— 《ᠲᠦᠨᠭᠯᠢᠶᠤᠤ ᠬᠤᠲᠠ ᠵᠢᠨ
ᠦᠨᠳᠦᠰᠦᠲᠡᠨ ᠤ ᠪᠦᠯᠬᠦᠮᠳᠡᠯ ᠳᠠᠪᠰᠢᠯᠲᠠ ᠵᠢᠨ ᠵᠢᠱ᠌ᠢᠶᠡᠴᠢ ᠬᠤᠪᠢ ᠬᠦᠮᠦᠨ》 ᠡᠦ ᠴᠢᠡᠭ ᠱᠠᠨᠢ
ᠲᠡᠮᠲᠡᠭᠯᠡᠪᠡ
ᠡᠮᠦᠨᠡᠬᠡᠨ᠂ ᠲᠦᠨᠭᠯᠢᠶᠤᠤ ᠬᠤᠲᠠ
ᠦᠨᠳᠦᠰᠦᠲᠡᠨ ᠤ ᠪᠦᠯᠬᠦᠮᠳᠡᠯ ᠳᠠᠪᠰᠢᠯᠳᠠ ᠵᠢᠨ ᠬᠦᠬᠢᠬᠦᠯᠦᠨ ᠰᠠᠢᠰᠢᠶᠠᠬᠤ ᠶᠡᠬᠡ ᠬᠤᠷᠠᠯ
ᠬᠤᠷᠠᠯᠳᠤᠭᠤᠯᠵᠦ᠂ ᠪᠦᠬᠦ ᠬᠤᠲᠠ ᠵᠢᠨ ᠬᠡᠪᠴᠢᠶᠡᠨ ᠡᠴᠡ ᠨᠢᠬᠡ ᠪᠦᠯᠦᠭ ᠵᠢᠱ᠌ᠢᠶᠡᠴᠢ ᠬᠠᠮᠲᠤ ᠨᠡᠢᠲᠡ ᠪᠤᠯᠤᠨ ᠬᠤᠪᠢ ᠬᠦᠮᠦᠨ ᠢ ᠬᠦᠬᠢᠬᠦᠯᠦᠨ
ᠱᠠᠨᠭᠨᠠᠪᠠ᠃ ᠡᠬᠦᠨ ᠳᠤ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ ᠬᠠᠮ ᠵᠠᠭᠤᠴᠢᠯᠠᠭᠤᠷ ᠤᠨ ᠲᠦᠪ ᠤᠨ ᠰᠤᠷᠪᠤᠯᠵᠢᠯᠠᠭᠴᠢ
ᠡᠦ ᠴᠢᠡᠭ ᠱᠠᠨ ᠲᠦᠨᠭᠯᠢᠶᠤᠤ
ᠬᠤᠲᠠ ᠵᠢᠨ ᠦᠨᠳᠦᠰᠦᠲᠡᠨ ᠤ ᠪᠦᠯᠬᠦᠮᠳᠡᠯ ᠳᠠᠪᠰᠢᠯᠲᠠ ᠵᠢᠨ ᠵᠢᠱ᠌ᠢᠶᠡᠴᠢ ᠬᠤᠪᠢ ᠬᠦᠮᠦᠨ ᠵᠢᠡᠷ
ᠬᠦᠬᠢᠬᠦᠯᠦᠭᠳᠡᠵᠡᠢ᠃ ᠲᠡᠬᠦᠨ ᠡᠴᠡ《ᠱᠠᠨᠭᠨᠠᠯ ᠤᠯᠤᠭᠰᠠᠨ ᠲᠦᠷᠦᠭᠳᠡᠯ ᠵᠢᠨᠨ ᠬᠤᠪᠢᠶᠠᠯᠴᠠᠨᠠ ᠤᠤ？》 ᠭᠡᠬᠦ
ᠳᠤ 《ᠡᠨᠡ ᠪᠤᠯ ᠨᠠᠳᠠ ᠵᠢ 20 ᠰᠢᠬᠠᠮ ᠵᠢᠯ ᠤᠨ ᠲᠤᠷᠰᠢ ᠤᠯᠠᠨ ᠦᠨᠳᠦᠰᠦᠲᠡᠨ ᠤ ᠠᠬᠠ ᠳᠡᠬᠦᠦ ᠨᠠᠷ
ᠲᠠᠭᠠᠨ ᠦᠢᠯᠡᠴᠢᠯᠡᠯᠡ ᠬᠡᠮᠡᠨ ᠨᠠᠮ ᠵᠠᠰᠠᠭ ᠡᠴᠡ ᠤᠯᠭᠤᠭᠰᠠᠨ ᠮᠠᠰᠢ
ᠶᠡᠬᠡ ᠦᠨᠭᠭᠡ ᠭᠡᠷᠡᠯ ᠪᠦᠬᠡᠳ ᠢᠷᠠᠭᠤ
ᠠᠯᠳᠠᠷ ᠶᠤᠮ》 ᠭᠡᠵᠦ ᠲᠦᠬᠦᠮᠬᠡᠨ ᠪᠦᠬᠡᠳ ᠳᠠᠷᠤᠤᠬᠠᠨ ᠶᠠᠷᠢᠵᠦ ᠪᠠᠢᠯᠠ᠃ ᠦᠨᠡᠨ ᠳᠡᠭᠡᠨ ᠡᠦ ᠴᠢᠡᠭ ᠱᠠᠨ
ᠤ ᠡᠳᠡᠭᠡᠷ ᠵᠢᠯ ᠤᠨ ᠲᠤᠷᠰᠢᠲᠠ ᠵᠢᠨ ᠠᠵᠢᠯ ᠦᠢᠯᠡᠰ ᠵᠢᠨᠨ ᠭᠡᠵᠦ ᠵᠢᠳᠬᠦᠨ ᠲᠡᠮᠡᠦᠯᠵᠦ ᠢᠷᠡᠭᠰᠡᠨ
ᠦᠯᠢᠬᠡᠷ ᠤᠴᠠᠷᠠᠯ ᠤᠳ ᠢ ᠬᠡᠳᠦᠬᠡᠨ ᠦᠬᠡ ᠪᠡᠷ ᠲᠤᠪᠴᠢᠯᠠᠬᠤᠳᠤ ᠪᠡᠷᠬᠡ ᠶᠤᠮ᠃
ᠡᠦ ᠴᠢᠡᠭ ᠱᠠᠨ᠂ 1978 ᠤᠨ ᠳᠤ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ ᠭᠤᠷᠪᠠᠨᠬᠤᠸᠠ ᠰᠤᠮᠤ ᠵᠢᠨ ᠬᠠᠷᠠᠨᠨᠠᠭᠤᠷ
ᠭᠠᠴᠠᠭᠠ ᠳᠤ ᠮᠠᠯᠴᠢᠨ ᠠᠪᠤ ᠡᠵᠢ ᠵᠢᠨ ᠵᠢᠨᠨ ᠲᠠᠪᠤᠨ ᠬᠡᠦᠬᠡᠳ ᠤᠨ ᠬᠢᠨᠢ ᠬᠤᠶᠠᠳᠤᠭᠠᠷ ᠨᠢ ᠪᠤᠯᠵᠦ ᠵᠠᠶᠠᠭᠠᠵᠦ᠂
2008 ᠤᠨ ᠳᠤ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ ᠪᠠᠢᠰᠢᠨᠭᠲᠦ ᠪᠠᠯᠭᠠᠰᠤ ᠳᠤ ᠴᠢᠮᠡᠭᠡᠯᠡᠭᠴᠢ ᠪᠡᠷ ᠠᠵᠢᠯᠯᠠᠵᠦ᠂
2010 ᠤᠨ ᠡᠴᠡ ᠤᠳᠤ ᠪᠤᠯᠳᠠᠯᠠ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ ᠬᠠᠮ ᠵᠠᠭᠤᠴᠢᠯᠠᠭᠤᠷ ᠤᠨ ᠲᠦᠪ （ᠤᠤᠯ ᠤᠨ
ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ ᠲᠧᠯᠸᠢᠰ ᠬᠤᠷᠢᠶᠠ） ᠲᠤ᠌ ᠠᠵᠢᠯᠯᠠᠵᠦ ᠪᠤᠢ᠃ ᠲᠡᠬᠦᠨ ᠤ ᠨᠠᠮᠳᠠᠷᠢ ᠳᠦᠬᠦᠮᠴᠢᠯᠡᠪᠠᠯ ᠡᠢᠮᠦ ᠯᠠ ᠲᠤᠪᠴᠢ
ᠠᠪᠰᠠᠷᠬᠠᠨ᠃ ᠭᠡᠬᠦ ᠳᠡᠭᠡᠨ ᠲᠡᠬᠦᠨ ᠤ ᠡᠨᠡ
ᠬᠦ 20 ᠰᠢᠬᠠᠮ ᠵᠢᠯ ᠤᠨ ᠲᠤᠷᠰᠢ ᠮᠤᠨᠭᠭᠤᠯ ᠬᠢᠲᠠᠳ
ᠵᠢᠡᠷ ᠭᠤᠤᠯᠳᠠᠭᠤᠯᠤᠭᠰᠠᠨ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ ᠡᠯᠡ ᠦᠨᠳᠦᠰᠦᠲᠡᠨᠤ ᠤᠯᠠᠨ ᠲᠦᠮᠡᠨᠳᠡᠭᠡᠨ
ᠦᠢᠯᠡᠴᠢᠯᠡᠵᠦ ᠶᠠᠪᠤᠭᠰᠠᠨ ᠵᠢᠳᠬᠦᠯ ᠴᠢᠷᠮᠠᠢᠯᠭᠠ ᠵᠢ ᠢᠯᠡᠳᠭᠡᠬᠦ ᠳᠤ ᠬᠡᠳᠦᠨ ᠨᠢᠭᠤᠷ ᠰᠤᠨᠢᠨ ᠴᠤ᠌
ᠮᠡᠬᠦᠰᠲᠡᠨᠡ᠃
