ᠡᠭᠡ ᠣᠷᠣᠨ ᠮᠢᠨᠢ᠂ ᠲᠣᠩᠭᠠᠯᠠᠭ ᠣᠷᠣᠰᠭᠠᠯᠳᠦ ᠪᠣᠯᠠᠭ᠎ᠤᠨ ᠴᠢᠨᠢ ᠣᠰᠣᠨ᠎ᠠᠴᠠ ᠠᠳᠢᠰ ᠬᠦᠷᠳᠡᠨ ᠬᠦᠪᠦᠷᠡᠵᠦ᠍᠂ ᠦᠷ᠎ᠡ ᠴᠢᠨᠢ ᠪᠢ ᠡᠯᠢᠭᠡᠨ᠎ᠳᠤ ᠴᠢᠨᠢ ᠣᠨᠠᠭ᠍ᠰᠠᠨ᠃ ᠣᠬᠢᠯᠠᠬᠤ᠎ᠪᠠᠷ ᠮᠢᠨᠢ ᠪᠦᠯᠢᠶᠡᠨ ᠱᠢᠷᠦᠢ᠎ᠪᠠᠷ᠎ᠢᠶᠠᠨ ᠦᠯᠦᠭᠡᠢᠳᠡᠵᠦ᠍᠂ ᠪᠦᠳᠦᠨ ᠲᠣᠯᠠᠭᠠᠨ ᠬᠠᠢᠷ᠎ᠠ᠎ᠪᠠᠨ ᠬᠠᠷᠠᠮ ᠦᠭᠡᠢ ᠶᠡᠭᠦᠯᠡᠭ᠌ᠰᠡᠨ᠃ ᠠᠯᠳᠠᠨ ᠱᠢᠷᠭᠠᠯ ᠨᠠᠷᠠ ᠨᠢ ᠡᠶᠡᠪᠡᠷᠬᠦᠦ ᠰᠠᠴᠣᠷᠠᠭ᠎ᠢᠶᠠᠷ᠎ᠢᠶᠠᠨ ᠲᠠᠭᠠᠯᠠᠨ ᠢᠯᠪᠢᠵᠦ᠍᠂ ᠡᠳᠦᠷ᠎ᠠᠴᠠ ᠡᠳᠦᠷ ᠡᠰᠡᠨ ᠮᠡᠨᠳᠦ ᠲᠣᠷᠨᠢᠭᠤᠯᠣᠭ᠍ᠰᠠᠨ᠃ ᠮᠠᠨᠴᠣᠢ᠎ᠳᠠᠭᠠᠨ ᠡᠰᠡ ᠪᠠᠭ᠍ᠳᠠᠨ᠂ ᠮᠠᠭᠠᠳ ᠦᠭᠡᠢ ᠪᠣᠰᠴᠦ᠍ ᠵᠣᠭ᠍ᠰᠣᠭ᠍ᠰᠠᠨ ᠲᠡᠷᠡ ᠡᠳᠦᠷ᠎ᠠᠴᠠ ᠬᠦᠮᠦᠨ ᠪᠣᠯᠬᠤ᠎ᠶ᠋ᠢᠨ ᠵᠠᠮ᠎ᠢᠶᠠᠷ ᠬᠦᠳᠦᠯᠦᠭ᠌ᠰᠡᠨ᠃ ᠬᠦᠯ ᠲᠡᠭᠡᠷ᠎ᠡ᠎ᠪᠠᠨ ᠪᠠᠳᠦ ᠲᠣᠭ᠍ᠳᠠᠨ᠂ ᠬᠤᠷᠸ᠎ᠠ᠎ᠶ᠋ᠢᠨ ᠦᠩᠭᠡ᠎ᠶ᠋ᠢ ᠰᠣᠨᠢᠭᠤᠴᠢᠯᠠᠨ ᠱᠢᠷᠳᠡᠬᠦ᠌᠎ᠳᠤ᠂ ᠡᠷᠪᠡᠬᠡᠢ ᠴᠠᠷᠴᠠᠬᠠᠢ ᠬᠤᠶᠠᠷ᠎ᠢᠶᠠᠷ᠎ᠢᠶᠠᠨ ᠠᠷᠭᠠᠳᠠᠨ᠂ ᠠᠢᠳᠠᠰ ᠬᠦᠨᠳᠡᠬᠦᠷ ᠦᠷᠭᠦᠭᠡᠨ ᠲᠠᠢᠵᠢᠭᠤᠯᠵᠦ᠍ ᠬᠠᠮᠠᠭᠠᠯᠠᠭ᠍ᠰᠠᠨ᠃

ᠡᠭᠡ ᠣᠷᠣᠨ ᠮᠢᠨᠢ᠂ ᠡᠵᠢ᠎ᠶ᠋ᠢᠨ ᠲᠡᠢᠳᠡᠢ ᠠᠴᠢᠳᠦ ᠡᠭᠡ ᠣᠷᠣᠨ ᠮᠢᠨᠢ！ ᠢᠮᠠᠬᠤ ᠢᠮᠠᠬᠤ᠎ᠪᠠᠷ ᠦᠰᠴᠦ᠍᠂ ᠭᠭᠢᠷ ᠦᠭᠡᠢ ᠨᠢᠯᠬ᠎ᠠ ᠣᠶᠣᠨ᠎ᠢᠶᠠᠨ ᠡᠷᠳᠡᠮ᠎ᠤᠨ ᠱᠢᠮ᠎ᠡ᠎ᠪᠠᠷ ᠲᠡᠯᠡᠬᠦ᠌ ᠬᠡᠵᠦ᠍ ᠲᠣᠭᠤᠯ᠎ᠤᠨ ᠪᠡᠯᠴᠢᠭᠡᠷ᠎ᠠᠴᠠ ᠬᠢᠴᠢᠶᠡᠯ᠎ᠤᠨ ᠲᠠᠩᠬᠢᠮ ᠣᠷᠣᠭᠤ ᠬᠦᠶᠦᠯᠳᠦᠭ᠌ᠰᠡᠨ ᠦᠶ᠎ᠡ᠎ᠶ᠋ᠢᠨ ᠨᠦᠬᠦᠳ᠎ᠤᠨ᠎ᠢᠶᠠᠨ ᠣᠯᠠ ᠮᠦᠷ᠎ᠠᠴᠠ ᠴᠡᠴᠡᠭᠡᠰ ᠲᠡᠯᠭᠡᠷᠡᠬᠦ᠌᠎ᠶ᠋ᠢ ᠬᠠᠷᠠᠭᠠᠳ᠂ ᠦᠷ᠎ᠡ ᠴᠢᠨᠢ ᠪᠢ ᠬᠠᠴᠢᠨ ᠬᠦᠰᠡᠯ᠎ᠳᠤ ᠣᠷᠢᠶᠠᠭ᠍ᠳᠠᠭ᠍ᠰᠠᠨ᠃ ᠲᠡᠷᠡ ᠨᠢᠭᠡᠨ ᠮᠦᠴᠡ᠎ᠠᠴᠠ ᠪᠢ ᠡᠬᠢ ᠵᠠᠬ᠎ᠠ᠎ᠨᠢ ᠦᠯᠦ᠍ ᠣᠯᠳᠠᠬᠤ ᠰᠣᠨᠢᠬᠠᠨ ᠮᠡᠳᠡᠷᠡᠮᠵᠢ᠎ᠳᠤ ᠵᠢᠷᠦᠭᠡ᠎ᠪᠠᠨ ᠣᠯᠵᠠᠯᠠᠭᠤᠯᠣᠨ᠂ ᠬᠠᠳᠠᠨ᠎ᠤ ᠴᠢᠨᠢ ᠡᠩᠭᠡᠷ᠎ᠢᠶᠠᠷ ᠠᠯᠠᠭ ᠴᠢᠯᠠᠭᠤ ᠲᠡᠬᠦᠵᠦ᠍ ᠭᠠᠭ᠍ᠴᠠᠭᠠᠷ ᠲᠡᠨᠦᠬᠦ᠌ ᠪᠣᠯᠣᠭ᠍ᠰᠠᠨ᠃ ᠵᠢᠰᠦᠮ᠎ᠤᠨ ᠣᠯᠠᠨ ᠴᠢᠯᠠᠭᠤ ᠴᠢᠨᠢ ᠵᠦᠢᠯ᠎ᠤᠨ ᠬᠡ᠎ᠪᠠᠨ ᠨᠢᠳᠦᠨ᠎ᠡ ᠲᠣᠯᠢᠯᠠᠭᠤᠯᠬᠤ ᠭᠱᠠᠨ᠂ ᠪᠢᠯᠢᠭ ᠴᠣᠭᠤᠷᠠᠨ᠂ ᠠᠩᠬᠢᠷᠬᠠᠨ ᠬᠦᠰᠡᠯ᠎ᠤᠨ᠎ᠢᠶᠠᠨ ᠪᠣᠱᠤᠭ᠎ᠠ᠎ᠶ᠋ᠢ ᠠᠩᠬ᠎ᠠ ᠣᠳᠠᠭ᠎ᠠ ᠲᠠᠪᠠᠵᠦ᠍᠂ ᠰᠣᠨᠢᠬᠠᠨ ᠮᠡᠳᠡᠷᠡᠮᠵᠢ᠎ᠶ᠋ᠢᠨ᠎ᠢᠶᠠᠨ ᠴᠣᠩᠬᠤ᠎ᠪᠠᠷ ᠲᠣᠳᠣᠭ᠍ᠰᠢ ᠱᠠᠭᠠᠢᠭ᠍ᠰᠠᠨ᠃ ᠣᠣᠯ᠎ᠨᠢ ᠲᠠ᠂ ᠦᠷ᠎ᠡ ᠨᠠᠮ᠎ᠠ᠎ᠪᠠᠷ᠎ᠢᠶᠠᠨ ᠠᠭᠤᠯᠠᠰ᠎ᠤᠨ ᠦᠨᠳᠦᠷ᠂ ᠣᠰᠣᠨ᠎ᠤ ᠬᠦᠨ᠂ ᠲᠠᠯ᠎ᠠ᠎ᠶ᠋ᠢᠨ ᠠᠭᠤᠳᠠᠮ᠂ ᠡᠪᠡᠰᠣᠨ᠎ᠤ ᠰᠣᠷᠭᠤᠭ᠂ ᠨᠠᠷᠠᠨ᠎ᠤ ᠡᠭᠡᠯᠢ᠂ ᠰᠠᠷᠠᠨ᠎ᠤ ᠡᠷᠬᠢᠮᠰᠦᠭ᠂ ᠣᠳᠣᠳ᠎ᠤᠨ ᠭᠡᠭᠡ ᠁ ᠶ᠋ᠢ ᠵᠢᠷᠣᠭᠤᠯᠬᠤ ᠬᠡᠵᠦ᠍ ᠲᠡᠩᠳᠡᠬᠦᠦ ᠡᠷᠭᠡ᠂ ᠲᠡᠩᠳᠡᠬᠦᠦ ᠡᠮᠵᠡᠭ᠌ᠭᠡᠨ ᠪᠣᠯᠭᠠᠭ᠍ᠰᠠᠨ ᠪᠠᠢᠵᠠᠢ᠃ ᠲᠡᠬᠡᠵᠦ᠍ ᠪᠢ ᠪᠢᠷ ᠬᠤᠷᠴᠠᠯᠠᠨ᠂ ᠰᠠᠢᠬᠠᠨ ᠪᠦᠬᠦᠨ᠎ᠢ ᠴᠢᠨᠢ ᠴᠠᠭᠠᠰᠣᠨ᠎ᠠ ᠵᠢᠷᠣᠭ᠍ᠯᠠᠬᠤ ᠬᠡᠵᠦ᠍ ᠴᠢᠷᠮᠠᠢᠬᠤ᠎ᠳᠤ᠂ ᠲᠣᠯᠣᠭᠠᠨ ᠦᠩᠭᠡᠳᠦ ᠰᠣᠯᠣᠩᠭ᠎ᠠ᠎ᠪᠠᠨ ᠲᠠ ᠨᠠᠳᠠ ᠬᠠᠢᠷᠠᠯᠠᠭ᠍ᠰᠠᠨ᠃ ᠢᠳᠡ ᠰᠠᠯᠬᠢᠨ᠎ᠢ ᠰᠦᠷᠴᠦ᠍ ᠲᠡᠯ ᠬᠡᠢᠰᠭᠡᠨ ᠲᠠᠪᠬᠢᠳᠠᠭ ᠣᠮᠣᠭ᠍ᠳᠣ ᠠᠳᠣᠭᠤᠳ᠂ ᠬᠦᠢᠳᠡᠨ᠎ᠤ ᠡᠷᠴᠢ᠎ᠶ᠋ᠢ ᠪᠠᠰᠣᠮᠵᠢᠯᠠᠨ ᠬᠠᠨᠠᠢᠳᠠᠭ ᠠᠮᠣᠭᠤᠯᠠᠩ ᠲᠡᠮᠡᠭᠡᠳ᠂ ᠡᠰᠡᠨᠢᠬᠦ᠌ ᠬᠠᠪᠣᠷ᠂ ᠲᠦᠯᠵᠢᠬᠦ᠌ ᠵᠣᠨ᠂ ᠵᠢᠮᠢᠰᠯᠡᠬᠦ᠌ ᠨᠠᠮᠣᠷ᠂ ᠢᠴᠡᠭᠡᠯᠡᠬᠦ᠌ ᠡᠪᠦᠯ ᠬᠡᠮᠡᠨ ᠲᠦᠷᠪᠡᠨ ᠣᠯᠠᠷᠢᠯ᠎ᠢᠶᠠᠨ᠎ᠲᠠᠭᠠᠨ ᠲᠡᠯᠭᠡᠷᠡᠵᠦ᠍ ᠵᠤᠯᠭᠠᠷᠠᠭᠰᠠᠨ ᠣᠷᠭᠤᠮᠠᠯ᠂ ᠪᠣᠴᠠᠵᠦ᠍ ᠡᠷᠬᠢᠳᠡᠭ ᠱᠢᠪᠠᠭᠤᠳ᠎ᠢᠶᠠᠨ ᠲᠡᠭ᠌ᠷᠢ᠎ᠲᠠᠢ᠎ᠨᠢ ᠴᠤᠭ ᠨᠠᠳᠠ ᠪᠡᠯᠡᠭ᠌ᠯᠡᠭ᠌ᠰᠡᠨ᠃ ᠮᠦᠴᠢᠷ ᠰᠦᠯᠵᠢᠨ ᠲᠡᠬᠦᠯᠢᠳᠡᠭ ᠵᠢᠭᠠᠬᠠᠨ ᠬᠡᠷᠡᠮᠦ᠍᠎ᠠᠴᠠ ᠲᠦᠷᠦᠬᠦᠯᠡᠨ ᠬᠠᠳᠠ ᠲᠠᠮᠵᠢᠨ ᠬᠠᠷᠠᠢᠳᠠᠭ ᠶᠠᠩᠬᠢᠷ ᠬᠡᠮᠡᠨ ᠲᠠᠨᠢᠬᠤ᠂ ᠲᠠᠨᠢᠬᠤ ᠦᠭᠡᠢ ᠣᠯᠠᠨ ᠣᠯᠠᠨ ᠠᠷᠢᠶᠠᠳᠠᠨ ᠬᠦᠷᠦᠭᠡᠰᠦ᠎ᠪᠠᠨ ᠦᠵᠦᠭ᠎ᠤᠨ ᠮᠢᠨᠢ ᠦᠵᠦᠬᠦᠷ ᠬᠦᠷᠭᠡᠭ᠌ᠰᠡᠨ᠃ ᠶᠠᠭᠤᠮ᠎ᠠ ᠶᠠᠭᠤᠮᠠᠨ᠎ᠤ ᠭᠠᠳᠠᠷ ᠲᠦᠷᠰᠦ᠎ᠶ᠋ᠢ ᠵᠢᠷᠣᠭᠠᠰᠣᠯᠠᠨ᠂ ᠦᠩᠭᠡᠳᠦ ᠰᠣᠯᠣᠩᠭ᠎ᠠ᠎ᠪᠠᠷ ᠴᠢᠨᠢ ᠪᠣᠳᠤᠭ ᠨᠠᠢᠷᠠᠨ᠂ ᠣᠰᠣᠨ ᠮᠠᠨᠠᠨ ᠬᠦᠯᠯᠡᠭ᠌ᠰᠡᠨ ᠣᠢ᠎ᠶ᠋ᠢᠨ ᠵᠢᠮ᠎ᠢᠶᠠᠷ ᠲᠣᠳᠣᠭ᠍ᠰᠢᠯᠠᠬᠤ ᠲᠣᠰᠣᠮ᠎ᠢᠶᠠᠨ ᠪᠠᠢᠭᠠᠯᠢ᠎ᠶ᠋ᠢᠨ ᠭᠤᠶᠣᠮᠰᠤᠭ᠎ᠲᠤ ᠨᠢᠳᠦ ᠠᠯᠳᠠᠨ᠂ ᠣᠷᠴᠢᠯᠠᠩ᠎ᠤᠨ ᠨᠢᠭᠤᠴᠠᠭᠠᠢ᠎ᠳᠤ ᠨᠡᠪᠳᠡᠷᠡᠨ ᠬᠠᠷᠠᠭ᠎ᠠ ᠦᠷᠭᠡᠵᠢᠬᠦ᠌᠎ᠶ᠋ᠢᠨ ᠣᠯᠠᠮ᠎ᠳᠤ᠂ ᠰᠣᠣ ᠪᠢᠯᠢᠭ᠎ᠤᠨ ᠴᠠᠭᠠᠨ᠎ᠠ᠎ᠠᠴᠠ᠎ᠪᠠᠨ ᠮᠠᠭ᠍ᠮᠠ ᠮᠡᠳᠦ ᠲᠦᠷᠡᠯᠵᠡᠭ᠌ᠰᠡᠨ᠃

ᠡᠭᠡ ᠣᠷᠣᠨ ᠮᠢᠨᠢ！ ᠲᠠ ᠪᠤᠯ ᠬᠦᠷᠴᠦ᠍ ᠬᠦᠨᠳᠡᠵᠦ᠍ ᠪᠣᠯᠣᠰᠢ ᠦᠭᠡᠢ ᠣᠮᠣᠭ᠍ᠯᠠᠩ ᠰᠦᠷᠯᠢᠬᠦᠨ᠂ ᠰᠣᠳᠣᠨ ᠬᠡᠬᠡᠨᠴᠢᠷ ᠣᠷᠠᠯᠢᠭ᠃ ᠬᠡᠮᠵᠢᠶ᠎ᠡ᠎ᠲᠠᠢ ᠬᠡᠳᠦᠨ ᠨᠠᠰᠦ᠂ ᠬᠡᠪᠴᠢᠶ᠎ᠡ᠎ᠲᠠᠢ ᠵᠢᠭᠠᠬᠠᠨ ᠮᠡᠳᠡᠯᠭᠡ ᠮᠢᠨᠢ ᠲᠠᠨ᠎ᠤ᠎ᠪᠠᠨ ᠠᠭᠤᠣ ᠶᠡᠭᠡ᠂ ᠠᠳᠠᠪᠠᠰᠢ ᠦᠵᠡᠰᠭᠦᠯᠡᠩ᠎ᠢ ᠶᠠᠭᠠᠬᠢᠨ ᠪᠦᠷᠢᠨ ᠵᠢᠷᠣᠭ᠍ᠯᠠᠵᠦ᠍ ᠴᠢᠳᠠᠨᠠᠮ？ ᠭᠠᠭ᠍ᠴᠠᠬᠠᠨ ᠬᠦᠰᠡᠯ᠎ᠢᠶᠠᠨ ᠬᠦᠢᠴᠡᠭᠡᠬᠦ᠌ ᠬᠡᠵᠦ᠍ ᠬᠠᠭᠠᠰ ᠨᠠᠰᠦ᠎ᠪᠠᠷ᠎ᠢᠶᠠᠨ ᠵᠢᠳᠬᠦᠬᠦ᠌᠎ᠳᠤ᠂ ᠬᠦᠮᠦᠨ᠎ᠤ ᠣᠷᠮᠠᠨ᠎ᠳᠤ ᠨᠢᠭᠡᠭᠡᠨ ᠣᠳᠠᠭ᠎ᠠ ᠴᠦ᠍ ᠠᠯᠭᠤᠷᠯᠠᠳᠠᠭ ᠦᠭᠡᠢ ᠴᠠᠭ ᠬᠤᠭᠤᠴᠠᠭᠠᠨ᠎ᠳᠤ ᠭᠤᠮᠣᠳᠠᠯ ᠲᠦᠷᠦᠬᠦ᠌᠎ᠶ᠋ᠢ ᠪᠠᠰᠠ ᠶᠠᠭᠠᠬᠢᠨᠠᠮ？ ᠬᠦᠰᠡᠯ ᠬᠦᠰᠡᠯ ᠬᠡᠵᠦ᠍ ᠬᠦᠮᠦᠨ᠎ᠨᠢ ᠡᠷᠡᠬᠦᠯ᠂ ᠣᠬᠠᠭ᠎ᠠ᠎ᠨᠢ ᠰᠠᠷᠠᠭᠤᠯ ᠪᠠᠢᠬᠤ᠎ᠳᠠᠭᠠᠨ ᠰᠠᠶᠢ ᠦᠨᠳᠣᠰᠣᠯᠠᠨ ᠰᠣᠶᠣᠭᠠᠯᠳᠠᠭ ᠭᠡᠳᠡᠭ᠎ᠢ ᠪᠦᠳᠦᠷᠢᠵᠦ᠍ ᠣᠨᠠᠨ᠂ ᠪᠣᠰᠴᠦ᠍ ᠲᠡᠮᠡᠣᠯᠣᠨ᠂ ᠪᠠᠶᠠᠷ ᠭᠤᠨᠢᠭ ᠬᠤᠶᠠᠷ᠎ᠲᠠᠭᠠᠨ ᠲᠡᠢᠯᠳᠡᠨ᠂ ᠠᠷᠠᠴᠢᠭ᠎ᠠ ᠦᠭᠡᠢ ᠠᠯᠮᠠᠢᠷᠠᠵᠦ᠍ ᠲᠦᠭᠡᠷᠢᠨ ᠣᠷᠣᠭ᠍ᠰᠢᠯᠠᠬᠤ᠎ᠳᠤ ᠮᠢᠨᠢ᠂ ᠠᠷᠭ᠎ᠠ ᠦᠭᠡᠢ ᠡᠪᠡᠳᠦᠯᠳᠡ᠎ᠪᠠᠷ ᠠᠮᠢᠳᠣᠷᠠᠯ ᠣᠬᠠᠭᠠᠷᠠᠭᠤᠯᠵᠦ᠍ ᠭᠡᠭᠡᠷᠡᠬᠦᠯᠦᠭ᠌ᠰᠡᠨ᠃ ᠭᠡᠬᠦ᠌᠎ᠳᠤ᠂ ᠡᠭᠡ ᠣᠷᠣᠨ ᠮᠢᠨᠢ ᠲᠠ ᠣᠷᠤᠭ᠎ᠠ ᠪᠣᠰᠭᠠᠭ᠎ᠠ ᠠᠮᠢᠳᠣᠷᠠᠯ᠎ᠢ ᠬᠠᠢᠷ᠎ᠠ ᠲᠠᠯᠠᠷᠬᠠᠯ᠎ᠢᠶᠠᠷ ᠠᠬᠢᠨ ᠲᠡᠪᠡᠷᠢᠬᠦᠯᠦᠭ᠌ᠰᠡᠨ᠃ ᠴᠢᠮ᠎ᠠ᠎ᠲᠠᠢ᠎ᠪᠠᠨ ᠬᠠᠮᠳᠦ ᠪᠠᠢᠬᠤ᠎ᠳᠤ᠂ ᠲᠡᠯᠡᠭᠡᠢ ᠪᠠᠭᠠᠳᠠᠵᠦ᠍᠂ ᠣᠷᠴᠢᠯᠠᠩ ᠵᠢᠵᠢᠭ᠌ᠷᠡᠨ᠎ᠡ᠃

