《ᠡᠨᠡ ᠪᠤᠯ ᠮᠢᠨᠤ ᠬᠢᠵᠦ ᠭᠠᠷᠭᠠᠭᠰᠠᠨ ᠮᠤᠩᠭᠤᠯ ᠭᠡᠷ ᠤ᠋ᠨ ᠬᠡᠯᠪᠡᠷᠢᠳᠤ ᠦᠨᠳᠡᠭᠡᠳᠦ ᠪᠤᠭᠤᠷᠰᠤᠭ᠂ ᠪᠢ ᠮᠤᠩᠭᠤᠯ ᠭᠡᠷ ᠤ᠋ᠨ ᠬᠡᠯᠪᠡᠷᠢᠳᠤ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠢ᠋ ᠪᠠᠷᠤᠭ 10 ᠭᠠᠷᠤᠢ ᠵᠢᠯ ᠬᠢᠵᠦ ᠪᠤᠢ᠃ ᠠᠩᠬᠠ ᠡᠬᠢᠨ ᠳ᠋ᠡᠬᠡᠨ ᠬᠠᠭᠠᠰ ᠡᠳᠦᠷ ᠤ᠋ᠨ ᠴᠠᠭ ᠵᠠᠷᠤᠴᠠᠭᠤᠯᠳᠠᠭ ᠪᠠᠢᠭᠰᠠᠨ᠂ ᠤᠳᠤ ᠲᠠᠪᠤᠬᠠᠨ ᠮᠢᠨᠦ᠋ᠲ ᠲᠸ᠋ ᠬᠢᠴᠢᠬᠡᠨᠠ᠂ ᠠᠩᠬᠠᠨ ᠤ᠋ ᠦᠶᠡᠰ ᠨᠢᠭᠡ ᠯᠡ ᠳᠠᠪᠬᠤᠷᠭᠠ ᠵᠢᠨ ᠪᠠᠢᠭᠰᠠᠨ ᠪᠤᠯ ᠤᠳᠤ ᠭᠤᠷᠪᠠᠨ ᠳᠠᠪᠬᠤᠷᠭᠠ ᠪᠤᠯᠭᠠᠵᠤ ᠨᠡᠮᠡᠭᠳᠡᠬᠦᠯᠦᠭᠰᠡᠨ》 ᠭᠡᠵᠦ ᠰᠢᠯᠤᠭᠤᠨ·ᠴᠠᠭᠠᠨ ᠢᠳᠡᠭᠡᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠤ᠋ᠨ ᠳᠡᠯᠭᠡᠭᠦᠷ ᠤ᠋ᠨ ᠡᠵᠡᠨᠳᠡᠨ ᠨᠠᠪᠴᠢᠮᠠ ᠶᠠᠷᠢᠵᠦ ᠪᠠᠢᠯᠠ᠃ ᠶᠡᠷᠦ ᠨᠢ ᠮᠤᠩᠭᠤᠯ ᠭᠡᠷ ᠤ᠋ᠨ ᠬᠡᠯᠪᠡᠷᠢᠲᠤ ᠦᠨᠳᠡᠭᠡᠳᠦ ᠪᠤᠭᠤᠷᠰᠤᠭ ᠨᠢ ᠲᠡᠬᠦᠨ ᠤ᠋ ᠠᠮᠢᠳᠤᠷᠠᠯ ᠦᠢᠯᠡᠰ ᠪᠤᠰᠬᠠᠭᠰᠠᠨ ᠠᠶᠠᠨ ᠵᠠᠮ ᠤ᠋ᠨ ᠦᠯᠢᠭᠡᠷ ᠢ᠋ ᠶᠠᠷᠢᠭᠠᠳ ᠪᠠᠢᠬᠤ ᠰᠢᠬ ᠁
ᠨᠠᠪᠴᠢᠮᠠ ᠪᠤᠯ ᠰᠢᠯᠤᠭᠤᠨ ᠬᠦᠪᠡᠭᠡᠲᠤ ᠴᠠᠭᠠᠨ ᠬᠤᠰᠢᠭᠤᠨ ᠤ᠋ ᠤᠤᠯ ᠤ᠋ᠨ ᠪᠦᠷᠢᠳᠤ ᠰᠤᠮᠤ （ᠤᠳᠤ ᠵᠢᠨ ᠤᠯᠠᠭᠠᠨᠴᠠᠪ ᠰᠤᠮᠤ） ᠵᠢᠨ ᠡᠩᠭᠡᠷᠪᠤᠯᠠᠭ ᠭᠠᠴᠠᠭᠠᠨ ᠤ᠋ ᠬᠦᠬᠡᠴᠢᠯᠠᠭᠤᠲᠤ ᠳᠤᠭᠤᠢᠯᠠᠩ ᠤ᠋ᠨ ᠮᠠᠯᠴᠢᠨ ᠷᠢᠨᠴᠢᠨᠳᠤᠷᠵᠢ᠂ ᠰᠠᠷᠠᠩᠬᠤᠸᠠᠷ ᠤ᠋ᠨ ᠤᠳᠬᠤᠨ ᠦᠬᠢᠨ ᠨᠢ ᠪᠤᠯᠤᠨᠠ᠃
ᠨᠠᠪᠴᠢᠮᠠ
ᠳᠡᠯᠭᠡᠭᠦᠷ ᠤ᠋ᠨ ᠠᠵᠢᠯᠴᠢᠨ ᠡᠴᠡ ᠪᠠᠨ ᠳᠡᠯᠭᠡᠭᠦᠷ ᠤ᠋ᠨ ᠡᠵᠡᠩᠨᠡᠭᠴᠢ ᠪᠤᠯᠪᠠ
ᠡᠷᠳᠡᠨᠢ ᠵᠢᠨ ᠰᠦᠷᠦᠭ ᠨᠢ ᠨᠠᠯᠠᠢᠭᠰᠠᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ
ᠡᠩᠬᠡ ᠠᠮᠢᠳᠤᠷᠠᠯ ᠢ᠋ ᠬᠤᠷᠤᠢᠯᠠᠭᠰᠠᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ
ᠡᠰᠡᠨᠢᠯ ᠬᠦᠭᠵᠢᠯ ᠢ᠋ ᠳᠠᠭᠤᠯᠠᠭᠰᠠᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ
ᠡᠭᠡᠯ ᠦᠢᠯᠡᠰ ᠢ᠋ ᠳᠡᠭᠡᠳᠦᠯᠡᠭᠰᠡᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ
ᠦᠷ ᠤ᠋ᠨ ᠴᠤᠯᠮᠤᠨ ᠡᠷᠳᠡ ᠬᠢᠯᠠᠯᠵᠠᠳᠠᠭ ᠨᠢ ᠠᠵᠢᠯᠴᠢ ᠬᠦᠮᠦᠨ ᠳ᠋ᠤ ᠵᠦᠭ ᠴᠢᠭ ᠵᠢᠭᠠᠵᠦ ᠥᠭᠳᠡᠭ ᠶᠤᠮ ᠪᠤᠯᠪᠠᠤ？ ᠨᠠᠪᠴᠢᠮᠠ ᠡᠳᠦᠷ ᠪᠦᠷᠢ ᠦᠷ ᠤ᠋ᠨ ᠴᠤᠯᠮᠤᠨ ᠲᠠᠢ ᠤᠷᠤᠯᠳᠤᠨ ᠪᠤᠰᠴᠤ ᠠᠵᠢᠯ ᠶ᠋ᠢᠡᠨ ᠠᠮᠵᠢᠭᠤᠯᠳᠠᠭ ᠵᠠᠩ ᠲᠠᠢ᠃
ᠨᠠᠪᠴᠢᠮᠠ ᠡᠨᠡ ᠡᠳᠦᠷ ᠠᠯᠢ ᠡᠳᠦᠷ ᠡᠴᠡ ᠴᠸ᠋ ᠡᠷᠳᠡ ᠪᠤᠰᠤᠭᠰᠠᠨ ᠪᠠᠢᠪᠠ᠃ ᠤᠴᠢᠷ ᠨᠢ ᠲᠡᠷᠡ ᠠᠩᠬᠠᠨ ᠤ᠋ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠤ᠋ᠨ ᠵᠠᠬᠢᠶᠠᠯᠠᠭᠠ ᠪᠠᠨ ᠲᠤᠰᠴᠤ ᠪᠠᠢᠭᠠ ᠶᠤᠮ ᠃ ᠡᠨᠡ ᠪᠤᠯ ᠠᠯᠢ ᠡᠷᠳᠡ 12 ᠵᠢᠯ ᠤ᠋ᠨ ᠡᠮᠦᠨᠡᠬᠢ ᠤᠴᠢᠷ ᠪᠢᠯᠡ᠃
