ᠬᠠᠮᠤᠭ ᠤ᠋ᠨ ᠲᠡᠭᠦᠰ ᠦᠩᠭᠡ ᠶ᠋ᠢ ᠤᠷᠠᠯᠠᠭᠰᠠᠭᠠᠷ ᠳᠤᠯᠤᠳᠤᠭᠠᠷ ᠰᠠᠷᠠ ᠶ᠋ᠢᠨ ᠪᠤᠷᠤᠭᠠᠨ
ᠬᠤᠪᠳᠤᠯ ᠤ᠋ᠨ ᠬᠦᠨ ᠳ᠋ᠥ ᠴᠢᠬᠢᠭ ᠠᠮᠳᠠᠯᠠᠭᠤᠯᠵᠤ ᠵᠡᠭᠦᠳᠦᠨ ᠪᠡᠯᠴᠢᠭᠡᠷ ᠲᠤ᠌ ᠳᠠᠭᠤᠯᠠᠭᠠᠳ ᠯᠡ
ᠬᠠᠰ ᠮᠡᠳᠦ ᠳᠤᠳᠤᠷᠠ ᠡᠴᠡ ᠪᠠᠨ ᠭᠡᠷᠡᠯᠳᠦᠬᠦ ᠤᠰᠤᠨ ᠤ᠋ ᠰᠡᠳᠬᠢᠯᠬᠡᠨ ᠡᠢᠮᠦ ᠯᠡ ᠲᠤᠩᠭᠠᠯᠠᠭ ᠭᠡᠳᠡᠭ ᠢ᠋
ᠬᠡ ᠨᠢ ᠬᠤᠯᠳᠤᠷᠠᠭᠰᠠᠨ ᠤᠷᠴᠢᠯᠠᠩ ᠤ᠋ᠨ ᠠᠮᠢᠰᠬᠤᠭᠠ ᠠᠭᠤᠰᠬᠢᠨ ᠳ᠋ᠥ ᠨᠡᠪᠴᠢᠭᠡᠵᠦ ᠮᠡᠳᠡᠷᠡᠭᠦᠯᠦᠨᠡᠮ
ᠮᠦᠩᠬᠦᠨ ᠭᠤᠤᠯ ᠦᠯᠢᠭᠡᠷ ᠬᠡᠯᠡᠭᠡᠳ ᠯᠡ ᠤᠭᠠᠯᠵᠠᠯᠠᠬᠤ ᠮᠡᠲᠦ ᠡᠨᠡ ᠪᠤᠷᠤᠭᠠᠨ
ᠮᠦᠷᠦᠭᠡᠳᠦᠯ ᠤ᠋ᠨ ᠡᠴᠢᠨᠡ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠪᠠᠨ ᠲᠤᠭᠯᠠᠭᠤᠯᠵᠤ ᠡᠷᠭᠡᠯᠡᠭᠦᠯᠦᠭᠡᠳ ᠯᠡ
ᠮᠦᠴᠢᠳᠭᠡᠨ ᠭᠠᠷᠠᠮ ᠲᠠᠢ ᠰᠢᠯᠦᠭᠴᠢ ᠶ᠋ᠢᠨ ᠬᠤᠳᠠ ᠶ᠋ᠢ ᠤᠬᠢᠶᠠᠨ ᠷᠠᠰᠢᠶᠠᠯᠠᠵᠤ
ᠮᠢᠩᠭᠠᠨ ᠪᠠᠳᠠᠭ ᠲᠠᠢ ᠬᠦᠰᠡᠯ ᠤ᠋ᠨ ᠵᠦᠷᠢᠭ ᠢ᠋ ᠨᠤᠮ ᠤ᠋ᠨ ᠤᠳᠬᠠ ᠪᠠᠷ ᠵᠢᠷᠤᠭᠯᠠᠭᠠ ᠤᠤ ᠳᠠ