ᠡᠦ ᠴᠢᠡᠭ ᠱᠠᠨ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ ᠲᠧᠯᠸᠢᠰ ᠬᠤᠷᠢᠶᠠ ᠳᠤ ᠰᠤᠷᠪᠤᠯᠵᠢᠯᠠᠭᠴᠢ
ᠪᠤᠯᠤᠭᠰᠠᠨ ᠲᠡᠷᠡ ᠡᠳᠦᠷ ᠡᠴᠡ ᠪᠠᠨ ᠡᠬᠢᠯᠡᠵᠦ ᠲᠤᠬᠠᠢᠯᠠᠭᠰᠠᠨ ᠠᠵᠢᠯ ᠵᠢᠨᠨ ᠰᠠᠢᠨ ᠬᠢᠬᠦ ᠵᠢ ᠲᠡᠷᠢᠬᠦᠨ
ᠪᠠᠢᠷᠢᠨ ᠳᠤ ᠲᠠᠯᠪᠢᠭᠰᠠᠭᠠᠷ ᠢᠷᠡᠵᠡᠢ᠃ ᠰᠤᠨᠢᠨ ᠮᠡᠳᠡᠭᠡᠨ ᠤ ᠠᠵᠢᠯᠲᠠᠨ ᠪᠤᠯᠤᠭᠰᠠᠳ ᠰᠤᠷᠠᠭ ᠮᠠᠨᠠᠵᠦ
ᠬᠤᠨᠤᠳᠠᠭ ᠭᠡᠳᠡᠭ ᠢ ᠡᠮᠦᠨᠡ ᠨᠢ ᠬᠡᠳᠦᠨ ᠵᠢᠯ ᠴᠢᠮᠡᠭᠡᠯᠡᠭᠴᠢ ᠵᠢᠨ ᠠᠵᠢᠯ ᠬᠢᠭᠰᠡᠨ ᠲᠤᠷᠰᠢᠯᠭᠠ ᠲᠠᠢ
ᠲᠡᠷᠡ ᠰᠠᠢᠨ ᠮᠡᠳᠡᠳᠡᠭ ᠪᠤᠯᠬᠤᠷ ᠲᠡᠷᠡ ᠪᠡᠷ ᠨᠠᠮ ᠲᠦᠷᠦ ᠵᠢᠨ ᠳᠠᠭᠤᠨ ᠬᠤᠭᠤᠯᠠᠢ᠂ ᠮᠠᠯᠴᠢᠨ ᠲᠠᠷᠢᠶᠡᠴᠢᠳ
ᠤᠨ ᠲᠤᠳᠤᠨᠤ ᠬᠠᠨᠢ ᠪᠤᠯᠬᠤ ᠪᠡᠷ ᠪᠡᠶᠡ ᠪᠠᠨ ᠴᠢᠨᠭᠭᠠ ᠱᠠᠭᠠᠷᠲᠠᠨ ᠦᠷᠯᠦᠬᠡ ᠦᠳᠡᠰᠢ ᠲᠠᠢ ᠤᠷᠤᠯᠳᠤᠨ
ᠠᠵᠢᠯᠯᠠᠪᠠ᠃ ᠲᠡᠷᠡ ᠬᠦᠳᠡᠭᠡ ᠲᠤᠰᠬᠤᠨ ᠮᠠᠯᠵᠢᠵᠦ
ᠲᠠᠷᠢᠶᠠᠯᠠᠬᠤ ᠤᠷᠤᠨ ᠵᠢᠡᠷ ᠨᠡᠢᠳᠡᠮ ᠬᠦᠨᠵᠡᠬᠡᠢᠷᠡᠵᠦ ᠬᠦᠳᠡᠭᠡ ᠪᠠᠭᠤᠨ ᠰᠤᠷᠪᠤᠯᠵᠢᠯᠠᠵᠦ᠂ ᠬᠤᠶᠠᠷ ᠭᠤᠷᠪᠠ
ᠪᠡᠷ ᠬᠤᠨᠤᠵᠦ ᠪᠠᠢᠭᠠᠳ ᠤᠳᠠᠭᠠ ᠪᠦᠷᠢ ᠠᠷᠪᠠᠭᠠᠳ ᠵᠤᠷᠪᠤᠰ ᠰᠤᠨᠢᠨ ᠮᠡᠳᠡᠭᠡ ᠤᠯᠤᠭᠠᠳ ᠢᠷᠡᠨᠡ᠃
ᠲᠡᠳᠡᠭᠡᠷ ᠰᠤᠨᠢᠨ ᠮᠡᠳᠡᠭᠡ ᠪᠠᠨ ᠡᠳᠦᠷ ᠰᠦᠨᠢ ᠢᠯᠭᠠᠯ ᠦᠬᠡᠢ ᠪᠢᠴᠢᠨ ᠨᠠᠢᠷᠠᠭᠤᠯᠵᠦ ᠡᠰᠭᠡᠵᠦ ᠦᠢᠯᠡᠳᠬᠦ
ᠵᠢᠨ ᠬᠠᠮᠲᠤ ᠪᠠᠰᠠ ᠰᠤᠨᠢᠨ ᠪᠤᠯᠤᠨ ᠷᠠᠳᠢᠣ᠋ ᠳᠤ ᠲᠤᠬᠢᠷᠠᠬᠤ ᠬᠡᠯᠪᠡᠷᠢ ᠪᠤᠯᠭᠠᠵᠦ᠂ ᠬᠤᠲᠠ ᠪᠠ
ᠦᠪᠡᠷᠲᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠡᠯᠡ ᠵᠠᠭᠤᠴᠢᠯᠠᠭᠤᠷ ᠤᠳ ᠵᠢᠡᠷ ᠶᠠᠪᠤᠭᠤᠯᠤᠨᠠ᠃ ᠲᠡᠷᠡ ᠪᠤᠯᠤᠮᠠᠷ
ᠰᠢᠬ ᠰᠠᠨᠠᠭᠳᠠᠭᠰᠠᠨ ᠡᠬᠡ ᠪᠢᠴᠢᠭ ᠤᠳ ᠵᠢᠨᠨ ᠪᠠᠰᠠ ᠬᠢᠲᠠᠳ ᠵᠢᠡᠷ ᠤᠷᠴᠢᠭᠤᠯᠴᠢᠬᠠᠭᠠᠳ ᠬᠠᠮᠢᠶᠠ ᠪᠦᠬᠦᠢ
ᠵᠠᠭᠤᠴᠢᠯᠠᠭᠤᠷ ᠤᠳ ᠵᠢᠡᠷ ᠢᠯᠡᠭᠡᠨᠡ᠃ ᠡᠨᠡ ᠮᠡᠲᠦ ᠪᠡᠷ ᠭᠠᠷ ᠲᠡᠬᠢ ᠰᠤᠨᠢᠨ ᠮᠡᠳᠡᠭᠡ ᠪᠠᠨ ᠤᠷᠤ ᠤᠷᠤᠨ
ᠳᠤ ᠨᠢ ᠤᠷᠤᠭᠤᠯᠵᠦ ᠵᠦᠭ ᠵᠦᠭ ᠲᠡᠭᠡᠨ ᠶᠠᠪᠤᠭᠤᠯᠵᠦ ᠪᠠᠷᠠᠪᠠᠯ ᠡᠦ ᠴᠢᠡᠭ ᠱᠠᠨ ᠳᠠᠬᠢᠭᠠᠳ ᠯᠠ ᠪᠤᠭᠴᠤ
ᠪᠠᠨ ᠡᠬᠦᠷᠦᠬᠡᠳ ᠰᠤᠨᠢᠨ ᠮᠡᠳᠡᠭᠡᠨ ᠤ ᠰᠢᠨᠡ ᠡᠷᠢᠯ ᠳᠤ ᠮᠤᠷᠳᠠᠨᠠ᠃ ᠨᠠᠢ᠍ᠮᠠᠨ ᠬᠤᠰᠢᠭᠤᠨᠤ ᠵᠢᠷ ᠤᠨ
ᠨᠢᠬᠡᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠤ ᠠᠳᠠᠯ ᠠᠮᠢᠳᠤᠷᠠᠯ ᠡᠴᠡ ᠡᠬᠢᠯᠡᠬᠡᠳ ᠠᠯᠢ ᠨᠢᠬᠡᠨ ᠠᠵᠦ ᠠᠬᠤᠢᠯᠠᠯ ᠠᠯᠪᠠᠨ
ᠪᠠᠢᠭᠤᠯᠭᠠ ᠵᠢᠨ ᠬᠦᠭᠵᠢᠯᠲᠡ ᠬᠤᠪᠢᠷᠠᠯᠲᠠ ᠬᠦᠷᠳᠡᠯᠡ᠂ ᠴᠢᠨᠠᠭᠰᠢᠯᠠᠨ ᠡᠮ ᠡᠮᠨᠡᠯᠬᠡ᠂ ᠰᠤᠷᠭᠠᠨ ᠬᠦᠮᠦᠵᠢᠯ᠂
ᠵᠠᠮ ᠬᠠᠷᠢᠯᠴᠠᠭᠠ᠂ ᠠᠮᠢ ᠠᠬᠤᠢ ᠁ ᠡᠦ ᠴᠢᠡᠭ ᠱᠠᠨ ᠤ ᠠᠵᠢᠯ ᠲᠠᠢ ᠬᠤᠯᠪᠤᠭᠳᠠᠬᠤ ᠦᠬᠡᠢ ᠨᠢ ᠨᠢᠬᠡ ᠴᠤ᠌ ᠪᠠᠢᠬᠤ
ᠦᠬᠡᠢ᠃ ᠲᠡᠷᠡ ᠤᠳᠠᠭᠰᠠᠨ ᠴᠤ᠌ ᠦᠬᠡᠢ ᠠᠵᠢᠯ ᠳᠠᠭᠠᠨ ᠭᠠᠷᠰᠢᠵᠦ᠂ ᠠᠰᠠᠭᠤᠨ
ᠰᠤᠷᠪᠤᠯᠵᠢᠯᠠᠬᠤ᠂ ᠪᠢᠴᠢᠵᠦ ᠨᠠᠢᠷᠠᠭᠤᠯᠬᠤ᠂ ᠰᠡᠬᠦᠳᠡᠷᠯᠡᠵᠦ
ᠰᠢᠨᠭᠭᠡᠭᠡᠬᠦ᠂ ᠡᠰᠭᠡᠵᠦ ᠦᠢᠯᠡᠳᠬᠦ ᠪᠦᠬᠦ ᠠᠵᠢᠯ ᠢ ᠭᠠᠭᠴᠠᠭᠠᠷ ᠵᠢᠨᠨ ᠪᠡᠶᠡ ᠪᠠᠨ ᠳᠠᠭᠠᠭᠠᠨ ᠪᠡᠶᠡᠯᠡᠬᠦᠯᠵᠦ
ᠳᠡᠢᠯᠬᠦ ᠪᠤᠯᠤᠭᠰᠠᠨ ᠵᠢᠡᠷ ᠪᠠᠷᠠᠬᠤ ᠦᠬᠡᠢ ᠬᠢᠲᠠᠳ ᠮᠤᠨᠭᠭᠤᠯ ᠬᠤᠶᠠᠷ ᠬᠡᠯᠡ ᠵᠢᠨ ᠤᠷᠴᠢᠭᠤᠯᠭᠠ ᠳᠤ ᠴᠤ᠌
ᠴᠠᠭᠠᠷᠠᠵᠦ ᠡᠬᠢᠯᠡᠪᠡ᠃ ᠨᠠᠢ᠍ᠮᠠᠨ ᠬᠤᠰᠢᠭᠤ ᠨᠢ 37.5 ᠲᠦᠮᠡᠨ ᠡᠯᠡ ᠦᠨᠳᠦᠰᠦᠲᠡᠨ ᠤ ᠬᠦᠮᠦᠨ ᠠᠮᠠ ᠲᠠᠢ
ᠪᠠᠢᠵᠦ᠂ ᠡᠬᠦᠨᠳᠤ ᠮᠤᠨᠭᠭᠤᠯ ᠦᠨᠳᠦᠰᠦᠲᠡᠨ ᠤ ᠬᠦᠮᠦᠨ ᠠᠮᠠ 16 ᠲᠦᠮᠡ ᠪᠠᠢᠳᠠᠭ᠃ ᠡᠢᠮᠦ ᠡᠴᠡ ᠪᠠᠨ
ᠰᠤᠨᠢᠨ ᠮᠡᠳᠡᠭᠡᠨ ᠤ ᠤᠬᠠᠭᠤᠯᠭᠠ ᠵᠢᠨ ᠠᠵᠢᠯ ᠳᠤ ᠬᠢᠲᠠᠳ ᠮᠤᠨᠭᠭᠤᠯ ᠬᠤᠤᠰ ᠬᠡᠯᠡᠨ ᠤ ᠦᠢᠯᠡᠴᠢᠯᠡᠬᠡ
ᠲᠤᠯᠭᠠᠮᠠ ᠱᠠᠭᠠᠷᠲᠠᠭᠳᠠᠬᠤ ᠨᠢ ᠬᠡᠯᠡᠯᠬᠡᠨ ᠦᠬᠡᠢ᠃ ᠡᠦ ᠴᠢᠡᠭ ᠱᠠᠨ ᠰᠤᠷᠪᠤᠯᠵᠢᠯᠠᠭᠴᠢ ᠪᠤᠯᠤᠭᠰᠠᠨ ᠲᠡᠷᠡ
ᠴᠠᠭ ᠡᠴᠡ ᠪᠠᠨ ᠵᠢᠯ ᠪᠦᠷᠢ ᠲᠦᠷᠦ ᠵᠢᠨ ᠪᠤᠳᠤᠯᠭᠠ ᠵᠢ ᠤᠬᠠᠭᠤᠯᠬᠤ᠂ ᠦᠨᠳᠦᠰᠦᠲᠡᠨ
ᠤ ᠪᠦᠯᠬᠦᠮᠳᠡᠯ ᠢ ᠴᠢᠨᠭᠭᠠᠳᠬᠠᠬᠤ᠂ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠲᠧᠭᠨᠢᠭ ᠮᠡᠷᠭᠡᠵᠢᠯ ᠢ ᠲᠦᠭᠡᠮᠡᠯᠵᠢᠬᠦᠯᠬᠦ᠂
ᠬᠠᠦᠯᠢ ᠴᠠᠭᠠᠵᠠ ᠵᠢ ᠲᠠᠢᠯᠪᠤᠷᠢᠯᠠᠬᠤ ᠭᠡᠬᠦ ᠮᠡᠲᠦ ᠵᠢᠨ ᠠᠭᠤᠯᠭᠠ ᠪᠦᠬᠦᠢ ᠬᠡᠳᠦᠨ ᠵᠠᠭᠤᠨ ᠬᠤᠪᠢ
ᠮᠤᠨᠭᠭᠤᠯ ᠬᠡᠯᠡᠨ ᠤ ᠤᠬᠠᠭᠤᠯᠭᠠ ᠵᠢᠨ ᠮᠠᠲᠧᠷᠢᠶᠠᠯᠢ ᠤᠷᠴᠢᠭᠤᠯᠤᠨ ᠦᠢᠯᠡᠳᠴᠦ ᠦᠷᠭᠡᠨ ᠲᠦᠮᠡᠨᠳᠡᠭᠡᠨ ᠦᠢᠯᠡᠴᠢᠯᠡᠭᠰᠡᠭᠡᠷ ᠢᠷᠡᠵᠡᠢ᠃
ᠲᠡᠬᠦᠨ ᠤ ᠰᠤᠷᠪᠤᠯᠵᠢᠯᠠᠨ ᠦᠢᠯᠡᠳᠦᠭᠰᠡᠨ ᠰᠤᠨᠢᠨ ᠮᠡᠳᠡᠭᠡ ᠦᠪᠦᠷ
ᠮᠤᠨᠭᠭᠤᠯ ᠤᠨ ᠤᠳᠤᠨ ᠲᠧᠯᠸᠢᠰ ᠵᠢᠡᠷ ᠵᠢᠯ ᠳᠤ ᠳᠠᠯᠠ ᠨᠠᠶᠠᠨ ᠵᠤᠷᠪᠤᠰ ᠵᠢᠡᠷ ᠨᠡᠪᠲᠡᠷᠡᠭᠦᠯᠦᠭᠳᠡᠵᠦ᠂
ᠲᠦᠨᠭᠯᠢᠶᠤᠤ ᠬᠤᠲᠠ ᠵᠢᠨ ᠲᠧᠯᠸᠢᠰ ᠬᠤᠷᠢᠶᠠ ᠵᠢᠨ ᠰᠤᠨᠢᠨ ᠮᠡᠳᠡᠭᠡᠨ ᠤ ᠨᠡᠪᠲᠡᠷᠡᠬᠦᠯᠬᠡ ᠪᠡᠷ ᠬᠠᠮᠤᠭ
ᠤᠯᠠᠨ ᠳᠠᠭᠠᠨ ᠨᠢᠬᠡ ᠰᠠᠷᠠ ᠵᠢᠨ ᠳᠤᠲᠤᠷᠠ 24 ᠵᠤᠷᠪᠤᠰ ᠰᠤᠨᠢᠨ ᠮᠡᠳᠡᠭᠡ ᠨᠡᠪᠲᠡᠷᠡᠬᠦᠯᠦᠭᠳᠡᠵᠦ
ᠦᠨᠭᠭᠡᠷᠡᠪᠡ᠃ ᠡᠬᠦᠨ ᠡᠴᠡ ᠭᠠᠳᠠᠨᠠ ᠲᠡᠷᠡ ᠪᠠᠰᠠ ᠦᠷᠬᠦᠯᠵᠢ ᠲᠦᠪ ᠤᠨ ᠪᠤᠯᠤᠨ ᠦᠪᠡᠷᠲᠡᠭᠡᠨ ᠵᠠᠰᠠᠬᠤ
ᠤᠷᠤᠨ ᠪᠠ ᠬᠤᠲᠠ ᠵᠢᠨ ᠷᠠᠳᠢᠣ᠋᠂ ᠰᠤᠨᠢᠨ ᠵᠡᠷᠭᠡᠳᠤ ᠦᠷᠬᠦᠯᠵᠢ ᠡᠬᠡ ᠪᠢᠴᠢᠭ ᠢᠯᠡᠭᠡᠵᠦ᠂ ᠨᠤᠲᠤᠭ ᠤᠰᠤᠨ
ᠤ ᠪᠠᠨ ᠡᠯᠡ ᠠᠵᠢᠯ ᠲᠦᠷᠦᠯ ᠤᠨ ᠠᠮᠵᠢᠯᠲᠠ ᠪᠦᠲᠦᠮᠵᠢ ᠵᠢ ᠴᠢᠨᠡᠬᠡ ᠮᠡᠳᠡᠨ ᠤᠬᠠᠭᠤᠯᠵᠦ ᠪᠠᠢᠪᠠ᠃ ᠲᠡᠬᠦᠨᠤ ᠰᠤᠷᠪᠤᠯᠵᠢᠯᠠᠵᠦ ᠨᠠᠢᠷᠠᠭᠤᠯᠤᠭᠰᠠᠨ ᠰᠤᠨᠢᠨ ᠮᠡᠳᠡᠭᠡ ᠡᠯᠡ
ᠱᠠᠲᠤᠨ ᠤ ᠮᠡᠳᠡᠭᠡ ᠵᠠᠭᠤᠴᠢᠯᠠᠭᠤᠷᠤᠳ ᠵᠢᠡᠷ ᠨᠡᠢᠳᠡᠮ
ᠳᠠᠮᠵᠢᠭᠤᠯᠤᠭᠳᠠᠵᠦ᠂ ᠡᠦ ᠴᠢᠡᠭ ᠱᠠᠨ ᠨᠠᠢ᠍ᠮᠠᠨ ᠨᠤᠲᠤᠭ ᠤᠨ ᠭᠠᠳᠠᠭᠰᠢ ᠤᠬᠠᠭᠤᠯᠤᠯ ᠢ ᠦᠷᠭᠡᠳᠭᠡᠬᠦ ᠪᠠ ᠨᠡᠷᠡ
ᠠᠯᠳᠠᠷᠰᠢᠯ ᠢ ᠨᠢ ᠳᠡᠭᠡᠭᠰᠢᠯᠡᠬᠦᠯᠬᠦ ᠳᠤ ᠦᠪᠡᠷ ᠤᠨ ᠭᠡᠬᠦ ᠨᠢᠬᠡ ᠬᠡᠮᠵᠢᠶᠡᠨ ᠤ ᠬᠦᠴᠦᠨ ᠵᠢᠳᠬᠦᠯ
ᠵᠢᠨᠨ ᠦᠵᠡᠬᠦᠯᠦᠭᠰᠡᠭᠡᠷ ᠢᠷᠡᠵᠡᠢ᠃ ᠵᠢᠯ ᠤᠨ ᠡᠴᠦᠰ ᠪᠤᠯᠬᠤ ᠳᠤ ᠪᠠᠢᠭᠤᠯᠭᠠ ᠵᠢᠨ ᠬᠢᠨᠢ ᠭᠠᠳᠠᠭᠰᠢ
ᠤᠬᠠᠭᠤᠯᠭᠠ ᠵᠢᠨ ᠱᠠᠨᠭᠨᠠᠯ ᠤᠨ ᠮᠦᠨᠭᠭᠦ ᠵᠢᠨ ᠬᠢᠨᠢ ᠭᠤᠷᠪᠠᠨ ᠤ ᠬᠤᠶᠠᠷ ᠨᠢ ᠪᠦᠷ ᠡᠦ ᠴᠢᠡᠭ ᠱᠠᠨᠤ
ᠪᠤᠯᠴᠢᠬᠠᠳᠠᠭ ᠪᠠᠢᠵᠦ᠂ 《ᠠᠵᠢᠯ ᠤᠨ ᠪᠦᠲᠦᠮᠵᠢ ᠦᠨᠳᠦᠷ ᠰᠤᠷᠪᠤᠯᠵᠢᠯᠠᠭᠴᠢ》᠂ 《ᠠᠵᠢᠯ ᠳᠠᠭᠠᠨ ᠰᠢᠭᠤᠷᠬᠠᠢ
ᠵᠠᠯᠠᠭᠤ》᠂ 《ᠭᠠᠳᠠᠭᠰᠢ ᠤᠬᠠᠭᠤᠯᠭᠠ ᠵᠢᠨ ᠭᠠᠪᠢᠶᠠᠳᠦ ᠰᠤᠷᠪᠤᠯᠵᠢᠯᠠᠭᠴᠢ》᠂ 《ᠬᠤᠤᠰ ᠬᠡᠯᠡ ᠲᠠᠢ
ᠴᠢᠳᠠᠪᠤᠷᠢᠲᠠᠨ》 ᠭᠡᠬᠦ ᠮᠡᠲᠦ ᠪᠡᠷ ᠨᠡᠷᠡᠯᠡᠭᠳᠡᠵᠦ ᠤᠯᠠᠨ ᠤ ᠪᠠᠨ ᠳᠤᠮᠳᠠ ᠤᠳᠤ ᠪᠤᠯᠤᠨ ᠬᠢᠯᠠᠯᠵᠠᠵᠠᠢ᠃