《ᠪᠢ 2009 ᠤᠨ ᠳ᠋ᠤ ᠰᠢᠯᠢ ᠵᠢᠨ ᠭᠤᠤᠯ ᠤ᠋ᠨ ᠠᠵᠢᠯ ᠮᠡᠷᠭᠡᠵᠢᠯ ᠤ᠋ᠨ ᠳᠡᠭᠡᠳᠦ ᠰᠤᠷᠭᠠᠭᠤᠯᠢ ᠳ᠋ᠤ ᠰᠤᠷᠤᠯᠴᠠᠵᠦ᠂ 2 ᠵᠢᠯ ᠭᠠᠷᠤᠢ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠬᠢᠬᠦ ᠮᠡᠷᠭᠡᠵᠢᠯ ᠢ᠋ ᠰᠤᠷᠴᠠᠢ᠃ ᠰᠤᠷᠭᠠᠭᠤᠯᠢ ᠡᠴᠡ ᠲᠡᠭᠦᠰᠦᠭᠡᠳ ᠬᠦᠬᠡᠬᠤᠳᠠ ᠳ᠋ᠤ ᠢᠷᠡᠭᠡᠳ ᠮᠸᠢ ᠶᠠᠨ ᠰᠢ ᠪᠤᠭᠤᠷᠰᠤᠭ ᠤ᠋ᠨ ᠳᠡᠯᠭᠡᠭᠦᠷ ᠲᠸ᠋ 2 ᠵᠢᠯ ᠭᠠᠷᠤᠢ ᠠᠵᠢᠯᠯᠠᠵᠦ᠂ ᠬᠤᠪᠢ ᠵᠢᠨ ᠳᠡᠯᠭᠡᠭᠦᠷ ᠡᠵᠡᠩᠨᠡᠬᠦ ᠰᠠᠨᠠᠭᠠᠳᠠᠢ 2014 ᠤᠨ ᠡᠴᠡ ᠭᠡᠷ ᠲᠡᠭᠡᠨ ᠦᠨᠳᠡᠭᠡᠳᠤ ᠪᠤᠭᠤᠷᠰᠤᠭ ᠤ᠋ᠨ ᠦᠷᠦᠭᠡ ᠭᠠᠷᠭᠠᠨ ᠠᠵᠢᠯ ᠤ᠋ᠨ ᠭᠠᠷᠤᠭᠠ ᠪᠠᠨ ᠡᠬᠢᠯᠡᠬᠦᠯᠦᠭᠰᠡᠨ》 ᠭᠡᠵᠦ ᠨᠠᠪᠴᠢᠮᠠ ᠡᠷᠬᠢᠴᠡᠬᠦᠯᠦᠨ ᠶᠠᠷᠢᠨᠠ᠃
ᠦᠪᠡᠷ ᠤ᠋ᠨ ᠳᠡᠯᠭᠡᠭᠦᠷ ᠲᠠᠢ ᠪᠤᠯᠬᠤ ᠳ᠋ᠤ ᠨᠡᠷᠡ ᠤᠰᠤ ᠪᠠᠢᠬᠤ ᠴᠢᠬᠤᠯᠠᠳᠠᠢ᠃ ᠨᠠᠪᠴᠢᠮᠠ ᠤᠨᠠᠭᠰᠠᠨ ᠨᠤᠲᠤᠭ ᠶ᠋ᠢᠡᠨ ᠦᠬᠡᠢᠯᠡᠨ ᠰᠠᠨᠠᠬᠤ ᠵᠢᠨ ᠵᠡᠷᠭᠡ ᠪᠠᠷ ᠦᠢᠯᠡᠰ ᠤ᠋ᠨ ᠮᠦᠷ ᠰᠦ ᠴᠠᠭᠠᠨ ᠪᠠᠢᠬᠤ ᠵᠢ ᠪᠡᠯᠭᠡᠳᠡᠵᠦ 《ᠰᠢᠯᠤᠭᠤᠨ·ᠴᠠᠭᠠᠨ ᠢᠳᠡᠭᠡᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠤ᠋ᠨ ᠳᠡᠯᠭᠡᠭᠦᠷ》 ᠬᠡᠬᠦ ᠨᠡᠷᠠ ᠬᠠᠢᠷᠠᠯᠠᠵᠤ᠂ ᠦᠢᠯᠡᠰ ᠪᠦᠲᠦᠭᠡᠬᠦ ᠠᠶᠠᠨ ᠶ᠋ᠢᠡᠨ ᠡᠬᠢᠯᠡᠬᠦᠯᠦᠭᠰᠡᠨ ᠶᠤᠮ᠃
ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠭᠡᠪᠡᠯ ᠬᠦᠮᠦᠨ ᠪᠦᠬᠦᠨ ᠢᠳᠡᠬᠦ ᠳᠤᠷᠠᠳᠠᠢ᠂ ᠵᠠᠬᠠ ᠳᠡᠯᠭᠡᠭᠦᠷ ᠦᠷᠭᠡᠨ ᠪᠠᠢᠬᠤ ᠨᠢ ᠳᠠᠮᠵᠢᠬ ᠦᠬᠡᠢ᠂ ᠭᠡᠳᠡᠯᠡ ᠵᠠᠬᠠ ᠳᠡᠯᠭᠡᠭᠦᠷ ᠢ᠋ ᠨᠡᠭᠡᠭᠡᠵᠦ ᠬᠡᠷᠡᠭᠯᠡᠭᠴᠢᠳ ᠤ᠋ᠨ ᠬᠦᠷᠢᠶᠡᠯᠡᠯ ᠢ᠋ ᠤᠯᠬᠤ ᠪᠤᠯ ᠴᠢᠬᠤᠯᠠ ᠠᠰᠠᠭᠤᠳᠠᠯ ᠪᠤᠯᠤᠨᠠ᠃ ᠨᠠᠪᠴᠢᠮᠠ ᠦᠪᠡᠷ ᠤ᠋ᠨ ᠰᠤᠷᠤᠭᠰᠠᠨ ᠮᠡᠷᠬᠡᠵᠢᠯ ᠲᠠᠢ ᠪᠠᠨ ᠤᠶᠠᠯᠳᠤᠭᠤᠯᠵᠤ ᠤᠯᠠᠨ ᠲᠦᠷᠦᠯ ᠤ᠋ᠨ ᠦᠨᠳᠡᠭᠡᠳᠦ ᠪᠤᠭᠤᠷᠰᠤᠭ ᠬᠢᠬᠦ ᠪᠠᠷ ᠭᠠᠷ ᠳᠦᠷᠦᠵᠡᠢ᠃ ᠲᠡᠷᠡ ᠪᠡᠷ ᠲᠦᠷᠦᠭᠰᠡᠨ ᠡᠳᠦᠷ ᠤ᠋ᠨ ᠪᠠᠶᠠᠷ ᠤ᠋ᠨ᠂ ᠬᠡᠤᠬᠡᠳ ᠤ᠋ᠨ ᠦᠷᠪᠦᠭᠡᠨ ᠨᠠᠢᠷ ᠤ᠋ᠨ᠂ ᠰᠢᠨᠠ ᠬᠤᠤᠰ ᠤ᠋ᠨ ᠬᠤᠷᠢᠮ ᠨᠠᠢᠷ ᠤ᠋ᠨ᠂ ᠨᠠᠰᠤᠨ ᠪᠠᠶᠠᠷ ᠤ᠋ᠨ ᠂ ᠨᠠᠢᠵᠠ ᠨᠦᠬᠦᠳ ᠤ᠋ᠨ ᠴᠤᠭᠯᠠᠭᠠᠨ ᠤ᠋᠂ ᠪᠠᠢᠭᠤᠯᠭᠠ ᠨᠢᠭᠡᠴᠢ ᠵᠢᠨ ᠬᠦᠳᠡᠯᠭᠡᠭᠡᠨ ᠤ᠋᠂ ᠡᠵᠢ ᠵᠢᠨ ᠪᠠᠶᠠᠷ ᠤ᠋ᠨ᠂ ᠠᠪᠤ ᠵᠢᠨ ᠪᠠᠶᠠᠷ ᠤ᠋ᠨ ᠁ ᠬᠡᠬᠦ ᠮᠡᠲᠦᠴᠢᠯᠡᠨ ᠤᠯᠠᠨ ᠵᠦᠢᠯ ᠤ᠋ᠨ ᠦᠨᠳᠡᠭᠡᠳᠤ ᠪᠤᠭᠤᠷᠰᠤᠭ ᠢ᠋ ᠵᠠᠬᠢᠶᠠᠯᠠᠭᠠ ᠪᠠᠷ ᠬᠢᠵᠦ ᠡᠬᠢᠯᠡᠭᠰᠡᠨ ᠭᠡᠳᠡᠭ᠃
ᠦᠢᠯᠡᠰ ᠪᠦᠲᠦᠭᠡᠬᠦ ᠳ᠋ᠤ ᠰᠢᠯᠤᠭᠤᠬᠠᠨ ᠵᠠᠮ ᠭᠡᠵᠦ ᠦᠬᠡᠢ᠂ ᠵᠠᠪᠠᠯ ᠨᠢᠭᠡ ᠨᠢᠭᠡ ᠪᠠᠷ ᠠᠯᠬᠤᠵᠦ ᠪᠠᠢᠭᠠᠳ ᠪᠦᠲᠦᠭᠡᠳᠡᠭ ᠶᠤᠮ᠃ ᠨᠠᠪᠴᠢᠮᠠ ᠠᠩᠬᠠ ᠡᠬᠢᠯᠡᠭᠡᠳ ᠵᠦᠩᠳᠡᠭᠡᠨ ᠨᠤᠭᠤᠷᠠᠯ ᠪᠦᠳᠦᠷᠢᠯ ᠳ᠋ᠤ ᠤᠴᠠᠷᠠᠵᠦ᠂ ᠨᠢᠭᠤᠴᠠᠬᠠᠨ ᠨᠢᠯᠪᠤᠰᠤ ᠤᠨᠠᠭᠠᠵᠦ ᠪᠠᠢᠭᠰᠠᠨ ᠭᠡᠳᠡᠭ᠃ ᠭᠡᠪᠡᠴᠦ ᠲᠡᠷᠡ ᠵᠤᠷᠢᠬ ᠮᠤᠬᠤᠭᠰᠠᠨ ᠦᠬᠡᠢ᠂ ᠵᠠᠬᠢᠶᠠᠯᠠᠭᠠ ᠢᠷᠡᠳᠡᠭ ᠯᠡ ᠪᠤᠯ ᠵᠠᠪᠠᠯ ᠰᠠᠢᠨ ᠬᠢᠬᠦ ᠂ ᠠᠮᠳᠠᠳᠠᠢ ᠬᠢᠬᠦ ᠂ ᠲᠠᠭᠠᠰᠢᠶᠠᠯ ᠳ᠋ᠤ ᠬᠦᠷᠭᠡᠬᠦ ᠭᠡᠮᠡᠨ ᠨᠢᠭᠡᠨ ᠰᠡᠳᠬᠢᠯ ᠢ᠋ ᠪᠠᠷᠢᠨ ᠵᠢᠳᠬᠦᠭᠰᠡᠭᠡᠷ ᠢᠷᠡᠪᠡ᠃
《ᠲᠤᠬᠠᠢ ᠵᠢᠨ ᠦᠶᠡᠰ ᠦᠨᠳᠡᠭᠡᠳᠦ ᠪᠤᠭᠤᠷᠰᠤᠭ ᠬᠢᠬᠦ ᠳ᠋ᠡᠭᠡᠨ ᠪᠤᠭᠤᠷᠰᠤᠭ ᠢ᠋ ᠨᠢ ᠲᠤᠰᠬᠠᠢ ᠳᠡᠯᠭᠡᠭᠦᠷ ᠡᠴᠡ ᠬᠤᠳᠠᠯᠳᠤᠨ ᠠᠪᠴᠤ᠂ ᠵᠦᠭᠡᠭᠡᠢ ᠵᠢ ᠨᠢ ᠦᠪᠡᠰᠤᠪᠠᠨ ᠨᠠᠢᠷᠠᠭᠤᠯᠵᠦ ᠪᠠᠢᠭᠰᠠᠨ ᠶᠤᠮ᠃ ᠨᠢᠭᠡ ᠤᠳᠠᠭᠠ ᠵᠦᠪᠬᠡᠨ ᠲᠦᠷᠪᠡ ᠲᠠᠪᠤᠬᠠᠨ ᠪᠤᠭᠤᠷᠰᠤᠭ ᠠᠪᠤᠭᠠᠳ ᠬᠢᠳᠡᠭ ᠪᠠᠢᠭᠰᠠᠨ᠂ ᠰᠡᠬᠦᠯ ᠳ᠋ᠤ ᠵᠠᠬᠢᠶᠠᠯᠠᠭᠠ ᠠᠷᠪᠢᠳᠴᠤ ᠡᠭᠦᠳᠡᠨ ᠳᠡᠯᠭᠡᠭᠦᠷ ᠪᠤᠯᠭᠠᠨ ᠦᠷᠭᠡᠳᠭᠡᠭᠰᠡᠨ ᠶᠤᠮ᠂ ᠲᠡᠷᠡ ᠦᠶᠡ ᠪᠠᠨ ᠪᠤᠳᠤᠬᠤ ᠳ᠋ᠤ ᠨᠡᠯᠢᠶᠡᠳ ᠬᠦᠬᠡᠷᠦᠬᠦᠢᠯᠡᠯᠳᠡᠢ ᠰᠠᠨᠠᠭᠳᠠᠨᠠ》 ᠭᠡᠵᠦ ᠨᠠᠪᠴᠢᠮᠠ ᠱᠠᠭᠠ ᠵᠢᠨ ᠬᠡᠯᠪᠡᠷᠢᠲᠤ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠬᠢᠬᠦ ᠪᠠᠷ ᠪᠤᠰᠤᠯᠠ᠃
ᠡᠭᠦᠳᠡᠨ ᠳᠡᠯᠭᠡᠭᠦᠷ ᠶ᠋ᠢᠡᠨ ᠡᠬᠢᠯᠡᠬᠦᠯᠦᠭᠰᠡᠨ ᠡᠴᠡ ᠬᠤᠢᠰᠢ ᠲᠡᠬᠦᠨ ᠤ᠋ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠬᠦᠭᠵᠢᠶᠠᠨ ᠲᠠᠢ ᠪᠤᠯᠪᠠ᠃ 《ᠨᠢᠭᠡ ᠵᠢ ᠦᠵᠡᠵᠦ ᠬᠤᠶᠠᠷ ᠢ᠋ ᠰᠡᠳᠬᠢᠬᠦ》 ᠳᠤᠷᠠᠳᠠᠢ ᠨᠠᠪᠴᠢᠮᠠ ᠤᠯᠠᠮᠵᠢᠯᠠᠯᠲᠤ ᠦᠨᠳᠡᠭᠡᠳᠤ ᠪᠤᠭᠤᠷᠰᠤᠭ ᠨᠢ ᠬᠦᠮᠦᠰ ᠤ᠋ᠨ ᠬᠡᠷᠡᠭᠴᠡᠭᠡ ᠵᠢ ᠬᠠᠩᠭᠠᠵᠦ ᠳᠡᠢᠯᠬᠦ ᠦᠬᠡᠢ ᠵᠢ ᠰᠡᠷᠡᠵᠦ ᠮᠡᠳᠡᠯᠡ᠃ ᠶᠠᠭᠠᠬᠢᠵᠦ ᠰᠢᠨᠠ ᠵᠢ ᠡᠭᠦᠳᠬᠦ ᠪᠤᠢ？ ᠶᠠᠭᠠᠬᠢᠵᠦ ᠬᠦᠮᠦᠰ ᠤ᠋ᠨ ᠠᠩᠬᠠᠷᠤᠯ ᠳ᠋ᠤ ᠬᠦᠷᠬᠡᠬᠦ ᠪᠢᠯᠡ？ ᠬᠦᠬᠡᠬᠤᠳᠠ ᠵᠢᠨ ᠲᠡᠭᠷᠢ ᠳ᠋ᠤ ᠠᠨᠢᠪᠴᠢᠯᠠᠬᠤ ᠤᠳᠤᠳ ᠢ᠋ ᠬᠠᠷᠠᠭᠠᠳ ᠲᠡᠷᠡ ᠦᠪᠡᠷ ᠤ᠋ᠨ ᠡᠷᠬᠡ ᠦᠬᠡᠢ ᠬᠦᠳᠡᠭᠡ ᠨᠤᠲᠤᠭ ᠶ᠋ᠢᠡᠨ ᠰᠠᠨᠠᠯᠠ᠃ ᠨᠤᠲᠤᠭ ᠶ᠋ᠢᠡᠨ ᠰᠠᠨᠠᠬᠤ ᠳ᠋ᠤ ᠮᠦᠩᠬᠦᠨ ᠰᠠᠷᠠᠨ ᠤ᠋ ᠳᠤᠤᠷᠠᠬᠢ ᠮᠦᠩᠬᠡᠵᠢᠨ ᠬᠢᠯᠠᠯᠵᠠᠬᠤ ᠲᠤᠭᠤᠨᠤᠲᠤ ᠭᠡᠷ ᠡᠴᠡ ᠴᠡᠩᠬᠡᠷ ᠤᠲᠤᠭᠠ ᠰᠤᠭᠤᠨᠠᠭᠯᠠᠵᠦ ᠬᠠᠷᠠᠭᠳᠠᠨᠠ᠃ ᠨᠠᠪᠴᠢᠮᠠ ᠰᠡᠬᠡᠰᠬᠢᠨ ᠤᠬᠠᠭᠠᠨ ᠤᠷᠤᠵᠦ ᠤᠳᠠᠭᠠᠨ ᠡᠳᠦᠷ ᠤ᠋ᠨ ᠪᠤᠳᠤᠯ ᠶ᠋ᠢᠡᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠲᠠᠭᠠᠨ ᠠᠭᠤᠰᠬᠠᠵᠦ ᠤᠷᠤᠭᠤᠯᠬᠤ ᠪᠠᠷ ᠰᠢᠢᠳᠴᠡᠢ᠃
《ᠬᠦᠳᠡᠬᠡ ᠨᠤᠲᠤᠭ ᠤ᠋ᠨ ᠡᠷᠳᠡᠨᠢᠰ ᠢ᠋ ᠠᠭᠤᠳᠠᠯᠤᠭᠠᠳ ᠪᠠᠷᠠᠰᠢ ᠦᠬᠡᠢ᠂ ᠬᠤᠳᠠ ᠳ᠋ᠤ ᠤᠷᠤᠭᠰᠠᠨ ᠵᠠᠯᠠᠭᠤᠴᠤᠳ᠂ ᠬᠡᠤᠬᠡᠳ ᠪᠠᠭᠠᠴᠤᠳ ᠬᠦᠳᠡᠬᠡ ᠵᠢᠨ ᠠᠮᠢᠳᠤᠷᠠᠯ ᠠᠬᠤᠢ ᠡᠴᠡ ᠬᠤᠯᠠᠳᠠᠵᠦ ᠪᠠᠢᠭᠠ ᠪᠤᠯᠬᠤᠷ ᠮᠤᠩᠭᠤᠯ ᠭᠡᠷ᠂ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠵᠡᠷᠭᠡ ᠵᠢ ᠬᠠᠷᠠᠭᠤᠯᠤᠭᠰᠠᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠬᠢᠬᠦ ᠵᠢ ᠵᠤᠷᠢᠵᠠᠢ᠃ ᠲᠡᠳᠡ ᠮᠢᠨᠤ ᠬᠢᠭᠰᠡᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠢ᠋ ᠢᠳᠡᠭᠡᠳ ᠬᠦᠳᠡᠭᠡ ᠪᠡᠨ ᠰᠠᠨᠠᠵᠦ ᠴᠤᠭᠴᠠᠯᠠᠨ ᠪᠠᠢᠭᠤᠯᠬᠤ ᠪᠤᠳᠤᠯ ᠤᠷᠤᠬᠤ᠂ ᠠᠪᠤ ᠡᠵᠢ ᠪᠠᠨ ᠠᠴᠢᠯᠠᠨ ᠬᠦᠨᠳᠦᠯᠡᠬᠦ ᠵᠢᠨ ᠤᠬᠠᠭᠠᠨ ᠢ᠋ ᠬᠦᠷᠳᠡᠬᠦ ᠪᠤᠯᠪᠠᠤ ᠭᠡᠮᠡᠨ ᠪᠤᠳᠤᠭᠠᠳ ᠰᠢᠨᠡᠴᠢᠯᠡᠯ ᠬᠢᠵᠦ ᠡᠬᠢᠯᠡᠭᠰᠡᠨ ᠶᠤᠮ》 ᠭᠡᠵᠦ ᠨᠠᠪᠴᠢᠮᠠ ᠵᠢᠨ ᠶᠠᠷᠢᠬᠤ ᠨᠢ ᠰᠡᠳᠬᠢᠯ ᠳ᠋ᠤ ᠲᠠᠭᠠᠳᠠᠢᠬᠠᠨ᠃
