ᠣᠲᠣ ᠪᠣᠯᠲᠠᠯᠠ ᠨᠠᠢ᠍ᠮᠠᠲᠡᠬᠢ ᠣᠲᠠᠭᠠ ᠪᠠᠨ ᠶᠠᠪᠣᠬᠲᠠᠵᠦ ᠪᠠᠢᠭᠠ 《ᠴᠣᠯᠮᠣᠨ》 ᠨᠡᠷᠡᠮᠵᠢᠲᠦ ᠡᠬᠡ ᠪᠢᠴᠢᠭ ᠡᠯᠰᠡᠬᠦ ᠱᠠᠩᠨᠠᠯᠲᠣ ᠠᠵᠢᠯᠯᠠᠭᠠ ᠪᠣᠯ ᠲᠠᠷᠣᠢ ᠡᠨᠡ ᠪᠦᠬᠦᠨᠤ ᠨᠢᠭᠡ ᠵᠢᠱᠶ᠋ᠶᠡ ᠪᠣᠯᠣᠨᠠ᠃ 2023 — 2024 ᠤᠨᠤ 《 ᠴᠣᠯᠮᠣᠨ》 ᠨᠡᠷᠡᠮᠵᠢᠲᠦ ᠷᠣᠮᠠᠨ ᠲᠣᠭᠣᠵᠢ ᠦᠬᠦᠯᠡᠯᠭᠡᠶᠢᠨ ᠡᠬᠡ ᠪᠢᠴᠢᠭ ᠡᠯᠰᠡᠬᠦ ᠱᠠᠩᠨᠠᠯᠲᠣ ᠠᠵᠢᠯᠯᠠᠭᠠ ᠳ᠋ᠦ 28 ᠷᠣᠮᠠᠨ᠂ 47 ᠲᠣᠭᠣᠵᠢ᠂ 57 ᠦᠬᠦᠯᠡᠯᠭᠡᠶᠢ ᠪᠠᠬᠲᠠᠭᠠᠬᠰᠠᠨ ᠨᠡᠢᠲᠡ 132 ᠪᠦᠲᠦᠭᠡᠯᠢ ᠡᠯᠰᠡᠨ ᠰᠢᠯᠭᠠᠷᠠᠭᠣᠯᠵᠦ᠂ ᠱᠠᠩᠨᠠᠯ ᠬᠦᠷᠲᠡᠭᠰᠡᠨ ᠵᠣᠬᠢᠶᠠᠯᠴᠢᠳ ᠲᠦ᠍ ᠰᠠᠩᠲᠦᠢ᠍ᠬᠦᠷᠡᠩ᠂ ᠣᠮᠨᠠᠷᠣᠨ· ᠴᠣᠯᠮᠣᠨ ᠵᠡᠷᠭᠡ ᠵᠠᠯᠠᠭᠣ ᠵᠣᠬᠢᠶᠠᠯᠴᠢᠳ ᠴᠣᠯᠭᠣᠷᠠᠵᠦ᠂ ᠣᠷᠠᠨ ᠵᠣᠬᠢᠶᠠᠯᠤᠨ ᠠᠶᠠᠨᠤ ᠦᠰᠦᠭᠡᠢ ᠵᠠᠯᠭᠠᠨ ᠣᠷᠣᠬᠰᠢᠯᠠᠬᠣ ᠵᠢᠮᠠ ᠶᠣᠰᠣᠶᠢ ᠬᠠᠷᠠᠭᠣᠯᠣᠬᠰᠠᠨ ᠪᠠᠢᠨᠠ᠃ ᠲᠡᠷᠡᠴᠢᠯᠡᠨ ᠲᠠᠪᠣᠨ ᠵᠢᠯ ᠪᠣᠯᠭᠠᠨ ᠳ᠋ᠦ᠍ ᠨᠢᠭᠡ ᠣᠲᠠᠭᠠ ᠶᠠᠪᠣᠬ᠍ᠲᠠᠬᠣ ᠬᠡᠪᠯᠡᠯ ᠡᠬᠢᠯᠡᠭ᠌ᠰᠡᠨ ᠣᠢ ᠪᠠᠨ ᠲᠣᠷᠠᠰᠭᠠᠨ ᠲᠡᠮᠲᠡᠭ᠌ᠯᠡᠬᠦ᠌ ᠠᠵᠢᠯᠯᠠᠭᠠ ᠨᠢ ᠦᠩᠭᠡᠨ ᠲᠡᠭᠡᠷᠡᠬᠢ ᠪᠠᠶᠠᠷ ᠲᠣᠷᠠᠰᠬᠠᠯᠤᠨ ᠠᠵᠢᠯᠯᠠᠭᠠ ᠲᠡᠳᠦᠢ ᠪᠣᠰᠣ᠂ ᠬᠠᠷᠢᠨ ᠰᠡᠳᠭᠦᠯᠤᠨᠶ᠋ᠢᠡᠨ ᠲᠠᠪᠣᠨ ᠵᠢᠯᠤᠨ ᠠᠵᠢᠯᠢ ᠱᠢᠯᠭᠠᠨ ᠦᠨᠡᠯᠡᠬᠦ᠂ ᠵᠣᠬᠢᠶᠠᠬ᠍ᠴᠢ ᠪᠣᠯᠣᠨ ᠣᠩᠱᠢᠬ᠍ᠴᠢᠳ ᠲᠠᠢ ᠪᠠᠨ ᠣᠢ᠌ᠯᠠᠭᠠᠯᠴᠠᠭᠠ ᠪᠠᠨ ᠬᠦᠨᠵᠡᠭᠡᠢ᠌ᠷᠡᠬᠦᠯᠬᠦ᠂ ᠮᠣᠩᠭᠣᠯ ᠣᠷᠠᠨ ᠵᠣᠬᠢᠶᠠᠯᠤᠨ ᠬᠦᠭ᠌ᠵᠢᠯᠲᠡᠶ᠋ᠢᠨ ᠬᠠᠨᠲᠣᠯᠭᠠ ᠴᠢᠭ᠌ᠯᠡᠯᠤᠨ ᠲᠣᠬᠠᠢ ᠣᠢ᠌ᠯᠠᠭᠠᠬᠣ᠂ ᠳ᠋ᠦᠩᠨᠡᠯᠲᠡ ᠪᠠ ᠲᠦᠯᠦᠪᠵᠢᠬᠦᠯᠭᠡᠶ᠋ᠢᠨ ᠠᠵᠢᠯᠯᠠᠭᠠ ᠪᠣᠯᠣᠬᠰᠠᠨ ᠶᠣᠮ᠃
《ᠴᠣᠯᠮᠣᠨ》 ᠭᠠᠷᠭᠠᠵᠦ ᠮᠣᠷᠲᠠᠬᠣ ᠰᠠᠨ
《ᠴᠣᠬᠣᠮᠬᠦ ᠰᠡᠳᠬᠢᠯ ᠴᠢᠨᠢ ᠶᠠᠩᠵᠦ ᠪᠡᠷ ᠶ᠋ᠢᠡᠨ ᠪᠠᠢᠪᠠᠯ᠂ ᠴᠣᠯᠮᠣᠨ ᠭᠠᠷᠭᠠᠭᠠᠳ ᠮᠣᠷᠲᠠᠭᠠᠷᠠᠢ ᠳ᠋ᠠ ᠬᠦ᠁》 ᠭᠡᠵᠦ ᠠᠷᠠᠳᠤᠨ ᠲᠠᠭᠣᠣ ᠳ᠋ᠦ ᠲᠠᠭᠣᠯᠠᠲᠠᠬ᠃ ᠬᠠᠷᠢᠨ ᠦᠨᠦᠲᠦᠷ ᠲᠠᠭᠣᠯᠠᠬᠰᠠᠨ ᠲᠠᠭᠣᠣ ᠦᠨᠡᠨ ᠪᠣᠯᠵᠦ᠂ ᠣᠷᠠᠨ ᠪᠦᠲᠦᠭᠡᠯᠴᠢᠳ ᠮᠠᠨᠢ 《ᠴᠣᠯᠮᠣᠨ》 ᠳ᠋ᠦ ᠪᠦᠲᠦᠭᠡᠯ ᠶ᠋ᠢᠡᠨ ᠭᠠᠷᠭᠠᠵᠦ ᠨᠡᠷᠡ ᠪᠠᠨ ᠲᠡᠮᠲᠡᠭᠯᠡᠬᠦᠯᠬᠦ ᠪᠡᠷ ᠨᠢᠭᠡ ᠶᠣᠰᠣᠨᠤ ᠣᠮᠣᠬᠰᠢᠯ ᠪᠠᠬᠠᠷᠬᠠᠯ ᠪᠣᠯᠭᠠᠲᠠᠬ ᠨᠢ ᠣᠴᠢᠷᠲᠠᠢ᠃ 《ᠴᠣᠯᠮᠣᠨ》 ᠰᠡᠳᠬᠦᠯ ᠪᠣᠯ ᠴᠢᠨᠠᠷ ᠴᠢᠨᠰᠠᠭᠠ ᠬᠢᠭᠡᠳ ᠠᠭᠣᠯᠭᠠᠶᠢᠨ ᠪᠠᠷᠢᠮᠵᠢᠶᠠᠶᠢᠨ ᠲᠦᠯᠦᠭᠡᠯᠡᠯ ᠪᠣᠯᠵᠦ᠂ ᠣᠷᠠᠯᠢᠬᠴᠢ ᠴᠢᠨᠠᠷ ᠪᠣᠯᠣᠨ ᠦᠵᠡᠯ ᠰᠠᠨᠠᠭᠠᠴᠢ ᠴᠢᠨᠠᠷᠤᠨ ᠦᠷᠤᠨ ᠴᠣᠯᠮᠣᠨ ᠮᠡᠲᠦ ᠦᠨᠢᠲᠡ ᠭᠡᠷᠡᠯᠲᠦᠭᠰᠡᠭᠡᠷ ᠠᠵᠢᠶᠠᠨᠠᠮ᠃
ᠶᠠᠷᠢᠯᠴᠠᠬᠤ ᠬᠤᠷᠠᠯᠤᠨ ᠠᠬᠤᠢ ᠲᠠᠯᠠᠪᠠᠢ
ᠰᠡᠳᠬᠦᠯᠤᠨ ᠠᠵᠢᠯᠤᠨ ᠠᠮᠵᠢᠯᠲᠠ ᠪᠦᠲᠦᠮᠵᠢᠶᠢ ᠬᠠᠮᠣᠬ ᠡᠴᠡ ᠲᠣᠲᠣ ᠬᠠᠷᠠᠭᠣᠯᠵᠦ ᠴᠢᠲᠠᠬᠣ ᠨᠢ ᠨᠡᠢᠲᠡᠯᠡᠭᠰᠡᠨ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠪᠣᠯᠬᠣ ᠶᠣᠮ᠃ ᠬᠣᠯᠠᠶᠢ ᠦᠬᠦᠯᠡᠵᠦ ᠨᠣᠷᠰᠢᠬᠣ ᠦᠭᠡᠢ ᠦᠨᠦᠭᠡᠨ ᠡᠴᠡ ᠵᠢᠱᠶ᠋ᠶᠡᠯᠡᠵᠦ ᠲᠣᠷᠠᠳᠪᠠᠯ᠂ 《ᠴᠣᠯᠮᠣᠨ》 ᠰᠡᠳᠬᠦᠯ ᠳ᠋ᠦ ᠠᠩᠬᠠ ᠨᠡᠢᠲᠡᠯᠡᠭᠲᠡᠭᠰᠡᠨ ᠵᠣᠬᠢᠶᠠᠯᠴᠢ ᠠᠶᠣᠩᠭᠠᠶᠢᠨ ᠰᠣᠲᠣᠨ ᠪᠦᠲᠦᠭᠡᠯ 《ᠮᠠᠨᠪᠠ ᠷᠠᠰᠠᠩ》 ᠷᠣᠮᠠᠨ ᠣᠯᠠᠨ ᠣᠲᠠᠭᠠ ᠬᠡᠪᠯᠡᠭᠲᠡᠵᠦ᠂ ᠬᠢᠲᠡᠳ᠂ ᠲᠦᠪᠡᠳ᠂ ᠺᠠᠽᠠᠬ ᠵᠡᠷᠭᠡ ᠬᠡᠲᠦᠨ ᠬᠡᠯᠡᠨ ᠳ᠋ᠦ ᠣᠷᠴᠢᠭᠣᠯᠣᠬᠲᠠᠵᠦ᠂ ᠭᠣᠷᠪᠠᠲᠣᠭᠠᠷ ᠣᠲᠠᠭᠠᠶᠢᠨ 《 ᠲᠣᠷᠣᠨᠠ》 ᠱᠠᠩᠨᠠᠯ ᠲᠣᠰᠣᠬᠰᠠᠨ ᠪᠢᠯᠡ᠃ ᠪᠠᠷᠮᠣᠳ ᠣᠯᠠᠭᠠᠨᠬᠦᠦ ᠶ᠋ᠢᠨ 《ᠭᠣᠷᠪᠠᠨ ᠵᠠᠭᠣᠨ ᠵᠢᠷᠠᠨ ᠨᠢᠭᠡᠨ ᠬᠦᠷᠦᠭᠡᠰᠦ》 ᠭᠡᠬᠦ ᠷᠣᠮᠠᠨ 《ᠴᠣᠯᠮᠣᠨ》 ᠰᠡᠳᠬᠦᠯ ᠳ᠋ᠦ ᠨᠡᠢᠲᠡᠯᠡᠭᠲᠡᠭᠡᠳ ᠣᠯᠠᠨᠤ ᠠᠩᠬᠠᠷᠣᠯᠢ ᠲᠠᠲᠠᠵᠦ ᠬᠣᠵᠢᠮ ᠨᠢ ᠨᠣᠮ ᠪᠣᠯᠣᠨ ᠬᠡᠪᠯᠡᠭᠲᠡᠵᠦ᠂ 2024 ᠤᠨ ᠳ᠋ᠦ ᠦᠪᠡᠷᠲᠡᠭᠡᠨ ᠵᠠᠰᠠᠬᠣ ᠣᠷᠣᠨᠤ ᠬᠣᠶᠠᠲᠣᠭᠠᠷ ᠬᠣᠭᠣᠴᠠᠭᠠᠨᠤ ᠠᠮᠢ ᠠᠬᠣᠢᠶᠢᠨ ᠣᠷᠠᠨ ᠵᠣᠬᠢᠶᠠᠯ ᠶ᠋ᠢᠡᠷ ᠰᠣᠩᠭᠣᠬᠲᠠᠬᠰᠠᠨ ᠪᠠᠢᠨᠠ᠃ ᠤ·ᠨᠠᠷᠬᠢᠯᠤᠨ 《ᠪᠠᠬᠪᠠᠬᠠᠢ ᠴᠡᠴᠡᠭ》 ᠷᠣᠮᠠᠨ ᠨᠢ 《ᠴᠣᠯᠮᠣᠨ》 ᠰᠡᠳᠬᠦᠯ ᠳ᠋ᠦ ᠨᠡᠢᠲᠡᠯᠡᠭᠲᠡᠭᠰᠡᠨᠤ ᠲᠠᠷᠠᠭᠠ ᠪᠠᠰᠠ ᠨᠣᠮ ᠪᠣᠯᠣᠨ ᠬᠡᠪᠯᠡᠭᠲᠡᠵᠦ᠂ ᠠᠷᠪᠠᠨ ᠭᠣᠷᠪᠠᠲᠣᠭᠠᠷ ᠬᠣᠭᠣᠴᠠᠭᠠᠨᠤ ᠦᠪᠡᠷᠲᠡᠭᠡᠨ ᠵᠠᠰᠠᠬᠣ ᠣᠷᠣᠨᠤ ᠣᠳᠬᠠ ᠵᠣᠬᠢᠶᠠᠯᠤᠨ ᠵᠣᠬᠢᠶᠠᠨ ᠪᠦᠲᠦᠭᠡᠯᠭᠡᠶᠢᠨ 《ᠰᠣᠯᠣᠩᠭᠠ》 ᠱᠠᠩᠨᠠᠯ ᠬᠦᠷᠲᠡᠵᠠᠢ᠃ ᠲᠡᠷᠡᠴᠢᠯᠡᠨ 《ᠴᠣᠯᠮᠣᠨ》 ᠰᠡᠳᠬᠦᠯ ᠳ᠋ᠦ ᠨᠡᠢᠲᠡᠯᠡᠭᠲᠡᠭᠰᠡᠨ 《ᠨᠢᠭᠡᠨ ᠵᠣᠬᠢᠶᠠᠯᠴᠢᠶᠢᠨ ᠡᠳᠦᠷᠤᠨ ᠲᠡᠮᠲᠡᠭᠯᠡᠯ》᠂ 《ᠡᠵᠢ ᠳ᠋ᠡᠭᠡᠨ ᠵᠠᠬᠢᠲᠠᠯ ᠪᠢᠴᠢᠭᠡᠷᠡᠢ》 ᠵᠡᠷᠭᠡ ᠪᠦᠲᠦᠭᠡᠯ ᠨᠢ ᠨᠣᠮ ᠪᠣᠯᠣᠨ ᠬᠡᠪᠯᠡᠭᠲᠡᠭᠰᠡᠨᠤ ᠲᠠᠷᠠᠭᠠ ᠬᠠᠯᠠᠮᠰᠢᠯ ᠪᠣᠯᠣᠨ ᠲᠠᠷᠬᠠᠵᠦ᠂ ᠬᠣᠶᠠᠷ ᠣᠲᠠᠭᠠ ᠲᠠᠬᠢᠨ ᠬᠡᠪᠯᠡᠭᠲᠡᠭᠰᠡᠨ ᠪᠦᠭᠡᠳ 《ᠲᠡᠭᠷᠢ ᠰᠦᠯᠲᠡ ᠲᠣᠪᠣᠷᠣᠣ》᠂ 《ᠭᠡᠮᠰᠢᠯ ᠣᠬᠠᠭᠠᠷᠠᠯ》 ᠂ 《ᠡᠩ ᠶᠢᠷᠲᠢᠨᠴᠦ》᠂ 《ᠴᠠᠭᠠᠨ ᠪᠣᠭᠣᠲᠣᠶᠢᠨ ᠰᠢᠯᠢ》 ᠪᠣᠯᠣᠨ 《ᠰᠣᠲᠣᠨ ᠲᠣᠭᠣᠵᠢᠶᠢᠨ ᠰᠣᠩᠭᠣᠮᠠᠯ》 ᠴᠣᠪᠣᠷᠠᠯᠤᠨ 30 ᠪᠣᠳᠢ᠂ 《ᠬᠡᠦᠬᠡᠳᠤᠨ ᠣᠷᠠᠨ ᠵᠣᠬᠢᠶᠠᠯ》 ᠴᠣᠪᠣᠷᠠᠯᠤᠨ 5 ᠪᠣᠲᠢ ᠨᠢ ᠲᠣᠰᠪᠣᠷᠢ ᠨᠢᠭᠡ ᠣᠲᠠᠭᠠ ᠲᠠᠬᠢᠨ ᠬᠡᠪᠯᠡᠭᠲᠡᠵᠡᠢ᠃ ᠡᠬᠦᠨ ᠡᠴᠡ ᠭᠠᠲᠠᠨᠠ 《ᠴᠣᠯᠮᠣᠨ》 ᠰᠡᠳᠬᠦᠯ ᠳ᠋ᠦ ᠨᠡᠢᠲᠡᠯᠡᠭᠰᠡᠨ ᠣᠯᠠᠨ ᠰᠠᠢ᠌ᠬᠠᠨ ᠪᠦᠲᠦᠭᠡᠯᠤ᠋ᠤᠨ ᠲᠣᠮᠲᠠᠲᠣ ᠰᠣᠷᠭᠠᠭᠣᠯᠢᠪᠣᠯᠣᠨ ᠶᠡᠬᠡ ᠲᠡᠭᠡᠲᠦ ᠰᠣᠷᠭᠠᠭᠣᠯᠢᠶ᠋ᠢᠨ ᠬᠢᠴᠢᠶᠡᠯᠤᠨ ᠪᠢᠴᠢᠭ᠂ ᠣᠩᠱᠢᠬᠣ ᠪᠢᠴᠢᠭ ᠲᠦ᠍ ᠰᠣᠩᠭᠣᠬ᠍ᠲᠠᠨ ᠣᠷᠣᠬ᠍ᠰᠠᠨ ᠪᠢᠯᠡ᠃ ᠡᠢᠨᠬᠦ 《ᠴᠣᠯᠮᠣᠨ》 ᠰᠡᠳᠬᠦᠯ ᠳ᠋ᠦ ᠠᠩᠬᠠ ᠨᠡᠢ᠌ᠲᠡᠯᠡᠭ᠌ᠲᠡᠭ᠌ᠰᠡᠨ ᠵᠣᠬᠢᠶᠠᠯ ᠪᠦᠲᠦᠭᠡᠯᠤᠨ ᠣᠯᠠᠩᠬᠢ ᠨᠢ ᠰᠡᠬᠦᠯ ᠳ᠋ᠣᠨᠢ ᠲᠣᠰᠬᠠᠢ ᠨᠣᠮ ᠪᠣᠯᠵᠦ᠍ ᠬᠡᠪᠯᠡᠭ᠌ᠲᠡᠭ᠌ᠰᠡᠨ ᠪᠦᠭᠡᠳ ᠵᠠᠷᠢᠮ ᠨᠢ ᠣᠯᠠᠨ ᠲᠡᠬᠢᠨ ᠬᠡᠪᠯᠡᠭ᠌ᠲᠡᠵᠦ᠍᠂ ᠬᠡᠴᠢᠨᠡᠨ ᠵᠢᠯᠶ᠋ᠢᠡᠷ ᠲᠠᠷᠬᠠᠭᠠᠯᠭᠠ ᠰᠠᠢ᠌ᠲᠠᠢ ᠬᠡᠪᠶ᠋ᠢᠡᠷ ᠪᠠᠢ᠌ᠭᠠ ᠨᠢ 《ᠴᠣᠯᠮᠣᠨ》 ᠰᠡᠳᠬᠦᠯᠤᠨ ᠵᠣᠬᠢᠶᠠᠯ ᠪᠦᠲᠦᠭᠡᠯᠤ᠋ᠤᠨ ᠮᠣᠩᠭᠣᠯ ᠣᠷᠠᠨ ᠵᠣᠬᠢᠶᠠᠯᠤᠨ ᠪᠠᠶᠠᠯᠢᠬ ᠦᠪ ᠣᠯᠠᠮᠵᠢᠯᠠᠯᠢ ᠪᠦᠲᠦᠭᠡᠭ᠌ᠰᠡᠨ ᠭᠡᠲᠡᠭᠤᠨ ᠪᠠᠲᠣᠲᠠᠢ ᠭᠡᠷᠡᠴᠢ ᠪᠣᠯᠬᠣ ᠶᠣᠮ᠃
《ᠴᠢᠨᠠᠷ ᠴᠢᠨᠰᠠᠭᠠᠶᠢ ᠲᠡᠭᠡᠲᠦᠯᠡᠨ ᠠᠭᠣᠯᠭᠠᠶᠢ ᠡᠷᠬᠢᠮᠯᠡᠬᠦ》 ᠪᠣᠯ 《 ᠴᠣᠯᠮᠣᠨ》 ᠰᠡᠳᠬᠦᠯᠤᠨ ᠪᠠᠷᠢᠮᠵᠢᠶᠠ ᠭᠡᠲᠡᠭ ᠪᠣᠯ ᠷᠣᠮᠠᠨ ᠲᠣᠭᠣᠵᠢ ᠪᠡᠷ ᠭᠣᠣᠯᠲᠠᠭᠣᠯᠬᠣ ᠪᠣᠯ 《ᠴᠣᠯᠮᠣᠨ》 ᠰᠡᠳᠬᠦᠯᠤᠨ ᠣᠨᠴᠠᠯᠢᠬ ᠪᠣᠯᠣᠨᠠ᠃ ᠲᠡᠭᠡᠷᠡ ᠵᠠᠭᠣᠨᠤ ᠲᠠᠯᠠᠭᠠᠳ ᠤᠨᠤ ᠰᠡᠬᠦᠯᠴᠢ ᠨᠠᠶᠠᠭᠠᠳ ᠤᠨᠤ ᠡᠬᠢ ᠪᠡᠷ᠂ ᠮᠣᠩᠭᠣᠯ ᠣᠷᠠᠨ ᠵᠣᠬᠢᠶᠠᠯᠤᠨ ᠬᠦᠷᠢᠶᠡᠨ ᠳ᠋ᠦ᠍ ᠱᠢᠨᠠ ᠪᠠᠢ᠌ᠲᠠᠯ ᠪᠣᠢ ᠪᠣᠯᠣᠬ᠍ᠰᠠᠨ ᠪᠣᠯᠪᠠᠴᠦ᠍ ᠣᠯᠠᠨ ᠲᠠᠯᠠᠶ᠋ᠢᠨ ᠱᠢᠯᠲᠠᠭᠠᠨ ᠡᠴᠡ ᠪᠣᠯᠵᠦ᠍᠂ ᠮᠣᠩᠭᠣᠯ ᠠᠮᠢᠲᠣᠷᠠᠯᠶ᠋ᠢᠡᠷ ᠰᠡᠲᠦᠪᠯᠡᠭ᠌ᠰᠡᠨ ᠷᠣᠮᠠᠨ ᠲᠣᠭᠣᠵᠢᠶ᠋ᠢᠨ ᠵᠣᠬᠢᠶᠠᠨ ᠪᠦᠲᠦᠭᠡᠯᠭᠡ ᠠᠬᠢᠴᠠ ᠮᠠᠭᠣᠲᠠᠢ ᠪᠠᠢ᠌ᠵᠠᠢ᠃ ᠲᠡᠷᠡ ᠬᠦ᠌ ᠪᠠᠢ᠌ᠲᠠᠯ ᠳ᠋ᠦ᠍ ᠴᠢᠭ᠌ᠯᠡᠬᠦᠯᠦᠨ 《ᠴᠣᠯᠮᠣᠨ》 ᠰᠡᠳᠬᠦᠯ ᠷᠣᠮᠠᠨ ᠲᠣᠭᠣᠵᠢ ᠨᠡᠢ᠌ᠲᠡᠯᠡᠬᠦ᠌ ᠪᠡᠷ ᠭᠣᠣᠯ ᠣᠨᠴᠠᠯᠢᠬᠶ᠋ᠢᠡᠨ ᠪᠣᠯᠭᠠᠬ᠍ᠰᠠᠨ ᠰᠡᠳᠬᠦᠯ ᠡᠷᠬᠢᠯᠡᠬᠦ᠌ ᠴᠢᠭ᠌ᠯᠡᠯ ᠶ᠋ᠢᠡᠨ ᠲᠣᠬ᠍ᠲᠠᠭᠠᠵᠦ᠂ ᠣᠷᠠᠨ ᠵᠣᠬᠢᠶᠠᠯᠤᠨ ᠰᠣᠷᠠᠬ ᠵᠠᠩᠬᠢᠶ᠋ᠢ ᠡᠵᠡᠮᠱᠢᠬᠦ᠂ ᠵᠣᠬᠢᠶᠠᠯᠴᠢᠳᠤᠨ ᠡᠩᠨᠡᠭᠡ ᠪᠡᠨ ᠦᠷᠭᠡᠵᠢᠬᠦᠯᠬᠦ᠂ ᠰᠢᠯᠢᠲᠡᠭ ᠰᠣᠲᠣᠨ ᠷᠣᠮᠠᠨ ᠲᠣᠭᠣᠵᠢᠶ᠋ᠢᠨ ᠪᠦᠲᠦᠭᠡᠯᠢ ᠴᠠᠬ ᠲᠣᠬᠠᠢ ᠳ᠋ᠣᠨᠢ ᠣᠩᠱᠢᠬ᠍ᠴᠢᠳ ᠲᠠᠢ ᠵᠣᠯᠭᠠᠭᠣᠯᠬᠣ ᠲᠠᠯᠠ ᠪᠡᠷ ᠦᠪᠦᠷ ᠮᠣᠩᠭᠣᠯᠤᠨ ᠠᠷᠠᠳᠤᠨ ᠬᠡᠪᠯᠡᠯᠤᠨ ᠬᠣᠷᠢᠶᠠᠨᠤ ᠭᠡᠭᠡᠪᠴᠢ ᠪᠣᠯᠣᠬ᠍ᠰᠠᠨ ᠲᠡᠲᠦᠢ ᠦᠭᠡᠢ ᠪᠦᠬᠦ᠌ ᠣᠷᠣᠨ ᠴᠢᠨᠠᠬ᠍ᠰᠢᠯᠠᠪᠠᠯ ᠪᠦᠬᠦ᠌ ᠣᠯᠣᠰᠤᠨ ᠬᠡᠪᠴᠢᠶᠠᠨ ᠳ᠋ᠡᠬᠢ ᠷᠣᠮᠠᠨ ᠲᠣᠭᠣᠵᠢᠶ᠋ᠢᠨ ᠪᠦᠲᠦᠭᠡᠯ ᠨᠠᠢ᠌ᠲᠡᠯᠡᠬᠦ᠌ ᠬᠦᠷᠦᠯᠴᠡᠬᠦᠢ᠌ᠴᠡ ᠬᠠᠭᠣᠲᠠᠰᠣ ᠨᠢᠭᠣᠷ ᠪᠦᠬᠦᠢ ᠮᠣᠩᠭᠣᠯ ᠰᠡᠳᠬᠦᠯ ᠦᠭᠡᠢ ᠪᠠᠢ᠌ᠬ᠍ᠰᠠᠨ ᠲᠡᠦᠭᠡᠶ᠋ᠢ ᠡᠴᠦᠰᠯᠡᠬᠦᠯᠦᠭ᠌ᠰᠡᠨ ᠪᠠᠢ᠌ᠨᠠ᠃ ᠢᠩᠬᠢᠭᠡᠳ 《ᠴᠣᠯᠮᠣᠨ》 ᠰᠡᠳᠬᠦᠯ ᠮᠡᠨᠲᠦᠯᠡᠭ᠌ᠰᠡᠨᠶ᠋ᠢᠡᠷ ᠮᠣᠩᠭᠣᠯ ᠬᠡᠯᠡᠨᠤ ᠷᠣᠮᠠᠨ ᠲᠣᠭᠣᠵᠢᠶ᠋ᠢᠨ ᠵᠣᠬᠢᠶᠠᠨ ᠪᠦᠲᠦᠭᠡᠯᠭᠡᠶ᠋ᠢ ᠲᠠᠢ᠌ᠴᠢᠯᠠᠵᠦ᠍᠂ ᠦᠪᠦᠷ ᠮᠣᠩᠭᠣᠯᠤᠨ ᠠᠷᠠᠳᠤᠨ ᠬᠡᠪᠯᠡᠯᠤᠨ ᠬᠣᠷᠢᠶᠠᠶᠢᠨ ᠣᠷᠠᠨ ᠵᠣᠬᠢᠶᠠᠯᠤᠨ ᠲᠦᠷᠦᠯᠤᠨ ᠨᠣᠮ ᠪᠢᠴᠢᠭᠤᠨ ᠬᠡᠪᠯᠡᠯᠤᠨ ᠡᠬᠢ ᠪᠠᠶᠠᠯᠢᠬᠢ ᠡᠵᠡᠮᠱᠢᠬᠦ᠌ ᠰᠠᠨᠠᠭᠠᠴᠢᠯᠠᠭᠠᠲᠣ ᠴᠢᠨᠠᠷᠢ ᠲᠡᠭᠡᠭ᠌ᠰᠢᠯᠡᠬᠦᠯᠵᠦ᠂ ᠲᠡᠬᠦᠨᠤ ᠣᠯᠠᠮ ᠶ᠋ᠢᠡᠷ ᠦᠪᠦᠷ ᠮᠣᠩᠭᠣᠯᠤᠨ ᠮᠣᠩᠭᠣᠯ ᠣᠷᠠᠨ ᠵᠣᠬᠢᠶᠠᠯ ᠰᠲ᠋ᠢᠯᠢ ᠪᠦᠷᠢᠨ᠂ ᠨᠣᠮ ᠰᠡᠳᠬᠦᠯ ᠬᠣᠷᠱᠢᠨ ᠣᠶᠠᠯᠲᠣᠬ᠍ᠰᠠᠨ ᠱᠢᠨᠠ ᠨᠢᠭᠡᠨ ᠴᠠᠬ ᠦᠶᠡ ᠳ᠋ᠦ᠍ ᠣᠷᠣᠬ᠍ᠰᠠᠨ ᠪᠢᠯᠡ᠃
1980 ᠤᠨ ᠳ᠋ᠦ ᠬᠡᠪᠯᠡᠯ ᠡᠬᠢᠯᠡᠭᠰᠡᠨ ᠠᠩᠬᠠᠨᠤ ᠳ᠋ᠣᠭᠠᠷ ᠡᠴᠡ ᠡᠲᠦᠭᠡ（2025 ᠤᠨᠤ ᠬᠣᠶᠠᠲᠣᠭᠠᠷ ᠬᠣᠭᠣᠴᠠᠭᠠ） ᠪᠣᠯᠲᠠᠯᠠᠬᠢ 《ᠴᠣᠯᠮᠣᠨ》 ᠰᠡᠳᠬᠦᠯᠤᠨ 181 ᠬᠣᠭᠣᠴᠠᠭᠠ ᠳ᠋ᠦ ᠨᠡᠢᠲᠡ 1200 ᠵᠣᠬᠢᠶᠠᠯᠴᠢᠶᠢᠨ 2473 ᠵᠣᠬᠢᠶᠠᠯ ᠪᠦᠲᠦᠭᠡᠯᠢ ᠨᠡᠢᠲᠡᠯᠡᠵᠦ᠂ ᠮᠣᠩᠭᠣᠯ ᠣᠷᠠᠨ ᠵᠣᠬᠢᠶᠠᠯᠤᠨ ᠮᠣᠨᠲᠠᠬ ᠶᠡᠬᠡ ᠡᠷᠳᠡᠨᠢᠰᠤᠨ ᠰᠠᠩᠢ ᠪᠦᠷᠢᠯᠲᠦᠬᠦᠯᠦᠭᠰᠡᠨ ᠪᠠᠢᠨᠠ᠃ ᠡᠬᠦᠨ ᠳ᠋ᠦ 109 ᠷᠣᠮᠠᠨ（ᠠᠬᠠ ᠲᠡᠬᠦᠦ ᠦᠨᠳᠦᠰᠦᠲᠡᠨᠤ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠪᠠᠬᠲᠠᠨᠠ）᠂ 248 ᠲᠣᠭᠣᠵᠢ᠂ 17 ᠵᠦᠴᠦᠭᠡ᠂ 31 ᠮᠡᠳᠡᠭᠡᠯᠡᠯᠤᠨ ᠣᠷᠠᠨ ᠵᠣᠬᠢᠶᠠᠯ ᠪᠣᠶᠣ ᠪᠠᠷᠢᠮᠲᠠᠲᠣ ᠵᠣᠬᠢᠶᠠᠯ᠂ 809 ᠦᠬᠦᠯᠡᠯᠭᠡ ᠨᠠᠢᠷᠠᠭᠣᠯᠤᠯ᠂ 991 ᠰᠢᠯᠦᠭ ᠨᠠᠢᠷᠠᠬᠯᠠᠯ᠂ 157 ᠣᠨᠣᠯ ᠮᠡᠲᠡᠯᠭᠡᠶᠢᠨ ᠰᠢᠨᠵᠢ ᠲᠠᠢ ᠵᠣᠬᠢᠶᠠᠯ ᠪᠦᠲᠦᠭᠡᠯ᠂ 42 ᠠᠷᠠᠳᠤᠨ ᠠᠮᠠᠨ ᠵᠣᠬᠢᠶᠠᠯ ᠪᠣᠯᠣᠨ ᠵᠠᠩ ᠦᠢᠯᠡᠶᠢᠨ ᠲᠣᠬᠠᠢ ᠡᠮᠬᠢᠳᠭᠡᠯ᠂ 69 ᠰᠣᠷᠣᠬᠴᠢᠶᠢᠨ ᠪᠦᠲᠦᠭᠡᠯ ᠪᠠᠬᠲᠠᠬᠰᠠᠨ ᠠᠵᠢ᠃ ᠡᠲᠡᠭᠡᠷ ᠵᠣᠬᠢᠶᠠᠯ ᠪᠦᠲᠦᠭᠡᠯᠤᠨ ᠵᠢᠬ᠍ᠰᠠᠭᠠᠯᠲᠠ ᠨᠢ 《ᠴᠣᠯᠮᠣᠨ》 ᠰᠡᠳᠬᠦᠯᠤᠨ 45 ᠵᠢᠯᠤᠨ ᠲᠣᠷᠰᠢ᠂ ᠷᠣᠮᠠᠨ ᠲᠣᠭᠣᠵᠢ ᠪᠡᠷ ᠭᠣᠣᠯᠲᠠᠭᠣᠯᠬᠣ ᠰᠡᠳᠬᠦᠯ ᠡᠷᠬᠢᠯᠡᠬᠦ᠌ ᠴᠢᠭ᠌ᠯᠡᠯᠲᠡ ᠪᠠᠨ ᠴᠢᠩᠭᠠ ᠪᠠᠷᠢᠮᠲᠠᠯᠠᠬ᠍ᠰᠠᠨ ᠰᠠᠭᠣᠷᠢᠨ ᠲᠡᠭᠡᠷᠡ ᠦᠬᠦᠯᠡᠯᠭᠡ ᠨᠠᠢ᠌ᠷᠠᠭᠣᠯᠣᠯ ᠪᠠ ᠢᠷᠠᠭᠣ ᠨᠠᠢ᠌ᠷᠠᠬ᠂ ᠲᠠᠢ᠌ᠰᠠᠨᠤ ᠵᠦᠴᠦᠭᠡ᠂ ᠺᠢᠨᠣ᠋ ᠣᠷᠠᠨ ᠵᠣᠬᠢᠶᠠᠯ ᠪᠠ ᠲᠧᠯᠸᠢᠰ ᠵᠦᠴᠦᠭᠡ᠂ ᠮᠡᠲᠡᠭᠡᠯᠡᠯᠤᠨ ᠣᠷᠠᠨ ᠵᠣᠬᠢᠶᠠᠯ ᠪᠣᠶᠣ ᠪᠠᠷᠢᠮᠲᠠᠲᠣ ᠵᠣᠬᠢᠶᠠᠯᠤᠨ ᠵᠣᠬᠢᠶᠠᠨ ᠪᠦᠲᠦᠭᠡᠯᠭᠡᠶ᠋ᠢ ᠴᠦ᠍ ᠢᠮᠠᠬ᠍ᠲᠠ ᠠᠩᠬᠠᠷᠴᠦ᠍᠂ ᠡᠬᠦᠨᠤ ᠲᠠᠭᠠᠣ ᠭᠠᠲᠠᠭᠠᠲᠣ ᠣᠷᠠᠨ ᠵᠣᠬᠢᠶᠠᠯ ᠪᠠ ᠣᠯᠣᠰᠤᠨ ᠲᠣᠲᠣᠭᠠᠲᠣᠶ᠋ᠢᠨ ᠠᠬᠠ ᠲᠡᠬᠦᠦ ᠦᠨᠳᠦᠰᠦᠲᠡᠨᠤ ᠰᠣᠲᠣᠨ ᠱᠢᠯᠢᠲᠡᠭ ᠪᠦᠲᠦᠭᠡᠯ ᠡᠴᠡ ᠰᠣᠩᠭᠣᠨ ᠲᠠᠨᠢᠯᠴᠠᠭᠣᠯᠵᠦ᠍᠂ ᠣᠷᠠᠯᠢᠬᠤᠨ ᠱᠢᠮᠠ ᠨᠦᠬᠦᠬᠦ᠌ᠶ᠋ᠢ ᠬᠢᠴᠢᠶᠡᠨ᠂ ᠮᠣᠩᠭᠣᠯ ᠣᠷᠠᠨ ᠵᠣᠬᠢᠶᠠᠯᠤᠨ ᠪᠦᠬᠦ᠌ ᠲᠠᠯᠠᠶ᠋ᠢᠨ ᠲᠡᠩᠴᠡᠬᠦᠷᠢᠲᠡᠢ ᠬᠦᠭ᠌ᠵᠢᠬᠦ᠌ ᠳ᠋ᠦ᠍ ᠦᠢᠯᠡᠴᠢᠯᠡᠭ᠌ᠰᠡᠭᠡᠷ ᠢᠷᠡᠭ᠌ᠰᠡᠨ ᠭᠡᠲᠡᠭᠢ ᠲᠣᠲᠣᠷᠬᠠᠢ ᠮᠡᠳᠡᠵᠦ ᠪᠣᠯᠣᠨᠠ᠃
《ᠴᠣᠯᠮᠣᠨ》 ᠰᠡᠳᠬᠦᠯ ᠡᠴᠡ 《ᠴᠣᠯᠮᠣᠨ ᠲᠡᠭᠡᠵᠢ ᠪᠢᠴᠢᠭ》 ᠬᠦᠷᠲᠡᠯᠡ
《 ᠴᠣᠯᠮᠣᠨ》 ᠰᠡᠳᠬᠦᠯ ᠬᠡᠪᠯᠡᠯ ᠡᠬᠢᠯᠡᠭ᠌ᠰᠡᠨ ᠲᠡᠷᠡ ᠴᠠᠬ ᠡᠴᠡ ᠪᠠᠨ ᠠᠪᠣᠭᠠᠳ ᠴᠠᠬ ᠦᠶᠡᠶ᠋ᠢᠨ ᠠᠲᠠᠷᠠᠮᠠᠶ᠋ᠢ ᠬᠦᠯᠢᠴᠡᠨ ᠲᠣᠭᠣᠯᠵᠦ᠍᠂ ᠣᠩᠱᠢᠬ᠍ᠴᠢᠳᠤᠨᠶ᠋ᠢᠡᠨ ᠰᠡᠳᠭᠢᠯ ᠳ᠋ᠦ᠍ ᠣᠲᠣᠨ 《ᠴᠣᠯᠮᠣᠨ》 ᠮᠡᠲᠦ ᠭᠡᠷᠡᠯᠲᠦᠬᠦ ᠪᠡᠷ ᠬᠢᠴᠢᠶᠡᠨ ᠵᠢᠳᠬᠦᠭᠰᠡᠭᠡᠷ ᠢᠷᠡᠭ᠌ᠰᠡᠨ ᠪᠢᠯᠡ᠃
ᠰᠡᠳᠬᠦᠯᠤᠨ ᠵᠠᠬᠢᠶᠠᠯᠠᠭᠠ ᠨᠠᠢ᠌ᠲᠠᠮ ᠰᠠᠢ᠌ᠨ ᠪᠠᠢ᠌ᠬ᠍ᠰᠠᠨ ᠲᠡᠭᠡᠷᠡ ᠵᠠᠭᠣᠨᠤ ᠨᠠᠶᠠᠭᠠᠳ ᠤᠨᠤ ᠡᠬᠢᠨ ᠳ᠋ᠦ᠍᠂ 《ᠴᠣᠯᠮᠣᠨ》 ᠰᠡᠳᠬᠦᠯᠤᠨ ᠲᠠᠷᠬᠠᠭᠠᠯᠲᠠ ᠬᠠᠮᠣᠬ ᠣᠯᠠᠨ ᠳ᠋ᠠᠭᠠᠨ 13000 ᠶ᠋ᠢ ᠲᠠᠪᠠᠬ᠍ᠰᠠᠨ ᠶᠡᠬᠡ ᠠᠮᠵᠢᠯᠲᠠ ᠪᠡᠷ ᠨᠠᠢ᠌ᠷᠠᠭᠣᠯᠣᠬ᠍ᠴᠢᠳᠤᠨᠶ᠋ᠢᠡᠨ ᠠᠵᠢᠯᠤᠨ ᠶᠠᠲᠠᠷᠠᠭᠠᠶ᠋ᠢ ᠣᠬᠢᠶᠠᠨ ᠲᠠᠢ᠌ᠪᠣᠱᠢᠷᠠᠭᠣᠯᠵᠦ᠍ ᠪᠠᠢ᠌ᠬ᠍ᠰᠠᠨ ᠪᠣᠯ ᠶᠡᠷᠡᠭᠡᠳ ᠤᠨ ᠪᠣᠯᠵᠦ ᠵᠠᠬᠠ ᠲᠡᠯᠭᠡᠬᠦᠷᠤᠨ ᠠᠵᠦ ᠠᠬᠣᠢᠶᠢᠨ ᠲᠦᠷᠢᠯᠲᠡ᠂ ᠴᠠᠭᠠᠰᠣ ᠪᠣᠯᠣᠨ ᠬᠡᠪᠯᠡᠯᠤᠨ ᠦᠨᠡᠶᠢᠨ ᠦᠰᠦᠯᠲᠡ ᠵᠢᠴᠢ ᠣᠩᠰᠢᠬᠴᠢᠳᠤᠨ ᠬᠡᠷᠡᠭᠴᠡᠭᠡ ᠱᠠᠭᠠᠷᠲᠠᠯᠭᠠᠶᠢᠨ ᠣᠯᠠᠨ ᠶᠠᠩᠵᠦᠲᠦ ᠬᠣᠪᠢᠷᠠᠯᠲᠠᠶᠢ ᠲᠠᠭᠠᠯᠲᠣᠨ ᠵᠠᠬᠠ ᠵᠡᠭᠡᠯᠢᠶ᠋ᠢᠨ ᠵᠢᠮᠠ ᠬᠠᠣᠯᠢᠶᠢ ᠲᠠᠨᠢᠵᠦ᠍ ᠡᠵᠡᠮᠱᠢᠨ ᠬᠦᠭᠵᠢᠬᠦ ᠱᠠᠭᠠᠷᠲᠠᠯᠭᠠ ᠲᠣᠯᠭᠠᠷᠠᠵᠠᠢ᠃ ᠡᠢᠨᠬᠦ ᠰᠡᠳᠬᠦᠯᠤᠨ ᠬᠡᠪ ᠨᠠᠮᠪᠠ ᠪᠠᠨ ᠪᠠᠷᠢᠮᠲᠠᠯᠠᠬᠰᠠᠨ ᠣᠷᠢᠲᠠᠯ ᠲᠣᠣᠷᠠ ᠰᠡᠳᠬᠦᠯᠤᠨ ᠴᠠᠭᠠᠰᠣᠶ᠋ᠢ ᠰᠣᠯᠢᠵᠦ᠂ ᠰᠠᠢ᠌ᠨ ᠴᠢᠨᠠᠷᠤᠨ ᠴᠠᠭᠠᠰᠣ ᠪᠣᠯᠭᠠᠬᠣᠶ᠋ᠢᠨ ᠲᠠᠭᠠᠣ᠂ ᠠᠭᠣᠯᠭᠠ ᠬᠡᠯᠪᠡᠷᠢ ᠳ᠋ᠡᠭᠡᠨ ᠵᠣᠬᠢᠬᠣ ᠲᠣᠬᠢᠷᠠᠭᠣᠯᠣᠯᠲᠠ ᠬᠢᠵᠦ᠍ ᠣᠩᠱᠢᠬ᠍ᠴᠢᠳᠤᠨ ᠣᠷᠣᠯᠴᠠᠯᠭᠠᠶ᠋ᠢ ᠨᠡᠮᠡᠭ᠌ᠲᠡᠬᠦᠯᠬᠦ᠌ ᠪᠡᠷ ᠲᠠᠮᠵᠢᠨ ᠵᠠᠬᠠ ᠲᠡᠯᠭᠡᠬᠦᠷᠤᠨ ᠨᠦᠯᠦᠭᠡᠶ᠋ᠢ ᠠᠷᠭᠠᠴᠠᠭᠠᠬᠣ ᠣᠯᠠᠨ ᠠᠷᠭᠠ ᠬᠡᠮᠵᠢᠶᠡ ᠠᠪᠴᠠᠢ᠃ 2005 ᠤᠨᠤ ᠨᠢᠭᠡᠲᠦᠭᠡᠷ ᠬᠣᠭᠣᠴᠠᠭᠠ ᠡᠴᠡ ᠡᠬᠢᠯᠡᠨ ᠰᠡᠳᠬᠦᠯ ᠨᠢ 《ᠲᠠᠯᠲᠠ ᠣᠷᠣᠰᠭᠠᠯ》᠂ 《ᠣᠷᠠᠨ ᠪᠦᠲᠦᠭᠡᠯᠤᠨ ᠠᠯᠲᠠᠨ ᠬᠣᠷᠣᠮ》᠂ 《ᠴᠠᠬᠢᠮ ᠰᠣᠷᠪᠣᠯᠵᠢᠯᠠᠭᠠ》᠂ 《 ᠱᠢᠨᠠ ᠱᠢᠬᠦᠮᠵᠢᠯᠡᠯ》 ᠮᠡᠲᠦ᠍ᠶ᠋ᠢᠨ ᠣᠩᠱᠢᠬ᠍ᠴᠢᠳᠤᠨ ᠣᠷᠣᠯᠴᠠᠯᠭᠠ ᠲᠠᠢ ᠵᠢᠵᠢᠭ ᠪᠣᠯᠣᠩ ᠭᠠᠷᠭᠠᠬᠣᠶ᠋ᠢᠨ ᠲᠠᠭᠠᠣ 2005 ᠤᠨᠤ ᠪᠦᠬᠦᠯᠢ ᠵᠢᠯᠶ᠋ᠢᠡᠷ ᠴᠣᠯᠮᠣᠨ ᠰᠡᠳᠬᠦᠯᠤᠨ ᠠᠵᠠᠲᠠᠢ ᠣᠩᠱᠢᠬ᠍ᠴᠢᠳᠤᠨ ᠱᠠᠩᠨᠠᠯᠲᠣ ᠠᠵᠢᠯᠯᠠᠭᠠᠶ᠋ᠢ ᠡᠷᠬᠢᠯᠡᠭ᠌ᠰᠨᠨᠶ᠋ᠢᠡᠷ ᠪᠠᠷᠠᠬᠣ ᠦᠭᠡᠢ ᠬᠦᠬᠡᠬᠣᠲᠠᠶ᠋ᠢᠨ ᠶᠡᠬᠡ ᠲᠡᠭᠡᠲᠦ ᠰᠣᠷᠭᠠᠭᠣᠯᠢ ᠨᠣᠭᠣᠳ ᠪᠠ ᠠᠯᠪᠠᠨ ᠪᠠᠢ᠌ᠭᠣᠯᠭᠠᠶ᠋ᠢᠨ ᠠᠵᠢᠯᠲᠠᠳᠤᠨ ᠲᠣᠮᠲᠠ 《ᠴᠣᠯᠮᠣᠨ》 ᠰᠡᠳᠬᠦᠯᠶ᠋ᠢᠡᠨ ᠵᠠᠬᠢᠶᠠᠯᠠᠵᠦ᠍ ᠲᠣᠲᠣᠨᠣ ᠬᠦᠮᠦᠰ ᠲᠡᠭᠡᠨ ᠬᠦᠷᠭᠡᠬᠦ᠌ ᠠᠵᠢᠯᠯᠠᠭᠠ ᠦᠷᠨᠢᠬᠦᠯᠵᠡᠢ᠃ ᠡᠬᠦᠨᠤ ᠬᠠᠮᠲᠣ ᠪᠠᠰᠠ ᠵᠣᠬᠢᠶᠠᠬ᠍ᠴᠢᠳᠤᠨᠶ᠋ᠢᠡᠨ ᠵᠣᠬᠢᠶᠠᠨ ᠪᠦᠲᠦᠭᠡᠬᠦ᠌ ᠢᠲᠡᠪᠬᠢᠵᠢᠯᠢ ᠲᠠᠢ᠌ᠴᠢᠯᠠᠬᠣ᠂ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠪᠣᠯᠣᠨ ᠰᠡᠳᠬᠦᠯᠤᠨᠶ᠋ᠢᠡᠨ ᠨᠠᠢ᠌ᠷᠠᠭᠣᠯᠭᠠ ᠬᠠᠷᠭᠣᠭᠣᠯᠭᠠᠶ᠋ᠢᠨ ᠴᠢᠨᠠᠷ ᠴᠢᠨᠰᠠᠭᠠᠶ᠋ᠢ ᠲᠡᠭᠡᠭ᠌ᠰᠢᠯᠡᠬᠦᠯᠬᠦ᠌ ᠲᠠᠯᠠ ᠪᠡᠷ ᠬᠦᠴᠦ ᠲᠠᠯᠪᠢᠵᠦ᠂ ᠰᠣᠲᠣᠯᠣᠨ ᠶᠠᠷᠢᠯᠴᠠᠬᠣ ᠬᠣᠷᠠᠯ ᠪᠣᠶᠣ ᠦᠵᠦᠭᠤᠨ ᠴᠢᠭᠣᠯᠭᠠᠨ᠂ ᠡᠬᠡ ᠪᠢᠴᠢᠭ ᠡᠯᠰᠡᠬᠦ ᠱᠠᠩᠨᠠᠯᠲᠣ ᠣᠷᠣᠯᠲᠣᠭᠠᠨ ᠡᠷᠬᠢᠯᠡᠬᠦ ᠵᠡᠷᠭᠡ ᠬᠡᠯᠪᠡᠷᠢ ᠪᠡᠷ ᠲᠠᠮᠵᠢᠭᠣᠯᠣᠨ ᠣᠩᠰᠢᠬᠴᠢ᠂ ᠵᠣᠬᠢᠶᠠᠬᠴᠢ᠂ ᠨᠠᠢᠷᠠᠭᠣᠯᠣᠬᠴᠢ ᠭᠡᠬᠦ ᠰᠡᠳᠬᠦᠯᠤᠨ ᠲᠣᠯᠭᠠᠶᠢᠨ ᠭᠣᠷᠪᠠᠨ ᠴᠢᠯᠠᠭᠣ ᠪᠠᠨ ᠭᠠᠩᠨᠠᠵᠦ ᠪᠡᠬᠢᠯᠡᠭᠰᠨᠨ ᠪᠠᠢᠨᠠ᠃
1999 ᠤᠨ ᠳ᠋ᠦ᠍ 《ᠴᠣᠯᠮᠣᠨ》 ᠰᠡᠳᠬᠦᠯᠤᠨ ᠨᠠᠢᠷᠠᠭᠣᠯᠬᠣ ᠬᠡᠯᠲᠡᠰᠤᠨ ᠬᠢᠨ《〈ᠴᠣᠯᠮᠣᠨ〉 ᠣᠷᠠᠨ ᠵᠣᠬᠢᠶᠠᠯᠤᠨ ᠲᠡᠭᠡᠵᠢ ᠪᠢᠴᠢᠭ》 ᠢ᠋ ᠰᠡᠳᠦᠨ ᠰᠠᠨᠠᠭᠠᠴᠢᠯᠠᠵᠦ᠂ ᠰᠡᠳᠬᠦᠯ ᠳ᠋ᠦ ᠨᠡᠢᠲᠡᠯᠡᠭᠰᠡᠨ ᠰᠢᠯᠢᠲᠡᠭ ᠰᠣᠲᠣᠨ ᠪᠦᠲᠦᠭᠡᠯᠢ ᠡᠮᠬᠢᠯᠡᠨ ᠲᠢᠭᠯᠡᠵᠦ ᠨᠣᠮ ᠪᠣᠯᠭᠠᠨ ᠲᠡᠬᠦᠪᠦᠷᠢᠯᠡᠵᠦ᠂ ᠢᠷᠠᠭᠣ ᠨᠠᠢ᠌ᠷᠠᠬ᠂ ᠦᠬᠦᠯᠡᠯᠭᠡ᠂ ᠲᠣᠭᠣᠵᠢᠶ᠋ᠢᠨ ᠱᠢᠯᠢᠲᠡᠭ ᠪᠦᠲᠦᠭᠡᠯᠤ᠋ᠤᠨᠢ ᠭᠣᠷᠪᠠᠨ ᠪᠣᠲᠢ ᠪᠣᠯᠭᠠᠨ ᠬᠡᠪᠯᠡᠬᠦᠯᠵᠠᠢ᠃ ᠡᠨᠡ ᠨᠢ ᠦᠩᠭᠡᠷᠡᠭᠰᠡᠨᠤ ᠰᠡᠳᠬᠦᠯ ᠬᠢᠭᠡᠳ ᠨᠣᠮ ᠬᠡᠪᠯᠡᠯ ᠬᠠᠷᠢᠴᠠᠩᠭᠣᠢ ᠲᠣᠰᠠᠭᠠᠷ ᠬᠡᠨ ᠠᠯᠢᠨ ᠳ᠋ᠠᠭᠠᠨ ᠬᠠᠮᠢᠶᠠᠲᠠᠬᠣ ᠦᠭᠡᠢ ᠪᠠᠢᠬᠰᠠᠨ ᠪᠠᠢᠲᠠᠯᠢ ᠡᠴᠦᠰᠯᠡᠬᠦᠯᠵᠦ᠂ ᠨᠣᠮ ᠰᠡᠳᠬᠦᠯᠢ ᠬᠣᠷᠰᠢᠨ ᠣᠶᠠᠯᠲᠣᠭᠣᠯᠵᠦ᠂ ᠰᠡᠳᠬᠦᠯ ᠶ᠋ᠢᠡᠷ ᠬᠡᠪᠯᠡᠯᠤᠨ ᠡᠬᠢ ᠪᠠᠶᠠᠯᠢᠬᠢ ᠨᠡᠭᠡᠭᠡᠵᠦ᠂ ᠨᠣᠮ ᠶ᠋ᠢᠡᠷ ᠰᠡᠳᠬᠦᠯᠤᠨ ᠣᠷᠣᠨ ᠵᠠᠢᠶᠢ ᠲᠡᠯᠡᠵᠦ᠂ ᠣᠩᠰᠢᠬᠴᠢᠳᠤᠨ ᠬᠠᠯᠠᠭᠣᠨ ᠬᠦᠷᠢᠶᠡᠯᠡᠯᠢ ᠣᠯᠵᠠᠢ᠃
ᠡᠬᠦᠨᠤ ᠰᠠᠭᠣᠷᠢᠨ ᠲᠡᠭᠡᠷᠡ 《ᠴᠣᠯᠮᠣᠨ》 ᠰᠡᠳᠬᠦᠯᠤᠨ ᠨᠠᠢᠷᠠᠭᠣᠯᠬᠣ ᠬᠡᠯᠲᠡᠰᠤᠨ ᠬᠢᠨ ᠨᠣᠮ ᠪᠢᠴᠢᠭ ᠣᠬᠠᠭᠠᠯᠠᠵᠦ ᠲᠦᠰᠦᠪᠯᠡᠬᠦ ᠲᠦᠷᠦᠯ ᠵᠦᠢᠯ ᠶ᠋ᠢᠡᠨ ᠴᠢᠩᠭᠠᠳᠬᠠᠨ᠂ 2014 ᠤᠨ ᠳ᠋ᠦ᠍ 《ᠴᠣᠯᠮᠣᠨ ᠲᠡᠭᠡᠵᠢ ᠪᠢᠴᠢᠭ·ᠰᠣᠩᠭᠣᠲᠠᠬ ᠪᠦᠲᠦᠭᠡᠯᠤᠨ ᠣᠷᠴᠢᠭᠣᠯᠭᠠ》 ᠬᠡᠮᠡᠬᠦ᠌ ᠢᠵᠢ ᠨᠣᠮᠢ ᠲᠦᠰᠦᠪᠯᠡᠨ ᠬᠡᠪᠯᠡᠬᠦᠯᠵᠦ᠂ 《ᠡᠩ ᠶᠢᠷᠲᠢᠨᠴᠦ》᠂《ᠲᠠᠩᠱᠠᠨᠤ ᠶᠡᠬᠡ ᠭᠠᠵᠠᠷ ᠬᠦᠲᠡᠯᠦᠯᠲᠡ》᠂ 《 ᠬᠦᠮᠦᠨᠤ ᠶᠢᠷᠲᠢᠨᠴᠦ ᠳ᠋ᠦ 》᠂ 《 ᠴᠠᠭᠠᠨ ᠪᠣᠭᠣᠲᠣᠶᠢᠨ ᠰᠢᠯᠢ》 ᠵᠡᠷᠭᠡ 《ᠴᠣᠯᠮᠣᠨ》 ᠰᠡᠳᠬᠦᠯ ᠳ᠋ᠦ ᠨᠡᠢᠲᠡᠯᠡᠬᠦᠯᠦᠭᠰᠡᠨ 14 ᠣᠷᠴᠢᠭᠣᠯᠭᠠᠶᠢᠨ ᠪᠦᠲᠦᠭᠡᠯᠢ ᠬᠠᠮᠣᠷᠣᠨ ᠪᠠᠬᠲᠠᠭᠠᠵᠦ᠂ ᠲᠣᠮᠲᠠᠲᠣᠶᠢᠨ ᠦᠨᠳᠦᠰᠦᠲᠡᠨᠤ ᠦᠪ ᠰᠣᠶᠣᠯ ᠪᠣᠯᠣᠨ ᠣᠷᠠᠨ ᠵᠣᠬᠢᠶᠠᠯᠤᠨ ᠦᠨᠢᠷ ᠰᠠᠩᠢ ᠣᠩᠰᠢᠬᠴᠢᠳ ᠲᠦ᠍ ᠮᠡᠳᠡᠷᠡᠬᠦᠯᠬᠦ ᠭᠡᠭᠡᠪᠴᠢᠶᠢ ᠨᠡᠭᠡᠭᠡᠪᠠ᠃
2015 ᠤᠨ ᠳ᠋ᠦ᠍ 《ᠴᠣᠯᠮᠣᠨ ᠲᠡᠭᠡᠵᠢ ᠪᠢᠴᠢᠭ· ᠭᠠᠲᠠᠭᠠᠲᠣ ᠣᠷᠠᠨ ᠵᠣᠬᠢᠶᠠᠯ》 ᠢ᠋ ᠲᠦᠰᠦᠪᠯᠡᠨ ᠬᠡᠪᠯᠡᠬᠦᠯᠵᠦ᠂ 《ᠬᠣᠪᠢ ᠵᠠᠶᠠᠭᠠᠨᠤ ᠴᠠᠲᠢᠬ》᠂ 《ᠠᠯᠠᠬ ᠵᠢᠷᠠᠨᠤ ᠪᠣᠲᠣᠷᠣᠣᠯ》᠂ 《 ᠡᠵᠢ ᠳ᠋ᠡᠭᠡᠨ ᠵᠠᠬᠢᠲᠠᠯ ᠪᠢᠴᠢᠭᠡᠷᠡᠢ》 ᠭᠡᠬᠦ ᠮᠡᠲᠦᠶᠢᠨ 11 ᠰᠣᠩᠭᠣᠲᠠᠬ ᠪᠦᠲᠦᠭᠡᠯᠢ ᠪᠠᠭᠲᠠᠭᠠᠵᠠᠢ᠃
