ᠦᠨᠲᠦᠰᠦᠨ ᠪᠠᠢᠲᠠᠯ —

ᠵᠤᠬᠢᠶᠠᠨ ᠪᠦᠲᠦᠭᠡᠭᠰᠡᠨ ᠴᠠᠭ᠄ 2005   ᠤᠨ

ᠦᠭᠡ᠄ ᠦ᠊·ᠨᠠᠴᠢᠨ

ᠠᠶ᠎ᠠ ᠄  ᠰᠡᠴᠡᠨᠴᠤᠭᠳᠦ

ᠵᠤᠬᠢᠶᠠᠨ ᠪᠦᠲᠦᠭᠡᠭᠰᠡᠨ ᠬᠡᠯᠪᠡᠷᠢ ᠄ ᠬᠤᠷᠴᠢᠨ ᠠᠷᠠᠳ᠎ᠤᠨ ᠲᠠᠭᠤᠤ ᠡᠴᠡ ᠡᠰᠢᠯᠡᠵᠦ ᠵᠤᠬᠢᠶᠠᠨ ᠪᠦᠲᠦᠭᠡᠵᠡᠢ

ᠠᠶ᠎ᠠ ᠎ᠶᠢᠨ ᠤᠨᠴᠠᠯᠢᠭ᠄ ᠬᠤᠷᠴᠢᠨ ᠴᠣᠭᠣᠷ᠎ᠤᠨ ᠪᠣᠢᠯᠠᠭ᠎ᠠ ᠳᠠᠷᠣᠯᠠᠭ᠎ᠠ ᠶ᠋ᠢ ᠬᠠᠪᠰᠤᠷᠭᠠᠭᠰᠠᠨ ᠠᠷᠠᠳ᠎ᠤᠨ ᠳᠠᠭᠤᠤ᠎ᠶᠢᠨ ᠬᠡᠪ ᠨᠠᠮᠪᠠ ᠲᠠᠢ