《ᠰᠠᠨᠠᠭᠠ ᠵᠦᠪ ᠪᠤᠯ ᠵᠠᠶᠠᠭᠠ ᠵᠦᠪ》᠃ ᠨᠠᠪᠴᠢᠮᠠ ᠬᠠᠮᠤᠭ ᠤ᠋ᠨ ᠠᠩᠬᠠ ᠬᠦᠳᠡᠬᠡ ᠲᠠᠯᠠ ᠳ᠋ᠠᠭᠠᠨ ᠴᠠᠢᠷᠠᠬᠤ ᠲᠠᠨᠠᠨ ᠴᠠᠭᠠᠨ ᠭᠡᠷ ᠶ᠋ᠢᠡᠷ ᠰᠡᠳᠦᠪᠯᠡᠭᠰᠡᠨ ᠮᠤᠩᠭᠤᠯ ᠭᠡᠷ ᠤ᠋ᠨ ᠬᠡᠯᠪᠡᠷᠢᠲᠤ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠬᠢᠵᠦ ᠡᠬᠢᠯᠡᠪᠡ ᠃ ᠬᠡᠳᠦᠢᠪᠡᠷ ᠵᠢᠷᠦᠭᠡᠨ ᠳ᠋ᠤᠨᠢ ᠰᠢᠩᠬᠡᠭᠰᠡᠨ ᠭᠡᠷ ᠪᠤᠯᠪᠠᠴᠤ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠲᠸ᠋ ᠤᠷᠠᠯᠠᠵᠦ ᠬᠢᠬᠦ ᠳ᠋ᠤ ᠶᠡᠬᠡ ᠬᠦᠴᠢᠷᠳᠠᠢ ᠪᠠᠢᠭᠰᠠᠨ ᠨᠢ ᠮᠡᠳᠡᠭᠡᠵᠢ᠃ ᠲᠡᠷᠡ ᠬᠠᠭᠠᠰ ᠡᠳᠦᠷ ᠤ᠋ᠨ ᠬᠦᠴᠦ ᠵᠠᠷᠤᠴᠠᠭᠤᠯᠵᠦ ᠪᠠᠢᠭᠠᠳ ᠮᠤᠩᠭᠤᠯ ᠭᠡᠷ ᠤ᠋ᠨ ᠬᠡᠯᠪᠡᠷᠢᠲᠤ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠶ᠋ᠢᠡᠨ ᠬᠢᠭᠡᠳ ᠬᠦᠯ ᠨᠢ ᠭᠠᠵᠠᠷ ᠬᠦᠷᠬᠦ ᠦᠬᠡᠢ ᠪᠠᠶᠠᠷᠯᠠᠵᠦ ᠪᠠᠢᠭᠰᠠᠨ ᠶ᠋ᠢᠡᠨ ᠮᠠᠷᠳᠠᠭᠠ ᠦᠬᠡᠢ᠃ ᠠᠩᠬᠠᠨ ᠤ᠋ ᠡᠭᠦᠳᠦᠯᠳᠡ ᠡᠴᠡ ᠪᠠᠨ ᠠᠮᠳᠠ ᠠᠪᠤᠭᠰᠠᠨ ᠨᠠᠪᠴᠢᠮᠠ ᠲᠠᠯᠠ ᠨᠤᠲᠤᠭ ᠤ᠋ᠨ ᠰᠡᠳᠦᠪᠲᠤ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ᠂ ᠲᠠᠪᠤᠨ ᠬᠤᠰᠢᠭᠤ ᠮᠠᠯ ᠤ᠋ᠨ ᠰᠡᠳᠦᠪᠲᠤ ᠦᠨᠳᠡᠭᠡᠳᠤ ᠪᠤᠭᠤᠷᠰᠤᠭ᠂ ᠱᠠᠭᠠ ᠵᠢᠨ ᠬᠡᠯᠪᠡᠷᠢᠲᠤ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ᠂ ᠰᠢᠳᠠᠷᠠ ᠵᠢᠨ ᠬᠡᠯᠪᠡᠷᠢᠲᠤ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ᠂ ᠮᠤᠩᠭᠤᠯ ᠬᠡ ᠤᠭᠠᠯᠵᠠᠲᠤ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠁ ᠬᠡᠬᠦ ᠵᠡᠷᠭᠡ 20 ᠭᠠᠷᠤᠢ ᠬᠡᠯᠪᠡᠷᠢ ᠳᠦᠷᠰᠦ ᠵᠢᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠢ᠋ ᠬᠢᠭᠡᠳ ᠤᠯᠠᠨ ᠤ᠋ ᠲᠠᠭᠠᠰᠢᠶᠠᠯ ᠢ᠋ ᠤᠯᠪᠠ᠃
《ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠨᠢ ᠵᠠᠪᠠᠯ ᠵᠠᠬᠠ ᠳᠡᠯᠭᠡᠭᠦᠷ ᠤ᠋ᠨ ᠬᠡᠷᠡᠭᠴᠡᠭᠡ ᠱᠠᠭᠠᠷᠳᠠᠯᠭᠠ ᠳ᠋ᠤ ᠨᠡᠢᠴᠡᠭᠰᠡᠨ ᠪᠠᠢᠵᠦ᠂ ᠤᠯᠠᠮᠵᠢᠯᠠᠯ ᠪᠠ ᠰᠢᠨᠡᠴᠢᠯᠡᠯ ᠢ᠋ ᠤᠶᠠᠯᠳᠤᠭᠤᠯᠬᠤ ᠬᠡᠷᠡᠭ ᠳᠡᠢ᠃ ᠪᠠᠶᠠᠷ ᠳᠤᠷᠠᠰᠬᠠᠯ ᠤ᠋ᠨ ᠡᠳᠦᠷ ᠲᠸ᠋ ᠵᠤᠷᠢᠭᠤᠯᠤᠭᠰᠠᠨ ᠤᠯᠠᠨ ᠬᠡᠯᠪᠡᠷᠢ ᠵᠢᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠢ᠋ ᠬᠦᠮᠦᠰ ᠵᠠᠬᠢᠶᠠᠯᠠᠬᠤ ᠨᠢ ᠤᠯᠠᠨ᠃ ᠤᠳᠤ ᠶᠠᠭ ᠰᠠᠢᠬᠠᠨ ᠰᠤᠷᠭᠠᠭᠤᠯᠢ ᠲᠡᠭᠦᠰᠬᠦ ᠤᠯᠠᠷᠢᠯ ᠪᠤᠯᠤᠭᠰᠠᠨ ᠪᠤᠯᠬᠤᠷ ᠬᠤᠩᠬᠤᠨ ᠤ᠋ ᠪᠠᠶᠠᠷ ᠤ᠋ᠨ ᠰᠡᠳᠦᠪᠲᠤ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠬᠠᠯᠠᠭᠤᠷᠠᠯ ᠪᠤᠯᠵᠦ ᠪᠠᠢᠨᠠ᠃ ᠨᠢᠭᠡ ᠠᠩᠬᠢ ᠳ᠋ᠤ ᠨᠢᠭᠡ ᠠᠳᠠᠯᠢ ᠪᠤᠰᠤ ᠵᠢᠨ ᠤᠨᠴᠠᠯᠢᠭᠲᠤ ᠦᠨᠳᠡᠭᠡᠳᠤ ᠪᠤᠭᠤᠷᠰᠤᠭ ᠶ᠋ᠢᠡᠷ ᠨᠠᠨᠳᠢᠨ ᠳᠤᠷᠠᠰᠤᠮᠵᠢ ᠦᠯᠡᠳᠡᠬᠡᠬᠦ ᠭᠡᠵᠦ ᠴᠢᠷᠮᠠᠢᠵᠦ ᠪᠠᠢᠨᠠ》 ᠭᠡᠵᠦ ᠨᠠᠪᠴᠢᠮᠠ ᠶᠠᠭᠠᠷᠠᠨᠠ᠃