2016 ᠤᠨ ᠳ᠋ᠦ ᠦᠷᠬᠦᠯᠵᠢᠯᠡᠨ 《ᠴᠣᠯᠮᠣᠨ ᠲᠡᠭᠡᠵᠢ ᠪᠢᠴᠢᠭ·ᠦᠪᠦᠷ ᠮᠣᠩᠭᠣᠯ ᠣᠷᠠᠨ ᠵᠣᠬᠢᠶᠠᠯ》 ᠪᠣᠯᠣᠨ《ᠴᠣᠯᠮᠣᠨ ᠲᠡᠭᠡᠵᠢ ᠪᠢᠴᠢᠭ·ᠪᠠᠷᠲᠠᠭᠠ ᠬᠠᠢᠬᠴᠢᠳᠤᠨ ᠲᠡᠮᠲᠡᠭᠯᠡᠯ》 ᠢ᠋ ᠲᠦᠰᠦᠪᠯᠡᠨ ᠬᠡᠪᠯᠡᠬᠦᠯᠵᠦ᠂ 《ᠰᠡᠷᠢᠬᠦᠭᠡᠨ ᠲᠠᠯᠠ ᠨᠣᠲᠣᠬ》᠂ 《ᠲᠡᠭᠷᠢ ᠠᠭᠣᠯᠠᠶᠢᠨ ᠬᠦᠬᠡ ᠣᠬᠲᠠᠷᠭᠣᠢ ᠡᠴᠡ ᠠᠰᠠᠭᠣᠬᠣᠢ》᠂ 《ᠰᠠᠭᠠᠬᠤᠨ ᠬᠣᠸᠠᠷ ᠲᠡᠯᠭᠡᠷᠡᠭᠰᠡᠨ ᠰᠠᠷᠠ ᠲᠠᠢ ᠰᠠᠷᠠ ᠦᠭᠡᠢ ᠬᠣᠨᠣᠬᠤ᠋ᠤᠨ》 ᠵᠡᠷᠭᠡ ᠪᠦᠲᠦᠭᠡᠯᠢ ᠪᠠᠬᠲᠠᠭᠠᠵᠦ᠂ ᠮᠣᠩᠭᠣᠯ ᠬᠡᠯᠡᠨᠤ ᠷᠣᠮᠠᠨ ᠵᠣᠬᠢᠶᠠᠨ ᠪᠦᠲᠦᠭᠡᠯᠭᠡᠶᠢᠨ ᠬᠠᠮᠣᠬ ᠦᠨᠳᠦᠷ ᠲᠦᠪᠰᠢᠨᠢ ᠲᠦᠪᠯᠡᠷᠡᠬᠦᠯᠦᠨ ᠬᠠᠷᠠᠭᠣᠯᠵᠦ᠂ ᠦᠪᠦᠷ ᠮᠣᠩᠭᠣᠯᠤᠨ ᠦᠪᠡᠷᠮᠢᠴᠡ ᠪᠠᠢᠭᠠᠯᠢᠶᠢᠨ ᠦᠵᠡᠮᠵᠢ ᠪᠣᠯᠣᠨ ᠵᠠᠩ ᠦᠢᠯᠡ ᠰᠣᠶᠣᠯᠢ ᠲᠣᠰᠬᠠᠨ ᠬᠠᠷᠠᠭᠣᠯᠣᠬᠰᠠᠨ ᠪᠠᠢᠨᠠ᠃
2017 ᠤᠨ ᠳ᠋ᠦ ᠴᠣᠯᠮᠣᠨ ᠲᠡᠭᠡᠵᠢ ᠪᠢᠴᠢᠭ· ᠰᠣᠩᠭᠣᠲᠠᠬ ᠪᠦᠲᠦᠭᠡᠯᠤᠨ ᠦᠪ ᠰᠠᠩ》 ᠴᠣᠪᠣᠷᠠᠯ ᠪᠢᠴᠢᠭ ᠲᠦ᠍ 《ᠴᠣᠯᠮᠣᠨ》 ᠰᠡᠳᠬᠦᠯ ᠬᠡᠪᠯᠡᠯ ᠡᠬᠢᠯᠡᠭᠰᠡᠨ ᠡᠴᠡ ᠨᠠᠭᠠᠰᠢᠬᠢ ᠬᠠᠮᠣᠬ ᠡᠴᠡ ᠨᠦᠯᠦᠭᠡᠯᠡᠬᠦ ᠬᠦᠴᠦᠨ ᠪᠦᠬᠦᠢ 《 ᠡᠷᠬᠢᠬᠦ ᠬᠣᠷᠸᠠᠶᠢᠨ ᠵᠢᠮᠠ》᠂ 《ᠬᠣᠢᠲᠣ ᠨᠠᠰᠣᠨ ᠳ᠋ᠠᠭᠠᠨ ᠣᠴᠠᠷᠠᠨᠠ》 ᠵᠡᠷᠭᠡ 10 ᠷᠣᠮᠠᠨᠢ ᠡᠮᠬᠢᠯᠡᠨ ᠬᠡᠪᠯᠡᠬᠦᠯᠵᠦ᠂ ᠮᠣᠩᠭᠣᠯ ᠣᠷᠠᠨ ᠵᠣᠬᠢᠶᠠᠯᠤᠨ ᠦᠪ ᠰᠠᠩᠢ ᠭᠠᠢᠬᠠᠭᠣᠯᠵᠦ᠂ ᠣᠮᠠᠷᠠᠲᠣ ᠬᠢᠯᠢᠶᠢᠨ ᠰᠣᠶᠣᠯᠤᠨ ᠪᠠᠢᠭᠣᠯᠣᠯᠲᠠᠶᠢ ᠠᠬᠢᠭᠣᠯᠣᠨ᠂ ᠣᠷᠣᠨ ᠨᠣᠲᠣᠬᠤᠨ ᠵᠣᠬᠢᠶᠠᠯᠴᠢᠳᠢ ᠬᠦᠮᠦᠵᠢᠬᠦᠯᠬᠦ ᠳ᠋ᠦ ᠢᠲᠡᠪᠬᠢ ᠦᠢᠯᠡᠲᠦᠯ ᠦᠵᠡᠬᠦᠯᠦᠭᠰᠡᠨ ᠪᠠᠢᠨᠠ᠃
2018 ᠤᠨ ᠡᠴᠡ ᠡᠬᠢᠯᠡᠵᠦ ᠪᠠᠰᠠ 《ᠴᠣᠯᠮᠣᠨ ᠲᠡᠭᠡᠵᠢ ᠪᠢᠴᠢᠭ· ᠰᠣᠲᠣᠨ ᠲᠣᠭᠣᠵᠢᠶᠢᠨ ᠰᠣᠩᠭᠣᠮᠠᠯ》᠂ 《ᠴᠣᠯᠮᠣᠨ ᠲᠡᠭᠡᠵᠢ ᠪᠢᠴᠢᠭ· ᠬᠡᠦᠬᠡᠳᠤᠨ ᠣᠷᠠᠨ ᠵᠣᠬᠢᠶᠠᠯ》 ᠂ 《 ᠴᠣᠯᠮᠣᠨ ᠲᠡᠭᠡᠵᠢ ᠪᠢᠴᠢᠭ· ᠰᠣᠲᠣᠨ ᠦᠬᠦᠯᠡᠯᠭᠡᠶᠢᠨ ᠰᠢᠯᠢᠮᠡᠯ》᠂《ᠴᠣᠯᠮᠣᠨ ᠲᠡᠭᠡᠵᠢ ᠪᠢᠴᠢᠭ· ᠲᠣᠮᠲᠠᠲᠣ ᠣᠯᠣᠰᠤᠨ ᠮᠣᠩᠭᠣᠯ ᠣᠷᠠᠨ ᠵᠣᠬᠢᠶᠠᠯ》 ᠵᠡᠷᠭᠡ ᠢᠵᠢ ᠨᠣᠮ ᠤ᠋ᠤᠨᠢ ᠬᠡᠪᠯᠡᠬᠦᠯᠦᠨ ᠲᠠᠷᠬᠠᠭᠠᠵᠦ᠂ ᠡᠳᠦᠭᠡ ᠪᠣᠯᠬᠣ ᠳ᠋ᠦ 《ᠴᠣᠯᠮᠣᠨ ᠲᠡᠭᠡᠵᠢ ᠪᠢᠴᠢᠭ》 ᠨᠢ ᠨᠡᠢᠲᠡ 10 ᠴᠣᠪᠣᠷᠠᠯ ᠨᠣᠮ᠂ 135 ᠪᠣᠳᠢ ᠳ᠋ᠦ ᠬᠦᠷᠴᠡᠢ᠃ ᠡᠳᠡᠭᠡᠷ ᠣᠯᠠᠨ ᠴᠣᠪᠣᠷᠠᠯ ᠨᠣᠮ ᠨᠢ 《ᠴᠣᠯᠮᠣᠨ》 ᠰᠡᠳᠬᠦᠯᠤᠨ ᠰᠢᠯᠢᠲᠡᠭ ᠵᠣᠬᠢᠶᠠᠯ ᠪᠦᠲᠦᠭᠡᠯᠢ ᠰᠡᠳᠬᠦᠯ ᠡᠴᠡ ᠯᠠᠪᠰᠢᠷᠠᠭᠣᠯᠣᠨ ᠨᠣᠮᠤᠨ ᠲᠠᠯᠪᠢᠭᠣᠷ ᠲᠦ᠍ ᠬᠦᠷᠭᠡᠵᠦ᠂ ᠣᠷᠠᠨ ᠵᠣᠬᠢᠶᠠᠯᠤᠨ 《ᠴᠣᠯᠮᠣᠨ》 ᠰᠡᠳᠬᠦᠯᠢ 《ᠰᠡᠳᠬᠦᠯ᠂ ᠨᠣᠮ᠂ ᠬᠦᠮᠦᠷᠭᠡ》 ᠵᠡᠷᠭᠡ ᠶ᠋ᠢ ᠬᠠᠮᠣᠷᠣᠬᠰᠠᠨ ᠣᠷᠠᠨ ᠵᠣᠬᠢᠶᠠᠯᠤᠨ ᠲᠣᠮᠣ ᠲᠠᠪᠴᠠᠩ ᠪᠣᠯᠭᠠᠵᠦ᠂ ᠰᠡᠳᠬᠦᠯ ᠶ᠋ᠢᠡᠷ ᠲᠠᠮᠵᠢᠨ ᠰᠢᠯᠢᠲᠡᠭ ᠪᠦᠲᠦᠭᠡᠯ ᠪᠣᠯᠣᠨ ᠵᠣᠬᠢᠶᠠᠬᠴᠢᠶᠢ ᠢᠯᠡᠷᠡᠬᠦᠯᠬᠦ᠂ ᠨᠣᠮ ᠪᠢᠴᠢᠭ ᠶ᠋ᠢᠡᠷ ᠲᠠᠮᠵᠢᠭᠣᠯᠣᠨ ᠵᠣᠬᠢᠶᠠᠯ ᠪᠦᠲᠦᠭᠡᠯᠤᠨ ᠨᠦᠯᠦᠭᠡ ᠠᠯᠲᠠᠷᠰᠢᠯᠢ ᠦᠷᠭᠡᠳᠭᠡᠵᠦ᠂ 《ᠵᠣᠬᠢᠶᠠᠨ ᠪᠦᠲᠦᠭᠡᠬᠦ — ᠨᠡᠢᠲᠡᠯᠡᠬᠦ — ᠲᠠᠮᠵᠢᠭᠣᠯᠬᠣ — ᠣᠯᠠᠮᠵᠢᠯᠠᠬᠣ 》 ᠪᠦᠷᠢᠨ ᠪᠦᠲᠦᠨ ᠲᠣᠬᠲᠠᠯᠴᠠᠭᠠᠶᠢ ᠪᠦᠷᠢᠯᠲᠦᠬᠦᠯᠵᠡᠢ᠃
ᠬᠦᠴᠢᠷᠢ ᠢᠯᠠᠬᠣ ᠬᠠᠮᠣᠬᠤᠨ ᠪᠦᠲᠦᠮᠵᠢᠲᠡᠢ ᠠᠷᠭᠠ ᠪᠣᠯ ᠦᠪᠡᠷᠢ ᠪᠠᠨ ᠬᠦᠴᠦᠷᠭᠡᠭ᠌ᠵᠢᠬᠦᠯᠬᠦ᠌ ᠬᠡᠷᠡᠭᠲᠡᠢ᠃ 《ᠴᠣᠯᠮᠣᠨ》 ᠰᠡᠳᠬᠦᠯᠤᠨ ᠬᠢᠨ ᠶᠠᠬ ᠢᠩᠬᠢᠵᠦ᠍ ᠵᠣᠬᠢᠶᠠᠬ᠍ᠴᠢ ᠪᠠ ᠵᠣᠬᠢᠶᠠᠯ ᠪᠦᠲᠦᠭᠡᠯ ᠡᠴᠡ ᠭᠠᠷᠲᠠᠵᠦ᠍᠂ ᠡᠭᠡ ᠪᠢᠴᠢᠭᠤᠨ ᠰᠡᠲᠦᠪ᠂ ᠠᠭᠣᠯᠭᠠ ᠣᠷᠠᠯᠢᠬᠢ ᠴᠢᠬᠣᠯᠠᠴᠢᠯᠠᠨ ᠵᠣᠬᠢᠶᠠᠯ ᠰᠣᠩᠭᠣᠬᠣ ᠪᠠ ᠨᠠᠢ᠌ᠷᠠᠭᠣᠯᠵᠦ᠍ ᠬᠠᠷᠭᠣᠭᠣᠯᠬᠣ ᠲᠠᠯᠠ ᠪᠡᠷ ᠬᠦᠴᠦ᠍ ᠲᠠᠯᠪᠢᠬ᠍ᠰᠠᠨ ᠡᠴᠡ ᠮᠣᠩᠭᠣᠯ ᠰᠡᠳᠬᠦᠯᠤ᠋ᠤᠨᠤᠨ ᠲᠣᠲᠣᠷᠠ ᠪᠠᠨ ᠨᠡᠷᠡ ᠨᠦᠯᠦᠭᠡ ᠲᠠᠢ ᠪᠣᠯᠵᠦ᠍᠂ ᠣᠷᠢᠳ ᠬᠣᠵᠢᠳ ᠲᠣᠮᠲᠠᠲᠣ ᠣᠯᠣᠰᠤᠨ ᠮᠣᠩᠭᠣᠯ ᠰᠡᠳᠬᠦᠯᠤᠨ ᠬᠣᠷᠠᠯᠤᠨ ᠨᠠᠢᠷᠠᠭᠣᠯᠭᠠ ᠬᠠᠷᠭᠣᠭᠣᠯᠭᠠᠶ᠋ᠢᠨ ᠲᠡᠷᠢᠬᠦᠨ ᠱᠠᠩᠨᠠᠯ᠂ ᠲᠠᠪᠣᠲᠣᠭᠠᠷ ᠬᠣᠭᠣᠴᠠᠭᠠᠨᠤ ᠣᠮᠠᠷᠠᠲᠣ ᠣᠷᠣᠨᠤ ᠠᠷᠪᠠᠨ ᠰᠣᠲᠣᠨ ᠰᠡᠳᠬᠦᠯᠤᠨ ᠱᠠᠩᠨᠠᠯ ᠪᠠ ᠦᠪᠡᠷᠲᠡᠭᠡᠨ ᠵᠠᠰᠠᠬᠣ ᠣᠷᠣᠨᠤ ᠠᠩᠬᠠᠲᠣᠭᠠᠷ ᠬᠣᠭᠣᠴᠠᠭᠠᠨᠤ ᠦᠪᠦᠷ ᠮᠣᠩᠭᠣᠯᠤᠨ ᠬᠣᠭᠣᠴᠠᠭᠠᠲᠣ ᠰᠡᠳᠬᠦᠯᠤᠨ ᠱᠠᠩᠨᠠᠯ᠂ ᠵᠢᠷᠭᠣᠲᠣᠭᠠᠷ ᠬᠣᠭᠣᠴᠠᠭᠠᠨᠤ ᠣᠮᠠᠷᠠᠲᠣ ᠣᠷᠣᠨᠤ ᠠᠷᠪᠠᠨ ᠰᠣᠲᠣᠨ ᠰᠡᠳᠬᠦᠯᠤᠨ ᠱᠠᠩᠨᠠᠯ ᠪᠠ ᠦᠪᠡᠷᠲᠡᠭᠡᠨ ᠵᠠᠰᠠᠬᠣ ᠣᠷᠣᠨᠤ ᠬᠣᠶᠠᠲᠣᠭᠠᠷ ᠬᠣᠭᠣᠴᠠᠭᠠᠨᠤ ᠦᠪᠦᠷ ᠮᠣᠩᠭᠣᠯᠤᠨ ᠬᠣᠭᠣᠴᠠᠭᠠᠲᠣ ᠰᠡᠳᠬᠦᠯᠤᠨ ᠱᠠᠩᠨᠠᠯ᠂ ᠦᠪᠦᠷ ᠮᠣᠩᠭᠣᠯᠤᠨ ᠨᠣᠮ ᠪᠢᠴᠢᠭᠰᠡᠳᠬᠦᠯ ᠰᠣᠨᠢᠨᠤ ᠨᠠᠢ᠌ᠷᠠᠭᠣᠯᠭᠠ ᠬᠠᠷᠭᠣᠭᠣᠯᠭᠠᠶ᠋ᠢᠨ ᠴᠢᠨᠠᠷᠤᠨ ᠱᠢᠯᠭᠠᠷᠠᠭᠣᠯᠣᠯᠲᠠᠶ᠋ᠢᠨ ᠮᠠᠩᠯᠠᠢ ᠱᠠᠩᠨᠠᠯᠢ ᠲᠣᠰᠣᠬ᠍ᠰᠠᠨ ᠪᠠᠢᠨᠠ᠃ 《ᠴᠣᠯᠮᠣᠨ》 ᠰᠡᠳᠬᠦᠯᠤᠨ ᠨᠠᠢ᠌ᠷᠠᠭᠣᠯᠣᠬ᠍ᠴᠢᠳ ᠴᠦ᠍ ᠮᠣᠩᠭᠣᠯ ᠰᠡᠳᠬᠦᠯᠤᠨ ᠬᠠᠮᠵᠢᠯᠴᠠᠬᠣ ᠬᠣᠷᠠᠯᠤᠨ ᠱᠢᠯᠢᠲᠡᠭ ᠨᠠᠢ᠌ᠷᠠᠭᠣᠯᠣᠬ᠍ᠴᠢ᠂ ᠭᠠᠪᠢᠶᠠᠲᠣ ᠨᠠᠢ᠌ᠷᠠᠭᠣᠯᠣᠬ᠍ᠴᠢ ᠂ ᠦᠪᠦᠷ ᠮᠣᠩᠭᠣᠯᠤᠨ ᠠᠷᠪᠠᠨ ᠰᠣᠲᠣᠨ ᠨᠠᠢ᠌ᠷᠠᠭᠣᠯᠣᠬ᠍ᠴᠢ ᠵᠡᠷᠭᠡᠶ᠋ᠢᠨ ᠢᠷᠠᠭᠣ ᠠᠯᠲᠠᠷᠢ ᠣᠲᠠᠭᠠ ᠲᠠᠷᠠᠭᠠᠯᠠᠨ ᠲᠣᠰᠴᠠᠢ ᠃
ᠵᠢᠩ ᠲᠠᠢ ᠬᠦᠨᠳᠦᠴᠡ ᠲᠠᠢ 《ᠴᠣᠯᠮᠣᠨ》 ᠤ᠋ ᠵᠢᠬᠦᠷ ᠲᠠᠢ ᠮᠦᠷᠦᠭᠡᠳᠦᠯ ᠲᠠᠢ ᠢᠷᠡᠭᠡᠳᠦᠢ
《ᠴᠣᠯᠮᠣᠨ》 ᠰᠡᠳᠬᠦᠯᠤᠨ ᠡᠭᠡ ᠪᠢᠴᠢᠭᠤᠨ ᠬᠠᠩᠭᠠᠯᠭᠠ ᠪᠣᠯᠣᠨ ᠴᠢᠨᠠᠷ ᠴᠢᠨᠰᠠᠭᠠᠶ᠋ᠢᠨ ᠲᠡᠭᠡᠭ᠌ᠰᠢᠯᠡᠯᠲᠡ ᠨᠢ ᠵᠦᠪᠭᠡᠨ ᠡᠭᠡ ᠪᠢᠴᠢᠭ ᠡᠯᠰᠡᠬᠦ᠌ ᠳ᠋ᠦ᠍ ᠲᠦᠱᠢᠭᠯᠡᠵᠦ᠍᠂ ᠱᠠᠩᠨᠠᠯᠤᠨ ᠠᠮᠠᠯᠠᠯᠲᠠ ᠳ᠋ᠦ᠍ ᠨᠠᠢ᠌ᠲᠠᠨ ᠪᠡᠶᠡᠯᠡᠭ᠌ᠲᠡᠭ᠌ᠰᠡᠨ ᠪᠢᠰᠢ᠂ ᠬᠠᠷᠢᠨ ᠰᠡᠳᠬᠦᠯᠤᠨ ᠲᠠᠯᠠ ᠡᠴᠡ ᠠᠲᠠᠯᠢ ᠪᠣᠰᠣᠶ᠋ᠢᠨ ᠴᠠᠬ ᠬᠣᠭᠣᠴᠠᠭᠠᠨ ᠳ᠋ᠦ᠍ ᠮᠣᠩᠭᠣᠯ ᠣᠷᠠᠨ ᠵᠣᠬᠢᠶᠠᠯᠤᠨ ᠵᠣᠬᠢᠶᠠᠨ ᠪᠦᠲᠦᠭᠡᠯᠭᠡᠶ᠋ᠢᠨ ᠰᠡᠲᠦᠪ ᠰᠡᠲᠦᠪᠯᠡᠬᠦᠨᠤ ᠶᠡᠷᠦᠩᠭᠡᠢ ᠪᠠᠢ᠌ᠲᠠᠯ ᠬᠢᠭᠡᠳ ᠣᠷᠠᠯᠠᠬᠣ ᠡᠷᠲᠡᠮᠤᠨ ᠬᠠᠨᠲᠣᠯᠭᠠ ᠴᠢᠭ᠌ᠯᠡᠯᠢ ᠠᠩᠬᠠᠷᠣᠨ ᠰᠠᠨᠠᠭᠠᠴᠢᠯᠠᠭᠠ ᠲᠠᠢ ᠪᠡᠷ ᠲᠣᠲᠣᠷᠬᠠᠢ᠌ᠯᠠᠨ ᠵᠢᠯᠣᠭᠣᠳᠴᠦ᠍ ᠪᠠᠢ᠌ᠬ᠍ᠰᠠᠨ ᠭᠡᠲᠡᠭ ᠲᠦ᠍ ᠲᠣᠲᠣᠷᠬᠠᠢ᠃ ᠠᠯᠢ ᠡᠷᠳᠡ1983 ᠤᠨ ᠳ᠋ᠦ᠍ 《ᠴᠣᠯᠮᠣᠨ》 ᠰᠡᠳᠬᠦᠯ 《ᠦᠨᠳᠦᠰᠦᠲᠡᠨᠤ ᠪᠦᠯᠬᠦᠮᠲᠡᠯ》 ᠭᠡᠬᠦ ᠪᠣᠯᠣᠩ ᠭᠠᠷᠭᠠᠨ ᠵᠣᠬᠢᠶᠠᠬ᠍ᠴᠢᠶ᠋ᠢᠨ ᠬᠠᠷᠠᠭᠠ ᠪᠠ ᠵᠣᠬᠢᠶᠠᠨ ᠪᠦᠲᠦᠭᠡᠬᠦ᠌ ᠠᠵᠢᠯᠯᠠᠭᠠᠶ᠋ᠢ ᠱᠢᠷᠬᠠ ᠰᠣᠷᠪᠢᠶ᠋ᠢᠨ ᠣᠳᠭᠠ ᠵᠣᠬᠢᠶᠠᠯ ᠪᠣᠶᠣ ᠲᠣᠭᠠᠴᠢᠯ ᠵᠠᠭᠠᠯᠲᠣᠯᠭᠠᠶ᠋ᠢᠨ ᠣᠷᠠᠨ ᠵᠣᠬᠢᠶᠠᠯ ᠡᠴᠡ ᠡᠪᠯᠢᠭ᠌ᠭᠡᠨ ᠱᠢᠯᠵᠢᠬᠦᠯᠦᠭ᠌ᠰᠡᠨ ᠪᠦᠭᠡᠳ ᠲᠡᠭᠡᠷᠡ ᠵᠠᠭᠣᠨᠤ ᠶᠡᠷᠡᠭᠡᠳ ᠤᠨᠤ ᠡᠬᠢᠨ ᠳ᠋ᠦ᠍ ᠷᠣᠮᠠᠨ ᠲᠣᠭᠣᠵᠢᠶ᠋ᠢᠨ ᠰᠡᠲᠦᠪ ᠲᠡᠯᠡᠯᠲᠡ ᠦᠭᠡᠢ ᠪᠠᠢ᠌ᠭᠠ ᠪᠠᠢ᠌ᠲᠠᠯ ᠳ᠋ᠦ᠍ ᠴᠢᠭ᠌ᠯᠡᠬᠦᠯᠦᠨ᠂ ᠦᠭᠡᠷᠡᠴᠢᠯᠡᠯᠲᠡ ᠰᠡᠲᠦᠪᠲᠦ ᠲᠣᠭᠣᠵᠢᠶ᠋ᠢᠨ ᠣᠷᠣᠯᠲᠣᠭᠠᠨ ᠡᠷᠬᠢᠯᠡᠵᠦ᠂ ᠱᠢᠨᠠ ᠵᠠᠭᠣᠨ ᠳ᠋ᠦ᠍ ᠣᠷᠣᠬ᠍ᠰᠠᠨᠤ ᠲᠠᠷᠠᠭᠠ ᠦᠨᠳᠦᠰᠦᠨ ᠱᠠᠲᠣᠨᠤ ᠠᠬᠣᠢ ᠠᠮᠢᠲᠣᠷᠠᠯᠢ ᠲᠣᠰᠭᠠᠬ᠍ᠰᠠᠨ ᠪᠦᠲᠦᠭᠡᠯ ᠳ᠋ᠦ᠍ ᠨᠡᠢ᠌ᠭᠡᠮᠤᠨ ᠵᠦᠷᠢᠴᠡᠯᠢ ᠬᠢᠯᠪᠠᠷᠴᠢᠯᠠᠨ ᠵᠠᠬ᠍ᠪᠣᠷᠴᠢᠯᠠᠬ᠍ᠰᠠᠨ ᠦᠵᠡᠭ᠌ᠲᠡᠯ ᠨᠣᠴᠢᠲᠠᠢ ᠪᠣᠯᠣᠬ᠍ᠰᠠᠨ ᠦᠶᠡ ᠳ᠋ᠦ᠍ ᠣᠣᠭᠠᠯ ᠰᠣᠶᠣᠯ᠂ ᠲᠡᠦᠭᠡ ᠪᠣᠯᠣᠨ ᠬᠠᠢ᠌ᠷᠠᠶ᠋ᠢᠨ ᠰᠡᠲᠦᠪᠲᠦ ᠵᠣᠬᠢᠶᠠᠯᠢ ᠠᠩᠬᠠᠷᠣᠨ ᠡᠭᠡ ᠪᠢᠴᠢᠭ ᠡᠯᠰᠡᠬᠦ᠌ ᠠᠵᠢᠯᠯᠠᠭᠠᠶᠢᠨ ᠶ᠋ᠢᠡᠨ ᠭᠣᠣᠯᠲᠠᠯᠭᠠ ᠪᠣᠯᠭᠠᠬ᠍ᠰᠠᠨ ᠶᠣᠮ᠃ ᠡᠳᠡᠭᠡᠷ ᠪᠦᠬᠦᠨ ᠨᠢ ᠰᠡᠲᠦᠪᠤᠨ ᠬᠣᠪᠢ ᠳ᠋ᠦ᠍ ᠵᠣᠬᠢᠶᠠᠯᠴᠢᠳᠶ᠋ᠢᠡᠨ ᠣᠲᠣᠷᠢᠳᠴᠦ᠍ ᠪᠠᠢ᠌ᠬ᠍ᠰᠠᠨ ᠪᠣᠯ ᠬᠡᠪᠯᠡᠯ ᠡᠬᠢᠯᠡᠭ᠌ᠰᠨᠨ ᠲᠡᠷᠡ ᠴᠠᠬ ᠡᠴᠡ ᠪᠠᠨ ᠡᠬᠢᠯᠡᠵᠦ᠂ ᠣᠷᠠᠨ ᠵᠣᠬᠢᠶᠠᠯᠤᠨ ᠵᠣᠬᠢᠶᠠᠨ ᠪᠦᠲᠦᠭᠡᠯᠭᠡ ᠲᠠᠢ ᠬᠣᠯᠪᠣᠬ᠍ᠲᠠᠬ᠍ᠰᠠᠨ ᠣᠬᠠᠬ᠍ᠲᠠᠬᠣᠨ ᠣᠢ᠌ᠯᠠᠭᠠᠯᠲᠠ᠂ ᠠᠬᠠᠮᠠᠳ ᠵᠣᠬᠢᠶᠠᠯᠴᠢᠶ᠋ᠢᠨ ᠲᠣᠷᠱᠢᠯᠭᠠ᠂ ᠨᠣᠮ ᠣᠩᠱᠢᠬᠣ ᠲᠣᠰᠠᠯᠠᠮᠵᠢ ᠮᠡᠲᠦ᠍ᠶ᠋ᠢᠨ ᠦᠨᠳᠦᠰᠦᠨ ᠣᠨᠣᠯ ᠪᠠ ᠮᠡᠲᠡᠯᠭᠡᠶ᠋ᠢᠨ ᠱᠢᠨᠵᠢᠲᠡᠢ ᠵᠣᠬᠢᠶᠠᠯᠢ ᠨᠡᠢ᠌ᠲᠡᠯᠡᠨ ᠵᠣᠬᠢᠶᠠᠨ ᠪᠦᠲᠦᠭᠡᠬᠦ᠌ ᠦᠢᠯᠡᠲᠦᠯᠭᠡ ᠳ᠋ᠦ᠍ ᠦᠢᠯᠡᠴᠢᠯᠡᠵᠦ᠍᠂ ᠰᠲ᠋ᠢᠯᠢ ᠪᠣᠯᠭᠠᠨᠤ ᠡᠭᠡ ᠪᠢᠴᠢᠭᠤᠨ ᠲᠣᠲᠣᠷᠠ ᠡᠴᠡ ᠣᠷᠠᠯᠠᠬᠣ ᠠᠷᠭᠠ ᠪᠠᠷᠢᠯᠤᠨ ᠬᠣᠪᠢ ᠳ᠋ᠦ᠍ ᠦᠪᠡᠷᠮᠢᠴᠡ ᠱᠢᠨᠠ ᠪᠦᠲᠦᠭᠡᠯᠢ ᠬᠦᠨᠲᠦᠳᠭᠡᠨ ᠣᠷᠠᠯᠢᠬᠤᠨ ᠦᠨᠳᠦᠷ ᠲᠦᠪᠱᠢᠨ ᠦᠭᠡᠲᠡ ᠵᠣᠬᠢᠶᠠᠯᠴᠢᠳᠶ᠋ᠢᠡᠨ ᠲᠠᠭᠠᠭᠣᠯᠣᠨ ᠬᠦᠲᠦᠯᠵᠦ᠍ ᠪᠠᠢᠬᠰᠠᠨ ᠪᠢᠯᠡ᠃ ᠡᠬᠦᠨ ᠳ᠋ᠦ ᠭᠠᠲᠠᠭᠠᠲᠣ ᠣᠷᠠᠨ ᠵᠣᠬᠢᠶᠠᠯ ᠪᠣᠯᠣᠨ ᠠᠬᠠ ᠲᠡᠬᠦᠦ ᠦᠨᠳᠦᠰᠦᠲᠡᠨᠤ ᠰᠢᠯᠢᠲᠡᠭ ᠣᠷᠠᠨ ᠵᠣᠬᠢᠶᠠᠯᠢ ᠣᠷᠴᠢᠭᠣᠯᠣᠨ ᠨᠡᠢᠲᠡᠯᠡᠵᠦ ᠪᠠᠢᠬᠰᠠᠨ ᠨᠢ ᠶᠡᠮᠡᠷ ᠨᠢᠭᠡᠨ ᠬᠡᠮᠵᠢᠶᠡᠨ ᠲᠡᠭᠡᠷᠡ ᠵᠢᠱ᠌ᠢᠶᠠ ᠵᠣᠬᠢᠶᠠᠯ ᠪᠣᠶᠣ ᠣᠩᠱᠢᠬᠣ ᠪᠢᠴᠢᠭ ᠭᠡᠮᠡᠷ ᠴᠢᠬᠣᠯᠠ ᠶᠡᠬᠡ ᠯᠠᠪᠯᠠᠯᠲᠠᠶ᠋ᠢᠨ ᠦᠨᠡ ᠴᠠᠨᠠ ᠲᠠᠢ ᠪᠣᠯᠵᠦ ᠪᠠᠢᠬᠰᠠᠨ ᠨᠢ ᠮᠡᠳᠡᠭᠡᠵᠢ᠃
ᠲᠦᠷᠦᠭᠡ ᠴᠢᠩᠭᠠᠯᠠᠵᠦ ᠵᠢᠳᠬᠦᠭᠰᠡᠨ 45 ᠬᠠᠪᠣᠷ ᠨᠠᠮᠣᠷ᠂ ᠲᠠᠬᠢᠨ ᠣᠷᠣᠬᠰᠢᠯᠠᠬᠣ ᠰᠢᠨᠡ ᠠᠶᠠᠨᠤ ᠭᠠᠷᠣᠭᠠ᠃ ᠣᠷᠠᠨ ᠵᠣᠬᠢᠶᠠᠯᠤᠨ ᠦᠨᠳᠦᠷ ᠲᠡᠭᠷᠢ ᠳ᠋ᠦ ᠬᠢᠯᠠᠯᠵᠠᠬᠰᠠᠨ《ᠴᠣᠯᠮᠣᠨ》 ᠰᠡᠳᠬᠦᠯ ᠬᠠᠪᠣᠷᠤᠨ ᠵᠡᠷᠭᠡᠯᠭᠡᠨ ᠲᠠᠢ ᠬᠠᠮᠲᠣ ᠦᠶᠡᠯᠵᠡᠨ᠂ ᠵᠣᠨᠤ ᠰᠣᠯᠣᠩᠭᠠ ᠲᠠᠢ ᠵᠡᠷᠭᠡᠴᠡᠨ ᠨᠠᠮᠢᠷᠠᠵᠦ᠂ ᠨᠠᠮᠣᠷᠤᠨ ᠰᠠᠯᠬᠢᠨ ᠲᠠᠢ ᠦᠶᠡᠷᠬᠡᠨ ᠰᠡᠪᠢᠯᠵᠡᠵᠦ᠂ ᠡᠪᠦᠯᠤᠨ ᠠᠭᠣᠯᠠᠰ ᠯᠣᠭᠠ ᠢᠵᠢᠯᠢᠰᠢᠨ ᠭᠡᠷᠡᠯᠲᠦᠬᠦ ᠶᠣᠮ ᠡ᠃
ᠵᠣᠬᠢᠶᠠᠯᠴᠢᠳ ᠶ᠋ᠢᠡᠨ ᠲᠠᠢᠴᠢᠯᠠᠵᠣ᠂ ᠣᠩᠰᠢᠬᠴᠢᠳ ᠶ᠋ᠢᠡᠨ ᠬᠦᠨᠳᠦᠳᠭᠡᠨ᠂ ᠡᠬᠡ ᠪᠢᠴᠢᠭᠤᠨ ᠰᠡᠳᠦᠪ ᠰᠣᠩᠭᠣᠯᠲᠠᠶᠢ ᠦᠷᠭᠡᠳᠭᠡᠨ᠂ ᠵᠣᠬᠢᠶᠠᠯᠤᠨ ᠴᠢᠨᠠᠷ ᠴᠢᠨᠰᠠᠭᠠᠶᠢ ᠲᠡᠭᠡᠭᠰᠢᠯᠡᠬᠦᠯᠵᠦ᠂ ᠦᠪᠦᠷ ᠮᠣᠩᠭᠣᠯᠤᠨ ᠣᠷᠠᠨ ᠵᠣᠬᠢᠶᠠᠯᠤᠨ ᠣᠷᠣᠨ ᠵᠠᠢᠶᠢ ᠲᠡᠯᠡᠬᠦ ᠪᠣᠯ 《 ᠴᠣᠯᠮᠣᠨ 》 ᠰᠡᠳᠬᠦᠯᠤᠨ ᠴᠣᠴᠠᠯᠲᠠ ᠦᠭᠡᠢ ᠣᠷᠣᠬᠰᠢᠯᠠᠵᠦ ᠢᠷᠡᠭᠰᠡᠨ ᠪᠠᠷᠢᠮᠲᠠᠯᠠᠯ ᠶᠣᠮ᠃ ᠡᠨᠡ ᠨᠢ ᠮᠦᠨᠴᠦ 《ᠴᠣᠯᠮᠣᠨ》 ᠰᠡᠳᠬᠦᠯ ᠣᠩᠰᠢᠬᠴᠢᠳᠤᠨ ᠲᠣᠮᠲᠠ 《ᠵᠣᠵᠠᠭᠠᠨ ᠮᠦᠷᠲᠡᠭᠡᠨ ᠵᠢᠩ ᠲᠠᠢ》 ᠭᠡᠮᠡᠨ ᠦᠨᠡᠯᠡᠭᠲᠡᠵᠦ ᠢᠷᠡᠭᠰᠡᠨᠤ ᠦᠨᠳᠦᠰᠦᠯᠡᠯ ᠪᠣᠯᠬᠣ ᠶᠣᠮ᠃