ᠮᠠᠯ ᠠᠵᠤ ᠠᠬᠤᠢ ᠲᠠᠷᠢᠶᠠᠯᠠᠩ ᠭᠡᠬᠦ ᠪᠡᠷ᠂ ᠠᠯᠢ ᠤᠯᠠᠨ ᠬᠦᠮᠦᠨ ᠤ᠋ ᠪᠤᠳᠤᠯ ᠲᠠᠷᠢᠬᠢᠨ ᠳ᠋ᠤ 《ᠬᠦᠬᠡ ᠲᠩᠷᠢ ᠴᠡᠯᠡᠢᠨ᠂ ᠬᠦᠳᠡᠭᠡ ᠲᠠᠯᠠ ᠨᠡᠯᠤᠢᠵᠦ᠂ ᠠᠶᠠᠰ ᠤ᠋ᠨ ᠰᠠᠯᠬᠢᠨ ᠦᠯᠢᠶᠡᠭᠦᠶᠠ ᠠᠳᠤᠭᠤ ᠮᠠᠯ ᠢᠷᠠᠯᠵᠠᠮᠤᠢ》 ᠵᠢᠴᠢ 《ᠬᠠᠯᠠᠭᠤᠨ ᠨᠠᠷᠠᠨ ᠳ᠋ᠤ ᠲᠠᠷᠢᠶᠠ ᠠᠷᠴᠢᠬᠤᠶᠠ᠂ ᠬᠠᠷᠠ ᠬᠦᠯᠦᠰᠦ ᠴᠢᠪ ᠴᠢᠪ ᠲᠤᠰᠤᠯᠠᠮᠤᠢ᠂ ᠬᠠᠯᠪᠠᠭᠠᠨ ᠳ᠋ᠡᠬᠢ ᠮᠦᠬᠦᠯᠢᠭ ᠠᠮᠤ ᠶ᠋ᠢᠨ᠂ ᠬᠠᠯᠠᠰᠢᠷᠠᠯ ᠵᠤᠪᠠᠯᠠᠩ ᠢ᠋ ᠬᠡᠨ ᠮᠡᠳᠡᠬᠦ ᠠᠵᠢ》 ᠭᠡᠬᠦ ᠡᠷᠳᠡᠨ ᠤ᠋ ᠰᠢᠯᠦᠭ ᠤ᠋ᠨ ᠮᠦᠷ ᠪᠠᠳᠠᠭ ᠤ᠋ᠳ ᠤᠷᠤᠵᠤ ᠢᠷᠡᠨᠠ᠃ ᠲᠡᠭᠦᠨᠴᠢᠯᠡᠨ ᠤᠢᠷᠠ ᠶ᠋ᠢᠨ ᠵᠢᠯ ᠳ᠋ᠤ ᠬᠦᠳᠡᠭᠡ ᠨᠤᠳᠤᠭ ᠲᠤ᠌ ᠵᠠᠯᠠᠭᠤᠴᠤᠳ ᠤᠯᠠᠮ ᠡᠴᠡ ᠤᠯᠠᠮ ᠴᠦᠬᠡᠷᠡᠭᠰᠡᠨ ᠶ᠋ᠢᠡᠷ 《ᠬᠡᠨ ᠲᠠᠷᠢᠶᠠ ᠲᠠᠷᠢᠵᠤ᠂ ᠬᠡᠨ ᠮᠠᠯ ᠮᠠᠯᠵᠢᠬᠤ ᠪᠤᠢ？》 ᠭᠡᠵᠦ ᠬᠦᠮᠦᠰ ᠶᠡᠬᠡᠳᠡ ᠰᠠᠨᠠᠭᠠᠰᠢᠷᠠᠳᠠᠭ ᠪᠤᠯᠵᠠᠢ᠃
ᠵᠤᠬᠢᠶᠠᠮᠠᠯ ᠤᠶᠤᠨ ᠴᠢᠳᠠᠪᠤᠷᠢ ᠵᠡᠷᠭᠡ ᠰᠢᠨᠠ ᠲᠧᠭᠨᠢᠭ ᠮᠡᠷᠭᠡᠵᠢᠯ ᠤ᠋ᠨ ᠦᠷᠨᠢᠭᠦᠨ ᠬᠦᠭᠵᠢᠯᠳᠠ ᠨᠢ ᠡᠢᠨ ᠬᠦ᠌ ᠰᠠᠨᠠᠭᠠᠰᠢᠷᠠᠯ ᠢ᠋ ᠠᠭᠠᠵᠢᠮ ᠶ᠋ᠢᠡᠷ ᠬᠤᠪᠢᠷᠠᠭᠤᠯᠵᠤ᠂ 《ᠮᠠᠰᠢᠨ ᠬᠦᠮᠦᠨ ᠲᠠᠷᠢᠶᠠ ᠲᠠᠷᠢᠵᠤ᠂ ᠮᠠᠰᠢᠨ ᠬᠦᠮᠦᠨ ᠮᠠᠯ ᠮᠠᠯᠵᠢᠬᠤ ᠴᠠᠭ ᠦᠶᠠ ᠨᠢᠭᠡ ᠮᠡᠳᠡᠭᠦᠨᠠ ᠬᠦᠷᠴᠤ ᠢᠷᠡᠨᠠ》 ᠭᠡᠬᠦ ᠲᠦᠰᠦᠭᠡᠯᠡᠯ ᠪᠤᠢ ᠪᠤᠯᠤᠭᠰᠠᠨ ᠪᠦᠭᠡᠳ ᠵᠠᠷᠢᠮ ᠲᠠᠯᠠ ᠪᠡᠷ ᠨᠢᠭᠡᠨᠳᠡ ᠪᠤᠳᠠᠳᠠᠢ ᠦᠢᠯᠡᠳᠦᠯᠭᠡ ᠪᠤᠯᠪᠠ᠃ ᠲᠡᠭᠦᠨᠴᠢᠯᠡᠨ 《ᠢᠷᠡᠭᠡᠳᠦᠢ ᠶ᠋ᠢᠨ ᠮᠠᠯ ᠠᠵᠤ ᠠᠬᠤᠢ ᠲᠠᠷᠢᠶᠠᠯᠠᠩ ᠪᠤᠯ ᠠᠮᠢᠳᠤ ᠪᠤᠳᠠᠰ ᠤ᠋ᠨ ᠦᠢᠯᠡᠳᠭᠡᠯ᠂ ᠤᠶᠤᠨᠳᠤ ᠲᠤᠨᠤᠭᠯᠠᠯ᠂ ᠲᠤᠭᠠᠴᠢᠯᠠᠭᠰᠠᠨ ᠮᠡᠷᠭᠡᠵᠢᠯ᠂ ᠪᠤᠬᠢᠷᠳᠦᠯ ᠦᠭᠡᠢ ᠡᠨᠧᠷᠬᠢ ᠶ᠋ᠢ ᠨᠡᠢᠳᠭᠡᠭᠰᠡᠨ ᠬᠠᠮ ᠴᠤᠭᠴᠠ ᠪᠤᠯᠤᠨᠠ》 ᠭᠡᠵᠦ ᠡᠷᠳᠡᠮᠳᠡᠳ ᠦᠵᠡᠵᠦ ᠪᠤᠢ᠃ ᠲᠡᠭᠡᠬᠦ ᠪᠡᠷ ᠤᠳᠤᠬᠠᠨ ᠤ᠋ ᠵᠢᠯᠤᠭᠤᠴᠢ ᠦᠭᠡᠢ ᠨᠢᠰᠭᠡᠯ ᠶ᠋ᠢᠡᠷ ᠲᠠᠷᠢᠶᠠᠨ ᠳ᠋ᠤ ᠡᠮ ᠰᠠᠴᠤᠬᠤ᠂ ᠪᠤᠷᠳᠤᠭᠤᠷ ᠤᠷᠤᠭᠤᠯᠬᠤ᠂ ᠮᠠᠰᠢᠨ ᠬᠦᠮᠦᠨ ᠶ᠋ᠢᠡᠷ ᠵᠢᠮᠢᠰ ᠲᠡᠭᠦᠯᠭᠡᠬᠦ᠂ ᠭᠠᠷ ᠤᠳᠠᠰᠤ ᠪᠡᠷ ᠠᠯᠤᠰ ᠡᠴᠡ ᠮᠠᠯ ᠤ᠋ᠨ ᠤᠩᠭᠤᠴᠠᠨ ᠳ᠋ᠤ ᠤᠰᠤ ᠲᠠᠯᠪᠢᠬᠤ᠂ ᠠᠳᠤᠭᠤ ᠮᠠᠯ ᠤ᠋ᠨ ᠪᠠᠢᠷᠢᠰᠢᠯ ᠢ᠋ ᠮᠡᠳᠡᠬᠦ ᠵᠡᠷᠭᠡ ᠨᠢ ᠬᠠᠮᠤᠭ ᠤ᠋ᠨ ᠳᠦᠭᠦᠮ ᠬᠡᠯᠪᠡᠷᠢ ᠪᠤᠯᠵᠤ᠂ ᠨᠢᠳᠤᠨ ᠳ᠋ᠤ ᠦᠵᠡᠭᠳᠡᠬᠦ ᠦᠭᠡᠢ᠂ ᠭᠠᠷ ᠲᠤ᠌ ᠪᠠᠷᠢᠭᠳᠠᠬᠤ ᠦᠭᠡᠢ ᠡᠯᠧᠺᠲᠷᠤᠨ ᠲᠤᠤᠷ ᠬᠦᠷᠢᠶᠠ ᠪᠡᠷ ᠦᠭᠡᠷ ᠮᠠᠯ ᠤ᠋ᠨ ᠪᠡᠯᠴᠢᠭᠡᠷᠯᠡᠬᠦ ᠤᠷᠤᠨ ᠵᠠᠢ ᠪᠠ ᠵᠠᠮ ᠮᠦᠷ ᠢ᠋ ᠭᠠᠷ ᠤᠳᠠᠰᠤ ᠪᠡᠷ ᠶ᠋ᠢᠡᠨ ᠵᠢᠷᠤᠨ ᠳᠤᠭᠳᠠᠭᠠᠬᠤ ᠵᠡᠷᠭᠡ ᠰᠢᠨᠠ ᠲᠸᠭᠨᠢᠭ ᠮᠡᠷᠭᠡᠵᠢᠯ ᠲᠠᠰᠤᠷᠠᠯᠳᠠ ᠦᠭᠡᠢ ᠳᠡᠯᠭᠡᠷᠡᠬᠦ ᠨᠢ ᠳᠠᠮᠵᠢᠭ ᠦᠭᠡᠢ᠃
ᠴᠠᠭ ᠦᠶᠠ ᠲᠦᠷᠦ ᠶ᠋ᠢᠨ ᠪᠤᠳᠤᠯᠭᠠ ᠶ᠋ᠢ ᠨᠦᠯᠦᠭᠡᠯᠡᠵᠦ᠂ ᠲᠦᠷᠦ ᠶ᠋ᠢᠨ ᠪᠤᠳᠤᠯᠭᠠ ᠠᠬᠢᠨ ᠴᠠᠭ ᠦᠶᠠ ᠳ᠋ᠤ ᠨᠦᠯᠦᠭᠡ ᠪᠤᠯᠳᠠᠭ᠃ ᠲᠦᠷᠦ ᠶ᠋ᠢᠨ ᠶᠠᠪᠤᠳᠠᠯ ᠤ᠋ᠨ ᠬᠤᠷᠢᠶᠠ ᠡᠴᠡ 《〈 ᠵᠤᠬᠢᠶᠠᠮᠠᠯ ᠤᠶᠤᠨ ᠴᠢᠳᠠᠪᠤᠷᠢ +〉 ᠠᠵᠢᠯᠯᠠᠭᠠ ᠶ᠋ᠢ ᠬᠦᠨᠵᠡᠭᠡᠢ ᠬᠡᠷᠡᠭᠵᠢᠭᠦᠯᠬᠦ ᠲᠤᠬᠠᠢ ᠰᠠᠨᠠᠯ》 ᠢ᠋ ᠳᠠᠷᠤᠮᠠᠯᠯᠠᠨ ᠲᠠᠷᠬᠠᠭᠠᠵᠤ᠂ ᠡᠨᠡ ᠵᠢᠯ ᠤ᠋ᠨ ᠲᠦᠪ ᠤ᠋ᠨ ᠨᠢᠭᠡᠳᠦᠭᠡᠷ ᠳᠤᠭᠠᠳᠤ ᠪᠢᠴᠢᠭ ᠮᠠᠲᠧᠷᠢᠶᠠᠯ ᠳ᠋ᠤ 《ᠵᠤᠬᠢᠶᠠᠮᠠᠯ ᠤᠶᠤᠨ ᠴᠢᠳᠠᠪᠤᠷᠢ ᠬᠢᠭᠡᠳ ᠬᠦᠳᠡᠭᠡ ᠠᠵᠤ ᠠᠬᠤᠢ ᠶ᠋ᠢᠨ ᠠᠭᠤᠰᠤᠯᠴᠠᠭᠰᠠᠨ ᠬᠦᠭᠵᠢᠯᠳᠠ ᠶ᠋ᠢ ᠠᠬᠢᠭᠤᠯᠤᠨᠠ》 ᠭᠡᠵᠦ ᠳᠤᠳᠤᠷᠬᠠᠢ ᠳᠤᠷᠠᠳᠴᠤ᠂ ᠮᠠᠨ ᠤ᠋ ᠤᠷᠤᠨ ᠪᠠᠰᠠ 《ᠦᠪᠦᠷ ᠮᠤᠡᠭᠭᠤᠯ ᠤ᠋ᠨ ᠦᠪᠡᠷᠲᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ᠋ 〈ᠵᠤᠬᠢᠶᠠᠮᠠᠯ ᠤᠶᠤᠨ ᠴᠢᠳᠠᠪᠤᠷᠢ +〉 ᠠᠵᠢᠯᠯᠠᠭᠠ ᠶ᠋ᠢ ᠬᠡᠷᠡᠭᠵᠢᠭᠦᠯᠬᠦ ᠲᠦᠰᠦᠯ （2026 — 2028 ᠤᠨ）》 ᠢ᠋ ᠳᠠᠷᠤᠮᠠᠯᠯᠠᠨ ᠲᠠᠷᠬᠠᠭᠠᠭᠰᠠᠨ ᠵᠡᠷᠭᠡ ᠨᠢ ᠵᠤᠬᠢᠶᠠᠮᠠᠯ ᠤᠶᠤᠨ ᠴᠢᠳᠠᠪᠤᠷᠢ ᠨᠢᠭᠡᠨᠳᠡ ᠴᠠᠭ ᠦᠶᠠ ᠵᠢᠨ ᠤᠷᠤᠰᠬᠠᠯ ᠪᠤᠯᠵᠤ᠂ ᠵᠤᠬᠢᠶᠠᠮᠠᠯ ᠤᠶᠤᠨ ᠴᠢᠳᠠᠪᠤᠷᠢ ᠶ᠋ᠢ ᠡᠵᠡᠮᠰᠢᠭᠰᠡᠨ ᠬᠦᠮᠦᠰ ᠪᠤᠯ ᠤᠳᠤᠬᠠᠨ ᠤ᠋ ᠪᠠ ᠢᠷᠡᠭᠡᠳᠦᠢ ᠶ᠋ᠢᠨ ᠨᠢᠭᠡᠨ ᠬᠤᠭᠤᠴᠠᠭᠠᠨ ᠳ᠋ᠡᠬᠢ ᠮᠠᠯ ᠠᠵᠤ ᠠᠬᠤᠢ ᠲᠠᠷᠢᠶᠠᠯᠠᠩ ᠤ᠋ᠨ ᠬᠦᠭᠵᠢᠯᠳᠡ ᠶ᠋ᠢ ᠡᠵᠡᠮᠳᠡᠬᠦ ᠬᠦᠮᠦᠰ ᠪᠤᠯᠬᠤ ᠶ᠋ᠢ ᠨᠢᠭᠡ ᠬᠡᠮᠵᠢᠶᠡᠨᠠ ᠳᠤᠳᠤᠷᠬᠠᠢᠯᠠᠵᠤ ᠪᠠᠢᠨᠠ᠃
ᠮᠠᠯ ᠠᠵᠤ ᠠᠬᠤᠢ ᠲᠠᠷᠢᠶᠠᠯᠠᠩ ᠪᠤᠯ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ᠋ ᠤᠷᠤᠰᠢᠨ ᠳᠤᠭᠳᠠᠨᠢᠬᠤ ᠶ᠋ᠢᠨ ᠠᠮᠢᠨ ᠰᠤᠳᠠᠰᠤ᠂ ᠤᠯᠤᠰ ᠭᠦᠷᠦᠨ ᠤ᠋ ᠤᠷᠤᠰᠢᠨ ᠬᠦᠭᠵᠢᠬᠦ ᠶ᠋ᠢᠨ ᠰᠠᠭᠤᠷᠢ ᠴᠢᠯᠠᠭᠤ ᠪᠤᠯᠤᠨᠠ᠃ ᠲᠡᠭᠡᠭᠦᠨᠠ᠂ 《ᠵᠤᠬᠢᠶᠠᠮᠠᠯ ᠤᠶᠤᠨ ᠴᠢᠳᠠᠪᠤᠷᠢ》 ᠬᠡᠮᠡᠬᠦ ᠴᠠᠭ ᠦᠶᠠ ᠶ᠋ᠢᠨ ᠤᠷᠤᠰᠬᠠᠯ ᠤ᠋ᠨ ᠡᠮᠦᠨᠠ᠂ ᠮᠠᠨ ᠤ᠋ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠴᠤᠬᠤᠮ ᠬᠡᠷᠬᠢᠨ ᠪᠡᠯᠡᠳᠭᠡᠯ ᠬᠢᠪᠡᠯ ᠵᠤᠬᠢᠬᠤ ᠪᠤᠢ？ ᠡᠭᠦᠨ ᠳ᠋ᠤ ᠵᠠᠷᠢᠮ ᠨᠢ ᠢᠳᠡᠪᠬᠢᠳᠠᠢ ᠪᠡᠷ ᠤᠷᠤᠰᠬᠠᠯ ᠢ᠋ ᠳᠠᠭᠠᠨ ᠤᠷᠤᠭᠰᠢᠯᠠᠵᠤ᠂ ᠵᠠᠷᠢᠮ ᠨᠢ ᠮᠤᠵᠢᠭᠤᠳᠠ ᠪᠡᠷ ᠦᠪᠡᠷ ᠢ᠋ ᠪᠡᠨ ᠪᠠᠷᠢᠮᠳᠠᠯᠠᠵᠤ᠂ ᠵᠠᠷᠢᠮ ᠨᠢ ᠰᠠᠯᠬᠢᠨ ᠳ᠋ᠤ ᠬᠡᠢᠰᠬᠦ ᠬᠠᠮᠬᠤᠤᠯ ᠮᠡᠳᠦ ᠳᠠᠭᠠᠵᠤ ᠳᠡᠷᠪᠡᠬᠦ ᠮᠠᠭᠠᠳ᠃ ᠮᠡᠭᠦᠰ ᠬᠦᠮᠦᠨ ᠤ᠋ ᠦᠵᠡᠬᠦ ᠪᠡᠷ᠂ ᠴᠠᠭ ᠦᠶᠠ ᠭᠡᠭᠴᠢ ᠬᠡᠳᠦᠢ ᠬᠠᠢᠷᠠ ᠨᠠᠢᠷ ᠦᠭᠡᠢ ᠴᠤ᠌ ᠡᠴᠤᠰ ᠲᠡᠭᠦᠰᠭᠡᠯ ᠶᠠᠭᠤ ᠪᠤᠯᠬᠤ᠂ ᠠᠯᠢ ᠨᠢ ᠭᠤᠤᠯ ᠠᠯᠢ ᠨᠢ ᠳᠡᠳ᠋ ᠪᠤᠯᠬᠤ ᠶ᠋ᠢ ᠭᠦᠢᠴᠡᠳ ᠪᠤᠳᠤᠯᠬᠢᠯᠠᠭᠰᠠᠨ ᠰᠠᠭᠤᠷᠢᠨ ᠲᠠᠬᠡᠷᠠ ᠴᠠᠭ ᠦᠶᠠ ᠶ᠋ᠢᠨ ᠠᠰᠢᠭᠳᠠᠢ ᠵᠦᠢᠯ ᠢ᠋ ᠬᠠᠯᠠᠰᠢᠷᠠᠯ ᠦᠭᠡᠢ ᠰᠤᠷᠤᠯᠴᠠᠵᠤ᠂ ᠦᠪᠡᠷ ᠢ᠋ ᠪᠡᠨ ᠲᠡᠭᠦᠯᠳᠡᠷᠵᠢᠭᠦᠯᠬᠦ ᠪᠤᠯ ᠬᠠᠮᠤᠭ ᠤ᠋ᠨ ᠦᠨᠳᠤᠰᠤᠨ ᠰᠤᠩᠭᠤᠯᠳᠠ ᠪᠤᠯᠠᠢ᠃ ᠵᠤᠬᠢᠶᠠᠮᠠᠯ ᠤᠶᠤᠨ ᠴᠢᠳᠠᠪᠤᠷᠢ ᠬᠡᠳᠦᠢ ᠰᠢᠨᠠ ᠬᠡᠳᠦᠢ ᠨᠦᠯᠦᠭᠡ ᠶᠡᠬᠡᠳᠠᠢ ᠴᠤ᠌ ᠪᠦᠷ ᠬᠦᠮᠦᠨ ᠲᠦᠷᠦᠯᠬᠢᠳᠡᠨ ᠤ᠋ ᠤᠶᠤᠨ ᠤᠬᠠᠭᠠᠨ ᠡᠴᠡ ᠲᠦᠷᠦᠵᠦ᠂ ᠦᠢ ᠤᠯᠠᠨ ᠬᠦᠮᠦᠨ ᠤ᠋ ᠲᠤᠷᠰᠢᠯᠭᠠ ᠶ᠋ᠢ ᠰᠤᠷᠤᠯᠴᠠᠨ ᠲᠡᠭᠦᠯᠳᠡᠷᠵᠢᠬᠦᠯᠦᠭᠰᠡᠨ ᠶᠤᠮ᠃ ᠳᠠᠬᠢᠪᠠᠯ᠂ ᠵᠤᠬᠢᠶᠠᠮᠠᠯ ᠤᠶᠤᠨ ᠴᠢᠳᠠᠪᠤᠷᠢ ᠬᠡᠳᠦᠢ ᠰᠠᠢᠨ ᠴᠤ᠌ ᠲᠡᠭᠦᠰ ᠰᠠᠢᠨ ᠭᠡᠵᠦ ᠬᠡᠯᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ᠃ ᠲᠡᠷᠡ ᠪᠤᠯ ᠨᠢᠭᠡ ᠵᠦᠢᠯ ᠤ᠋ᠨ ᠪᠠᠭᠠᠵᠢ ᠲᠡᠳᠦᠢ᠃ ᠪᠠᠭᠠᠵᠢ ᠶ᠋ᠢ ᠦᠪᠡᠷ ᠤ᠋ᠨ ᠪᠡᠶᠠ ᠳ᠋ᠤ ᠦᠢᠯᠡᠴᠢᠯᠡᠭᠦᠯᠬᠦ ᠶ᠋ᠢ ᠰᠤᠷᠬᠤ ᠡᠴᠡ ᠪᠢᠰᠢ᠂ ᠪᠠᠭᠠᠵᠢ ᠳ᠋ᠤ ᠪᠦᠷᠢᠮᠦᠰᠦᠨ ᠨᠠᠢᠳᠠᠵᠤ᠂ ᠦᠪᠡᠷ ᠤ᠋ᠨ ᠰᠡᠳᠬᠢᠵᠦ ᠪᠤᠳᠤᠬᠤ ᠴᠢᠳᠠᠪᠤᠷᠢ᠂ ᠲᠤᠷᠰᠢᠯᠭᠠ ᠬᠤᠷᠠᠮᠳᠤᠭᠤᠯᠬᠤ ᠴᠢᠳᠠᠪᠤᠷᠢ ᠪᠡᠨ ᠠᠯᠳᠠᠵᠤ ᠪᠤᠯᠬᠤ ᠦᠭᠡᠢ᠃ ᠲᠡᠭᠦᠨᠴᠢᠯᠡᠨ ᠨᠤᠳᠤᠭ ᠤ᠋ᠨ ᠡᠪᠤᠭᠡᠳ ᠤ᠋ᠨ ᠲᠠᠷᠢᠬᠢᠨ ᠳ᠋ᠤ ᠠᠯᠳᠠ ᠪᠡᠷ ᠰᠤᠯᠢᠬᠤ ᠦᠭᠡᠢ ᠦᠪ ᠡᠷᠳᠡᠨᠢ ᠪᠠᠢᠬᠤ ᠶ᠋ᠢ ᠰᠠᠨᠠᠵᠤ ᠶᠠᠪᠤᠬᠤ ᠬᠡᠷᠡᠭ ᠳᠠᠢ᠃