《ᠵᠤᠷᠢᠭ ᠪᠠᠢᠪᠠᠯ ᠪᠦᠲᠦᠬᠦ ᠬᠤᠯᠠ ᠦᠬᠡᠢ᠂ ᠵᠠᠮ ᠪᠠᠢᠪᠠᠯ ᠬᠦᠷᠬᠦ ᠬᠤᠯᠠ ᠦᠬᠡᠢ》 ᠬᠡᠳᠡᠭ᠂ ᠨᠢᠭᠡ ᠳᠡᠯᠭᠡᠭᠦᠷ ᠢ᠋ ᠦᠭᠡᠳᠡ ᠲᠠᠢ ᠦᠩᠭᠡ ᠲᠠᠢ ᠠᠪᠴᠤ ᠶᠠᠪᠤᠨᠠ ᠭᠡᠳᠡᠭ ᠨᠠᠷᠢᠨ ᠤᠬᠠᠭᠠᠨ᠂ ᠠᠯᠤᠰ ᠤ᠋ᠨ ᠪᠤᠳᠤᠯᠭᠠ᠂ ᠤᠢᠭᠠ ᠦᠬᠡᠢ ᠴᠢᠷᠮᠠᠢᠯᠭᠠ ᠡᠴᠡ ᠰᠠᠯᠵᠦ ᠴᠢᠳᠠᠬᠤ ᠦᠬᠡᠢ ᠶᠤᠮ᠃ ᠰᠢᠯᠤᠭᠤᠨ·ᠴᠠᠭᠠᠨ ᠢᠳᠡᠭᠡᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠤ᠋ᠨ ᠳᠡᠯᠭᠡᠭᠦᠷ ᠤ᠋ᠨ ᠵᠢᠯ ᠤ᠋ᠨ ᠤᠷᠤᠯᠭᠠ ᠵᠠᠷᠤᠯᠭᠠ ᠵᠠᠭᠤᠨ ᠲᠦᠮᠡ ᠵᠢ ᠳᠠᠪᠠᠵᠦ ᠪᠠᠢᠭᠠ ᠨᠢ ᠡᠬᠦᠨ ᠢ᠋ ᠪᠠᠲᠤ ᠬᠡᠷᠡᠴᠢᠯᠡᠬᠦ ᠪᠠᠢᠬᠠ⁈
ᠰᠤᠳᠤᠯᠭᠠ ᠰᠤᠷᠤᠯᠴᠠᠭᠠ ᠪᠠᠷ ᠰᠤᠳᠤᠬᠠᠨ ᠠᠮᠳᠠ ᠲᠠᠢ ᠪᠤᠭᠤᠷᠰᠤᠭ ᠬᠢᠨᠡ
ᠠᠷᠠᠭᠠᠨ ᠰᠢᠯᠦᠰᠤ ᠭᠤᠭᠤᠵᠢᠮᠠᠷ ᠦᠨᠳᠡᠭᠡᠳᠦ ᠪᠤᠭᠤᠷᠰᠤᠭ
ᠠᠮᠳᠠ ᠨᠠᠢᠷᠠᠭᠤᠯᠭᠠ ᠨᠢ ᠰᠤᠳᠤᠬᠠᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ
ᠠᠪᠤᠭᠰᠠᠨ ᠬᠦᠮᠦᠨ ᠢ᠋ ᠱᠠᠭᠰᠢᠭᠤᠯᠳᠠᠭ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ
ᠠᠵᠠ ᠵᠢᠷᠭᠠᠯ ᠢ᠋ ᠪᠡᠯᠬᠡᠯᠡᠳᠡᠭ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ
ᠨᠠᠪᠴᠢᠮᠠ ᠵᠢᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠬᠢᠬᠦ ᠦᠷᠦᠭᠡᠨ ᠤ᠋ ᠬᠢᠨᠢ ᠬᠠᠨᠠᠨ ᠳᠡᠭᠡᠷᠡ ᠨᠢᠭᠡ ᠵᠢᠷᠤᠭ ᠪᠤᠢ᠃ ᠲᠡᠷᠡ ᠪᠤᠯ ᠳᠠᠷᠤᠢ ᠦᠬᠢᠨ ᠤ᠋ ᠬᠢᠨᠢ ᠡᠵᠢ ᠳ᠋ᠡᠬᠡᠨ ᠵᠢᠷᠤᠵᠦ ᠥᠭᠬᠦᠭᠰᠡᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠤ᠋ᠨ ᠵᠢᠷᠤᠭ ᠪᠤᠯᠤᠨᠠ᠃ ᠡᠨᠡ ᠵᠢᠷᠤᠭ ᠡᠵᠢ ᠵᠢᠨ ᠬᠢᠨᠢ ᠠᠵᠢᠯ ᠦᠢᠯᠡᠰ ᠤ᠋ᠨ ᠠᠯᠤᠰ ᠤ᠋ᠨ ᠵᠤᠷᠢᠯᠭᠠ᠂ ᠠᠵᠠ ᠬᠡᠢᠮᠦᠷᠢ ᠵᠢ ᠳᠠᠯᠠᠯᠳᠠᠭ ᠴᠸ᠋ ᠪᠤᠯᠪᠠᠤ！
ᠤᠤᠯ ᠨᠢ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠢ᠋ ᠬᠢᠬᠦ ᠳ᠋ᠤ ᠶᠠᠭᠤ ᠯᠡ ᠪᠠᠢᠬᠤᠪ ᠭᠡᠵᠦ ᠪᠤᠳᠤᠵᠦ ᠪᠠᠢᠭᠰᠠᠨ ᠮᠠᠨᠢ ᠱᠠᠯ ᠪᠤᠷᠤᠭᠤᠳᠠᠭᠰᠠᠨ ᠶ᠋ᠢᠡᠨ ᠶᠠᠭᠤ ᠵᠢ ᠨᠢ ᠨᠢᠭᠤᠬᠤᠪ᠃ ᠲᠦᠷᠦᠭᠰᠡᠨ ᠡᠳᠦᠷ ᠤ᠋ᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠶ᠋ᠢᠡᠷ ᠵᠢᠱ᠌ᠢᠶᠡᠯᠡᠬᠦ ᠳ᠋ᠤ 20 ᠰᠢᠬᠠᠮ ᠠᠯᠬᠤᠮ ᠤᠷᠤᠳᠠᠭ ᠶᠤᠮ᠃ ᠡᠨᠡ ᠪᠤᠯ ᠵᠦᠪᠬᠡᠨ ᠬᠢᠬᠦ ᠠᠯᠬᠤᠮ ᠳᠠᠷᠠᠭᠠ ᠰᠢᠦ᠃ ᠳᠠᠬᠢᠪᠠᠯ ᠭᠤᠯᠢᠷ ᠤ᠋ᠨ ᠤᠭᠤᠷᠠᠭ ᠤ᠋ᠨ ᠠᠭᠤᠯᠤᠭᠳᠠᠴᠠ᠂ ᠬᠠᠷᠢᠮᠠᠬᠠᠢ ᠴᠢᠨᠡᠷ᠂ ᠨᠢᠬᠳᠠ ᠵᠢᠨ ᠪᠠᠢᠳᠠᠯ᠂ ᠠᠮᠳᠠ ᠰᠢᠮᠳᠠ᠂ ᠰᠢᠷᠠᠬᠤ ᠨᠦᠬᠦᠴᠡᠯ ᠵᠡᠷᠭᠡ ᠡᠴᠡ ᠰᠢᠯᠲᠠᠭᠠᠯᠠᠨ ᠡᠳᠡᠨ ᠤ᠋ ᠬᠢᠨ 7 ᠠᠳᠠᠯᠢ ᠪᠤᠰᠤ ᠲᠦᠷᠦᠯ ᠤ᠋ᠨ ᠭᠤᠯᠢᠷ ᠢ᠋ ᠬᠡᠷᠡᠭᠯᠡᠵᠦ ᠪᠠᠢᠨᠠ᠃
