ᠬᠣᠷᠠᠬᠰᠠᠨ ᠡᠬᠦᠯᠡᠰ ᠡᠴᠡ ᠰᠡᠳᠬᠢᠯᠤᠨ ᠭᠡᠭᠡ ᠪᠠᠨ ᠬᠠᠷᠠᠬᠣ ᠨᠢ
ᠬᠣᠷᠠᠶᠢᠨ ᠲᠠᠷᠠᠭᠠᠬᠢ ᠰᠣᠯᠣᠩᠭᠠ ᠡᠴᠡ ᠠᠮᠢᠲᠣᠷᠠᠯ ᠴᠡᠴᠡᠭᠯᠡᠬᠦ ᠮᠡᠲᠦ ᠵᠢᠪᠬᠣᠭᠠᠲᠠᠢ
ᠲᠡᠷᠳᠡᠭᠡ ᠡᠴᠡ ᠠᠨᠢᠷᠯᠠᠬᠣ ᠲᠡᠬᠦᠯᠲᠡᠷ ᠬᠦᠭᠵᠢᠮ ᠰᠣᠨᠣᠷ ᠲᠦ᠍ ᠠᠢᠵᠠᠮᠯᠠᠭᠠᠳ
ᠲᠡᠭᠷᠢᠶᠢᠨ ᠡᠭᠡᠰᠢᠭ ᠬᠣᠷᠴᠢᠨᠤ ᠲᠠᠯᠠ ᠳ᠋ᠦ ᠲᠠᠭᠣᠷᠢᠰᠬᠣ ᠮᠡᠲᠦ ᠴᠣᠣᠷᠢᠶᠠᠲᠠᠢ
ᠨᠢᠯᠬᠠ ᠨᠣᠭᠣᠭᠠ ᠬᠣᠷᠠᠶᠢᠨ ᠰᠢᠮᠡ ᠪᠡᠷ ᠡᠬᠡ ᠭᠠᠵᠠᠷ ᠲᠠᠭᠠᠨ ᠨᠢᠯᠬᠠᠷᠠᠨ ᠰᠡᠷᠪᠡᠯᠵᠡᠭᠡᠳ
ᠨᠣᠲᠣᠬᠤᠨ ᠡᠯᠢᠭᠡᠨ ᠳ᠋ᠡᠭᠡᠨ ᠪᠠᠲᠠᠷᠠᠵᠦ ᠣᠷᠭᠣᠬᠣ ᠣᠮᠣᠬᠯᠠᠩ ᠴᠣᠬᠲᠠᠢ
ᠴᠡᠴᠡᠭ ᠡᠷᠪᠡᠬᠡᠢ ᠬᠣᠣᠰᠯᠠᠨ ᠪᠠᠯᠲᠣ ᠰᠠᠷᠠᠶᠢ ᠣᠷᠮᠠᠰᠢᠨ ᠪᠦᠵᠢᠭᠯᠡᠭᠡᠳ
ᠴᠡᠩᠭᠡᠯ ᠪᠢᠯᠬᠠᠬᠰᠠᠨ ᠠᠮᠢᠲᠣᠷᠠᠯᠢ ᠲᠠᠭᠣᠯᠠᠨ ᠵᠢᠷᠭᠠᠬᠣ ᠮᠡᠲᠦ ᠦᠵᠡᠰᠬᠦᠯᠡᠩ
ᠬᠠᠢᠯᠠᠰᠣᠨᠤ ᠨᠠᠪᠴᠢ ᠨᠠᠮᠠᠭᠠ ᠶᠣᠪᠣᠷᠤᠯᠲᠠᠨ ᠰᠢᠪᠡᠨᠡᠯᠲᠦᠭᠡᠳ
ᠮᠣᠲᠣᠨ ᠡᠴᠡ ᠪᠠᠨ ᠬᠠᠭᠠᠴᠠᠵᠦ ᠶᠠᠲᠠᠮᠠ ᠰᠡᠳᠬᠢᠯᠢ ᠲᠣᠭᠠᠴᠢᠮᠠ ᠮᠡᠲᠦ ᠣᠶᠠᠷᠠᠭᠣᠨ
ᠬᠦᠪᠴᠢᠨ ᠲᠡᠯᠡᠬᠡᠢ ᠡᠬᠡ ᠪᠠᠢᠭᠠᠯᠢ ᠪᠠᠨ ᠡᠩᠬᠦᠷᠡᠢᠯᠡᠨ ᠢᠯᠪᠢᠬᠦ ᠨᠢ