ᠳᠠᠭᠤᠤ᠎ᠶᠢᠨ ᠲᠦᠷᠦᠯ᠄ ᠵᠤᠬᠢᠶᠠᠯ᠎ᠤᠨ ᠲᠠᠭᠤᠤ

ᠦᠯᠢᠭᠡᠷ —

《ᠬᠠᠢᠷ᠎ᠠ ᠬᠠᠢᠷ᠎ᠠ᠎ᠶᠢᠨ ᠪᠠᠲᠤᠴᠠᠭᠠᠨ》 ᠭᠡᠬᠦ ᠳᠠᠭᠤᠤ ᠨᠠᠯᠠᠭᠠᠷᠬᠠᠨ ᠤᠯᠠᠢᠵᠤ ᠨᠠᠪᠴᠢᠰ ᠨᠢ ᠪᠥᠵᠢᠭᠰᠡᠨ ᠪᠠᠲᠤᠴᠠᠭᠠᠨ᠎ᠢ ᠤᠷᠠᠯᠢᠭ᠋ ᠰᠣᠶᠣᠯ᠎ᠤᠨ ᠬᠦᠷᠲᠡᠭᠡᠯ ᠪᠤᠯᠭᠠᠬ᠍ᠰᠡᠨ᠎ᠢᠶᠠᠷ ᠦᠯᠦ ᠪᠠᠷᠠᠮ᠂ ᠠᠮᠢ ᠠᠬᠤᠢ᠎ᠶᠢᠨ ᠰᠠᠢᠵᠢᠷᠠᠯᠲᠠ᠂ ᠣᠷᠴᠢᠨ ᠲᠣᠭᠣᠷᠢᠨ᠎ᠤ ᠭᠤᠶᠤᠵᠢᠯᠳᠠ ᠨᠢ ᠬᠥᠮᠥᠨ ᠠᠷᠠᠳ ᠲᠸ᠋ ᠭᠤᠸ᠎ᠠ ᠰᠠᠢᠬᠠᠨ᠎ᠤ ᠲᠠᠭᠠᠰᠢᠶᠡᠯᠳᠦ ᠲᠥᠷᠥᠭᠳᠡᠯ ᠣᠯᠭᠣᠵᠤ ᠴᠢᠳᠠᠨ᠎ᠠ ᠭᠡᠳᠡᠭ᠎ᠢ ᠨᠤᠲᠠᠲᠠᠢ ᠬᠡᠷᠡᠴᠢᠯᠠᠵᠠᠢ᠃ ᠢᠯᠠᠩᠭᠤᠶ᠎ᠠ᠂  ᠲᠤᠰ ᠳᠠᠭᠤᠤ᠎ᠶᠢ ᠵᠣᠬᠢᠶᠠᠨ ᠪᠦᠲᠦᠭᠡᠬᠦ᠎ᠳᠦ ᠤᠷᠠᠨ ᠪᠦᠲᠦᠭᠡᠯᠴᠢᠳ ᠲᠸ᠋ ᠤᠢ ᠪᠢᠯᠢᠭ᠂ ᠰᠡᠷᠡᠯ ᠮᠡᠳᠡᠷᠡᠮᠵᠢ ᠰᠣᠶᠣᠷᠬᠠᠭᠰᠠᠨ ᠳᠠᠢᠴᠢᠨᠲᠠᠯ᠎ᠠ᠎ᠶᠢᠨ ᠪᠠᠲᠤᠴᠠᠭᠠᠨ᠎ᠤ ᠤᠢ ᠮᠠᠨᠢ ᠬᠢᠩᠭᠠᠨ ᠠᠢᠮᠠᠭ᠎ᠤᠨ ᠬᠣᠷᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠣᠰᠢᠭᠤᠨ᠎ᠤ ᠰᠣᠶᠣᠯ ᠵᠢᠭᠤᠯᠴᠢᠯᠠᠯ ᠎ᠤᠨ ᠱᠤᠰᠢᠭ᠎ᠠ ᠲᠡᠮᠳᠡᠭ᠂ ᠨᠡᠷ᠎ᠡ᠎ᠶᠢᠨ ᠬᠠᠭᠤᠳᠠᠰᠤ ᠪᠣᠯᠵᠤ᠂ 《ᠡᠵᠡᠨ᠎ᠡ᠎ᠶᠢᠨ ᠲᠣᠣᠷᠠᠢ᠂ ᠲᠦᠰᠢᠶᠡᠲᠦ᠎ᠶᠢᠨ ᠪᠠᠲᠤᠴᠠᠭᠠᠨ》 ᠬᠡᠮᠡᠨ ᠬᠤᠯᠡ ᠣᠢᠷ᠎ᠠ᠎ᠳᠠᠭᠠᠨ ᠠᠯᠳᠠᠷᠰᠢᠨ᠂ ᠠᠢᠯᠴᠢᠨ ᠭᠡᠢᠴᠢᠳ᠎ᠤᠨ ᠵᠤᠭᠠᠯᠠᠬᠤ ᠣᠷᠣᠨ ᠪᠤᠯᠵᠦ ᠤᠶᠠᠩᠭᠠᠲᠤ ᠳᠠᠭᠤᠤ ᠪᠡᠷ᠎ᠢᠶᠠᠨ ᠤᠯᠤᠰ ᠲᠦᠮᠡᠨ᠎ᠳᠡᠭᠡᠨ ᠲᠠᠨᠢᠭ᠍ᠳᠠᠭᠰᠠᠨ ᠨᠡᠢᠲᠡᠯᠢᠭ ᠵᠢᠱ᠌ᠢᠶ᠎ᠡ᠂ ᠰᠣᠩᠭᠣᠳᠠᠭ ᠵᠠᠭᠪᠤᠷ ᠪᠣᠯᠤᠭᠰᠠᠨ ᠪᠠᠢᠯ᠎ᠠ᠃ 2005 ᠣᠨ᠎ᠳᠤ ᠬᠣᠷᠴᠢᠨ ᠪᠠᠷᠠᠭᠤᠨ ᠭᠠᠷᠤᠨ ᠳᠤᠮᠳᠠᠳᠤ ᠬᠣᠰᠢᠭᠤᠨ᠎ᠤ ᠭᠢᠨ ᠲᠠᠡᠭ᠌ᠰᠤᠭ ᠪᠠᠢᠭᠠᠯᠢ᠎ᠶᠢᠨ ᠭᠠᠢᠬᠠᠮᠰᠢᠭ᠋᠂ ᠨᠤᠲᠤᠭ ᠤᠰᠤᠨ᠎ᠤ ᠪᠠᠨ ᠠᠮᠢ ᠠᠬᠤᠢ ᠬᠢᠭᠡᠳ ᠰᠣᠶᠣᠯ ᠵᠢᠭᠤᠯᠴᠢᠯᠠᠯ᠎ᠢ ᠰᠤᠷᠲᠠᠯᠴᠢᠯᠠᠨ ᠤᠬᠠᠭᠤᠯᠬᠤ ᠪᠡᠷ ᠢᠷᠠᠭᠤ ᠨᠠᠢᠷᠠᠭ᠍ᠴᠢ ᠦ᠊·ᠨᠠᠴᠢᠨ ᠬᠢᠭᠡᠳ ᠬᠥᠭᠵᠢᠮ᠎ᠤᠨ ᠵᠣᠬᠢᠶᠠᠭ᠍ᠴᠢ ᠰᠡᠴᠡᠨᠴᠣᠭᠲᠤ ᠬᠣᠶᠠᠷ ᠪᠠᠭ᠍ᠰᠢ᠎ᠶᠢ ᠤᠷᠢᠵᠤ᠂ ᠬᠡᠭᠡᠷ᠎ᠡ᠎ᠶᠢᠨ ᠰᠢᠨᠵᠢᠯᠡᠭᠡ ᠭᠢᠯᠭᠡᠵᠦ᠂ ᠤᠷᠠᠨ ᠪᠦᠲᠦᠭᠡᠯ ᠲᠤᠭᠤᠷᠪᠢᠵᠤ ᠥᠭᠬᠦ᠎ᠶᠢ ᠨᠠᠢᠳᠠᠵᠠᠢ᠃

— ᠪᠢᠳᠠ ᠲᠠᠷᠠ ᠵᠢᠯ᠎ᠤᠨ 8 ᠰᠠᠷ᠎ᠠ᠎ᠶᠢᠨ ᠨᠢᠭᠡᠨ ᠡᠳᠦᠷ᠂ ᠪᠦᠷᠦᠢ ᠡᠴᠠ ᠠᠮᠵᠢᠵᠤ ᠳᠠᠢᠴᠢᠨᠲᠠᠯ᠎ᠠ᠎ᠶᠢᠨ ᠪᠠᠲᠤᠴᠠᠭᠠᠨ᠎ᠤ ᠤᠢ᠎ᠳᠦ ᠬᠦᠷᠴᠦ ᠪᠢᠯᠡ ᠃ ᠵᠠᠮ᠎ᠳᠠᠭᠠᠨ ᠳᠠᠢᠴᠢᠨᠲᠠᠯ᠎ᠠ᠎ᠶᠢᠨ ᠪᠠᠲᠤᠴᠠᠭᠠᠨ᠎ᠢ ᠪᠡᠭᠡᠵᠢᠩ᠎ᠤᠨ ᠰᠢᠶᠠᠡᠭ᠌ᠱᠠᠨ ᠠᠭᠤᠯᠠᠨ᠎ᠤ ᠪᠠᠲᠤᠴᠠᠭᠠᠨ ᠲᠠᠢ ᠤᠳᠤᠮ ᠨᠢᠭᠡᠲᠡᠢ ᠬᠡᠵᠤ ᠦᠵᠡᠵᠡᠭᠡᠪᠡ᠃ ᠡᠷᠲᠡ ᠦᠶ᠎ᠡ᠎ᠳᠦ ᠨᠢᠭᠡ ᠭᠦᠩᠵᠦ ᠪᠡᠭᠡᠵᠢᠩ ᠡᠴᠠ ᠡᠨᠳᠠ ᠮᠣᠷᠳᠠᠵᠤ ᠢᠷᠡᠬᠦ᠎ᠳᠡᠭᠡᠨ ᠪᠠᠲᠤᠴᠠᠭᠠᠨ᠎ᠤ ᠦᠷ᠎ᠡ᠎ᠶᠢ ᠠᠪᠴᠢᠷᠠᠨ ᠨᠢᠭᠡ ᠰᠠᠭᠤᠷᠢ ᠳᠠᠷᠢᠭ᠍ᠰᠠᠨ ᠡᠴᠠ ᠤᠳᠦ ᠪᠤᠯᠬᠤ᠎ᠳᠦ ᠲᠠᠯ᠎ᠠ ᠵᠤ᠎ᠶᠢ ᠪᠦᠷᠬᠦᠭᠰᠡᠨ ᠰᠢᠭᠤᠢ ᠪᠣᠯᠤᠭᠰᠠᠨ ᠭᠡᠨ᠎ᠡ ᠭᠡᠰᠡᠨ ᠦᠯᠢᠭᠡᠷ᠎ᠢ ᠠᠮᠲᠠᠷᠬᠠᠨ ᠰᠤᠨᠤᠰᠬᠤ᠎ᠳᠦ ᠰᠡᠳᠬᠢᠯ ᠤ᠋ᠨ ᠭᠦᠨ᠎ᠳᠦ ᠤᠯᠠᠮ ᠭᠠᠢᠬᠠᠨ ᠰᠣᠨᠢᠷᠬᠠᠬᠤ ᠰᠡᠳᠬᠢᠯᠭᠡ ᠲᠥᠷᠥᠭᠳᠡᠭᠰᠡᠨ ᠪᠠᠢᠯ᠎ᠠ᠃ ᠪᠢᠳᠠ ᠪᠠᠲᠤᠴᠠᠭᠠᠨ ᠤ᠋ ᠰᠢᠭᠤᠢ ᠳᠤᠮᠳᠠᠭᠤᠷ ᠠᠯᠬᠤᠯᠠᠬᠤ᠎ᠳᠦ ᠲᠡᠷᠲᠡᠭᠡᠬᠢ ᠲᠠᠷᠠ ᠪᠠᠲᠤᠴᠠᠭᠠᠨ᠎ᠤ ᠨᠠᠪᠴᠢᠰ ᠡᠯᠭᠦᠭᠡᠰᠦᠲᠡᠢ ᠳ᠋ᠧᠩᠯᠦ ᠰᠢᠭ ᠬᠠᠷᠠᠭᠳᠠᠭᠰᠠᠨ ᠪᠥᠭᠡᠳ ᠤᠨᠠᠬᠤ ᠨᠠᠷᠡᠨ᠎ᠤ ᠤᠯᠠᠪᠢᠷ ᠲᠤᠶᠠᠭᠠᠨ᠎ᠳᠦ ᠲᠠᠪᠤᠨ ᠬᠣᠰᠢᠭᠤ ᠡᠴᠠ ᠨᠢ ᠭᠡᠷᠡᠯ ᠰᠠᠴᠤᠷᠠᠵᠤ ᠪᠠᠢᠭ᠎ᠠ ᠶᠤᠮ ᠰᠢᠭ᠋ ᠰᠠᠨᠠᠭᠳᠠᠯ᠎ᠠ᠃ ᠲᠡᠭᠦᠨ᠎ᠤ ᠳᠡᠭᠡᠭᠦᠷ ᠨᠢ ᠬᠥᠬᠡ ᠠᠯᠠᠭ ᠴᠡᠭᠴᠡᠦᠬᠡᠢ ᠬᠣᠣᠰ ᠬᠣᠣᠰ᠎ᠢᠶᠠᠷ ᠵᠢᠷᠭᠢᠯᠳᠦᠨ ᠨᠢᠰᠴᠦ ᠪᠠᠢᠬᠤ᠎ᠳᠦ ᠂ ᠠᠮᠠᠷᠠᠭ ᠬᠣᠣᠰ᠎ᠤᠳ ᠭᠠᠷ ᠬᠣᠯᠪᠣᠯᠴᠠᠨ ᠵᠤᠭᠠᠯᠠᠵᠤ ᠪᠠᠢᠭ᠎ᠠ ᠲᠠᠢ ᠲᠠᠭᠠᠷᠠᠯᠳᠤᠯ᠎ᠠ᠃ ᠡᠨᠡ ᠬᠦ᠌ ᠦᠵᠡᠮᠵᠢ ᠵᠢᠷᠤᠭᠯᠠᠯ ᠨᠠᠳᠠ᠎ᠳᠦ ᠤᠷᠠᠨ ᠪᠦᠲᠦᠭᠡᠯ᠎ᠤᠨ ᠬᠣᠯᠪᠣᠨ ᠪᠤᠳᠤᠬᠤ ᠣᠷᠣᠨ ᠵᠠᠢ ᠬᠢᠭᠡᠳ ᠪᠢᠯᠢᠭ ᠰᠡᠷᠡᠯ ᠣᠯᠭᠣᠨ ᠲᠤᠰ ᠳᠠᠭᠤᠤ᠎ᠶᠢ ᠪᠢᠴᠢᠭᠰᠡᠨ ᠶᠤᠮ ᠭᠡᠵᠦ ᠦ᠊·ᠨᠠᠴᠢᠨ ᠤᠴᠢᠷᠯᠠᠨ ᠶᠠᠷᠢᠯ᠎ᠠ᠃

ᠦ᠊· ᠨᠠᠴᠢᠨ ᠪᠦᠷᠦᠢ᠎ᠶᠢᠨ ᠦᠶ᠎ᠡ ᠪᠡᠷ ᠪᠠᠲᠤᠴᠠᠭᠠᠨ᠎ᠤ ᠤᠢ᠎ᠳᠦ ᠬᠡᠭᠡᠷ᠎ᠡ᠎ᠶᠢᠨ ᠰᠢᠪᠠᠭᠤᠳ ᠬᠣᠣᠰᠯᠠᠨ ᠨᠢᠰᠬᠦ᠎ᠶᠢ ᠬᠠᠷᠠᠭᠠᠳ 《 ᠡᠭᠦᠷ ᠡᠭᠦᠷ᠎ᠢᠶᠠᠨ ᠡᠷᠢᠭᠰᠡᠨ ᠪᠦᠷᠦᠢ᠎ᠶᠢᠨ ᠰᠢᠪᠠᠭᠤᠳ᠂  ᠵᠢᠭᠦᠷ ᠵᠢᠭᠦᠷ᠎ᠢᠶᠠᠨ ᠬᠣᠯᠪᠣᠭᠠᠳ ᠳᠡᠪᠳᠡᠷᠢᠨ ᠡᠷᠭᠢᠨ᠎ᠡ ᠭᠦ 》 ᠭᠡᠰᠡᠨ ᠮᠥᠷ ᠱᠠᠳ ᠲᠡᠭᠦᠨ᠎ᠤ ᠲᠠᠷᠢᠬᠢᠨ᠎ᠳᠦ ᠣᠷᠣᠭᠰᠠᠨ ᠪᠠᠢᠵᠠᠢ ᠃ ᠠᠮᠠᠷᠠᠭ ᠬᠣᠣᠰ᠎ᠤᠳ ᠭᠠᠷ ᠬᠣᠯᠪᠣᠨ ᠭᠦᠶᠦᠵᠦ ᠪᠤᠯᠬᠤ᠎ᠳᠦ ᠠᠭᠤᠯᠠᠨ᠎ᠤ ᠰᠢᠪᠠᠭᠤᠳ ᠵᠢᠭᠦᠷ᠎ᠢᠶᠠᠨ ᠬᠣᠯᠪᠣᠨ ᠡᠭᠦᠷ᠎ᠢᠶᠠᠨ ᠡᠷᠢᠬᠦ ᠨᠢ ᠵᠦᠢᠲᠡᠢ᠃ ᠡᠳᠠ ᠶᠠᠭᠤᠨ  ᠤ᠋ ᠲᠥᠯᠥᠭᠡ ᠪᠤᠢ ？ ᠡᠨᠡ ᠪᠦᠭᠦᠨ ᠪᠦᠷ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠠᠮᠢᠳᠤᠷᠠᠯ᠎ᠤᠨ ᠲᠥᠯᠥᠭᠡ ᠂ ᠦᠷ᠎ᠡ ᠥᠨᠳᠡᠭᠡ ᠂ ᠠᠩᠭᠠᠬᠠᠢ ᠳᠡᠭᠳᠡᠭᠡᠬᠡᠢ᠎ᠶᠢᠨ᠎ᠢᠶᠠᠨ ᠲᠥᠯᠥᠭᠡ ᠶᠤᠮᠰᠠᠨ᠃ ᠨᠢᠭᠡᠯᠬᠡᠨ ᠦᠭᠡ ᠪᠡᠷ ᠬᠡᠯᠡᠪᠡᠯ ᠰᠠᠢᠨ ᠰᠠᠢᠬᠠᠨ ᠬᠦᠰᠡᠯ ᠪᠢᠯᠬᠠᠭᠰᠠᠨ ᠣᠷᠭᠢᠯᠤᠮ᠎ᠠ ᠬᠠᠯᠠᠭᠤᠨ ᠰᠡᠳᠬᠢᠯ᠎ᠤᠨ ᠬᠥᠳᠡᠯᠭᠡᠭᠡᠨ ᠪᠤᠶᠤ ᠰᠡᠳᠬᠢᠴᠡ᠎ᠶᠢᠨ ᠪᠠᠢᠳᠠᠯ᠎ᠢ ᠢᠯᠡᠷᠡᠭᠦᠯᠦᠭᠰᠡᠨ 《ᠬᠠᠢᠷ᠎ᠠ 》 ᠵᠢᠨ ᠲᠦᠯᠦᠭᠡ ᠪᠤᠯᠬᠤ ᠶᠤᠮ ᠃ ᠬᠠᠢᠷ᠎ᠠ᠎ᠳᠦ ᠤᠯᠤᠰ ᠦᠨᠳᠦᠰᠦᠲᠡᠨ᠂ ᠠᠮᠢᠳᠡᠨ ᠭᠣᠣᠯᠲᠠᠨ᠎ᠤ ᠬᠠᠷᠢᠶ᠎ᠠ ᠦᠭᠡᠢ ᠲᠤᠯᠠ ᠢᠷᠠᠭᠤ ᠨᠠᠢᠷᠠᠭ᠍ᠴᠢ᠎ᠶᠢᠨ ᠤᠶᠤᠨ ᠮᠡᠳᠡᠷᠡᠮᠵᠢ᠎ᠳᠦ ᠬᠠᠢᠷ᠎ᠠ᠎ᠶᠢᠨ ᠴᠤᠪᠤᠭ᠎ᠠ ᠴᠥᠷᠬᠡᠯᠡᠭᠰᠡᠨ ᠶᠤᠮᠰᠢᠭ᠋ ᠬᠣᠯᠪᠣᠨ ᠪᠣᠳᠣᠯᠲᠠ ᠡᠭᠦᠰᠦᠭᠰᠡᠨ ᠡᠴᠠ《ᠬᠠᠢᠷ᠎ᠠ ᠬᠠᠢᠷ᠎ᠠ᠎ᠶᠢᠨ ᠪᠠᠲᠤᠴᠠᠭᠠᠨ 》 ᠭᠡᠬᠦ ᠰᠢᠯᠦᠭ᠎ᠤᠨ ᠭᠠᠷᠴᠠᠭ ᠲᠥᠷᠥᠭᠳᠡᠭᠰᠡᠨ ᠶᠤᠮ ᠃

