ᠠᠩᠬᠠᠨ᠎ᠤ ᠴᠠᠰᠤ —

ᠨᠠᠮᠤᠷ᠎ᠤᠨ ᠨᠠᠷᠠᠨ᠎ᠤ ᠠᠯᠲᠠᠨ ᠥᠩᠭᠡ᠎ᠪᠠᠷ

ᠨᠠᠪᠴᠢ᠎ᠨᠢ ᠱᠢᠷᠠᠯᠠᠭ᠎ᠠ ᠥᠷᠭᠡᠨ ᠲᠠᠯ᠎ᠠ᠎ᠶ᠋ᠢ

ᠡᠪᠥᠯ᠎ᠤᠨ ᠰᠠᠷᠠᠨ᠎ᠤ ᠮᠥᠩᠭᠦᠨ ᠥᠩᠭᠡ᠎ᠪᠠᠷ

ᠡᠮᠥᠰᠭᠡᠯ ᠬᠤᠶᠠᠭ᠎ᠢ᠎ᠨᠢ ᠰᠣᠯᠢᠶ᠎ᠠ ᠬᠡᠵᠤ

ᠣᠨ᠎ᠤ ᠲᠣᠷᠭᠠᠨ ᠠᠯᠠᠭᠠᠨ ᠳᠡᠭᠡᠷ᠎ᠡ

ᠬᠥᠩᠭᠡᠨ ᠬᠥᠩᠭᠡᠨ ᠰᠠᠪᠰᠠᠨ᠎ᠠ

ᠣᠯᠠᠨ᠎ᠤ ᠬᠤᠷᠠᠭᠠᠨ ᠮᠠᠯᠠᠭᠠᠢ ᠳᠡᠭᠡᠷ᠎ᠡ

ᠱᠢᠩᠭᠡᠨ ᠱᠢᠩᠭᠡᠨ ᠯᠠᠪᠰᠠᠨ᠎ᠠ

ᠠᠩᠬᠠᠨ᠎ᠤ ᠴᠠᠰᠤ —

ᠥᠨᠳᠡᠭᠡᠨ ᠭᠠᠯᠠᠭᠤᠳ᠎ᠤᠨ ᠬᠤᠷᠭᠤᠳᠠᠭ᠍ᠰᠠᠨ

ᠭᠠᠩᠭᠠᠨᠠᠭ᠎ᠠ᠎ᠶ᠋ᠢ᠎ᠨᠢ ᠦᠳᠡᠴᠢᠭᠡᠭᠡᠳ

ᠦᠬᠡᠷ᠎ᠤᠨ ᠡᠪᠡᠷ᠎ᠢ ᠬᠠᠩᠭᠢᠨᠠᠭᠤᠯᠳᠠᠭ

ᠵᠢᠩᠭᠢᠨᠡᠭᠡ᠎ᠶ᠋ᠢ᠎ᠨᠢ ᠣᠭ᠍ᠲᠤᠶ᠎ᠠ ᠭᠡᠵᠤ

ᠴᠠᠩᠭᠠᠭ᠍ᠰᠠᠨ ᠠᠮᠢᠲᠠᠨ᠎ᠤ ᠠᠪᠤᠷᠠᠯ

ᠲᠠᠤᠯᠠᠢ᠎ᠶ᠋ᠢᠨ ᠬᠡᠯᠡ᠎ᠳᠤ ᠬᠠᠢᠯᠠᠵᠤ ᠪᠤᠷᠠᠨ᠎ᠠ

ᠠᠩᠭᠠᠭ᠍ᠰᠠᠨ ᠠᠷᠪᠢᠨ᠎ᠤ ᠢᠪᠡᠭᠡᠯ

ᠠᠭᠤᠯᠠ᠎ᠶ᠋ᠢᠨ ᠪᠡᠯ᠎ᠳᠤ ᠴᠠᠢᠯᠠᠵᠤ ᠪᠤᠲᠠᠷᠠᠨ᠎ᠠ

ᠠᠩᠬᠠᠨ᠎ᠤ ᠴᠠᠰᠤ —

ᠴᠠᠯᠭᠢᠭᠠᠳ ᠪᠤᠯᠬᠤ ᠦᠭᠡᠢ ᠴᠠᠢᠳᠠᠮ᠎ᠢ

ᠴᠠᠷᠴᠠᠭᠠᠵᠤ ᠨᠢᠭᠡ ᠵᠢᠩᠲᠡᠬᠦᠯᠦᠭᠡᠳ

ᠳᠡᠭ᠌ᠳᠡᠭᠡᠳ ᠪᠣᠯᠬᠤ ᠦᠭᠡᠢ ᠲᠣᠭᠤᠰᠤ᠎ᠶ᠋ᠢ

ᠳᠡᠪᠰᠡᠭᠡᠳ ᠨᠢᠭᠡ ᠠᠮᠠᠷᠠᠶ᠎ᠠ ᠭᠡᠵᠤ

ᠮᠢᠩᠭᠠᠨ ