ᠲᠡᠭ᠌ᠷᠢ ᠱᠢᠭ ᠲᠦᠪ ᠶᠡᠭᠡᠮᠰᠦᠭ

ᠲᠠᠯ᠎ᠠ ᠱᠢᠭ᠋ ᠲᠤᠳᠤᠷ ᠲᠠᠮᠢᠷ᠎ᠲᠠᠢ

ᠲᠦᠱᠢᠭ ᠶᠡᠭᠡ ᠬᠠᠢᠷᠬᠠᠨ

ᠲᠦᠷᠦᠭ᠌ᠰᠡᠨ ᠠᠪᠣ ᠮᠢᠨᠢ

ᠨᠢᠷᠤᠭᠤᠨ᠎ᠳ᠋ᠠᠭᠠᠨ ᠨᠠᠮᠠᠶ᠋ᠢ ᠡᠬᠦᠷᠴᠦ᠍

ᠨᠠᠷᠠᠨ᠎ᠤ ᠭᠡᠷᠡᠯ᠎ᠢᠶᠠᠷ ᠦᠨᠦᠰᠦᠬᠦᠯᠦᠭ᠌ᠰᠡᠨ

ᠨᠤᠳᠤᠭ᠎ᠤᠨ ᠲᠤᠬᠠᠢ ᠶᠠᠷᠢᠵᠦ᠍

ᠤᠷᠤᠱᠢᠬᠤᠢ᠎ᠶ᠋ᠢᠨ ᠨᠢᠭᠤᠴᠠ᠎ᠶ᠋ᠢ ᠲᠠᠨᠢᠭᠤᠯᠤᠭ᠍ᠰᠠᠨ

ᠠᠮᠢᠳᠤᠷᠠᠯ᠎ᠤᠨ ᠬᠦᠯᠭᠡᠨ ᠰᠤᠳᠤᠷ

ᠠᠷᠢᠭᠤᠨ ᠬᠠᠢᠷ᠎ᠠ᠎ᠶ᠋ᠢᠨ ᠪᠦᠷᠢᠯᠸ᠎ᠠ

ᠠᠯᠳᠠᠨ ᠰᠤᠷᠭᠠᠯ᠎ᠤᠨ ᠲᠤᠪᠴᠢᠶᠠᠨ

ᠠᠮᠵᠢᠯᠳᠠ᠎ᠳᠤ ᠬᠦᠷᠭᠡᠭ᠌ᠰᠡᠨ ᠨᠠᠮᠳᠠᠷ

ᠮᠤᠷᠢᠨ᠎ᠳ᠋ᠠᠭᠠᠨ ᠠᠯᠠᠪᠭᠢᠨ ᠮᠤᠷᠳᠠᠬᠤ᠎ᠳᠤ

ᠲᠤᠭ ᠱᠢᠭ᠋ ᠰᠦᠷ᠎ᠲᠠᠢ ᠬᠠᠷᠠᠭ᠍ᠳᠠᠳᠠᠭ

ᠮᠠᠩᠨᠤᠭ ᠲᠠᠯ᠎ᠠ᠎ᠪᠠᠷ᠎ᠢᠶᠠᠨ ᠲᠠᠪᠭᠢᠭᠤᠯᠬᠤ᠎ᠳᠤ

ᠰᠠᠯᠭᠢ ᠱᠢᠭ᠋ ᠬᠤᠷᠳᠦ᠍᠎ᠲᠠᠢ ᠰᠠᠨᠠᠭ᠍ᠳᠠᠳᠠᠭ

ᠲᠦᠷᠪᠡᠨ ᠴᠠᠭ᠎ᠢ ᠬᠠᠷᠢᠭᠤᠯᠵᠦ᠍

ᠲᠡᠮᠡᠦᠯᠵᠦ᠍ ᠵᠢᠳᠬᠦᠵᠦ᠍ ᠢᠷᠡᠭ᠌ᠰᠡᠨ

ᠲᠤᠭᠤᠷᠭᠠᠳᠤ ᠭᠡᠷ᠎ᠤᠨ᠎ᠢᠶᠠᠨ ᠨᠠᠷᠠ

ᠲᠡᠰᠪᠦᠷᠢ ᠲᠡᠪᠴᠢᠶᠡᠷᠢ᠎ᠲᠠᠢ ᠠᠪᠣ ᠮᠢᠨᠢ

ᠭᠡᠯᠡᠪᠡᠯ ᠦᠭᠡ ᠭᠡᠵᠦ᠍

ᠭᠡᠯᠡᠭ᠌ᠰᠡᠨ᠎ᠳᠡᠭᠡᠨ ᠵᠠᠪᠠᠯ ᠬᠦᠷᠬᠦ᠌ ᠭᠡᠵᠦ᠍

ᠭᠡᠨ᠎ᠳᠤ ᠴᠦ᠍ ᠶᠠᠷᠢᠭ᠎ᠠ ᠦᠭᠡᠢ

ᠭᠡᠬᠦᠳᠡᠭ ᠴᠡᠭᠡᠵᠢᠨ ᠳ᠋ᠡᠭᠡᠨ ᠪᠤᠳᠤᠵᠦ᠍

ᠵᠠᠪ ᠦᠭᠡᠢ ᠮᠤᠩᠭᠠᠨᠢᠵᠦ᠍

ᠵᠢᠯ ᠵᠢᠯ᠎ᠢ ᠡᠯᠡᠭᠡᠵᠦ᠍

ᠵᠢᠷᠭᠢᠬᠦ᠌ ᠱᠢᠪᠠᠭᠤ ᠮᠡᠳᠦ

ᠵᠢᠷᠭᠠᠵᠦ᠍ ᠵᠦᠳᠡᠷᠡᠭ᠌ᠰᠡᠨ ᠠᠪᠣ ᠮᠢᠨᠢ

ᠪᠡᠯᠴᠢᠭᠡᠷ᠎ᠤᠨ ᠴᠢᠨᠢ ᠱᠢᠷᠭᠡᠭ ᠡᠪᠡᠰᠦ

ᠴᠢᠮ᠎ᠠ᠎ᠶ᠋ᠢ ᠮᠠᠷᠳᠠᠬᠤ ᠦᠭᠡᠢ

ᠪᠤᠷᠤ ᠮᠠᠩᠬᠠᠨ᠎ᠤ ᠱᠢᠷᠭᠤᠯᠵᠢ  ᠴᠦ᠍

ᠴᠢᠮ᠎ᠠ᠎ᠶ᠋ᠢ ᠮᠠᠷᠳᠠᠬᠤ ᠦᠭᠡᠢ

ᠲᠡᠭ᠌ᠷᠢ ᠱᠢᠭ ᠲᠦᠪ ᠶᠡᠭᠡᠮᠰᠦᠭ

ᠲᠠᠯ᠎ᠠ ᠱᠢᠭ᠋ ᠲᠤᠳᠤᠷ ᠲᠠᠮᠢᠷ᠎ᠲᠠᠢ

ᠲᠦᠱᠢᠭ ᠶᠡᠭᠡ ᠬᠠᠢᠷᠬᠠᠨ

ᠲᠦᠷᠦᠭ᠌ᠰᠡᠨ ᠠᠪᠣ ᠮᠢᠨᠢ ᠡ！