ᠲᠤᠰ ᠳᠠᠭᠤᠤ᠎ᠶᠢᠨ ᠦᠭᠡᠨ᠎ᠳᠦ 《 ᠡᠭᠦᠷ ᠡᠭᠦᠷ ᠂ ᠵᠢᠭᠦᠷ ᠵᠢᠭᠦᠷ /  ᠵᠤᠯᠠᠢ ᠵᠤᠯᠠᠢ᠂ ᠵᠠᠭᠤᠨ ᠵᠠᠭᠤᠨ / ᠬᠠᠵᠠᠭᠤ ᠬᠠᠵᠠᠭᠤ ᠂ ᠬᠠᠷᠤᠢ ᠪᠦᠷᠦᠢ 》 ᠭᠡᠰᠡᠨ ᠲᠡᠭᠰᠢ ᠭᠡᠮᠨᠠᠯ᠂ ᠡᠩ ᠵᠡᠷᠭᠡᠴᠡᠭᠦᠯᠦᠯ᠎ᠤᠨ ᠤᠭ ᠰᠠᠨᠠᠭ᠎ᠠ ᠨᠢ 《ᠬᠠᠨᠢ》 ᠬᠢᠭᠡᠳ 《ᠬᠠᠢᠷ᠎ᠠ》 ᠎ᠶ᠋ᠢᠨ ᠭᠣᠣᠯ ᠰᠠᠨᠠᠭ᠎ᠠ ᠪᠠᠨ ᠢᠯᠡᠳᠬᠡᠬᠦ ᠭᠡᠰᠡᠨ ᠪᠠᠢᠵᠠᠢ᠃ ᠢᠷᠠᠭᠤ ᠨᠠᠢᠷᠠᠭ᠍ᠴᠢ ᠦ᠊·ᠨᠠᠴᠢᠨ᠎ᠤ ᠦᠭᠡ ᠪᠡᠷ ᠬᠡᠯᠡᠪᠡᠯ᠂ ᠤᠷᠠᠨ ᠪᠦᠲᠦᠭᠡᠯᠴᠢ ᠬᠥᠮᠥᠨ ᠪᠠᠢᠭᠠᠯᠢ᠎ᠶᠢᠨ ᠲᠤᠬᠠᠢ ᠪᠢᠴᠢᠬᠦ᠎ᠳᠦ ᠬᠥᠬᠡ ᠲᠡᠭᠷᠢ᠂ ᠬᠥᠪᠥᠩ ᠡᠭᠦᠯᠡᠰ᠎ᠢ ᠯᠡ ᠪᠤᠳᠤᠬᠤ ᠪᠢᠰᠢ ᠬᠠᠷᠢᠨ ᠲᠡᠭᠦᠨ᠎ᠤ ᠴᠠᠭᠠᠲᠤᠬᠢ ᠬᠥᠮᠥᠨ ᠠᠷᠠᠳ᠎ᠤᠨ ᠰᠡᠳᠬᠢᠯ ᠭᠡᠬᠦ ᠬᠣᠶᠠᠳᠠᠭᠢ ᠪᠠᠢᠭᠠᠯᠢ᠎ᠶᠢ ᠪᠢᠴᠢᠳᠡᠭ ᠤᠴᠢᠷᠲᠠᠢ᠃ ᠲᠡᠭᠦᠨ ᠡᠴᠠ ᠬᠥᠮᠥᠨ᠎ᠤ ᠪᠤᠳᠤᠯ ᠰᠡᠳᠬᠢᠯ ᠲᠠᠢ ᠤᠶᠠᠰᠤᠨ ᠨᠡᠢᠯᠡᠭᠰᠡᠨ ᠰᠠᠨᠠᠭ᠎ᠠ ᠠᠬᠤᠢ ᠤᠷᠭᠤᠳᠠᠭ ᠲᠤᠯᠠ《ᠬᠠᠢᠷ᠎ᠠ ᠬᠠᠢᠷ᠎ᠠ᠎ᠶᠢᠨ ᠪᠠᠲᠤᠴᠠᠭᠠᠨ》 ᠎ᠤ᠋ ᠰᠠᠨᠠᠭ᠎ᠠ ᠠᠬᠤᠢ ᠳ᠋ᠡᠬᠢ ᠰᠦᠭ ᠰᠦᠨᠡᠰᠦ ᠪᠣᠯ《ᠬᠠᠢᠷ᠎ᠠ》 ᠪᠠᠢᠭᠰᠠᠨ ᠪᠥᠭᠡᠳ ᠵᠣᠬᠢᠶᠠᠨ ᠪᠦᠲᠦᠭᠡᠯᠲᠡ᠎ᠶᠢᠨ ᠠᠷᠤ ᠳ᠋ᠡᠬᠢ ᠯᠣᠭᠢᠭ᠋ ᠲᠤᠩᠭᠠᠯᠲᠠ ᠨᠢ ᠡᠨᠡ ᠪᠣᠯᠣᠨ᠎ᠠ ᠃