ᠬᠠᠮᠤᠭ ᠤ᠋ᠨ ᠰᠤᠩᠭᠤᠳᠠᠭ ᠠᠶᠠᠯᠭᠤ ᠶ᠋ᠢ ᠨᠠᠢᠷᠠᠭᠰᠠᠭᠠᠷ ᠳᠤᠯᠤᠳᠤᠭᠠᠷ ᠰᠠᠷᠠ ᠶ᠋ᠢᠨ ᠪᠤᠷᠤᠭᠠᠨ
ᠬᠤᠪᠢ ᠵᠠᠶᠠᠭᠠᠨ ᠤ᠋ ᠠᠯᠳᠠᠨ ᠬᠤᠨᠳᠠᠭᠠᠨ ᠳ᠋ᠥ ᠭᠠᠭᠴᠠᠭᠠᠷᠳᠠᠯ ᠬᠡᠮᠨᠡᠨ ᠬᠤᠭᠤᠷᠳᠠᠭᠠᠳ ᠯᠡ
ᠬᠤᠮᠠᠬᠢ ᠶ᠋ᠢᠨ ᠬᠤᠢᠨᠠ ᠡᠴᠡ ᠬᠦᠭᠡᠭᠡᠴᠡᠯᠳᠦᠬᠦ ᠬᠤᠷᠸᠠ ᠶ᠋ᠢᠨ ᠳᠤᠭᠤᠰᠤ ᠪᠤᠷᠳᠠᠭ ᠢ᠋ ᠠᠷᠴᠢᠵᠤ
ᠬᠠᠢᠷᠠ ᠶ᠋ᠢᠨ ᠲᠡᠭᠷᠢ ᠳ᠋ᠥ ᠰᠤᠯᠤᠩᠭᠠ ᠬᠤᠪᠢᠯᠵᠤ ᠨᠤᠮᠤᠯᠠᠭᠰᠠᠨ ᠠᠪᠤ ᠶ᠋ᠢᠨ ᠦᠨᠦᠷ ᠬᠠᠩᠬᠤᠯᠤᠨᠠᠮ
ᠴᠠᠭᠠᠨ ᠳᠤᠭᠤᠷᠤᠤ ᠭᠠᠩᠭᠠᠨᠠᠵᠤ ᠭᠠᠩᠭᠠᠨᠠᠭᠠᠳ ᠯᠡ ᠨᠢᠰᠬᠦ ᠮᠡᠲᠦ ᠡᠨᠡ ᠪᠤᠷᠤᠭᠠᠨ
ᠴᠡᠪᠡᠷ ᠰᠡᠳᠬᠢᠯ ᠤ᠋ᠨ ᠮᠢᠨᠢ ᠴᠡᠭᠡᠯ ᠳ᠋ᠥ ᠳᠡᠭᠳᠡᠭᠡᠬᠡᠢ ᠨᠦ᠍ᠭᠦᠳ ᠢ᠋ᠶ᠋ᠠᠨ ᠳᠡᠷᠪᠡᠭᠦᠯᠵᠦ ᠠᠷᠭᠠᠳᠠᠭᠠᠳ ᠯᠡ
ᠴᠡᠴᠡᠭ ᠪᠦᠬᠦᠨ ᠤ᠋ ᠦᠩᠭᠡᠨ ᠡᠴᠡ ᠡᠵᠢ ᠶ᠋ᠢᠨ ᠮᠢᠨᠢ ᠮᠦᠰᠢᠶᠡᠳᠦ ᠳᠤᠳᠤᠷᠠᠵᠤ
ᠴᠢᠮᠠ ᠳ᠋ᠠᠭᠠᠨ ᠯᠡ ᠳᠡᠮᠡᠥᠯᠬᠦ ᠰᠢᠯᠦᠭ ᠮᠢᠨᠢ ᠰᠠᠴᠤᠯᠢ ᠶ᠋ᠢᠨ ᠰᠦ ᠪᠤᠯᠵᠤ ᠠᠰᠬᠠᠷᠠᠭᠠ ᠤᠤ ᠳᠠ