ᠬᠦᠷᠦᠭᠡᠳ ᠢᠷᠡᠬᠦ ᠣᠯᠠᠷᠢᠯ ᠡᠴᠡ ᠦᠷᠡ ᠵᠢᠮᠢᠰ ᠲᠡᠬᠦᠬᠦ ᠮᠡᠲᠦ ᠪᠠᠶᠠᠰᠬᠣᠯᠠᠩᠲᠠᠢ
ᠬᠣᠯᠠᠶᠢᠨ ᠨᠠᠢᠷᠠᠬᠴᠢᠶᠢᠨ ᠦᠭᠡ ᠦᠰᠦᠭ ᠦᠷᠦᠬᠡ ᠳ᠋ᠦ ᠨᠢᠰᠦᠯᠴᠡᠬᠦ ᠨᠢ
ᠣᠷᠠᠯᠢᠬᠤᠨ ᠰᠠᠬᠢᠭᠣᠰᠣ ᠬᠠᠢᠷᠠ ᠬᠡᠮᠨᠡᠵᠦ ᠴᠡᠩᠭᠡᠬᠦ ᠮᠡᠲᠦ ᠵᠢᠷᠭᠠᠯᠲᠠᠢ
ᠠᠮᠢᠲᠣᠷᠠᠯ ᠬᠠᠢᠷᠠᠶᠢᠨ ᠠᠶᠠᠯᠭᠣᠨ ᠲᠡᠭᠡᠷᠡ ᠦᠪᠡᠷ ᠪᠢ ᠪᠡᠷ ᠶ᠋ᠢᠡᠨ ᠭᠠᠩᠭᠠᠷᠠᠭᠠᠳ
ᠵᠦᠩ ᠮᠡᠳᠡᠷᠡᠮᠵᠢᠶᠢᠨ ᠬᠦᠨ ᠬᠢᠵᠠᠭᠠᠷ ᠲᠦ᠍ ᠰᠡᠳᠬᠢᠯᠤᠨ ᠵᠣᠯᠠ ᠪᠠᠳᠮᠠᠯᠠᠵᠦ ᠬᠡᠷᠡᠯᠲᠦᠬᠦᠢ
ᠦᠲᠡᠰᠢᠶᠢᠨ ᠰᠠᠷᠠᠨ ᠡᠴᠡ ᠠᠮᠣᠷ ᠠᠮᠣᠭᠣᠯᠠᠩ ᠪᠣᠲᠣᠯ ᠳ᠋ᠦ ᠨᠡᠪᠴᠢᠭᠡᠳ
ᠦᠨᠡᠨ ᠰᠠᠨᠠᠭᠠᠨᠤ ᠦᠵᠦᠬᠦᠷ ᠲᠣᠷᠠᠯᠠᠯ ᠠᠰᠠᠬᠣ ᠮᠡᠲᠦ ᠠᠮᠠᠷᠠᠬ ᠲᠣᠬᠲᠣᠯᠣᠩᠭᠣᠢ
ᠨᠠᠮ ᠵᠢᠮ ᠠᠶᠠᠰᠲᠠᠬᠣᠢ ᠳ᠋ᠦ ᠬᠡᠨ ᠨᠢᠭᠡᠨ ᠨᠠᠮᠣᠭᠣᠬᠠᠨ ᠲᠠᠯᠠᠶᠢᠨ ᠰᠢᠯᠦᠭ ᠲᠡᠷᠯᠡᠭᠡᠳ
ᠲᠣᠨᠣᠯᠵᠠᠬᠰᠠᠨ ᠮᠦᠷᠡᠨ ᠭᠣᠣᠯᠤᠨ ᠣᠷᠣᠰᠬᠠᠯ ᠰᠢᠬ ᠢᠷᠠᠭᠣ ᠣᠶᠠᠩᠭᠠᠲᠠᠢ
ᠡᠪᠦᠭᠡᠳ ᠡᠴᠡ ᠦᠪᠯᠡᠭᠰᠡᠨ ᠪᠣᠳᠢ ᠰᠣᠷᠭᠠᠯ ᠲᠡᠷᠢᠬᠢᠨ ᠳ᠋ᠦ ᠰᠡᠢᠯᠦᠭᠲᠡᠭᠡᠳ