ᠬᠥᠭᠵᠢᠮ᠎ᠤᠨ ᠵᠣᠬᠢᠶᠠᠭ᠍ᠴᠢ ᠰᠡᠴᠡᠨᠴᠣᠭᠲᠤ 《 ᠬᠠᠢᠷ᠎ᠠ ᠬᠠᠢᠷ᠎ᠠ᠎ᠶᠢᠨ ᠪᠠᠲᠤᠴᠠᠭᠠᠨ》 ᠭᠡᠬᠦ ᠰᠢᠯᠦᠭ᠎ᠤᠨ ᠠᠢᠵᠠᠮ᠎ᠳᠦ ᠤᠯᠠᠮᠵᠢᠯᠠᠯ ᠰᠢᠨᠡᠴᠢᠯᠡᠯ᠎ᠢ ᠤᠶᠠᠯᠳᠤᠭᠤᠯᠵᠤ ᠂ ᠬᠠᠢᠷ᠎ᠠ ᠰᠡᠳᠬᠢᠯᠭᠡ ᠪᠠᠨ ᠠᠭᠤᠰᠬᠠᠭᠰᠠᠨ  ᠠᠶ᠎ᠠ ᠵᠣᠬᠢᠶᠠᠭᠰᠠᠨ ᠡᠴᠠ ᠲᠤᠰ ᠳᠠᠭᠤᠤ᠎ᠳᠦ ᠠᠮᠢᠵᠢᠷᠠᠯ᠎ᠤᠨ ᠬᠦᠴᠦᠨ ᠪᠢᠯᠬᠠᠭᠤᠯᠵᠤ ᠪᠢᠯᠡ᠃

— ᠨᠤᠲᠤᠭ ᠤᠰᠤ ᠪᠠᠨ ᠳᠠᠭᠤᠯᠠᠬᠤ᠎ᠳᠦ ᠡᠰ ᠪᠦᠭᠦᠨ ᠮᠢᠨᠢ ᠢᠨᠢᠶᠡᠵᠦ ᠪᠠᠢᠬᠤ ᠶᠤᠮᠰᠢᠭ᠋᠃ ᠪᠢ ᠨᠠᠷᠡᠳᠦ ᠪᠠᠭᠰᠢᠨᠠᠷ᠎ᠤᠨ ᠵᠣᠬᠢᠶᠠᠨ ᠪᠦᠲᠦᠭᠡᠭᠰᠡᠨ ᠤᠷᠠᠨ ᠪᠦᠲᠦᠭᠡᠯ᠎ᠤᠨ ᠠᠴᠢ ᠪᠡᠷ《 ᠬᠠᠢᠷ᠎ᠠ ᠬᠠᠢᠷ᠎ᠠ᠎ᠶᠢᠨ ᠪᠠᠲᠤᠴᠠᠭᠠᠨ》 ᠲᠠᠢ ᠪᠠᠨ ᠬᠠᠮᠲᠤ ᠠᠷᠠᠳ ᠤᠯᠠᠨ᠎ᠳᠠᠭᠠᠨ ᠲᠠᠨᠢᠭ᠍ᠳᠠᠭᠰᠠᠨ᠎ᠳᠠᠭᠠᠨ ᠡᠷᠬᠡ ᠦᠭᠡᠢ ᠣᠮᠣᠭᠰᠢᠵᠤ ᠶᠠᠪᠤᠳᠠᠭ ᠭᠡᠵᠦ ᠲᠤᠰ ᠳᠠᠭᠤᠤ᠎ᠶᠢ ᠠᠩᠬ᠎ᠠ ᠲᠠᠭᠤᠯᠠᠬ᠍ᠰᠡᠨ ᠳᠠᠭᠤᠴᠢᠨ ᠪᠠᠢ ᠬᠤᠡᠭ ᠮᠸᠢ ᠲᠤᠬ᠍ᠳᠤᠯᠦᠡᠭ᠌ᠬᠠᠨ ᠶᠠᠷᠢᠯ᠎ᠠ ᠃