《ᠪᠢᠳᠠ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠲᠸ᠋ ᠬᠡᠷᠡᠭᠯᠡᠬᠦ ᠭᠤᠯᠢᠷ ᠢ᠋ ᠰᠤᠩᠭᠤᠬᠤ ᠳ᠋ᠠᠭᠠᠨ ᠪᠠᠷᠤᠭ ᠭᠤᠯᠢᠷ ᠪᠤᠯᠭᠠᠨ ᠡᠴᠡ ᠰᠤᠩᠭᠤᠵᠦ ᠰᠤᠳᠤᠯᠤᠭᠰᠠᠨ ᠶᠤᠮ᠂ ᠮᠠᠨ ᠤ᠋ ᠬᠡᠷᠡᠭᠯᠡᠵᠦ ᠪᠠᠢᠭᠠ ᠭᠤᠯᠢᠷ ᠤ᠋ᠨ ᠤᠭᠤᠷᠠᠭ ᠤ᠋ᠨ ᠠᠭᠤᠯᠤᠭᠳᠠᠴᠠ ᠨᠢ 15 ᠡᠴᠡ ᠳᠡᠭᠡᠭᠰᠢ ᠪᠠᠢᠵᠦ᠂ ᠡᠩ ᠤ᠋ᠨ ᠭᠤᠯᠢᠷ ᠪᠠᠷᠤᠭ 6 ᠤᠷᠴᠢᠮ ᠯᠡ ᠪᠠᠢᠳᠠᠭ᠃ ᠪᠢᠳᠡ ᠪᠠᠰᠠ ᠪᠤᠯ ᠠᠽᠢᠶᠠ ᠲᠢᠪ ᠤ᠋ᠨ ᠲᠡᠷᠢᠬᠦᠨ ᠲᠠᠪᠤ ᠳ᠋ᠤ ᠤᠷᠤᠬᠤ ᠺᠤᠷᠢᠶᠠ ᠤᠯᠤᠰ ᠤ᠋ᠨ ᠰᠢᠬᠢᠷ ᠢ᠋ ᠬᠡᠷᠡᠭᠯᠡᠵᠦ ᠪᠠᠢᠨᠠ᠂ ᠲᠤᠰ ᠰᠢᠬᠢᠷ ᠨᠢ ᠡᠩ ᠤ᠋ᠨ ᠰᠢᠬᠢᠷ ᠡᠴᠡ ᠦᠨᠡᠳᠡᠢ ᠪᠤᠯᠪᠠᠴᠦ ᠰᠢᠷᠬᠡᠭ ᠨᠢ ᠨᠢᠭᠳᠠ᠂ ᠠᠭᠤᠰᠬᠤ ᠨᠢ ᠬᠤᠷᠳᠤᠨ᠂ ᠴᠤᠯ ᠪᠠᠢᠭᠠᠯᠢ ᠵᠢᠨ ᠰᠢᠬᠢᠷ ᠪᠤᠯᠤᠨᠠ᠂ ᠡᠳᠡᠭᠡᠷ ᠢ᠋ ᠪᠢᠳᠠ ᠪᠦᠷ ᠤᠯᠠᠨ ᠤᠳᠠᠭᠠ ᠵᠢᠨ ᠲᠤᠷᠰᠢᠯᠳᠠ ᠪᠠᠷ ᠳᠠᠮᠵᠢᠵᠦ ᠰᠢᠯᠭᠠᠷᠠᠭᠤᠯᠵᠦ ᠭᠠᠷᠭᠠᠭᠰᠠᠨ ᠶᠤᠮ》 ᠭᠡᠵᠦ ᠨᠠᠪᠴᠢᠮᠠ ᠲᠠᠨᠢᠯᠴᠠᠭᠤᠯᠪᠠ᠃
ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠶ᠋ᠢᠡᠨ ᠠᠮᠳᠠᠳᠠᠢ ᠰᠠᠢᠠᠬᠨ᠂ ᠬᠦᠮᠦᠰ ᠤ᠋ᠨ ᠲᠠᠭᠠᠰᠢᠶᠠᠯ ᠳ᠋ᠤ ᠬᠦᠷᠭᠡᠬᠦ ᠭᠡᠵᠦ ᠨᠠᠪᠴᠢᠮᠠ ᠬᠦᠯᠦᠰᠦ ᠭᠠᠷᠭᠠᠨ ᠤᠯᠤᠭᠰᠠᠨ ᠮᠦᠩᠬᠦ ᠪᠠᠨ ᠲᠤᠷᠰᠢᠯᠳᠠ ᠳ᠋ᠠᠭᠠᠨ ᠵᠠᠷᠤᠴᠠᠭᠤᠯᠤᠭᠰᠠᠭᠠᠷ ᠁ ᠤᠴᠢᠷ ᠨᠢ ᠡᠨᠡ ᠪᠤᠯ ᠲᠡᠬᠦᠨ ᠤ᠋ ᠦᠪᠡᠷ ᠤ᠋ᠨ ᠭᠠᠷ ᠶ᠋ᠢᠡᠷ ᠶ᠋ᠢᠡᠨ ᠦᠰᠭᠡᠵᠦ ᠪᠤᠢᠵᠢᠭᠤᠯᠤᠭᠰᠠᠨ ᠠᠯᠠᠭ ᠦᠷᠠ ᠲᠠᠢ ᠨᠢ ᠠᠳᠠᠯᠢᠬᠠᠨ ᠶᠤᠮ᠃ ᠶᠠᠭ ᠢᠩᠬᠢᠵᠦ ᠰᠡᠳᠬᠢᠯ ᠵᠢᠷᠦᠭᠡ ᠪᠠᠨ ᠰᠢᠩᠭᠡᠭᠡᠭᠰᠡᠨ ᠪᠤᠯᠬᠤᠷ ᠲᠡᠳᠡᠨ ᠤ᠋ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠢ᠋ ᠬᠦᠮᠦᠰ ᠪᠤᠯᠢᠶᠠᠯᠳᠤᠨ ᠠᠪᠳᠠᠭ ᠪᠢᠯᠡ᠃ ᠭᠡᠪᠡᠴᠦ ᠨᠠᠪᠴᠢᠮᠠ ᠰᠡᠳᠬᠢᠯ ᠬᠠᠨᠤᠭᠰᠠᠨ ᠦᠬᠡᠢ᠂ ᠰᠢᠨᠠ ᠵᠢ ᠰᠦᠪᠡᠭᠴᠢᠯᠡᠬᠦ ᠵᠠᠩ ᠶ᠋ᠢᠡᠨ ᠤᠷᠬᠢᠭᠰᠠᠨ ᠦᠬᠡᠢ᠃
ᠲᠡᠷᠡ ᠡᠵᠢ ᠪᠠᠨ ᠰᠠᠨᠠᠯᠠ᠂ ᠵᠦᠭᠡᠭᠡᠢ ᠲᠠᠢ ᠵᠢᠭᠤᠷᠠᠭᠰᠠᠨ ᠪᠤᠳᠠᠭᠠ ᠪᠠᠨ ᠰᠠᠨᠠᠯᠠ᠂ ᠲᠤᠭᠤᠯ ᠲᠠᠲᠠᠵᠦ ᠪᠠᠢᠭᠠᠳ ᠬᠦᠯ ᠶ᠋ᠢᠡᠨ ᠬᠢᠰᠬᠢᠬᠦᠯᠦᠭᠡᠳ ᠤᠬᠢᠯᠠᠵᠦ ᠪᠠᠢᠭᠰᠠᠨ ᠶ᠋ᠢᠡᠨ ᠰᠠᠨᠠᠯᠠ᠃ 《ᠬᠦᠬᠡᠷᠤᠬᠦᠢ ᠲᠤᠭᠤᠯ ᠡᠬᠡ ᠵᠢᠨ ᠰᠦ ᠳ᠋ᠡᠭᠡᠨ ᠲᠡᠢᠮᠦ ᠲᠤᠷᠠᠳᠠᠢ᠂ ᠪᠢ ᠲᠡᠷᠡ ᠰᠦ ᠵᠢ ᠨᠢ ᠤᠤᠭᠤᠬᠤ ᠬᠡᠵᠦ ᠲᠤᠭᠤᠯ ᠡᠴᠡ ᠢᠯᠡᠬᠦᠦ ᠳᠤᠷᠠᠳᠠᠢ ᠪᠠᠢᠳᠠᠭ》 ᠭᠡᠵᠦ ᠨᠠᠪᠴᠢᠮᠠ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠤ᠋ᠨ ᠵᠦᠭᠡᠭᠡᠢ ᠪᠠᠨ ᠵᠢᠭᠤᠷᠠᠬᠤ ᠦᠶᠡᠰ ᠢᠨᠢᠶᠡᠳᠦ ᠠᠯᠳᠠᠭᠰᠠᠨ ᠶ᠋ᠢᠡᠨ ᠭᠡᠨᠡᠳᠳᠡ ᠶᠠᠭᠤ ᠨᠢᠭᠡ ᠵᠢ ᠰᠡᠬᠡᠰᠬᠢᠨ ᠪᠤᠳᠤᠵᠦ ᠤᠯᠤᠯᠠ᠃ ᠦᠨᠢᠶᠡᠨ ᠰᠦ ᠪᠠᠷ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠤ᠋ᠨ ᠵᠦᠭᠡᠭᠡᠢ ᠵᠢ ᠤᠷᠤᠯᠠᠭᠤᠯᠵᠦ ᠬᠢᠶᠡ ᠭᠡᠳ ᠳᠠᠬᠢᠨᠳᠠ ᠲᠤᠷᠰᠢᠯᠳᠠ ᠵᠢᠨ ᠠᠶᠠᠨ ᠳ᠋ᠠᠭᠠᠨ ᠭᠠᠷᠪᠠ᠃