ᠶᠠᠭ ᠲᠡᠭᠡᠵᠦ ᠴᠢᠷᠮᠠᠢᠨ ᠠᠵᠢᠯᠯᠠᠭᠰᠠᠨ ᠤ ᠪᠠᠨ ᠠᠴᠢ ᠪᠡᠷ ᠡᠦ ᠴᠢᠡᠭ ᠱᠠᠨ 2013 ᠤᠨ ᠤ 7 ᠰᠠᠷᠠ ᠳᠤ
ᠤᠨᠴᠠ ᠴᠢᠳᠠᠪᠤᠷᠢᠲᠠᠨ ᠵᠢᠡᠷ ᠤᠷᠤᠨ ᠲᠤᠭᠠ ᠲᠠᠢ ᠪᠤᠯᠵᠦ᠂ ᠲᠤᠰ ᠵᠢᠯᠳᠤ ᠪᠠᠨ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ ᠲᠧᠯᠸᠢᠰ
ᠬᠤᠷᠢᠶᠠ ᠵᠢᠨ ᠮᠤᠨᠭᠭᠤᠯ ᠨᠠᠢᠷᠠᠭᠤᠯᠬᠤ ᠬᠡᠯᠳᠡᠰ ᠤᠨ ᠡᠷᠬᠢᠯᠡᠭᠴᠢ ᠵᠢᠨ ᠲᠤᠰᠢᠶᠠᠯ ᠳᠤ
ᠳᠡᠪᠰᠢᠬᠦᠯᠦᠭᠳᠡᠪᠡ᠃
2018 ᠤᠨ ᠤ 5 ᠰᠠᠷᠠ ᠡᠴᠡ 2021 ᠤᠨ ᠤ 9 ᠰᠠᠷᠠ ᠪᠤᠯᠳᠠᠯᠠᠬᠢ ᠭᠤᠷᠪᠠᠨ ᠵᠢᠯ
ᠬᠠᠭᠠᠰ ᠤᠨ ᠬᠤᠭᠤᠴᠠᠭᠠᠨ ᠳᠤ ᠡᠦ ᠴᠢᠡᠭ ᠱᠠᠨ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ ᠴᠢᠡᠭ ᠯᠦᠡᠭ ᠱᠠᠨ ᠪᠠᠯᠭᠠᠰᠤ
ᠵᠢᠨ ᠬᠦᠨᠳᠡᠢ ᠵᠢᠨ ᠭᠤᠤ ᠲᠤᠰᠬᠤᠨ ᠳᠤ ᠤᠨᠢᠨ ᠳᠡᠭᠡᠷᠡ ᠨᠢ ᠶᠠᠳᠠᠭᠤ ᠵᠢ ᠲᠡᠳᠬᠦᠬᠦ ᠲᠤᠰᠬᠤᠨᠳᠤ
ᠰᠠᠭᠤᠬᠤ ᠨᠢᠬᠡᠳᠦᠬᠡᠷ ᠱᠦᠵᠢ᠂ ᠠᠵᠢᠯᠯᠠᠬᠤ
ᠳᠤᠭᠤᠢᠯᠠᠡᠭ ᠤᠨ ᠳᠠᠷᠤᠭᠠ ᠪᠡᠷ ᠠᠵᠢᠯᠯᠠᠪᠠ᠃ ᠨᠢᠬᠡᠨ ᠴᠡᠪᠡᠷ ᠮᠤᠨᠭᠭᠤᠯ ᠦᠨᠳᠦᠰᠦᠲᠡᠨ ᠤ ᠺᠠᠳ᠋ᠷ ᠴᠤᠯᠤ
ᠬᠢᠲᠠᠳ ᠦᠨᠳᠦᠰᠦᠲᠡᠨ ᠵᠢᠡᠷ ᠪᠦᠷᠢᠯᠳᠦᠭᠰᠡᠨ ᠨᠢᠬᠡ ᠲᠤᠰᠬᠤᠨ ᠤ ᠮᠢᠨᠭᠭᠠ ᠭᠠᠷᠤᠢ ᠤᠯᠠᠨ ᠲᠦᠮᠡᠨ ᠢ
ᠳᠠᠢᠴᠢᠯᠠᠨ ᠳᠠᠭᠠᠭᠤᠯᠤᠨᠠ ᠭᠡᠳᠡᠭ ᠪᠤᠳᠤᠪᠠᠯ ᠪᠠᠰᠠ ᠲᠡᠢᠮᠦ ᠬᠢᠯᠪᠠᠷ ᠬᠡᠷᠡᠭ ᠪᠢᠰᠢ ᠶᠤᠮ᠃ ᠭᠡᠬᠦ ᠳᠡᠭᠡᠨ
ᠡᠦ ᠴᠢᠡᠭ ᠱᠠᠨ ᠬᠤᠪᠢᠳᠠᠭᠰᠠᠨ ᠲᠡᠷᠡ ᠲᠤᠰᠬᠤᠨ ᠤ ᠪᠠᠨ ᠤᠳᠠᠭᠠᠨ ᠵᠢᠯ ᠤᠨ ᠤᠯᠠᠨ ᠠᠰᠠᠭᠤᠳᠠᠯ ᠢ ᠤᠬᠤᠷᠬᠠᠨ
ᠬᠡᠳᠦᠨ ᠵᠢᠯ ᠲᠤᠳᠤᠷᠠ ᠪᠦᠷ ᠰᠢᠢᠳᠪᠦᠷᠢᠯᠡᠵᠦ ᠦᠭᠬᠦ ᠪᠡᠷ ᠠᠷᠭᠠ ᠪᠦᠬᠦᠨᠢ ᠰᠦᠪᠡᠭᠴᠢᠯᠡᠨ ᠪᠦᠬᠦ ᠴᠢᠳᠠᠯ
ᠵᠢᠨᠨ ᠰᠢᠪᠬᠠᠵᠠᠢ᠃ ᠬᠦᠨᠳᠡᠢ ᠵᠢᠨ ᠭᠤᠤ ᠲᠤᠰᠬᠤᠨ ᠨᠢ
ᠳᠦᠷᠪᠡᠨ ᠲᠠᠯᠠ ᠪᠡᠷ ᠵᠢᠨᠨ ᠠᠭᠤᠯᠠ ᠪᠡᠷ ᠬᠦᠷᠢᠶᠡᠯᠡᠭᠳᠡᠭᠰᠠᠨ ᠬᠤᠲᠤᠭᠤᠷ ᠭᠠᠵᠠᠷ ᠲᠤ᠌ ᠪᠠᠢᠷᠢᠰᠢᠵᠦ᠂
ᠪᠦᠬᠦ ᠲᠤᠰᠬᠤᠨ ᠵᠢᠡᠷ ᠵᠢᠨᠨ ᠨᠡᠢᠲᠡ 300 ᠭᠠᠷᠤᠢ ᠡᠷᠦᠬᠡ᠂ 1100 ᠭᠠᠷᠤᠢ ᠠᠮᠠᠨ ᠲᠤᠭᠠ ᠲᠠᠢ ᠪᠠᠢᠵᠦ᠂
ᠠᠮᠠᠨ ᠲᠤᠭᠠ ᠪᠦᠷᠢ ᠳᠤ ᠬᠤᠪᠢᠳᠠᠬᠤ ᠲᠠᠷᠢᠶᠠᠨ ᠭᠠᠵᠠᠷ ᠨᠢ 5 ᠮᠤ᠌ ᠴᠤ᠌ ᠬᠦᠷᠬᠦ ᠦᠬᠡᠢ ᠪᠠᠢᠳᠠᠭ᠃
ᠤᠨᠴᠠᠭᠠᠢ ᠭᠠᠵᠠᠷ ᠵᠦᠢ ᠵᠢᠨ ᠪᠠᠢᠷᠢᠰᠢᠯ ᠡᠴᠡ ᠪᠠᠨ ᠪᠤᠯᠵᠦ ᠲᠡᠨᠳᠡᠬᠢ ᠵᠢᠨ ᠵᠠᠮ ᠬᠠᠷᠢᠯᠴᠠᠭᠠ ᠪᠤᠢᠳᠠ
ᠪᠦᠭᠯᠡᠬᠦᠦ ᠪᠦᠬᠡᠳ ᠤᠯᠠᠨ ᠲᠦᠮᠡᠨ ᠮᠦᠨ ᠯᠠ ᠲᠡᠭᠷᠢ ᠵᠢ ᠲᠦᠰᠢᠵᠦ ᠲᠠᠷᠢᠶᠠᠯᠠᠵᠦ ᠮᠠᠯᠵᠢᠬᠤ ᠤᠯᠠᠮᠵᠢᠯᠯᠠᠲᠤ
ᠬᠡᠯᠪᠡᠷᠢ ᠡᠴᠡ ᠪᠠᠨ ᠰᠠᠯᠵᠦ ᠳᠡᠢᠯᠦᠬᠡᠳᠦᠢ ᠪᠠᠢᠵᠦ᠂ ᠠᠷᠠᠳ ᠤᠨ ᠠᠮᠢᠳᠤᠷᠠᠯ ᠠᠨᠠᠢᠬᠠᠨ ᠪᠠᠢᠪᠠ᠃
ᠡᠦ ᠴᠢᠡᠭ ᠱᠠᠨ ᠲᠡᠷᠡ ᠲᠤᠰᠬᠤᠨ ᠳᠤ ᠠᠨᠭᠬᠠ ᠬᠦᠷᠬᠦ ᠳᠡᠭᠡᠨ ᠲᠤᠰᠬᠤᠨ ᠤ ᠵᠦᠪᠯᠡᠯ
ᠤᠨ ᠭᠡᠷ ᠢ ᠨᠢ ᠦᠵᠡᠬᠡᠳ ᠨᠢᠬᠡ ᠯᠠ ᠠᠳᠬᠤ ᠪᠤᠯᠵᠠᠢ᠃ ᠬᠡᠳᠦᠨ ᠲᠠᠰᠤᠯᠭᠠ ᠭᠡᠷ ᠤᠨ ᠬᠢᠨᠢ ᠨᠢᠬᠡ ᠯᠠ
ᠲᠠᠰᠤᠯᠭᠠ ᠭᠡᠷ ᠨᠢ ᠬᠡᠷᠡᠭᠯᠡᠵᠦ ᠪᠤᠯᠬᠤ ᠪᠦᠬᠡᠳ ᠪᠤᠰᠤᠳ ᠨᠢ ᠡᠬᠦᠳᠡ ᠴᠤᠨᠭᠬᠤ ᠨᠢ ᠴᠦᠮ ᠪᠠᠯᠪᠠᠷᠠᠭᠠᠳ
ᠠᠪᠬᠤ ᠵᠢᠨ ᠠᠷᠭᠠ ᠦᠬᠡᠢ ᠪᠤᠯᠴᠢᠬᠠᠵᠠᠢ᠃ ᠲᠡᠢᠮᠦ ᠲᠤᠮᠤ ᠲᠤᠰᠬᠤᠨ ᠤ ᠵᠦᠪᠯᠡᠯ ᠤᠨ ᠭᠡᠷ ᠭᠡᠵᠦ ᠪᠠᠢᠭᠠᠳ