ᠡᠭᠦᠷ ᠡᠭᠦᠷ᠎ᠢᠶᠠᠨ ᠡᠷᠢᠭᠰᠡᠨ ᠪᠦᠷᠦᠢ᠎ᠶᠢᠨ ᠰᠢᠪᠠᠭᠤᠳ

ᠵᠢᠭᠦᠷ ᠵᠢᠭᠦᠷ᠎ᠢᠶᠠᠨ ᠬᠣᠯᠪᠣᠭᠠᠳ ᠳᠡᠪᠳᠡᠷᠢᠨ ᠡᠷᠭᠢᠨ᠎ᠡ ᠭᠦ

ᠨᠠᠮᠠᠭ᠎ᠠ ᠨᠠᠮᠠᠭ᠎ᠠ  ᠪᠠᠨ ᠳᠡᠷᠡᠯᠡᠭᠰᠡᠨ ᠪᠠᠲᠤᠴᠠᠭᠠᠨ᠎ᠤ ᠨᠠᠪᠴᠢᠰ

ᠨᠠᠮᠤᠷ ᠨᠠᠮᠤᠷ᠎ᠤᠨ ᠥᠩᠭᠡ ᠪᠡᠷ᠎ᠢᠶᠠᠨ ᠨᠠᠯᠠᠭᠠᠷᠬᠠᠨ ᠤᠯᠠᠢᠨ᠎ᠠ

            ᠠᠢ ᠭᠦᠢ ᠵᠧ ᠭᠦᠢ ᠬᠠᠢᠷ᠎ᠠ ᠬᠠᠢᠷ᠎ᠠ᠎ᠶᠢᠨ ᠪᠠᠲᠤᠴᠠᠭᠠᠨ

            ᠨᠠᠮᠤᠷ ᠨᠠᠮᠤᠷ᠎ᠤᠨ ᠥᠩᠭᠡ ᠪᠡᠷ᠎ᠢᠶᠠᠨ ᠨᠠᠯᠠᠭᠠᠷᠬᠠᠨ ᠤᠯᠠᠢᠨ᠎ᠠ

ᠵᠤᠯᠠᠢ ᠵᠤᠯᠠᠢ ᠪᠠᠨ ᠦᠨᠦᠰᠦᠭᠰᠡᠨ ᠪᠠᠲᠤᠴᠠᠭᠠᠨ᠎ᠤ ᠨᠠᠪᠴᠢᠰ

ᠵᠠᠭᠤᠨ ᠵᠠᠭᠤᠨ᠎ᠤ ᠪᠦᠷᠦᠢ ᠪᠡᠷ ᠪᠥᠬᠥᠬᠦ ᠦᠭᠡᠢ ᠤᠯᠠᠢᠨ᠎ᠠ

ᠵᠤᠯᠠ ᠳ᠋ᠧᠩᠯᠦ᠎ᠶᠢᠨ ᠭᠡᠷᠡᠯ ᠰᠢᠭ ᠨᠠᠪᠴᠢᠰ᠎ᠤᠨ᠎ᠢᠶᠠᠨ ᠲᠤᠶᠠᠭᠠᠨ᠎ᠳᠦ

ᠵᠢᠷᠤᠭ ᠰᠢᠯᠦᠭ᠎ᠤᠨ ᠠᠩᠭᠢᠷ ᠪᠣᠯᠵᠤ ᠬᠣᠶᠠᠭᠤᠯᠠ ᠪᠠᠨ ᠵᠢᠷᠭᠠᠨ᠎ᠠ ᠭᠦ

            ᠠᠢ ᠭᠦᠢ ᠵᠧ ᠭᠦᠢ ᠬᠠᠢᠷ᠎ᠠ ᠬᠠᠢᠷ᠎ᠠ᠎ᠶᠢᠨ ᠪᠠᠲᠤᠴᠠᠭᠠᠨ

            ᠵᠢᠷᠤᠭ ᠰᠢᠯᠦᠭ᠎ᠤᠨ ᠠᠩᠭᠢᠷ ᠪᠣᠯᠵᠤ ᠬᠣᠶᠠᠭᠤᠯᠠ ᠪᠠᠨ ᠵᠢᠷᠭᠠᠨ᠎ᠠ ᠭᠦ

ᠬᠠᠵᠠᠭᠤ ᠬᠠᠵᠠᠭᠤ ᠪᠡᠷ ᠶᠤᠪᠤᠷᠠᠬ᠍ᠰᠠᠨ ᠪᠠᠲᠤᠴᠠᠭᠠᠨ᠎ᠤ ᠮᠥᠴᠢᠷ

ᠬᠠᠷᠤᠢ ᠪᠦᠷᠦᠢ᠎ᠶᠢᠨ ᠴᠠᠭ᠎ᠢᠶᠠᠷ ᠴᠦ᠍ ᠪᠠᠶᠠᠷ ᠲᠠᠢ ᠱᠤᠤᠭᠢᠨ᠎ᠠ

ᠬᠠᠨᠢ ᠬᠠᠨᠢ ᠪᠠᠨ ᠳᠤᠯᠠᠭᠠᠯᠠᠭᠰᠠᠨ ᠬᠣᠷᠸ᠎ᠠ᠎ᠶᠢᠨ ᠠᠮᠠᠷᠠᠭ᠎ᠤᠳ