ᠡᠭᠡ ᠣᠷᠣᠨ ᠮᠢᠨᠢ！ ᠲᠠᠩᠰᠤᠭ ᠭᠤᠸ᠎ᠠ ᠦᠵᠡᠮᠵᠢ᠎ᠠᠴᠠ ᠴᠢᠨᠢ ᠴᠠᠬᠢᠯᠭᠠᠨ ᠬᠤᠷᠳᠦ᠍᠎ᠲᠠᠢ ᠬᠦᠭ᠌ᠵᠢᠯ ᠦᠷᠨᠢᠯ᠎ᠢ ᠴᠢᠨᠢ ᠬᠦᠷᠳᠡᠯ᠎ᠡ ᠪᠢ ᠵᠢᠷᠣᠭ᠍ᠯᠠᠭ᠍ᠰᠠᠨ᠃ ᠵᠢᠷᠣᠭ᠍ᠯᠠᠬᠤ᠎ᠶ᠋ᠢᠨ ᠲᠣᠭᠠᠯᠠᠩ᠎ᠢᠶᠠᠷ ᠲᠣᠳᠣᠭᠠᠳᠦ ᠶᠢᠷᠳᠢᠨᠴᠦ᠍ ᠣᠷᠣᠭᠤ᠎ᠪᠠᠨ ᠠᠯᠬᠤᠮ ᠠᠯᠬᠤᠮ᠎ᠢᠶᠠᠷ ᠨᠡᠪᠳᠡᠷᠡᠵᠦ᠍᠂ ᠠᠮᠢ ᠨᠠᠰᠣᠨ᠎ᠤ ᠨᠢᠭᠤᠴᠠ᠂ ᠬᠦᠮᠦᠨ ᠮᠦᠰᠦ᠎ᠶ᠋ᠢ ᠬᠦᠣᠷᠡᠵᠦ᠍᠂ ᠬᠤᠪᠠ ᠮᠡᠳᠦ ᠲᠣᠩᠭᠠᠯᠠᠭ᠎ᠤᠨ ᠴᠢᠨᠠᠷ᠎ᠲᠤ ᠠᠭᠠᠵᠢᠮ᠎ᠢᠶᠠᠷ ᠲᠠᠰᠣᠭ᠍ᠰᠠᠨ᠃ ᠠᠶᠣᠩᠭ᠎ᠠ᠎ᠶ᠋ᠢᠨ ᠲᠠᠭᠤ᠂ ᠴᠠᠬᠢᠯᠭᠠᠨ᠎ᠤ ᠨᠢᠷᠭᠡᠯᠳᠡ᠂ ᠵᠣᠳ ᠱᠢᠭᠤᠷᠭ᠎ᠠ᠂ ᠰᠠᠯᠬᠢ ᠮᠦᠨᠳᠦᠷ ᠬᠡᠷᠬᠢᠨ ᠲᠣᠭ᠍ᠰᠢᠷᠠᠭ᠍ᠰᠠᠨ ᠴᠦ᠍᠂ ᠲᠠᠢᠪᠣᠩ ᠪᠠᠢᠬᠤ᠎ᠶ᠋ᠢᠨ ᠲᠠᠰᠪᠣᠷᠢ᠎ᠶ᠋ᠢ ᠲᠦᠭ᠌ᠰᠢᠬᠦᠯᠦᠨ ᠪᠠᠢᠵᠦ᠍᠂ ᠲᠠ ᠨᠠᠳᠠ ᠣᠯᠭᠤᠭ᠍ᠰᠠᠨ᠃ ᠲᠠᠯᠠᠢ ᠶᠡᠭᠡ ᠬᠠᠢᠷ᠎ᠠ᠎ᠶ᠋ᠢ ᠴᠢᠨᠢ ᠲᠦᠱᠢᠵᠦ᠍᠂ ᠬᠡᠴᠢᠨᠡᠨ ᠰᠦᠨᠢ᠎ᠶ᠋ᠢᠨ ᠬᠠᠷᠠᠩᠭᠤᠢ᠎ᠳᠤ ᠣᠷᠢ ᠭᠠᠭ᠍ᠴᠠᠭᠠᠷ ᠲᠣᠷᠣᠢᠨ᠂ ᠵᠢᠷᠣᠭᠠᠰᠦ᠂ ᠴᠡᠭ᠂ ᠬᠠᠪᠳᠠᠭᠠᠢ᠎ᠪᠠᠷ ᠲᠠᠨ᠎ᠢᠶᠠᠨ ᠪᠦᠳᠦᠭᠡᠬᠦ᠌ ᠬᠡᠵᠦ᠍ ᠮᠡᠷᠡᠢᠭ᠌ᠰᠡᠨ ᠪᠢᠯᠡ？ ᠴᠡᠴᠡᠭᠡᠰ᠎ᠤᠨ ᠴᠢᠨᠢ ᠭᠡᠰᠡᠭ᠌ᠬᠡᠨ ᠬᠡᠯᠳᠡᠰ᠂ ᠨᠠᠭᠤᠷ᠎ᠤᠨ ᠴᠢᠨᠢ ᠵᠣᠷᠪᠣᠰᠭᠠᠨ ᠠᠷ᠂ ᠡᠪᠡᠰᠦᠨ᠎ᠤ ᠴᠢᠨᠢ ᠭᠠᠭ᠍ᠴᠠᠬᠠᠨ ᠱᠢᠷᠭᠡᠭ᠎ᠢ ᠪᠦᠳᠦᠭᠡᠬᠦ᠌ ᠬᠡᠵᠦ᠍ ᠪᠦᠬᠦ᠌ ᠠᠩᠬᠠᠷᠣᠯ᠎ᠢᠶᠠᠨ ᠲᠦᠪᠯᠡᠷᠡᠬᠦᠯᠦᠨ ᠮᠣᠩᠭᠠᠨᠢᠬᠤ᠎ᠳᠠᠭᠠᠨ ᠦᠪᠡᠷ᠎ᠢ᠎ᠪᠠᠨ ᠲᠠᠬᠢᠨ ᠪᠦᠳᠦᠭᠡᠵᠦ᠍ ᠪᠠᠢᠯ᠎ᠠ ᠬᠡᠳᠡᠭ᠎ᠢᠶᠠᠨ ᠬᠡᠵᠢᠶ᠎ᠡ ᠬᠤᠵᠢᠮ ᠰᠠᠶᠢ ᠰᠡᠷᠡᠭ᠌ᠰᠡᠨ᠃ ᠣᠶᠣᠨ ᠰᠠᠨᠠᠭᠠᠨ᠎ᠤ ᠮᠢᠨᠢ ᠶᠢᠷᠳᠢᠨᠴᠦ᠍ ᠰᠦᠢᠷᠡᠵᠦ᠍᠂ ᠠᠬᠢᠨ ᠴᠣᠭ᠍ᠴᠠᠯᠠᠭ᠍ᠳᠠᠬᠤ᠎ᠶ᠋ᠢᠨ ᠬᠢᠯᠠᠰᠭᠠᠨ ᠬᠤᠷᠣᠮ᠎ᠳᠤ᠂ ᠦᠪᠡᠷ᠎ᠢ ᠮᠢᠨᠢ ᠲᠠ ᠦᠭᠡᠷ᠎ᠡ᠎ᠪᠠᠷ ᠦᠨᠡᠯᠡᠬᠦ᠌ ᠪᠣᠯᠭᠠᠭ᠍ᠰᠠᠨ᠃ ᠬᠡᠳᠦ ᠬᠡᠢᠷᠭᠡᠯ᠎ᠢ ᠲᠡᠪᠴᠢᠵᠦ᠍᠂ ᠣᠷᠣᠱᠢᠬᠤᠢ᠎ᠶ᠋ᠢᠨ ᠦᠨ᠎ᠡ ᠦᠷᠳᠡᠭ᠎ᠢ ᠵᠦᠪ᠎ᠢᠶᠠᠷ ᠱᠢᠬᠦᠵᠦ᠍᠂ ᠵᠢᠷᠦᠭᠡᠨ᠎ᠤ ᠦᠨᠡᠨᠴᠢᠬᠡᠨ ᠦᠴᠢᠯ᠎ᠢᠶᠠᠨ ᠴᠢᠩᠨᠠᠵᠦ᠍᠂ ᠭᠠᠭ᠍ᠴᠠᠭᠠᠷᠳᠠᠯ᠎ᠳᠤ ᠱᠢᠨᠦᠨ᠂ ᠭᠠᠭ᠍ᠴᠠᠭᠠᠷᠳᠠᠯ᠎ᠠᠴᠠ ᠯᠢᠩᠬ᠍ᠸ᠎ᠠ ᠮᠡᠳᠦ ᠰᠣᠭᠤᠷᠠᠬᠤ᠎ᠳᠠᠭᠠᠨ᠂ ᠲᠠᠨ᠎ᠢᠶᠠᠨ ᠪᠢ ᠨᠡᠩᠳᠡ ᠲᠡᠭᠡᠳᠦᠯᠡᠬᠦ᠌ ᠪᠣᠯᠣᠭ᠍ᠰᠠᠨ᠃ ᠲᠠᠭᠤᠨ ᠦᠭᠡᠢ ᠬᠠᠢᠷ᠎ᠠ᠎ᠠᠴᠠ ᠠᠮᠢᠯᠠᠭ᠍ᠰᠠᠨ ᠪᠦᠬᠦᠨ᠂ ᠦᠷᠢᠰᠦᠯᠳᠦᠭᠡᠨ ᠲᠡᠮᠡᠴᠡᠭᠡᠨ᠎ᠤ ᠲᠣᠮᠳᠠ ᠲᠣᠨᠵᠦ᠍ ᠦᠯᠡᠳᠡᠳᠡᠭ ᠭᠡᠳᠡᠭ᠎ᠲᠤ ᠢᠳᠡᠭᠡᠭ᠌ᠰᠡᠨ᠃

ᠡᠭᠡ ᠣᠷᠣᠨ ᠮᠢᠨᠢ！ ᠪᠢ ᠲᠠᠨ᠎ᠢᠶᠠᠨ ᠣᠳᠣ ᠴᠦ᠍ ᠭᠡᠰᠡᠨ ᠵᠢᠷᠣᠭ᠍ᠯᠠᠭ᠍ᠰᠠᠭᠠᠷ᠃ ᠬᠡᠶ᠎ᠡ᠂ ᠦᠵᠦᠭ᠎ᠢᠶᠠᠷ ᠪᠢᠰᠢ᠂ ᠰᠦᠭ ᠰᠦᠨᠡᠰᠦ᠎ᠪᠠᠷ᠎ᠢᠶᠠᠨ ᠵᠢᠷᠣᠭ᠍ᠯᠠᠵᠦ᠍ ᠪᠣᠢ᠃ ᠰᠦᠭ ᠰᠦᠨᠡᠰᠦ᠎ᠪᠠᠷ᠎ᠢᠶᠠᠨ ᠵᠢᠷᠣᠭ᠍ᠯᠠᠬᠤ ᠲᠣᠰᠣᠮ ᠦᠭ᠌ᠭᠢᠶᠡᠮᠣᠷ ᠠᠭᠤᠳᠠᠮᠴᠢ ᠴᠢᠨᠢ ᠮᠡᠳᠡᠷᠡᠭ᠌ᠳᠡᠨ᠎ᠡ᠃ ᠡᠯᠢᠭᠡᠨ᠎ᠠᠴᠠ ᠴᠢᠨᠢ ᠴᠣᠢᠯᠠᠳᠠᠭ ᠠᠯᠳᠠᠷᠠᠢ ᠪᠦᠷᠬᠦᠳ᠎ᠤᠨ ᠦᠳᠦ᠍᠎ᠨᠢ ᠬᠦᠷᠳᠡᠯ᠎ᠡ ᠲᠡᠭ᠌ᠷᠢ᠎ᠪᠠᠨ ᠠᠴᠢᠨ ᠰᠡᠷᠪᠡᠯᠵᠡᠳᠡᠭ᠎ᠲᠤ ᠱᠢᠳᠦᠭ᠌ᠰᠡᠨ᠃ ᠠᠯᠠᠭᠠᠨ᠎ᠳᠤ ᠴᠢᠨᠢ ᠪᠦᠵᠢᠳᠡᠭ ᠬᠦᠭᠡᠷᠦᠬᠦᠨ ᠴᠣᠬᠤ᠎ᠶ᠋ᠢᠨ ᠪᠡᠶ᠎ᠡ᠎ᠪᠠᠨ ᠠᠰᠠᠭᠠᠨ ᠰᠦᠨᠢ᠎ᠶ᠋ᠢ ᠭᠡᠷᠡᠯᠳᠦᠬᠦᠯᠳᠡᠭ ᠠᠷᠣᠣᠬᠠᠨ ᠲᠡᠮᠡᠣᠯᠦᠯ᠎ᠳᠤ ᠪᠠᠭ᠍ᠠᠳᠣᠭ᠍ᠰᠠᠨ᠃ ᠡᠭᠡᠯᠭᠡᠨ᠎ᠳᠡᠭᠡᠨ ᠲᠡᠩᠳᠡᠬᠦᠦ ᠡᠭᠡᠯᠭᠡᠨ ᠪᠡᠷᠢ ᠴᠡᠴᠡᠭ᠎ᠤᠨ ᠨᠠᠮ ᠬᠦᠮ᠎ᠢ ᠨᠦᠮᠦᠷᠣᠨ᠂ ᠣᠷᠴᠢᠨ ᠠᠬᠤᠢ᠎ᠪᠠᠨ ᠴᠢᠮᠡᠬᠦ᠌ ᠬᠡᠵᠦ᠍ ᠴᠢᠮᠡᠭᠡ ᠦᠭᠡᠢᠬᠡᠨ ᠭᠠᠩᠬᠤᠳᠠᠭ᠎ᠲᠤ ᠪᠠᠭ᠍ᠠᠷᠬᠠᠭ᠍ᠰᠠᠨ ᠁ ᠲᠡᠢᠮᠦ᠍ ᠯᠡ ᠳ᠋ᠠ᠃ ᠴᠣᠣᠳᠦ ᠲᠡᠭ᠌ᠷᠢ ᠪᠣᠷᠣᠭᠠᠨ ᠦᠭᠡᠢ ᠭᠡᠳᠡᠭ ᠰᠠᠨ᠃ ᠨᠠᠮ ᠬᠦᠮ᠎ᠳᠤ ᠯᠡ ᠰᠠᠶᠢ ᠲᠠᠢᠯᠠᠬᠤ ᠬᠦᠴᠦᠨ ᠨᠢᠭᠤᠭ᠍ᠳᠠᠳᠠᠭ ᠭᠡᠳᠡᠭ᠎ᠢ ᠲᠠ ᠦᠷ᠎ᠡ ᠨᠠᠮ᠎ᠠ᠎ᠳᠠᠭᠠᠨ ᠲᠠᠭᠤᠨ ᠦᠭᠡᠢ ᠦᠬᠦᠯᠡᠭ᠌ᠰᠡᠨ᠃ ᠨᠢᠳᠦ᠍᠎ᠪᠠᠨ ᠠᠨᠢᠭᠠᠳ ᠨᠠᠮ ᠰᠠᠭᠤᠬᠤᠨ᠎ᠠ᠂ ᠡᠰ ᠪᠦᠬᠦᠨ᠎ᠳᠤ ᠮᠢᠨᠢ ᠡᠶᠡᠷᠬᠦ᠌ ᠡᠨᠧᠷᠬᠢ ᠴᠢᠨᠢ ᠱᠢᠩᠬᠡᠨ᠎ᠡ᠃ ᠲᠡᠷᠡ ᠡᠨᠧᠷᠬᠢ᠎ᠠᠴᠠ ᠡᠷᠴᠢ ᠰᠡᠯᠬᠦᠵᠦ᠍᠂ ᠣᠷᠮᠠᠰ ᠮᠢᠨᠢ ᠪᠠᠳᠠᠷᠠᠨ᠎ᠠ᠃ ᠵᠣᠯᠠᠢ ᠣᠷᠣᠭᠤ ᠣᠩᠭᠤᠳ ᠴᠠᠬᠢᠯᠬᠤ᠎ᠶ᠋ᠢᠨ ᠭᠱᠠᠨ᠎ᠳᠤ᠂ ᠪᠢ ᠲᠠᠨ᠎ᠢᠶᠠᠨ ᠰᠦᠭ ᠰᠦᠨᠡᠰᠦ᠎ᠪᠠᠷ᠎ᠢᠶᠠᠨ ᠨᠠᠢᠷᠠᠨ᠂ ᠰᠦᠭ ᠰᠦᠨᠡᠰᠦ᠎ᠲᠠᠢ ᠴᠢᠨᠢ ᠱᠣᠭᠤᠬᠤ ᠬᠡᠮᠡᠨ ᠲᠡᠩᠭᠡᠭᠡ ᠰᠣᠷᠢᠳᠠᠭ᠃ ᠵᠦᠪᠬᠡᠨ ᠡᠨᠡ ᠦᠶ᠎ᠡ᠎ᠳᠤ ᠯᠡ ᠪᠢ ᠬᠠᠢᠷ᠎ᠠ᠎ᠶ᠋ᠢ ᠬᠦᠢᠴᠡᠳ ᠮᠡᠳᠡᠷᠡᠵᠦ᠍᠂ ᠵᠣᠯᠠ᠎ᠶ᠋ᠢᠨ ᠭᠠᠯ ᠱᠢᠭ᠋ ᠪᠠᠳᠮᠠᠯᠠᠨ ᠭᠡᠷᠡᠯᠳᠦᠳᠡᠭ᠃ ᠵᠦᠪᠬᠡᠨ ᠡᠨᠡ ᠦᠶ᠎ᠡ᠎ᠳᠤ ᠯᠡ ᠪᠢ ᠬᠦᠮᠦᠨ᠎ᠤ ᠶᠢᠷᠳᠢᠨᠴᠦ᠍᠎ᠳᠤ ᠢᠷᠡᠭ᠌ᠰᠡᠨ ᠣᠳᠭ᠎ᠠ ᠠᠭᠤᠯᠭ᠎ᠠ᠂ ᠦᠨ᠎ᠡ ᠴᠡᠨ᠎ᠡ᠎ᠪᠠᠨ ᠦᠢᠯᠠᠭᠠᠵᠦ᠍᠂ ᠪᠠᠶᠠᠷ ᠵᠢᠷᠭᠠᠯ᠎ᠤᠨ ᠣᠷᠬᠢᠯ᠎ᠳᠤ ᠴᠡᠩᠭᠡᠷ ᠱᠠ ᠠᠯᠴᠢᠭᠤᠷ ᠨᠠᠮᠢᠷᠠᠭᠤᠯᠣᠨ᠂ ᠶᠡᠭᠡ ᠬᠠᠢᠷ᠎ᠠ᠎ᠶ᠋ᠢᠨ ᠪᠦᠷᠢᠯᠸ᠎ᠠ ᠡᠭᠡ ᠣᠷᠣᠨ ᠴᠢᠮ᠎ᠠ᠎ᠪᠠᠨ ᠨᠠᠮᠣᠭᠤᠬᠠᠨ ᠠᠶᠠᠯᠳᠠᠭ᠃

ᠡᠭᠡ ᠣᠷᠣᠨ ᠮᠢᠨᠢ！ ᠲᠤᠭ᠎ᠠ᠎ᠲᠠᠢ ᠨᠠᠰᠣᠨ᠎ᠳᠠᠭᠠᠨ ᠲᠠᠨ᠎ᠢᠶᠠᠨ ᠵᠢᠷᠣᠭ᠍ᠯᠠᠬᠤ ᠬᠦᠰᠡᠯ ᠲᠠᠩᠳᠠ᠎ᠪᠠᠨ ᠣᠷᠬᠢᠯᠣᠨ᠎ᠠ᠃

ᠠᠮᠵᠢᠬᠤ ᠦᠭᠡᠢ᠎ᠨᠢ ᠡ ᠬᠡᠵᠦ᠍ ᠨᠠᠰᠦ᠎ᠪᠠᠨ ᠴᠢᠮᠠᠯᠠᠨ᠂ ᠦᠷᠯᠦᠭᠡ ᠦᠳᠡᠰᠢ᠎ᠶ᠋ᠢ ᠲᠡᠮᠡᠴᠡᠬᠦ᠌᠎ᠳᠤ᠂ ᠪᠣᠳᠠᠩ ᠮᠠᠨᠠᠨ᠎ᠢᠶᠠᠨ ᠨᠦᠮᠦᠷᠭᠡᠨ᠂ ᠠᠵᠢᠯᠯᠠᠵᠦ᠍ ᠠᠮᠠᠷᠠᠬᠤ᠎ᠪᠠᠨ ᠵᠣᠬᠢᠰᠳᠠᠢ ᠪᠠᠢᠯᠭ᠎ᠠ ᠬᠡᠵᠦ᠍ ᠰᠠᠨᠠᠭᠤᠯᠳᠠᠭ ᠡᠭᠡ ᠣᠷᠣᠨ ᠮᠢᠨᠢ！

ᠦᠪᠡᠷ᠎ᠢ᠎ᠪᠠᠨ ᠲᠠᠪᠠᠵᠦ᠍ ᠴᠢᠳᠠᠬᠤ ᠦᠭᠡᠢ ᠪᠠᠴᠢᠮᠳᠠᠬᠤ᠎ᠳᠠᠭᠠᠨ ᠪᠣᠷᠤᠭ᠎ᠠ ᠪᠣᠯᠵᠦ᠍ ᠡᠪᠦᠷ ᠣᠷᠣᠭᠤ ᠴᠢᠨᠢ ᠵᠦᠰᠡᠷᠡᠬᠦ᠌᠎ᠳᠤ᠂ ᠦᠷᠦᠴᠡ᠎ᠪᠠᠨ ᠨᠡᠪᠳᠡ ᠱᠢᠪᠱᠢᠬᠦᠯᠵᠦ᠍ ᠲᠣᠰᠳᠠᠭ ᠡᠭᠡ ᠣᠷᠣᠨ ᠮᠢᠨᠢ！

ᠲᠣᠭ᠍ᠳᠣᠯᠣᠯ᠎ᠢᠶᠠᠨ ᠲᠠᠷᠣᠵᠦ᠍ ᠴᠢᠳᠠᠬᠤ ᠦᠭᠡᠢ ᠭᠠᠯ ᠱᠢᠭ᠋ ᠲᠦᠷᠡᠯᠵᠡᠬᠦ᠌᠎ᠳᠤ᠂ ᠴᠠᠰᠦᠨ᠎ᠤ ᠵᠡᠯᠡᠭᠡᠭᠡᠨ ᠱᠢᠷᠭᠡᠭ᠎ᠢᠶᠠᠷ᠎ᠢᠶᠠᠨ ᠢᠯᠪᠢᠨ ᠲᠣᠬᠤᠨᠢᠭᠤᠯᠣᠭ᠍ᠰᠠᠨ ᠡᠭᠡ ᠣᠷᠣᠨ ᠮᠢᠨᠢ！