ᠬᠤᠳᠳᠤᠭ ᠴᠤ᠌ ᠦᠬᠡᠢ ᠪᠠᠢᠵᠦ᠂ ᠪᠤᠰᠤᠳ ᠡᠷᠦᠬᠡ ᠡᠴᠡ ᠤᠰᠤ ᠵᠦᠭᠡᠭᠡᠨ ᠬᠡᠷᠡᠭᠯᠡᠵᠦ ᠪᠠᠢᠪᠠ᠃ ᠲᠡᠬᠦᠨ ᠢ ᠤᠴᠢᠬᠤ
ᠳᠤ ᠲᠡᠷᠡ ᠲᠤᠰᠬᠤᠨ ᠨᠢ ᠨᠠᠮ ᠤᠨ ᠡᠬᠦᠷ ᠤᠨ ᠱᠦᠵᠢ ᠦᠬᠡᠢ ᠪᠦᠬᠡᠳ ᠨᠠᠮ ᠤᠨ ᠡᠬᠦᠷ ᠤᠨ ᠬᠡᠰᠢᠬᠦᠨ ᠴᠤ᠌
ᠦᠬᠡᠢ ᠪᠠᠢᠵᠦ᠂ ᠭᠠᠴᠠᠭᠠᠨ ᠳᠠᠷᠤᠭᠠ ᠪᠤᠯᠤᠨ ᠨᠢᠬᠲᠠᠯᠠᠨ ᠪᠤᠳᠤᠭᠴᠢ ᠬᠤᠶᠠᠭᠤᠯᠠ ᠡᠴᠡ ᠨᠢ ᠤᠨᠳᠤᠤ ᠲᠤᠰᠬᠤᠨ
ᠤ ᠵᠦᠪᠯᠡᠯ ᠤᠨ ᠬᠡᠰᠢᠬᠦᠨ ᠴᠤ᠌ ᠦᠬᠡᠢ ᠪᠠᠢᠪᠠ᠃ ᠤᠤᠯ ᠤᠨ ᠱᠦᠵᠢ ᠪᠠᠨ ᠵᠠᠭᠠᠯᠳᠤᠵᠦ ᠤᠨᠠᠭᠠᠭᠰᠠᠨ ᠪᠦᠬᠡᠳ
ᠰᠡᠬᠦᠯᠡᠷ ᠨᠢ ᠪᠠᠯᠭᠠᠰᠤᠨ ᠤ ᠺᠠᠳ᠋ᠷ ᠱᠦᠵᠢ ᠵᠢᠨ ᠠᠵᠢᠯ ᠢ ᠨᠢ ᠬᠡᠰᠡᠭ ᠬᠤᠭᠤᠴᠠᠭᠠ ᠬᠠᠷᠢᠭᠤᠴᠠᠭᠠᠳ ᠬᠢᠵᠦ
ᠳᠡᠢᠯᠦᠭᠰᠡᠨ ᠦᠬᠡᠢ ᠳᠤᠷᠭᠤᠨ ᠬᠠᠶᠠᠴᠢᠬᠠᠭᠠᠳ ᠪᠠᠢᠪᠠ᠃ ᠲᠡᠷᠡ ᠠᠢᠯ ᠨᠢ ᠶᠠᠳᠠᠭᠤ ᠬᠤᠴᠤᠷᠤᠨᠭᠭᠤᠢ ᠵᠢᠨ
ᠳᠡᠭᠡᠷᠡ ᠵᠠᠷᠭᠤ ᠵᠠᠭᠠᠯᠳᠤᠭᠠᠨ ᠠᠷᠪᠢᠨ ᠪᠠᠢᠵᠦ ᠳᠡᠭᠡᠷᠡ ᠱᠠᠲᠤᠨ ᠤ ᠬᠠᠮᠢᠶᠠ ᠪᠦᠬᠦᠢ ᠰᠠᠯᠠᠭᠠ
ᠮᠦᠴᠢᠷ ᠤᠨ ᠬᠢᠨ ᠢ ᠠᠷᠭᠠ ᠪᠠᠷᠠᠭᠳᠠᠭᠤᠯᠵᠦ ᠪᠠᠢᠭᠰᠠᠨ ᠭᠡᠳᠡᠭ ᠢ ᠲᠡᠷᠡ ᠤᠴᠢᠭᠠᠳ ᠬᠡᠳᠦᠨ ᠡᠳᠦᠷ
ᠰᠠᠭᠤᠭᠠᠳ ᠰᠠᠶᠢ ᠮᠡᠳᠡᠵᠡᠢ᠃ ᠲᠡᠷᠡ ᠪᠠᠢᠳᠠᠯ ᠳᠤ ᠨᠢᠬᠡᠳᠦᠬᠡᠷ ᠱᠦᠵᠢ ᠪᠡᠷ ᠲᠤᠮᠢᠯᠠᠭᠳᠠᠵᠦ ᠤᠴᠢᠭᠰᠠᠨ ᠡᠦ
ᠴᠢᠡᠭ ᠱᠠᠨ ᠭᠠᠴᠠᠭᠠᠨ ᠤ ᠨᠠᠮ ᠤᠨ ᠡᠬᠦᠷ ᠤᠨ ᠱᠦᠵᠢ ᠵᠢᠨ ᠲᠤᠰᠢᠶᠠᠯ ᠢ ᠨᠢ ᠬᠠᠪᠰᠤᠷᠭᠠᠨ
ᠬᠠᠷᠢᠭᠤᠴᠠᠵᠦ ᠲᠡᠷᠡ ᠲᠤᠰᠬᠤᠨ ᠢ ᠰᠢᠨᠡ ᠦᠨᠭᠭᠡ ᠲᠦᠷᠬᠦ ᠤᠷᠤᠭᠤᠯᠬᠤ ᠪᠡᠷ ᠴᠢᠨᠡᠬᠡ ᠮᠡᠳᠡᠨ
ᠴᠢᠷᠮᠠᠢᠵᠠᠢ᠃ ᠴᠢᠳᠠᠨᠠ ᠤᠤ？ ᠦᠬᠡᠢ ᠤᠤ？ ᠭᠡᠳᠡᠭ ᠪᠤᠯ ᠴᠢᠳᠠᠯ ᠤᠨ ᠠᠰᠠᠭᠤᠳᠠᠯ᠂ ᠴᠢᠳᠠᠯ ᠵᠢᠨᠨ
ᠭᠠᠷᠭᠠᠵᠦ ᠴᠢᠷᠮᠠᠢᠵᠦ ᠤᠴᠢᠳᠠᠭ ᠨᠢ ᠭᠠᠷᠮᠠᠭᠠᠢ ᠬᠦᠮᠦᠨ ᠤ ᠵᠠᠡᠭ ᠶᠤᠮ ᠭᠠᠵᠠᠷ ᠡᠦ ᠴᠢᠡᠭ ᠱᠠᠨ ᠲᠡᠷᠡ
ᠨᠤᠲᠤᠭ ᠤᠨ ᠤᠯᠠᠨ ᠲᠦᠮᠡᠨ ᠤ ᠠᠮᠢᠳᠤᠷᠠᠯ ᠤᠨ ᠨᠦᠬᠦᠴᠡᠯ ᠢ ᠰᠠᠢᠵᠢᠷᠠᠭᠤᠯᠬᠤ ᠪᠡᠷ ᠵᠢᠷᠦᠭᠡᠨ ᠲᠠᠮᠢᠷ
ᠵᠢᠨᠨ ᠰᠢᠪᠬᠠᠵᠠᠢ᠃ ᠬᠠᠮᠤᠭ ᠤᠷᠢᠳᠠᠪᠠᠷ ᠲᠡᠷᠡ
ᠬᠠᠮᠢᠶᠠ ᠪᠦᠬᠦᠢ ᠰᠠᠯᠠᠭᠠ ᠮᠦᠴᠢᠷ ᠢ ᠡᠷᠢᠵᠦ ᠪᠠᠢᠭᠠᠳ 7 ᠲᠦᠮᠡ ᠭᠠᠷᠤᠢ ᠲᠦᠬᠦᠷᠢᠭ ᠵᠤᠭᠤᠰ ᠭᠤᠶᠤᠴᠢᠯᠠᠨ
ᠤᠯᠵᠦ ᠠᠪᠬᠤ ᠵᠢᠨ ᠲᠠᠮᠳᠤᠭ ᠦᠬᠡᠢ ᠪᠤᠯᠤᠭᠠᠳ ᠪᠠᠢᠭᠰᠠᠨ ᠲᠤᠰᠬᠤᠨ ᠤ ᠵᠦᠪᠯᠡᠯ ᠤᠨ ᠭᠡᠷ ᠬᠦᠷᠢᠶᠡ ᠵᠢ ᠨᠢ
ᠰᠢᠨᠡᠳᠭᠡᠬᠦ ᠵᠢᠨ ᠬᠠᠮᠲᠤ ᠬᠤᠳᠳᠤᠭ ᠴᠤᠬᠢᠵᠦ ᠤᠰᠤ ᠬᠡᠷᠡᠭᠯᠡᠬᠦ ᠠᠰᠠᠭᠤᠳᠠᠯ ᠢ ᠰᠢᠢᠳᠪᠦᠷᠢᠯᠡᠪᠡ᠃
ᠡᠦ ᠴᠢᠡᠭ ᠱᠠᠨ ᠡᠷᠦᠬᠡ ᠪᠡᠷ ᠬᠦᠨᠵᠡᠬᠡᠢᠷᠡᠬᠦ ᠲᠤᠮᠳᠠ ᠪᠠᠨ ᠵᠠᠡᠭ ᠶᠦᠡᠭ ᠯᠢ ᠬᠡᠮᠡᠬᠦ
ᠨᠢᠬᠡᠨ ᠭᠤᠤᠨᠢ ᠪᠡᠶᠡ ᠨᠠᠰᠤᠲᠠᠨ（ᠲᠠᠪᠤᠨ ᠪᠠᠲᠤᠯᠠᠭᠠᠲᠤ ᠡᠷᠦᠬᠡ） ᠤ ᠬᠢᠨ ᠭᠤᠴᠢᠨ ᠵᠢᠯ ᠴᠠᠬᠢᠯᠭᠠᠨ
ᠤᠷᠤᠭᠠᠳᠤᠢ ᠪᠦᠬᠡᠳ ᠬᠤᠳᠳᠤᠭ ᠴᠤ᠌ ᠦᠬᠡᠢ ᠪᠠᠢᠬᠤ ᠵᠢ ᠮᠡᠳᠡᠭᠡᠳ ᠲᠦᠢᠯ ᠵᠢᠡᠷ ᠰᠡᠳᠬᠢᠯ ᠬᠦᠳᠡᠯᠵᠡᠢ᠃
ᠠᠳᠠᠯᠢᠬᠠᠨ ᠬᠦᠵᠦᠬᠦᠦ ᠲᠤᠯᠤᠭᠠᠢ ᠲᠠᠢ ᠬᠦᠮᠦᠨ ᠪᠠᠢᠵᠦ ᠪᠠᠢᠭᠠᠳ ᠡᠪᠡᠳᠴᠢᠨ ᠡᠮᠭᠡᠭ ᠲᠠᠢ᠂ ᠳᠤᠷᠤᠢ
ᠪᠠᠭᠤᠷᠠᠢ ᠭᠠᠭᠴᠠ ᠪᠡᠶᠡ ᠨᠠᠰᠤᠲᠠᠨ ᠢ ᠢᠨᠭᠭᠢᠵᠦ ᠤᠮᠳᠤᠭᠠᠢᠯᠠᠭᠠᠳ ᠶᠠᠭᠠᠬᠢᠵᠦ ᠪᠤᠯᠤᠨᠠ ᠪᠤᠢ⁈ᠲᠡᠷᠡ ᠬᠤᠰᠢᠭᠤᠨ ᠤ ᠴᠠᠬᠢᠯᠭᠠᠨ ᠬᠦᠴᠦᠨ ᠤ ᠺᠤᠮᠫᠠᠨᠢ ᠲᠠᠢ
ᠬᠠᠷᠢᠴᠠᠵᠦ ᠪᠠᠢᠭᠠᠳ ᠴᠠᠬᠢᠯᠭᠠᠨ ᠤᠷᠤᠭᠤᠯᠵᠦ