ᠬᠠᠢᠷ᠎ᠠ ᠬᠠᠢᠷ᠎ᠠ᠎ᠶᠢᠨ᠎ᠢᠶᠠᠨ ᠵᠡᠭᠦᠳᠦᠨ᠎ᠳᠦ ᠪᠡᠶᠡᠰ᠎ᠢᠶᠠᠨ ᠰᠣᠭᠲᠣᠭᠠᠨ᠎ᠠ

            ᠠᠢ ᠭᠦᠢ ᠵᠧ ᠭᠦᠢ ᠬᠠᠢᠷ᠎ᠠ ᠬᠠᠢᠷ᠎ᠠ᠎ᠶᠢᠨ ᠪᠠᠲᠤᠴᠠᠭᠠᠨ

            ᠬᠠᠢᠷ᠎ᠠ ᠬᠠᠢᠷ᠎ᠠ᠎ᠶᠢᠨ᠎ᠢᠶᠠᠨ ᠵᠡᠭᠦᠳᠦᠨ᠎ᠳᠦ ᠪᠡᠶᠡᠰ᠎ᠢᠶᠠᠨ ᠰᠣᠭᠲᠣᠭᠠᠨ᠎ᠠ

ᠦᠨᠡᠯᠡᠯᠳᠡ—

ᠢᠯᠠᠯᠲᠠ （ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠤᠷᠠᠯᠢᠭ᠋᠎ᠤᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠶ᠋ᠢᠨ ᠪᠠᠭ᠍ᠰᠢ ᠂ ᠠᠶ᠎ᠠ ᠵᠤᠬᠢᠶᠠᠭ᠍ᠴᠢ ）

ᠲᠤᠰ ᠳᠠᠭᠤᠤ ᠶ᠋ᠢᠨ ᠬᠥᠭᠵᠢᠮ ᠤ᠋ᠨ ᠲᠠᠯ᠎ᠠ ᠡᠴᠠ ᠰᠢᠨᠵᠢᠯᠡᠪᠡᠯ᠂ ᠬᠣᠶᠠᠷ ᠱᠠᠳ ᠪᠣᠯᠭᠠᠨ ᠨᠢᠭᠡ ᠥᠭᠦᠯᠡᠪᠦᠷᠢ ᠠᠶ᠎ᠠ ᠪᠡᠷ ᠪᠦᠲᠦᠵᠦ᠂ ᠬᠣᠶᠠᠷ ᠥᠭᠦᠯᠡᠪᠦᠷᠢ ᠠᠶ᠎ᠠ ᠨᠢ ᠨᠢᠭᠡ ᠪᠦᠷᠢᠨ ᠪᠦᠲᠦᠨ ᠰᠠᠨᠠᠭ᠎ᠠ ᠠᠬᠤᠢ ᠶ᠋ᠢ ᠢᠯᠡᠳᠬᠡᠵᠡᠢ᠃ ᠬᠦᠭᠵᠢᠮ᠎ᠦᠨ ᠠᠶᠠᠯᠭᠤ ᠳ᠋ᠠᠭᠠᠨ ᠬᠤᠷᠴᠢᠨ ᠴᠣᠭᠣᠷ᠎ᠤᠨ ᠪᠣᠢᠯᠠᠭ᠎ᠠ ᠳᠠᠷᠣᠯᠠᠭ᠎ᠠ ᠶ᠋ᠢ ᠬᠠᠪᠰᠤᠷᠭᠠᠭᠰᠠᠨ᠎ᠠᠴᠠ ᠠᠷᠠᠳ᠎ᠤᠨ ᠳᠠᠭᠤᠤ᠎ᠶᠢᠨ ᠦᠨᠦᠷ ᠠᠮᠲᠠ ᠨᠡᠩ ᠦᠳᠭᠡᠷᠡᠵᠡᠢ ᠃ ᠡᠭᠦᠪᠡᠷ ᠦᠯᠦ ᠪᠠᠷᠠᠮ ᠳᠠᠬᠢᠯᠲᠠ᠎ᠶᠢᠨ ᠬᠡᠰᠡᠭ ᠳᠡᠭᠡᠨ ᠡᠮᠦᠨᠡᠬᠢ ᠠᠶ᠎ᠠ᠎ᠪᠠᠨ ᠬᠦᠭᠵᠢᠭᠦᠯᠦᠭᠰᠡᠨ᠎ᠡᠴᠡ ᠨᠡᠩ ᠶᠡᠬᠡ ᠲᠠᠲᠠᠬᠤ ᠬᠦᠴᠦᠨ ᠲᠠᠢ ᠃

ᠠᠯᠲᠠᠷ —

ᠦᠪᠦᠷ ᠮᠤᠩᠭᠤᠯ᠎ᠤᠨ ᠤᠷᠤᠨ ᠨᠤᠲᠤᠭ᠎ᠤᠨ ᠰᠤᠩᠭᠤᠳᠠᠭ ᠳᠠᠭᠤᠤ᠎ᠶᠢᠨ ᠨᠢᠭᠡ᠃