ᠲᠠᠨ᠎ᠢᠶᠠᠨ ᠵᠢᠷᠣᠭ᠍ᠯᠠᠬᠤ᠎ᠨᠢ ᠮᠢᠨᠦ᠍ ᠲᠡᠬᠦᠯᠳᠡᠷ ᠡᠷᠭᠡ ᠴᠢᠯᠦᠭᠡ᠃ ᠡᠨᠡ ᠣᠷᠣᠨ ᠵᠠᠢ᠎ᠠᠴᠠ᠎ᠪᠠᠨ ᠪᠢ ᠲᠡᠬᠦᠰ ᠭᠤᠸ᠎ᠠ᠂ ᠦᠯᠡᠮᠵᠢ ᠦᠵᠡᠰᠭᠦᠯᠡᠩ᠎ᠢ ᠮᠡᠳᠡᠷᠡᠵᠦ᠍᠂ ᠢᠯᠠᠭᠤᠭ᠍ᠰᠠᠨ ᠪᠠᠭᠠᠳᠣᠷ ᠮᠡᠳᠦ ᠣᠮᠤᠭ ᠪᠠᠳᠠᠷᠠᠭᠤᠨ᠂ ᠴᠡᠬᠡᠵᠢ ᠲᠡᠨᠢᠬᠦᠨ ᠬᠠᠨᠠᠢᠳᠠᠭ᠃ ᠦᠷ᠎ᠤᠨ ᠱᠢᠷᠭᠠᠯ ᠭᠡᠭᠡ ᠴᠣᠩᠬᠤ ᠨᠡᠪᠳᠡᠯᠦᠨ ᠲᠣᠰᠭᠤ᠎ᠶᠢ ᠶᠠᠭᠠᠷᠠᠩᠬᠠᠨ ᠲᠡᠬᠦᠵᠦ᠍ ᠠᠪᠣᠭᠠᠳ᠂ ᠲᠠᠨ᠎ᠢᠶᠠᠨ ᠵᠢᠷᠣᠭ᠍ᠯᠠᠬᠤ ᠵᠢᠷᠣᠭᠠᠰᠦ ᠪᠣᠯᠭᠠᠳᠠᠭ᠃ ᠲᠣᠷᠣᠯᠵᠠᠭ᠍ᠰᠠᠨ ᠵᠡᠷᠭᠡᠯᠭᠡ ᠭᠠᠷ᠎ᠲᠤ ᠪᠠᠷᠢᠭ᠍ᠳᠠᠮᠠᠷ ᠣᠢᠷᠠᠬᠠᠨ ᠵᠢᠷᠢᠯᠵᠡᠬᠦ᠌᠎ᠳᠤ ᠠᠯᠠᠭ᠎ᠠ᠎ᠪᠠᠨ ᠲᠡᠯᠭᠡᠨ ᠲᠣᠰᠴᠦ᠍᠂ ᠲᠠᠨ᠎ᠢᠶᠠᠨ ᠵᠢᠷᠣᠭ᠍ᠯᠠᠬᠤ ᠰᠡᠳᠭᠢᠬᠦᠢ᠎ᠳᠡᠭᠡᠨ ᠠᠭᠤᠰᠭᠠᠳᠠᠭ᠃ ᠠᠭᠤᠯᠠᠰ᠎ᠤᠨ ᠴᠢᠨᠢ ᠪᠦᠯᠢᠶᠡᠨ ᠠᠮᠢᠰᠭᠤᠭ᠎ᠠ ᠰᠡᠮᠬᠡᠨ ᠠᠨᠢᠷᠳᠤᠬᠤ᠎ᠳᠤ ᠶᠠᠳᠠᠷᠠᠯ᠎ᠢᠶᠠᠨ ᠲᠠᠢᠯᠵᠦ᠍ ᠨᠠᠮ ᠲᠣᠭ᠍ᠵᠢᠷᠠᠳᠠᠭ᠃ ᠬᠠᠳᠠᠨ᠎ᠤ ᠴᠢᠨᠢ ᠢᠷᠠᠭᠤᠬᠠᠨ ᠴᠣᠣᠷᠢᠶ᠎ᠠ ᠰᠣᠨᠣᠷᠳᠠᠬᠤ᠎ᠳᠤ ᠦᠢᠳᠭᠠᠷ᠎ᠢ ᠮᠢᠨᠢ ᠱᠢᠩᠭᠡᠯᠡᠵᠦ᠍ ᠪᠣᠢ ᠬᠡᠮᠡᠨ ᠦᠷᠦᠴᠡ᠎ᠪᠠᠨ ᠲᠠᠷᠣᠵᠦ᠍ ᠣᠳᠠᠳᠠᠯ᠎ᠠ᠎ᠪᠠᠨ ᠴᠢᠩᠨᠠᠳᠠᠭ᠃ ᠵᠢᠩᠬᠢᠨᠢ ᠶᠠᠭᠤᠮ᠎ᠠ ᠪᠦᠳᠦᠭᠡᠳᠡᠭ ᠬᠦᠮᠦᠨ ᠦᠢᠳᠳᠠᠭ ᠦᠭᠡᠢ᠂ ᠬᠠᠷᠢᠨ ᠣᠶᠣᠨ ᠰᠠᠨᠠᠭ᠎ᠠ ᠮᠢᠨᠢ ᠦᠢᠳᠣᠭᠠᠳ ᠪᠠᠢᠳᠠᠭ ᠮᠢᠨᠢ ᠮᠦᠨ ᠲᠠᠨ᠎ᠠᠴᠠ᠎ᠪᠠᠨ ᠡᠰᠢ᠎ᠲᠠᠢ᠃ ᠣᠴᠢᠷ᠎ᠨᠢ ᠡᠭᠡ ᠣᠷᠣᠨ ᠮᠢᠨᠢ ᠲᠠ ᠦᠷ᠎ᠡ ᠨᠠᠮ᠎ᠠ᠎ᠳᠠᠭᠠᠨ ᠣᠷᠠᠯᠢᠭ᠎ᠤᠨ ᠠᠪᠢᠶᠠᠰ ᠬᠦᠷᠳᠡᠭᠡᠭ᠌ᠰᠡᠨ᠃ ᠦᠪᠡᠷ᠎ᠢ ᠴᠢᠨᠢ ᠵᠢᠷᠣᠵᠦ᠍ ᠱᠣᠭᠤᠬᠤ ᠢᠷᠠᠭᠤ ᠠᠯᠳᠠᠷ᠎ᠲᠠᠢ ᠡᠬᠦᠷᠭᠡ᠎ᠶ᠋ᠢ ᠠᠯᠳᠠ᠎ᠪᠠᠷ ᠠᠷᠠᠯᠵᠢᠬᠤ ᠦᠭᠡᠢ ᠨᠠᠰᠦ᠎ᠲᠠᠢ ᠮᠢᠨᠢ ᠴᠤᠭ ᠦᠭ᠌ᠭᠦᠭ᠌ᠰᠡᠨ᠃

ᠡᠭᠡ ᠣᠷᠣᠨ ᠮᠢᠨᠢ！ ᠲᠠᠨ᠎ᠳᠠᠭᠠᠨ ᠬᠠᠢᠷ᠎ᠠ᠎ᠲᠠᠢ ᠬᠡᠪᠡᠯ ᠲᠡᠩᠳᠡᠬᠦᠦ ᠡᠭᠡᠯᠬᠡᠨ᠃ ᠦᠢᠭ᠎ᠠ ᠦᠭᠡᠢ ᠴᠢᠷᠮᠠᠢᠯᠭ᠎ᠠ᠎ᠪᠠᠷ᠎ᠢᠶᠠᠨ ᠠᠴᠢ᠎ᠶ᠋ᠢ ᠴᠢᠨᠢ ᠬᠠᠷᠢᠭᠤᠯᠠᠨ᠎ᠠ ᠭᠡᠪᠡᠯ ᠲᠠᠩᠳᠡᠬᠦᠦ ᠠᠯᠪᠠᠷᠠᠬᠤ᠃ ᠦᠭᠡ᠎ᠶ᠋ᠢᠨ ᠰᠠᠢᠬᠠᠨ᠎ᠢ ᠲᠡᠪᠢᠰᠴᠦ᠍᠂ ᠦᠢᠯᠡ᠎ᠶ᠋ᠢᠨ ᠮᠠᠭᠤᠬᠠᠢ᠎ᠶ᠋ᠢ ᠦᠢᠯᠡᠳᠬᠦ᠌᠎ᠶ᠋ᠢ ᠲᠡᠪᠴᠢ ᠭᠡᠵᠦ ᠲᠠ ᠰᠣᠷᠭᠠᠭ᠍ᠰᠠᠨ᠃ ᠶᠡᠭᠡ᠎ᠶ᠋ᠢ ᠬᠦᠰᠡᠵᠦ᠍᠂ ᠪᠠᠭ᠎ᠠ᠎ᠪᠠᠨ ᠠᠯᠳᠠᠬᠤ᠎ᠶ᠋ᠢ ᠰᠡᠷᠡᠮᠵᠢᠯᠡ ᠬᠡᠵᠦ᠍ ᠲᠠ ᠪᠠᠰᠠ ᠨᠠᠳᠠ ᠶᠠᠷᠢᠭ᠍ᠰᠠᠨ᠃ ᠣᠷᠴᠢᠯᠠᠩ᠎ᠤᠨ ᠵᠠᠢ᠎ᠳᠤ ᠲᠡᠨᠦᠵᠦ᠍ ᠭᠠᠴᠢᠭ᠍ᠳᠠᠵᠦ᠍ ᠶᠠᠪᠣᠬᠤ᠎ᠳᠤ᠂ ᠡᠭᠡ ᠣᠷᠣᠨ ᠬᠡᠵᠦ᠍ ᠡᠬᠦᠷᠢᠳᠡ ᠦᠷ᠎ᠡ᠎ᠪᠠᠨ ᠭᠠᠳᠠᠭ᠍ᠰᠢ ᠲᠦᠯᠬᠢᠳᠡᠭ ᠦᠭᠡᠢ ᠡᠵᠢ᠎ᠶ᠋ᠢᠨ ᠲᠣᠯᠠᠭᠠᠬᠠᠨ ᠡᠪᠦᠷ ᠭᠡᠳᠡᠭ᠎ᠢ ᠮᠡᠳᠡᠬᠦᠯᠦᠭ᠌ᠰᠡᠨ᠃ ᠡᠬᠦᠷ᠎ᠢᠶᠠᠨ ᠣᠷᠬᠢᠭᠠᠳ ᠨᠢᠰᠦᠭ᠌ᠰᠡᠨ ᠱᠢᠪᠠᠭᠤ ᠡᠷᠬᠢᠭᠡᠳ ᠵᠠᠪᠠᠯ ᠪᠣᠴᠠᠳᠠᠭ ᠭᠡᠳᠡᠭ᠎ᠢ ᠶᠠᠪᠣᠵᠦ᠍ ᠲᠣᠭᠤᠯᠣᠭ᠍ᠰᠠᠨ ᠪᠦᠬᠦᠨ ᠮᠢᠨᠢ ᠭᠡᠷᠡᠴᠢᠯᠡᠭ᠌ᠰᠡᠨ᠃

ᠡᠭᠡ ᠣᠷᠣᠨ ᠮᠢᠨᠢ！ ᠲᠠᠨ᠎ᠤ ᠰᠣᠶᠣᠷᠬᠠᠭ᠍ᠰᠠᠨ ᠵᠢᠵᠢᠭ᠌ᠭᠡᠨ ᠣᠷᠣᠨ ᠵᠠᠢ ᠲᠠᠨᠢ ᠮᠢᠨᠦᠬᠢ ᠦᠬᠦᠳᠡᠯ᠎ᠡ ᠣᠷᠣᠱᠢᠬᠤ ᠠᠱᠢᠳᠠ᠎ᠶ᠋ᠢᠨ ᠵᠣᠯ ᠵᠢᠷᠭᠠᠯᠳᠦ ᠣᠷᠣᠨ᠃ ᠲᠠᠨ᠎ᠢᠶᠠᠨ ᠪᠢ ᠢᠷᠡᠭᠡᠳᠦᠢ᠎ᠳᠤ ᠮᠦᠨ ᠵᠢᠷᠣᠭ᠍ᠯᠠᠭ᠍ᠰᠠᠭᠠᠷ ᠪᠠᠢᠬᠤ᠎ᠨᠢ ᠮᠦᠩᠭᠡ᠎ᠶ᠋ᠢᠨ ᠬᠡᠬᠡᠨ ᠲᠡᠮᠡᠣᠯᠦᠯ᠃ ᠡᠨᠡᠬᠡᠨ ᠪᠡᠶ᠎ᠡ ᠮᠢᠨᠢ ᠰᠦᠬᠦᠮ ᠰᠦᠬᠦᠮ᠎ᠢᠶᠠᠷ ᠠᠪᠴᠢᠵᠦ᠍᠂ ᠦᠯᠦᠭᠡᠢᠳᠡᠵᠦ᠍ ᠪᠣᠢᠵᠢᠭᠤᠯᠣᠭ᠍ᠰᠠᠨ ᠣᠰᠣ ᠱᠢᠷᠦᠢ᠎ᠳᠤ ᠴᠢᠨᠢ ᠠᠭᠤᠰᠭᠤ᠎ᠶ᠋ᠢᠨ ᠴᠠᠭ᠂ ᠲᠠᠨ᠎ᠤ᠎ᠪᠠᠨ ᠬᠠᠯᠠᠭᠤᠨ ᠡᠯᠢᠭᠡᠨ᠎ᠳᠤ ᠡᠷᠬᠢᠭᠡᠳ ᠢᠷᠡᠬᠦ᠌᠎ᠶ᠋ᠢᠨ ᠲᠠᠪᠢᠯᠠᠩ᠎ᠢ᠂ ᠦᠯᠡᠮᠵᠢ ᠬᠠᠢᠷ᠎ᠠ᠎ᠶ᠋ᠢᠨ ᠴᠢᠨᠢ ᠢᠪᠡᠭᠡᠯ ᠰᠣᠶᠣᠷᠬᠠᠯ᠎ᠢᠶᠠᠷ ᠲᠣᠷᠨᠢᠨ᠂ ᠠᠬᠢᠭᠠᠳ ᠲᠠᠨ᠎ᠢᠶᠠᠨ ᠵᠢᠷᠣᠭ᠍ᠯᠠᠬᠤ᠎ᠶ᠋ᠢᠨ ᠣᠴᠠᠷᠠᠯ᠎ᠢ ᠵᠠᠯᠪᠠᠷᠢᠨ ᠵᠠᠯᠪᠠᠷᠢᠨ ᠲᠠᠭᠠᠳᠭᠠᠬᠤ ᠮᠠᠨᠢ ᠪᠦᠬᠦᠨ᠎ᠢ ᠴᠢᠳᠠᠭ᠍ᠴᠢ ᠬᠤᠷᠮᠣᠰᠳᠠ᠎ᠠᠴᠠ ᠭᠤᠶᠣᠬᠤ ᠴᠣᠷᠢ᠎ᠶᠢᠨ ᠭᠠᠭ᠍ᠴᠠ ᠬᠦᠰᠡᠯ ᠪᠣᠶᠦ᠍᠃