ᠦᠭᠭᠦᠭᠰᠡᠨ ᠪᠦᠬᠡᠳ ᠬᠤᠰᠢᠭᠤᠨ ᠤ ᠰᠢᠯᠵᠢᠬᠡ ᠬᠤᠯᠪᠤᠭᠠ ᠵᠢᠨ ᠺᠤᠮᠫᠠᠨᠢ ᠡᠴᠡ ᠲᠦᠮᠡᠨ ᠲᠦᠬᠦᠷᠢᠭ ᠤᠯᠵᠦ
ᠬᠤᠤᠳᠳᠤᠭ ᠮᠠᠯᠳᠠᠵᠦ ᠦᠭᠪᠡ᠃ ᠲᠡᠷᠡ ᠪᠠᠰᠠ ᠬᠤᠰᠢᠭᠤᠨ ᠤ ᠤᠰᠤᠨ ᠠᠰᠢᠭᠯᠠᠯᠲᠠ ᠵᠢᠨ ᠲᠤᠪᠴᠢᠶᠠ ᠵᠢ ᠡᠷᠢᠵᠦ
ᠪᠠᠢᠭᠠᠳ 700 ᠭᠠᠷᠤᠢ ᠲᠦᠮᠡᠨ ᠲᠦᠬᠦᠷᠢᠭ ᠲᠦᠷᠦᠯ ᠵᠦᠢᠯ ᠤᠨ ᠪᠡᠯᠡ ᠮᠦᠨᠭᠭᠦ ᠭᠤᠶᠤᠴᠢᠯᠠᠨ ᠤᠯᠵᠦ ᠬᠦᠨᠳᠡᠢ
ᠵᠢᠨ ᠭᠤᠤ ᠲᠤᠰᠬᠤᠨ ᠤ 500 ᠭᠠᠷᠤᠢ ᠮᠤ᠌ ᠲᠠᠷᠢᠶᠠ ᠵᠢ ᠤᠰᠤᠯᠠᠵᠦ ᠳᠡᠢᠯᠬᠦ ᠪᠤᠯᠭᠠᠭᠰᠠᠨ ᠵᠢᠡᠷ ᠮᠤ᠌
ᠪᠦᠷᠢ ᠡᠷᠳᠡᠨᠢ ᠰᠢᠰᠢ ᠵᠢᠨ ᠤᠨᠠᠯᠲᠠ ᠵᠢ 400 ᠡᠴᠡ 500 ᠵᠢᠡᠭ ᠨᠡᠮᠡᠭᠳᠡᠬᠦᠯᠪᠡ᠃ ᠲᠡᠷᠡ ᠮᠦᠨ ᠵᠠᠮ
ᠬᠠᠷᠢᠯᠴᠠᠭᠠᠨ ᠤ ᠲᠤᠪᠴᠢᠶᠠ ᠵᠢ ᠡᠷᠢᠵᠦ ᠪᠠᠢᠭᠠᠳ 600 ᠭᠠᠷᠤᠢ ᠲᠦᠮᠡᠨ ᠲᠦᠬᠦᠷᠢᠭ ᠲᠦᠷᠦᠯ ᠵᠦᠢᠯ ᠤᠨ
ᠪᠡᠯᠡ ᠮᠦᠨᠭᠭᠦ ᠭᠤᠶᠤᠴᠢᠯᠠᠨ ᠤᠯᠵᠦ 5.6 ᠺᠢᠯᠤᠮᠧᠲ᠋ᠷ ᠤᠨ ᠱᠦᠢᠨᠢ ᠵᠠᠮ ᠳᠡᠪᠢᠰᠦᠨ ᠦᠭᠴᠦ᠂ ᠲᠤᠰᠬᠤᠨ ᠤ
ᠠᠷᠠᠳ ᠤᠨ ᠭᠠᠷᠴᠦ ᠤᠷᠤᠬᠤ ᠳᠤ ᠳᠦᠬᠦᠮ ᠦᠬᠡᠢ ᠪᠠᠢᠭᠰᠠᠨ᠂ ᠮᠠᠯ ᠲᠠᠷᠢᠶᠠ ᠪᠠᠨ ᠬᠤᠳᠠᠯᠳᠤᠬᠤᠳᠤ
ᠳᠦᠬᠦᠮ ᠦᠬᠡᠢ ᠪᠠᠢᠭᠰᠠᠨ ᠲᠡᠦᠬᠡ ᠵᠢ ᠡᠴᠦᠰᠯᠡᠬᠦᠯᠵᠡᠢ᠃ ᠲᠡᠷᠡ ᠪᠠᠰᠠ ᠲᠦᠨᠭᠯᠢᠶᠤᠤ ᠬᠤᠲᠠ ᠵᠢᠨ
ᠦᠭᠡᠷᠡᠴᠢᠯᠡᠯᠲᠡ ᠬᠦᠭᠵᠢᠬᠦᠯᠦᠯᠲᠡ ᠵᠢᠨ ᠵᠦᠪᠯᠡᠯ ᠲᠠᠢ
ᠬᠠᠷᠢᠴᠠᠵᠦ ᠪᠠᠢᠭᠠᠳ 90 ᠭᠠᠷᠤᠢ ᠲᠦᠮᠡᠨ ᠲᠦᠬᠦᠷᠢᠭ ᠤᠨ ᠲᠦᠷᠦᠯ ᠵᠦᠢᠯ ᠤᠨ ᠪᠡᠯᠡ ᠮᠦᠨᠭᠭᠦ ᠭᠤᠶᠤᠴᠢᠯᠠᠨ
ᠤᠯᠵᠦ ᠲᠤᠰᠬᠤᠨ ᠤ ᠳᠤᠮᠳᠠ ᠵᠠᠮ ᠤᠨ ᠳ᠋ᠧᠡᠭ ᠤᠭᠰᠠᠷᠠᠵᠦ ᠦᠭᠭᠦᠭᠡᠳ ᠠᠭᠤᠯᠠᠨ ᠭᠠᠵᠠᠷ ᠤᠨ ᠬᠦᠮᠦᠰ ᠤᠨ
ᠦᠳᠡᠰᠢ ᠤᠷᠤᠢ ᠪᠡᠷ ᠶᠠᠪᠤᠵᠦ ᠰᠠᠭᠤᠬᠤ ᠳᠤ ᠲᠦᠬᠦᠮ ᠦᠬᠡᠢ ᠪᠠᠢᠭᠰᠠᠨ ᠬᠦᠴᠢᠷᠳᠡᠯ ᠢ ᠨᠢ ᠰᠢᠢᠳᠪᠦᠷᠢᠯᠡᠨ
ᠦᠭᠴᠡᠢ᠃
ᠡᠦ ᠴᠢᠡᠭ ᠱᠠᠨ ᠬᠦᠨᠳᠡᠢ ᠵᠢᠨ ᠭᠤᠤ ᠲᠤᠰᠬᠤᠨ ᠤ ᠤᠳᠠᠭᠠᠨ ᠵᠢᠯ ᠤᠨ ᠰᠢᠬᠢᠷᠯᠢᠭ ᠲᠦᠮᠦᠰᠦ
ᠲᠠᠷᠢᠭᠰᠠᠨ ᠲᠡᠦᠬᠡ ᠲᠠᠢ ᠳᠠᠪᠠᠭᠤᠯᠢᠬ ᠨᠦᠬᠦᠴᠡᠯ ᠳᠤ ᠨᠢ ᠲᠤᠬᠢᠷᠠᠭᠤᠯᠵᠦ᠂ ᠤᠨᠢᠨ ᠳᠡᠭᠡᠷᠡ ᠨᠢ ᠶᠠᠳᠠᠭᠤ
ᠵᠢ ᠳᠡᠳᠬᠦᠬᠦ ᠲᠤᠰᠬᠠᠢ ᠲᠦᠷᠦᠯ ᠤᠨ ᠪᠡᠯᠡ ᠮᠦᠨᠭᠭᠦ ᠵᠢ ᠲᠡᠮᠡᠴᠡᠨ ᠤᠯᠵᠦ ᠶᠠᠳᠠᠭᠤ ᠬᠦᠴᠢᠷᠲᠡᠢ ᠡᠷᠦᠬᠡᠤᠳ ᠵᠢᠡᠷ ᠰᠢᠬᠢᠷᠯᠢᠭ ᠲᠦᠮᠦᠰᠦ ᠲᠠᠷᠢᠭᠤᠯᠬᠤ ᠵᠢᠨ ᠬᠠᠮᠲᠤ ᠲᠤᠰᠬᠤᠨ ᠳᠤ ᠨᠢ ᠹᠧᠨᠲ᠋ᠢᠶᠤᠤᠷ ᠤᠨ
ᠦᠢᠯᠡᠳᠪᠦᠷᠢ ᠭᠠᠷᠭᠠᠨ ᠦᠭᠴᠦ᠂ ᠤᠯᠠᠨ ᠲᠦᠮᠡᠨ ᠤ ᠰᠢᠬᠢᠷᠯᠢᠭ ᠲᠦᠮᠦᠰᠦ ᠪᠡᠷ ᠵᠢᠨ ᠹᠧᠨᠲ᠋ᠢᠶᠤᠤᠷ ᠬᠢᠵᠦ
ᠬᠤᠳᠠᠯᠳᠤᠬᠤ ᠵᠢ ᠨᠢ ᠵᠤᠷᠢᠭᠵᠢᠭᠤᠯᠪᠠ᠃ ᠡᠦ ᠴᠢᠡᠭ ᠱᠠᠨ ᠬᠡᠳᠦᠨ ᠵᠢᠯ ᠳᠠᠷᠠᠭᠠᠯᠠᠨ ᠲᠡᠳᠡᠭᠡᠷ ᠡᠯᠪᠡᠭ
ᠬᠤᠷᠢᠶᠠᠭᠰᠠᠨ ᠰᠢᠬᠢᠷᠯᠢᠭ ᠲᠦᠮᠦᠰᠦ ᠪᠤᠯᠤᠨ ᠬᠤᠪᠢ ᠪᠡᠷ ᠵᠢᠨᠨ ᠦᠢᠯᠡᠳᠪᠦᠷᠢᠯᠡᠭᠰᠡᠨ ᠹᠧᠨᠲ᠋ᠢᠶᠤᠤᠷ ᠵᠢᠨᠨ
ᠵᠤᠭᠤᠰ ᠪᠤᠯᠭᠠᠬᠤ ᠵᠢᠨ ᠲᠦᠯᠦᠬᠡ ᠪᠦᠬᠦ ᠨᠠᠢ᠍ᠮᠠᠨ ᠬᠤᠰᠢᠭᠤ ᠵᠢ ᠪᠠᠷᠠᠳᠠᠯᠠ ᠶᠠᠪᠤᠵᠦ ᠬᠤᠪᠢ ᠵᠢᠨ
ᠬᠠᠷᠢᠴᠠᠭᠠ ᠶᠠᠪᠤᠯᠴᠠᠭᠠ ᠪᠠᠨ ᠠᠰᠢᠭᠯᠠᠨ ᠦᠨᠳᠦᠷ ᠦᠨᠡ ᠪᠡᠷ ᠬᠤᠳᠠᠯᠳᠤᠨ ᠦᠭᠪᠡ᠃ ᠦᠷᠭᠡᠨ ᠤᠯᠠᠨ
ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠤᠨ ᠵᠢᠨᠨ ᠰᠤᠶᠤᠯ ᠤᠨ ᠠᠮᠢᠳᠤᠷᠠᠯ ᠢ ᠨᠢ ᠪᠠᠶᠠᠯᠢᠭᠵᠢᠭᠤᠯᠵᠦ᠂ ᠪᠦᠬᠦᠢᠯᠡ
ᠲᠤᠰᠬᠤᠨᠳᠤ ᠰᠠᠢᠨ ᠰᠠᠢᠬᠠᠨ ᠠᠮᠢᠳᠤᠷᠠᠯ ᠤᠨ ᠠᠭᠤᠷ ᠠᠮᠢᠰᠬᠤᠯ ᠲᠠᠢ ᠪᠤᠯᠭᠠᠬᠤ ᠵᠢᠨ ᠲᠦᠯᠦᠬᠡ ᠡᠦ ᠴᠢᠡᠭ
ᠱᠠᠨ ᠬᠤᠪᠢ ᠵᠢᠨ ᠬᠠᠷᠮᠠᠨ ᠡᠴᠡ ᠪᠠᠨ 5000 ᠲᠦᠬᠦᠷᠢᠭ
ᠵᠤᠭᠤᠰ ᠭᠠᠷᠭᠠᠬᠤ ᠵᠢᠨ ᠬᠠᠮᠲᠤ ᠤᠢᠷᠠ ᠬᠠᠪᠢ ᠵᠢᠨ ᠠᠵᠦ ᠠᠬᠤᠢᠯᠠᠯᠲᠠᠨ᠂ ᠲᠠᠨᠢᠯ ᠠᠬᠠ ᠳᠡᠬᠦᠦ ᠨᠠᠷ
ᠵᠢᠨᠨ ᠡᠷᠢᠵᠦ ᠪᠠᠢᠭᠠᠳ ᠨᠡᠢᠲᠡ 4 ᠲᠦᠮᠡ ᠭᠠᠷᠤᠢ ᠲᠦᠬᠦᠷᠢᠭ ᠵᠤᠭᠤᠰ ᠬᠤᠷᠠᠮᠳᠤᠭᠤᠯᠤᠨ ᠬᠦᠭᠵᠢᠮᠳᠡᠬᠦᠷ ᠪᠠ
ᠬᠤᠪᠴᠠᠰᠤ ᠬᠤᠨᠠᠷ ᠬᠤᠳᠠᠯᠳᠤᠨ ᠠᠪᠴᠦ ᠬᠦᠨᠳᠡᠢ ᠵᠢᠨ ᠭᠤᠤ ᠲᠤᠰᠬᠤᠨ ᠳᠤ ᠵᠠᠭᠤᠨ ᠬᠦᠮᠦᠨ ᠤ ᠶᠠᠨᠭᠭᠠᠷ
ᠤᠨ ᠪᠦᠯᠬᠦᠮ ᠭᠠᠷᠭᠠᠪᠠ᠋᠃ ᠲᠡᠷᠡ ᠪᠠᠰᠠ ᠲᠠᠷᠢᠶᠠᠯᠠᠡᠭ ᠤᠨ ᠪᠠᠩᠭᠢ ᠲᠠᠢ ᠬᠠᠷᠢᠴᠠᠵᠦ ᠪᠠᠢᠭᠠᠳ ᠠᠷᠠᠳ
ᠢ ᠬᠠᠷᠠᠭᠠᠯᠵᠠᠬᠤ ᠲᠠᠷᠢᠶᠠᠯᠠᠡᠭ ᠤᠨ ᠵᠢᠬᠡᠯᠡᠯᠬᠡ ᠵᠢ ᠬᠤᠢᠨᠠ ᠡᠮᠦᠨᠡ ᠨᠡᠢᠲᠡ 1000 ᠭᠠᠷᠤᠢ ᠲᠦᠮᠡᠨ
ᠲᠦᠬᠦᠷᠢᠭ ᠵᠢᠬᠡᠯᠡᠨ ᠦᠭᠴᠦ᠂ ᠲᠤᠰᠬᠤᠨ ᠤ ᠤᠯᠠᠨ ᠲᠦᠮᠡᠨ ᠤ ᠮᠠᠯ ᠲᠡᠵᠢᠬᠡᠪᠦᠷᠢ ᠲᠡᠵᠢᠬᠡᠬᠦ ᠵᠡᠷᠭᠡ ᠳᠤ
ᠨᠢ ᠲᠤᠰᠠᠯᠠᠵᠠᠢ᠃ ᠬᠦᠨᠳᠡᠢ ᠵᠢᠨ ᠭᠤᠤ ᠲᠤᠰᠬᠤᠨ ᠤ ᠤᠯᠠᠨ ᠲᠦᠮᠡᠨ ᠤ ᠲᠡᠵᠢᠭᠡᠭᠰᠡᠨ ᠨᠤᠲᠤᠭ ᠤᠨ ᠲᠠᠬᠢᠶᠠ
ᠵᠢ ᠨᠢ ᠬᠤᠳᠠᠯᠳᠤᠵᠦ ᠦᠭᠬᠦ᠂ ᠵᠦᠬᠡᠢ ᠲᠡᠵᠢᠬᠡᠵᠦ ᠪᠠᠯ ᠭᠠᠷᠭᠠᠳᠠᠭ ᠲᠠᠷᠢᠶᠠᠴᠢᠳ ᠤᠨ ᠵᠦᠬᠡᠢ ᠵᠢᠨ ᠪᠠᠯ
ᠢ ᠨᠢ ᠪᠤᠷᠤᠯᠠᠭᠤᠯᠵᠦ ᠦᠭᠬᠦ ᠬᠡᠮᠡᠨ ᠲᠡᠷᠡ ᠦᠪᠡᠷ ᠤᠨ ᠲᠦᠷᠦᠯ ᠰᠠᠲᠤᠨ ᠡᠴᠡ ᠪᠠᠨ ᠡᠬᠢᠯᠡᠬᠡᠳ ᠬᠠᠮᠲᠤ
ᠠᠵᠢᠯᠯᠠᠭᠰᠠᠳ᠂ ᠨᠠᠢᠵᠠ ᠨᠦᠬᠦᠳ ᠵᠢᠨᠨ ᠪᠠᠷᠠᠳᠠᠯᠠ ᠡᠷᠢᠵᠦ ᠬᠦᠶᠦᠪᠡ᠃ ᠵᠠᠷᠢᠮ ᠠᠯᠵᠠᠭᠤ ᠵᠠᠯᠬᠠᠭᠤ ᠬᠦᠮᠦᠰ
ᠲᠤ᠌ ᠨᠢ ᠡᠦ ᠴᠢᠡᠭ ᠱᠠᠨ ᠬᠤᠪᠢ ᠵᠢᠨ ᠬᠠᠷᠢᠴᠠᠭᠠ ᠪᠠᠨ ᠠᠰᠢᠭᠯᠠᠨ ᠠᠵᠢᠯ ᠤᠯᠵᠦ ᠦᠭᠭᠦᠨ ᠬᠢᠯᠭᠡᠵᠦ᠂
ᠵᠠᠷᠢᠮ ᠢ ᠨᠢ ᠪᠠᠰᠠ ᠪᠡᠶᠡ ᠪᠡᠷ ᠵᠢᠨᠨ ᠳᠠᠭᠠᠭᠤᠯᠵᠦ ᠪᠠᠢᠭᠠᠳ ᠬᠦᠷᠢᠶᠡ ᠬᠠᠰᠢᠶᠠ ᠵᠢ ᠨᠢ
ᠴᠡᠪᠡᠷᠯᠡᠬᠦᠯᠵᠦ ᠨᠤᠭᠤᠭᠠ ᠵᠢᠮᠢᠰ ᠲᠠᠷᠢᠭᠤᠯᠪᠠ᠃ ᠠᠢᠯ ᠠᠢᠮᠠᠬ ᠬᠤᠭᠤᠷᠤᠨᠳᠦ ᠵᠢᠨ ᠵᠦᠷᠢᠴᠡᠯ
ᠮᠦᠷᠬᠦᠯᠳᠦᠬᠡᠨ᠂ ᠠᠬᠠ ᠳᠡᠬᠦᠦ ᠬᠤᠶᠠᠭᠤᠯᠠ ᠵᠢᠨ ᠳᠤᠮᠳᠠᠬᠢ ᠬᠡᠷᠡᠬᠦᠯ ᠶᠠᠷᠬᠢᠶᠠᠨ ᠢ ᠴᠤ᠌ ᠡᠦ ᠴᠢᠡᠭ
ᠱᠠᠨ ᠡᠪ ᠵᠦᠢ ᠵᠢ ᠨᠢ ᠦᠵᠡᠵᠦ ᠡᠶᠡᠲᠡᠢ ᠰᠠᠢᠬᠠᠨ ᠰᠢᠢᠳᠪᠦᠷᠢᠯᠡᠵᠦ ᠦᠭᠬᠦᠨᠡ᠃ ᠤᠨᠴᠠᠭᠠᠢ ᠡᠪᠡᠳᠴᠢᠨ
ᠡᠮᠭᠡᠭ ᠲᠠᠢ ᠵᠢ ᠨᠢ ᠦᠪᠡᠷ ᠵᠢᠨᠨ ᠳᠠᠭᠠᠭᠤᠯᠵᠦ ᠠᠪᠠᠴᠢᠭᠠᠳ ᠡᠮᠨᠡᠬᠦᠯᠵᠦ ᠠᠪᠤᠨᠠ᠂ ᠬᠠᠮᠢᠶᠠ ᠪᠦᠬᠦᠢ
ᠰᠠᠯᠠᠭᠠ ᠮᠦᠴᠢᠷ ᠢ ᠡᠷᠢᠵᠦ ᠪᠠᠢᠭᠠᠳ ᠬᠠᠷᠠᠭᠠᠯᠵᠠᠯ ᠦᠵᠡᠬᠦᠯᠵᠦ ᠨᠦᠬᠦᠪᠦᠷᠢ ᠬᠦᠷᠲᠡᠭᠡᠨᠡ᠃ ᠲᠡᠷᠡ
ᠪᠠᠰᠠ ᠵᠢᠯ ᠪᠤᠯᠭᠠᠨ ᠬᠤᠰᠢᠭᠤᠨ ᠤ ᠮᠤᠨᠭᠭᠤᠯ ᠡᠮᠨᠡᠯᠬᠡ ᠵᠢᠨ ᠬᠤᠷᠢᠶᠠ ᠵᠡᠷᠭᠡ ᠲᠠᠢ ᠬᠠᠷᠢᠴᠠᠵᠦ
ᠲᠤᠰᠬᠤᠨ ᠤ ᠤᠯᠠᠨ ᠲᠦᠮᠡᠨ ᠳᠤ ᠰᠦᠢᠳᠭᠡᠯ ᠬᠤᠷᠢᠶᠠᠬᠤ ᠦᠬᠡᠢ ᠪᠡᠷ ᠠᠯᠪᠠᠨ ᠵᠢᠷᠤᠮ ᠤᠨ ᠡᠮᠴᠢᠯᠡᠬᠡ
ᠬᠢᠯᠬᠡᠬᠦ； ᠲᠠᠷᠢᠶᠠᠯᠠᠡᠭ ᠮᠠᠯ ᠠᠵᠦ ᠠᠬᠤᠢ ᠵᠢᠨ ᠲᠤᠪᠴᠢᠶᠠ ᠵᠢᠨ ᠮᠡᠷᠭᠡᠵᠢᠯᠲᠡᠳ ᠢ ᠤᠷᠢᠵᠦ ᠲᠠᠷᠢᠵᠦ
ᠲᠡᠵᠢᠬᠡᠬᠦ ᠲᠤᠬᠠᠢ ᠪᠤᠯᠪᠠᠰᠤᠷᠠᠯ ᠬᠦᠷᠲᠡᠭᠡᠬᠦ ᠭᠡᠬᠦ ᠮᠡᠲᠦ ᠪᠡᠷ ᠤᠯᠠᠨ ᠲᠦᠮᠡᠨ ᠤ ᠡᠷᠡᠬᠦᠯ ᠮᠡᠨᠳᠦ᠂
ᠦᠢᠯᠡᠳᠪᠦᠷᠢᠯᠡᠯ ᠠᠮᠢᠳᠤᠷᠠᠯ ᠳᠤ ᠠᠴᠢ ᠲᠤᠰᠠ ᠲᠠᠢ ᠠᠵᠢᠯ ᠢ ᠠᠷᠪᠢᠨ ᠬᠢᠵᠡᠢ᠃ ᠡᠨᠡ ᠮᠡᠲᠦ ᠪᠡᠷ ᠭᠤᠷᠪᠠᠨ
ᠵᠢᠯ ᠬᠠᠭᠠᠰ ᠠᠵᠢᠯᠯᠠᠬᠤ ᠳᠤ ᠬᠦᠨᠳᠡᠢ ᠵᠢᠨ ᠭᠤᠤ ᠲᠤᠰᠬᠤᠨ ᠤ ᠦᠨᠭᠭᠡ ᠳᠦᠷᠬᠦ ᠦᠬᠡᠷᠡᠴᠢᠯᠡᠭᠳᠡᠵᠦ᠂
ᠤᠯᠠᠨ ᠲᠦᠮᠡᠨ ᠤ ᠢᠲᠡᠭᠡᠯ ᠵᠤᠷᠢᠭ ᠬᠦᠪᠴᠢᠯᠡᠭᠳᠡᠵᠦ ᠠᠵᠢᠯᠯᠠᠬᠤ ᠢᠳᠡᠪᠬᠢᠵᠢᠯ ᠨᠢ ᠰᠠᠢᠵᠢᠷᠠᠵᠦ ᠢᠷᠡᠪᠡ᠃《ᠪᠢᠳᠡ ᠡᠦ ᠱᠦᠵᠢ ᠳᠡᠭᠡᠨ
ᠬᠡᠵᠢᠶᠡᠳᠡ ᠲᠠᠯᠠᠷᠬᠠᠵᠦ ᠶᠠᠪᠤᠳᠠᠭ᠂ ᠲᠡᠷᠡ ᠮᠠᠨᠤᠰᠢ ᠵᠤᠷᠢᠭᠵᠢᠭᠤᠯᠤᠨ ᠪᠠᠯᠲᠤ ᠵᠦᠬᠡᠢ ᠲᠡᠵᠢᠬᠡᠯᠭᠡᠭᠰᠡᠨ
ᠪᠦᠬᠡᠳ ᠪᠠᠰᠠ ᠪᠢᠳᠡᠨ ᠢ ᠬᠠᠪᠰᠤᠷᠤᠨ ᠵᠦᠬᠡᠢ ᠵᠢᠨ ᠪᠠᠯ ᠢ ᠭᠠᠳᠠᠭᠰᠢ ᠬᠤᠳᠠᠯᠳᠤᠵᠦ ᠦᠭᠴᠡᠢ᠃ ᠵᠦᠬᠡᠢ
ᠲᠡᠵᠢᠬᠡᠵᠦ ᠪᠠᠯ ᠬᠤᠳᠠᠯᠳᠤᠭᠰᠠᠨ ᠵᠢᠡᠷ ᠮᠠᠨ ᠤ ᠠᠮᠢᠳᠤᠷᠠᠯ ᠶᠡᠬᠡᠪᠡᠷ ᠰᠠᠢᠵᠢᠷᠠᠭᠰᠠᠨ ᠰᠢᠦ》 ᠭᠡᠵᠦ
ᠬᠦᠨᠳᠡᠢ ᠵᠢᠨ ᠭᠤᠤ ᠲᠤᠰᠬᠤᠨ ᠤ ᠠᠷᠠᠳ ᠯᠢ ᠬᠦᠧᠧ ᠱᠧᠡᠭ ᠰᠡᠳᠬᠢᠯ ᠳᠤᠭᠳᠤᠯᠤᠨ ᠶᠠᠷᠢᠵᠦ ᠪᠠᠢᠯᠠ᠃ ᠪᠤᠰᠤᠳ
ᠲᠤ᠌ ᠮᠡᠳᠡᠷᠡᠭᠳᠡᠨᠡ ᠭᠡᠳᠡᠭ ᠪᠤᠰᠤᠳ ᠤᠨ ᠲᠦᠯᠦᠬᠡ ᠴᠢᠷᠮᠠᠢᠨ ᠠᠵᠢᠯᠯᠠᠭᠰᠠᠨ ᠤ ᠬᠢᠨᠢ ᠬᠠᠷᠢᠭᠤ ᠪᠠᠢᠵᠦ
ᠲᠠᠭᠠᠷᠠᠨᠠ᠃ ᠡᠦ ᠴᠢᠡᠭ ᠱᠠᠨ ᠭᠡᠭᠴᠢ ᠨᠠᠮ ᠵᠠᠰᠠᠭ ᠡᠴᠡ ᠲᠡᠬᠦᠨ ᠳᠤ ᠳᠠᠭᠠᠭᠠᠯᠭᠠᠭᠰᠠᠨ ᠡᠬᠦᠷᠬᠡ ᠪᠠᠨ
ᠢᠨᠭᠭᠢᠵᠦ ᠬᠢᠯᠠᠷᠠᠲᠠᠯᠠ ᠪᠡᠶᠡᠯᠡᠬᠦᠯᠳᠡᠭ ᠰᠤᠳᠤᠨ ᠰᠤᠷᠪᠤᠯᠵᠢᠯᠠᠭᠴᠢ ᠪᠤᠯᠬᠤ ᠶᠤᠮ᠃
2023 ᠤᠨ ᠡᠴᠡ ᠤᠳᠤ ᠪᠤᠯᠳᠠᠯᠠ ᠡᠦ ᠴᠢᠡᠭ ᠱᠠᠨ ᠨᠠᠢ᠍ᠮᠠᠨ ᠬᠤᠰᠢᠭᠤᠨ ᠤ ᠬᠠᠮ
ᠵᠠᠭᠤᠴᠢᠯᠠᠭᠤᠷ ᠤᠨ ᠲᠦᠪ ᠤᠨ ᠨᠠᠮ ᠤᠨ ᠡᠬᠦᠷ ᠤᠨ ᠬᠡᠰᠢᠬᠦᠨ᠂ ᠰᠤᠷᠪᠤᠯᠵᠢᠯᠠᠵᠦ ᠬᠠᠷᠢᠯᠴᠠᠬᠤ ᠬᠡᠯᠳᠡᠰ ᠤᠨ ᠡᠷᠬᠢᠯᠡᠭᠴᠢ
ᠪᠤᠯᠤᠨ ᠮᠤᠨᠭᠭᠤᠯ ᠨᠠᠢᠷᠠᠭᠤᠯᠬᠤ ᠬᠡᠯᠳᠡᠰ ᠤᠨ ᠡᠷᠬᠢᠯᠡᠭᠴᠢ ᠵᠢᠨ ᠲᠤᠰᠢᠶᠠᠯᠢ ᠬᠠᠪᠰᠤᠷᠭᠠᠨ ᠬᠠᠷᠢᠭᠤᠴᠠᠵᠦ
ᠪᠠᠢᠨᠠ᠃ ᠡᠦ ᠴᠢᠡᠭ ᠱᠠᠨ ᠤᠷᠢᠳ ᠬᠤᠵᠢᠳ ᠬᠤᠳᠠ ᠪᠠ ᠬᠤᠰᠢᠭᠤᠨ ᠳᠡᠰ ᠤᠨ 《ᠲᠡᠷᠢᠬᠦᠨ ᠤ ᠰᠤᠨᠢᠨ ᠮᠡᠳᠡᠭᠡᠨ ᠤ ᠠᠵᠢᠯᠲᠠᠨ》᠂ 《ᠭᠠᠳᠠᠭᠰᠢ ᠤᠬᠠᠭᠤᠯᠤᠯ
ᠤᠨ ᠰᠢᠯᠢᠳᠡᠭ ᠰᠤᠷᠪᠤᠯᠵᠢᠯᠠᠭᠴᠢ》᠂ 《ᠲᠤᠰᠬᠤᠨ ᠳᠤ ᠰᠠᠭᠤᠭᠰᠠᠨ ᠰᠢᠯᠢᠳᠡᠭ ᠺᠠᠳ᠋ᠷ》᠂ 《ᠪᠦᠬᠦ ᠤᠷᠤᠨ ᠤ ᠠᠵᠢᠯ ᠦᠢᠯᠡᠰ ᠤᠨ ᠨᠢᠬᠡᠴᠡ ᠵᠢᠨ ᠶᠠᠳᠠᠭᠤ ᠡᠴᠡ
ᠠᠩᠭᠢᠵᠢᠷᠠᠭᠤᠯᠵᠦ ᠪᠡᠬᠢᠯᠡᠯᠲᠡ ᠰᠢᠪᠲᠤᠯᠤᠭᠰᠠᠨ ᠲᠤᠰᠬᠠᠢ ᠲᠦᠷᠦᠯ ᠤᠨ ᠱᠠᠨᠭᠨᠠᠯ ᠬᠦᠷᠲᠡᠭᠴᠢ》ᠵᠡᠷᠭᠡ ᠮᠠᠰᠢ ᠤᠯᠠᠨ ᠢᠷᠠᠭᠤ ᠠᠯᠳᠠᠷ ᠵᠢᠡᠷ ᠡᠨᠭᠭᠡᠷ ᠵᠢᠨᠨ
ᠮᠢᠯᠢᠶᠠᠯᠭᠠᠵᠠᠢ᠃ 2024 ᠤᠨ ᠤ 3 ᠰᠠᠷᠠ ᠡᠴᠡ ᠡᠦ ᠴᠢᠡᠭ ᠱᠠᠨ ᠡᠬᠡᠨᠡᠷ ᠲᠠᠢ ᠪᠠᠨ ᠬᠤᠶᠠᠭᠤᠯᠠ
ᠬᠤᠰᠢᠭᠤᠨ ᠤ ᠪᠠᠨ 《 ᠰᠢᠨ ᠾᠧᠡᠭ》 ᠬᠠᠢᠷᠠ ᠰᠡᠳᠬᠢᠯ ᠵᠢᠨᠨ ᠬᠠᠨᠳᠢᠪᠯᠠᠬᠤ ᠪᠦᠯᠬᠦᠮ ᠤᠨ ᠬᠡᠰᠢᠬᠦᠨ
ᠪᠤᠯᠵᠦ᠂ ᠰᠠᠷᠠ ᠪᠦᠷᠢ ᠦᠪᠡᠷ ᠤᠨ ᠨᠢᠬᠡ ᠬᠤᠪᠢ ᠬᠠᠯᠠᠭᠤᠨ ᠰᠡᠳᠬᠢᠯ ᠤᠨ ᠬᠠᠨᠳᠢᠪ ᠵᠢᠡᠷ ᠵᠢᠨᠨ ᠬᠢᠲᠠᠳ
ᠮᠤᠨᠭᠭᠤᠯ ᠢᠯᠭᠠᠯ ᠦᠬᠡᠢ ᠲᠡᠳᠡᠭᠡᠷ ᠵᠤᠪᠠᠵᠦ ᠵᠦᠳᠡᠭᠰᠡᠨ ᠬᠦᠮᠦᠰ ᠲᠤ᠌ ᠲᠤᠰᠠᠯᠠᠵᠦ ᠪᠤᠢ᠃ ᠲᠡᠷᠡ ᠤᠳᠦ ᠠᠵᠢᠯ ᠤᠨ ᠵᠠᠪ ᠴᠢᠯᠦᠬᠡ ᠪᠡᠷ ᠵᠢᠨᠨ ᠮᠤᠷᠢᠨ ᠬᠤᠭᠤᠷ᠂
ᠡᠯᠧᠺᠲ᠋ᠷᠦᠨ ᠬᠦᠭᠵᠢᠮ ᠵᠡᠷᠭᠡ ᠵᠢ ᠰᠤᠷᠴᠦ ᠪᠠᠢᠬᠤ ᠡᠴᠡ ᠭᠠᠳᠠᠨᠠ ᠪᠠᠰᠠ ᠬᠠᠦᠯᠢ ᠴᠠᠭᠠᠵᠠ ᠵᠢᠨ ᠮᠡᠳᠡᠯᠬᠡ
ᠪᠤᠯᠤᠨ ᠰᠡᠳᠬᠢᠴᠡ ᠵᠢᠨ ᠤᠬᠠᠭᠠᠨ ᠰᠤᠷᠤᠯᠴᠠᠵᠦ ᠡᠳᠡᠭᠡᠷ ᠮᠡᠷᠭᠡᠵᠢᠯ ᠵᠢᠡᠷ ᠵᠢᠨᠨ ᠤᠯᠠᠨ ᠲᠦᠮᠡᠨ ᠳᠡᠭᠡᠨ ᠨᠡᠡᠭ
ᠰᠠᠢᠨ ᠵᠢᠡᠷ ᠦᠢᠯᠡᠴᠢᠯᠡᠬᠦ ᠪᠡᠷ ᠴᠢᠷᠮᠠᠢᠨ ᠠᠵᠢᠯᠯᠠᠵᠦ ᠪᠤᠢ᠃