ᠦᠯᠡᠮᠵᠢᠶᠢᠨ ᠠᠷᠢᠭᠣᠨ ᠴᠢᠨᠠᠷ ᠰᠣᠲᠠᠰᠣ ᠪᠦᠬᠦᠨ ᠶ᠋ᠢᠡᠷ ᠨᠡᠪᠲᠡᠷᠡᠬᠦ ᠮᠡᠲᠦ ᠣᠴᠢᠷᠯᠠᠩᠭᠣᠢ
ᠲᠣᠷᠮᠣᠯᠵᠠᠬᠣ ᠣᠲᠣᠳᠤᠨ ᠵᠣᠭᠣᠬ ᠡᠴᠡ ᠣᠷᠴᠢᠯᠠᠩᠤᠨ ᠨᠢᠭᠣᠴᠠᠶᠢ ᠴᠢᠩᠨᠠᠬᠣᠶᠢᠨ ᠬᠣᠷᠣᠮ
ᠲᠡᠨᠢᠬᠦᠨ ᠬᠣᠷᠸᠠᠶᠢᠨ ᠬᠠᠴᠢᠨ ᠵᠠᠲᠠᠷᠠᠬᠣ ᠮᠡᠲᠦ ᠭᠠᠢᠬᠠᠮᠰᠢᠬ
ᠭᠡᠭᠡ ᠪᠠᠨ ᠵᠢᠷᠮᠦᠰᠦᠯᠡᠭᠰᠡᠨ ᠬᠠᠷᠠᠩᠭᠣᠢ ᠲᠡᠭᠷᠢᠶᠢᠨ ᠬᠠᠶᠠᠭᠠᠨ ᠳ᠋ᠦ ᠨᠡᠬᠦᠬᠦ ᠨᠢ
ᠭᠡᠷᠤᠨ ᠬᠠᠨᠠ ᠰᠢᠭᠣᠬᠲᠠᠵᠦ ᠰᠠᠯᠬᠢᠨᠤ ᠰᠢᠪᠡᠨᠡᠭᠡ ᠠᠨᠢᠷᠯᠠᠬᠣ ᠮᠡᠲᠦ ᠵᠣᠭᠠᠲᠠᠢ
ᠭᠡᠷᠡᠯᠤᠨ ᠰᠦᠭ ᠣᠷᠣᠰᠢᠬᠰᠠᠨ ᠲᠣᠯᠣᠭᠠᠨ ᠠᠶᠠᠯᠭᠣ ᠪᠡᠷ ᠬᠦᠰᠡᠯ ᠮᠦᠷᠦᠭᠡᠲᠦᠯ ᠶ᠋ᠢᠡᠨ ᠲᠠᠭᠣᠯᠠᠭᠠᠳ
ᠣᠷᠣᠰᠢᠬᠣᠢᠶᠢᠨ ᠢᠯᠠ ᠲᠠᠯᠲᠠ ᠳ᠋ᠦ ᠢᠵᠢᠯᠢᠰᠢᠨ ᠲᠠᠢᠳᠬᠣᠷᠠᠬᠣᠢ
ᠭᠡᠷᠡᠯᠲᠦ ᠮᠦᠴᠡ ᠭᠡᠨᠡᠨ ᠬᠠᠢᠷᠠ ᠢᠪᠢᠯᠦᠬᠦᠯᠵᠦ ᠲᠣᠷᠠᠯᠠᠯᠤᠨ ᠡᠷᠴᠢ ᠱᠠᠩᠨᠠᠨᠠ
ᠨᠠᠮᠵᠢᠭᠣᠨ ᠰᠦᠨᠢ ᠲᠣᠷᠠᠳᠬᠠᠯ ᠨᠦᠮᠦᠷᠴᠦ ᠵᠢᠷᠦᠬᠡᠨ ᠴᠣᠬᠢᠯᠭᠠ ᠪᠠᠨ ᠴᠢᠩᠨᠠᠨᠠ
ᠡᠬᠡ ᠨᠣᠲᠣᠬᠤᠨ ᠲᠣᠷᠭᠠᠨ ᠵᠢᠪᠡᠷ ᠡᠮᠵᠡᠭᠯᠡᠭᠰᠡᠨ ᠡᠯᠢᠭᠡᠶᠢ ᠠᠨᠠᠭᠠᠨᠠ
ᠡᠭᠡᠯ ᠶᠡᠷᠦᠮᠲᠡᠭ ᠲᠦ᠍ ᠲᠠᠰᠴᠣ ᠪᠢ ᠰᠡᠳᠬᠢᠯᠤᠨ ᠭᠡᠭᠡᠨ ᠠᠶᠠᠯᠭᠣ ᠴᠢᠪᠬᠠᠲᠠᠨᠠ