《ᠪᠢᠳᠠ ᠤᠤᠯ ᠳ᠋ᠠᠭᠠᠨ ᠤᠷᠭᠤᠮᠠᠯ ᠤ᠋ᠨ ᠵᠦᠭᠡᠭᠡᠢ ᠵᠢ ᠬᠡᠷᠡᠭᠯᠡᠵᠦ ᠪᠠᠢᠭᠰᠠᠨ᠂ ᠤᠷᠭᠤᠮᠠᠯ ᠤ᠋ᠨ ᠵᠦᠭᠡᠭᠡᠢ ᠵᠢ ᠬᠦᠮᠦᠨ ᠤ᠋ ᠬᠦᠴᠦ ᠪᠠᠷ ᠪᠤᠯᠪᠠᠰᠤᠷᠠᠭᠤᠯᠵᠦ ᠭᠠᠷᠭᠠᠳᠠᠭ᠃ ᠲᠡᠭᠡᠭᠡᠳ ᠪᠢ ᠴᠤᠯ ᠦᠨᠢᠶᠡᠨ ᠰᠦ ᠪᠠᠷ ᠬᠢᠭᠰᠡᠨ ᠵᠦᠭᠡᠭᠡᠢ ᠵᠢ ᠵᠠᠷᠤᠬᠤ ᠪᠤᠳᠤᠯ ᠤᠷᠤᠵᠦ᠂ ᠬᠡᠳᠦᠨ ᠮᠢᠩᠭᠠᠨ ᠵᠢᠩ ᠰᠦ ᠪᠠᠷ ᠲᠤᠷᠰᠢᠯᠳᠠ ᠬᠢᠵᠦ ᠪᠠᠢᠮᠠᠨᠵᠢᠨ ᠰᠠᠶᠢ ᠤᠳᠤ ᠵᠢᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠤ᠋ᠨ ᠵᠦᠭᠡᠭᠡᠢ ᠪᠠᠨ ᠭᠠᠷᠭᠠᠵᠦ ᠠᠪᠤᠭᠰᠠᠨ ᠶᠤᠮ᠃ ᠶᠡᠷᠦ ᠨᠢ ᠵᠢᠯ ᠤ᠋ᠨ ᠳᠦᠷᠪᠡᠨ ᠤᠯᠠᠷᠢᠯ ᠤ᠋ᠨ ᠠᠭᠤᠷ ᠠᠮᠢᠰᠬᠤᠯ ᠠᠳᠠᠯᠢ ᠦᠬᠡᠢ ᠪᠤᠯᠬᠤᠷ ᠦᠬᠡᠷ ᠤ᠋ᠨ ᠢᠳᠡᠬᠦ ᠡᠪᠡᠰᠦ᠂ ᠤᠤᠭᠤᠬᠤ ᠤᠰᠤ᠂ ᠬᠡᠪᠳᠡᠵᠦ ᠠᠮᠠᠷᠠᠬᠤ ᠵᠡᠷᠭᠡ ᠡᠴᠡ ᠰᠢᠯᠳᠠᠭᠠᠯᠠᠨ ᠵᠦᠭᠡᠬᠡᠢ ᠨᠠᠢᠷᠠᠭᠤᠯᠬᠤ ᠳ᠋ᠤ ᠴᠸ᠋ ᠠᠳᠠᠯᠢ ᠪᠤᠰᠤ ᠴᠠᠭ ᠲᠸ᠋ ᠭᠡᠳᠦᠢ ᠭᠷᠡᠮ ᠳ᠋ᠤ ᠬᠡᠳᠦᠢ ᠵᠦᠭᠡᠭᠡᠢ ᠵᠢ ᠬᠡᠳᠦᠢ ᠭᠷᠠᠳᠦ᠋ᠰ ᠤ᠋ᠨ ᠬᠠᠯᠠᠭᠤᠨ ᠳ᠋ᠤ ᠨᠠᠢᠷᠠᠭᠤᠯᠬᠤ ᠨᠢ ᠨᠠᠷᠢᠨ ᠵᠢᠷᠤᠮ ᠲᠠᠢ ᠪᠠᠢᠳᠠᠭ》 ᠭᠡᠵᠦ ᠨᠠᠪᠴᠢᠮᠠ ᠰᠢᠨᠡᠭᠡᠨ ᠢᠷᠡᠭᠰᠡᠨ ᠰᠦ ᠪᠠᠨ ᠰᠢᠯᠭᠠᠵᠦ ᠪᠠᠢᠯᠠ᠃
ᠦᠨᠢᠶᠡᠨ ᠰᠦ ᠪᠠᠷ ᠵᠦᠭᠡᠭᠡᠢ ᠪᠡᠨ ᠨᠠᠢᠷᠠᠭᠤᠯᠵᠦ ᠭᠠᠷᠭᠠᠯᠠ᠃ ᠢᠩᠬᠢᠭᠡᠳ ᠵᠤᠭᠰᠤᠬᠤ ᠤᠤ ？ ᠨᠠᠪᠴᠢᠮᠠ ᠵᠢᠨ ᠬᠠᠷᠢᠭᠤᠯᠳᠠ ᠨᠢ 《 ᠦᠬᠡᠢ 》 ᠭᠡᠰᠡᠨ ᠭᠠᠭᠴᠠ ᠦᠬᠡ᠃ ᠲᠡᠷᠡ ᠳᠠᠬᠢᠨ ᠰᠢᠷᠠ ᠲᠤᠰᠤ᠂ ᠴᠦᠴᠦᠭᠡᠢ᠂ ᠬᠤᠷᠤᠳ᠂ ᠠᠭᠠᠷᠤᠤᠯ ᠵᠡᠷᠭᠡ ᠵᠢ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠲᠸ᠋ ᠠᠭᠤᠰᠬᠠᠨ ᠤᠷᠤᠭᠤᠯᠤᠭᠰᠠᠭᠠᠷ ᠯᠡ ᠪᠠᠢᠪᠠ᠃ ᠤᠳᠤ ᠲᠡᠳᠡᠨ ᠤ᠋ ᠳᠡᠯᠭᠡᠭᠦᠷ ᠲᠸ᠋ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠤ᠋ᠨ ᠲᠦᠷᠦᠯ ᠵᠦᠢᠯ᠂ ᠰᠢᠬᠢᠷ ᠲᠤᠰᠤᠨ ᠤ᠋ ᠲᠦᠷᠦᠯ ᠵᠦᠢᠯ᠂ ᠴᠠᠭᠠᠨ ᠢᠳᠡᠭᠡᠨ ᠤ᠋ ᠪᠤᠭᠤᠷᠰᠤᠭ ᠤ᠋ᠨ ᠲᠦᠷᠦᠯ ᠵᠦᠢᠯ ᠭᠡᠳ 70 ᠰᠢᠬᠠᠮ ᠲᠦᠷᠦᠯ ᠵᠦᠢᠯ ᠤ᠋ᠨ ᠪᠤᠭᠤᠷᠰᠤᠭ ᠢ᠋ ᠬᠤᠳᠠᠯᠳᠤᠵᠦ ᠪᠠᠢᠨᠠ᠃
《ᠴᠠᠭᠠᠨ ᠢᠳᠡᠭᠡᠨ ᠤ᠋ ᠰᠠᠢᠨ ᠲᠠᠢ ᠲᠠᠯᠠ ᠵᠢ ᠬᠦᠮᠦᠰ ᠪᠦᠷ ᠮᠡᠳᠡᠳᠡᠭ᠂ ᠲᠡᠬᠦᠨ ᠢ᠋ ᠨᠡᠭᠡᠭᠡᠨ ᠬᠦᠭᠵᠢᠬᠦᠯᠵᠦ ᠳᠡᠯᠭᠡᠷᠡᠬᠦᠯᠬᠦ ᠪᠤᠯ ᠬᠦᠳᠡᠬᠡ ᠨᠤᠲᠤᠭ ᠤ᠋ᠨ ᠦᠷᠡᠰ ᠪᠢᠳᠠᠨ ᠤ᠋ ᠡᠭᠦᠷᠭᠡ ᠪᠤᠯᠤᠨᠠ᠃ ᠡᠬᠦᠨ ᠤ᠋ ᠲᠦᠯᠦᠭᠡ ᠦᠴᠦᠭᠡᠨ ᠬᠦᠴᠦ ᠪᠠᠨ ᠭᠠᠷᠭᠠᠵᠦ ᠪᠠᠢᠭᠠ ᠮᠢᠨᠢ ᠡᠨᠡ ᠪᠢᠯᠡ᠃ ᠮᠠᠨ ᠤ᠋ ᠳᠡᠯᠭᠡᠭᠦᠷ ᠲᠸ᠋ ᠬᠡᠷᠡᠭᠯᠡᠬᠦ ᠴᠠᠭᠠᠨ ᠢᠳᠡᠭᠡᠨ᠂ ᠰᠢᠷᠠ ᠲᠤᠰᠤᠨ ᠤ᠋ ᠬᠡᠮᠵᠢᠶᠡ ᠶᠡᠬᠡ ᠪᠤᠯᠬᠤᠷ ᠪᠢᠳᠠ ᠬᠦᠳᠡᠭᠡ ᠨᠤᠲᠤᠭ ᠡᠴᠡ ᠴᠤᠯ ᠪᠠᠢᠭᠠᠯᠢᠯᠢᠭ ᠢ᠋ ᠤᠷᠤᠭᠤᠯᠵᠦ ᠪᠠᠢᠨᠠ᠃ ᠵᠢᠯ ᠳ᠋ᠤ ᠪᠠᠷᠤᠭ 5000 ᠵᠢᠩ ᠤ᠋ᠨ ᠰᠢᠷᠠ ᠲᠤᠰᠤ ᠵᠢ ᠰᠢᠯᠤᠭᠤᠨ ᠬᠦᠬᠡ ᠬᠤᠰᠢᠭᠤᠨ ᠤ᠋ ᠮᠠᠯᠴᠢᠨ ᠠᠢᠯ ᠡᠴᠡ ᠤᠷᠤᠭᠤᠯᠵᠦ᠂ ᠮᠠᠯᠴᠢᠨ ᠲᠦᠮᠡᠨ ᠳ᠋ᠡᠭᠡᠨ ᠴᠠᠭᠠᠨ ᠢᠳᠡᠭᠡᠨ ᠵᠢᠡᠨ ᠪᠤᠷᠤᠯᠠᠭᠤᠯᠬᠤ ᠰᠢᠨᠠ ᠵᠠᠮ ᠢ᠋ ᠨᠡᠭᠡᠭᠡᠵᠦ ᠥᠭᠬᠦ ᠪᠠᠷ ᠴᠢᠷᠮᠠᠢᠵᠦ ᠪᠠᠢᠨᠠ》 ᠭᠡᠵᠦ ᠨᠠᠪᠴᠢᠮᠠ ᠤᠯᠵᠠᠭᠤᠷᠬᠠᠨᠠ᠃
ᠬᠦᠳᠡᠭᠡ ᠡᠴᠡ ᠭᠠᠷᠴᠤ ᠬᠤᠳᠠ ᠤᠷᠤᠭᠰᠠᠨ᠂ ᠬᠤᠳᠠ ᠡᠴᠡ ᠪᠠᠨ ᠳᠠᠬᠢᠨ ᠬᠦᠭᠵᠢᠯ ᠢ᠋ ᠡᠷᠢᠯᠬᠢᠯᠡᠬᠦ ᠪᠤᠯ ᠲᠡᠬᠦᠨ ᠤ᠋ ᠠᠮᠵᠢᠯᠳᠠ ᠤᠯᠤᠭᠰᠠᠨ ᠤ᠋ ᠪᠠᠰᠠ ᠨᠢᠭᠡᠨ ᠵᠤᠷ ᠭᠡᠯᠳᠡᠢ᠃ ᠨᠠᠪᠴᠢᠮᠠ ᠵᠢᠯ ᠪᠤᠯᠭᠠᠨ ᠱᠠᠩᠬᠠᠢ᠂ ᠲᠢᠶᠠᠨᠵᠢᠨ᠂ ᠵᠸᠵᠢᠶᠠᠩ ᠵᠡᠷᠭᠡ ᠬᠦᠭᠵᠢᠭᠰᠡᠨ ᠬᠤᠳᠠ ᠳ᠋ᠤ ᠶᠠᠪᠤᠭᠳᠠᠬᠤ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠤ᠋ᠨ ᠴᠤᠭᠯᠠᠭᠠᠨ ᠳ᠋ᠤ ᠠᠯᠳᠠᠯ ᠦᠬᠡᠢ ᠶᠠᠪᠤᠵᠦ ᠰᠤᠷᠤᠯᠴᠠᠳᠠᠭ᠃ ᠨᠢᠭᠡ ᠤᠳᠠᠭᠠ ᠤᠴᠢᠪᠠᠯ ᠨᠢᠭᠡ ᠰᠢᠨᠠ ᠵᠦᠢᠯ ᠢ᠋ ᠰᠤᠷᠳᠠᠭ ᠪᠤᠯᠬᠤᠷ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠨᠢ ᠤᠯᠠᠨ ᠲᠦᠮᠡᠨ ᠤ᠋ ᠲᠠᠭᠠᠰᠢᠶᠠᠯ ᠳ᠋ᠤ ᠬᠦᠷᠳᠡᠭ ᠤ᠋ᠨ ᠨᠢᠭᠤᠴᠠ ᠨᠢ ᠴᠸ᠋ ᠡᠨᠡ ᠪᠠᠢᠯᠬᠦᠢ᠃
《ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠤ᠋ᠨ ᠴᠤᠭᠯᠠᠭᠠᠨ ᠳ᠋ᠤ ᠶᠠᠪᠤᠪᠠᠯ ᠠᠷᠪᠢᠨ ᠵᠦᠢᠯ ᠢ᠋ ᠤᠯᠵᠤ ᠰᠤᠷᠳᠠᠭ᠂ ᠶᠡᠷᠦ ᠨᠢ ᠨᠢᠳᠦ ᠪᠠᠷ ᠦᠵᠡᠵᠦ ᠭᠠᠷ ᠶ᠋ᠢᠡᠷ ᠶ᠋ᠢᠡᠨ ᠪᠠᠷᠢᠬᠤ ᠨᠢ ᠤᠨᠳᠤᠤ ᠪᠠᠢᠳᠠᠭ ᠡ᠂ ᠮᠠᠨ ᠤ᠋ ᠬᠡᠷᠡᠭᠯᠡᠵᠦ ᠪᠠᠢᠭᠠ ᠰᠢᠬᠢᠷ ᠢ᠋ ᠴᠤᠭᠯᠠᠭᠠᠨ ᠳ᠋ᠸ᠋ ᠤᠴᠢᠭᠠᠳ ᠰᠤᠷᠴᠦ ᠮᠡᠳᠡᠭᠰᠡᠨ ᠶᠤᠮ᠃ ᠮᠦᠨ ᠪᠠᠰᠠ ᠪᠤᠭᠤᠷᠰᠤᠭ ᠶ᠋ᠢᠡᠨ ᠰᠢᠷᠠᠬᠤ ᠲᠤᠭᠤᠭᠠ᠂ ᠠᠮᠳᠠ ᠨᠠᠢᠷᠠᠭᠤᠯᠭᠠ᠂ ᠤᠷᠠᠯᠠᠵᠦ ᠬᠡᠬᠡᠯᠡᠬᠦ᠂ ᠰᠢᠨᠠ ᠴᠠᠭ ᠦᠶᠠ ᠵᠢ ᠬᠡᠷᠬᠢᠨ ᠳᠠᠭᠠᠬᠤ ᠭᠡᠳ ᠠᠷᠪᠢᠨ ᠵᠦᠢᠯ ᠢ᠋ ᠰᠤᠷᠤᠭᠰᠠᠨ》 ᠭᠡᠵᠦ ᠨᠠᠪᠴᠢᠮᠠ ᠶᠠᠷᠢᠨᠠ᠃
ᠲᠡᠷᠡ ᠪᠠᠰᠠ ᠴᠦ᠍ ᠠᠵᠢᠯ ᠨᠢᠭᠡᠳᠡᠨ ᠶ᠋ᠢᠡᠨ ᠳᠡᠮᠵᠢᠵᠦ ᠦᠪᠡᠷ ᠤ᠋ᠨ ᠤᠷᠠ ᠴᠢᠳᠠᠪᠤᠷᠢ ᠪᠠᠨ ᠤᠯᠠᠮᠵᠢᠯᠠᠬᠤ ᠵᠢ ᠵᠤᠷᠢᠳᠠᠭ ᠨᠢᠩᠵᠢᠨ ᠰᠡᠳᠬᠢᠯᠳᠠᠨ ᠶᠤᠮ᠃ ᠤᠳᠤᠬᠠᠨ ᠪᠤᠯᠳᠠᠯᠠ ᠨᠢᠬᠡᠨᠳᠡ ᠠᠷᠪᠠᠭᠠᠳ ᠭᠠᠷ ᠤ᠋ᠨ ᠱᠠᠪᠢ ᠬᠦᠮᠦᠵᠢᠬᠦᠯᠦᠭᠰᠡᠨ ᠪᠦᠭᠡᠳ ᠵᠠᠷᠢᠮ ᠨᠢ ᠬᠤᠪᠢ ᠵᠢᠨ ᠳᠡᠯᠭᠡᠭᠦᠷ ᠡᠵᠡᠩᠨᠡᠵᠦ ᠤᠷᠤᠨ ᠨᠤᠲᠤᠭ ᠲᠠᠭᠠᠨ ᠭᠢᠯᠠᠷᠠᠭᠤᠯᠵᠦ ᠶᠠᠪᠤᠨᠠ᠃ ᠠᠯᠠᠱᠠ ᠵᠡᠬᠦᠨ ᠬᠤᠰᠢᠭᠤ ᠪᠠᠷ ᠨᠤᠲᠤᠭᠳᠠᠢ ᠴᠡᠯᠮᠡᠭ ᠬᠡᠳᠦᠨ ᠵᠢᠯ ᠤ᠋ᠨ ᠡᠮᠦᠨᠡ ᠲᠡᠬᠦᠨ ᠳ᠋ᠤ ᠱᠠᠪᠢᠯᠠᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠬᠢᠬᠦ ᠵᠢ ᠰᠤᠷᠤᠭᠠᠳ ᠤᠳᠤ ᠠᠢᠮᠠᠭ ᠳᠡᠭᠡᠷᠡ ᠪᠠᠨ ᠳᠡᠯᠭᠡᠭᠦᠷ ᠡᠷᠬᠢᠯᠡᠭᠰᠡᠨ ᠪᠠᠢᠯᠠ᠃
《ᠮᠢᠨᠤ ᠬᠢᠭᠰᠡᠨ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠦᠷᠬᠦᠯᠵᠢ ᠪᠠᠶᠠᠷ ᠵᠢᠷᠭᠠᠯ ᠤ᠋ᠨ ᠳᠡᠭᠡᠵᠢ ᠪᠡᠷ ᠭᠠᠷᠳᠠᠭ ᠲᠤᠨᠢ ᠪᠡᠯᠭᠡᠰᠢᠶᠡᠳᠡᠭ ᠶᠤᠮ᠂ ᠬᠦᠮᠦᠰ ᠲᠸ᠋ ᠪᠠᠶᠠᠷ ᠵᠢᠷᠭᠠᠯ ᠪᠡᠯᠡᠭᠯᠡᠬᠦ ᠰᠢᠭ ᠰᠠᠢᠬᠠᠨ ᠵᠦᠢᠯ ᠬᠠᠮᠢᠭᠠ ᠪᠠᠢᠬᠤ ᠪᠤᠢ⁈ ᠲᠡᠢᠮᠦ ᠪᠤᠯᠬᠤᠷ ᠪᠢ ᠴᠢᠨᠠᠷᠯᠢᠭ᠂ ᠠᠮᠳᠠᠳᠠᠢ᠂ ᠡᠷᠡᠬᠦᠯ ᠮᠡᠨᠳᠦ ᠳ᠋ᠤ ᠲᠤᠰᠠᠳᠠᠢ᠂ ᠴᠤᠯ ᠪᠠᠢᠭᠠᠯᠢᠯᠢᠭ ᠤᠷᠤᠴᠠ ᠲᠠᠢ ᠦᠨᠳᠡᠭᠡᠲᠤ ᠪᠤᠭᠤᠷᠰᠤᠭ ᠢ᠋ ᠬᠢᠬᠦ ᠪᠠᠷ ᠬᠢᠴᠢᠶᠡᠨ ᠵᠢᠳᠬᠦᠵᠦ ᠶᠠᠪᠤᠨᠠ》 ᠭᠡᠵᠦ ᠨᠠᠪᠴᠢᠮᠠ ᠵᠦᠭᠡᠯᠡᠨ ᠢᠨᠢᠶᠡᠮᠰᠦᠭᠯᠡᠪᠡ᠃
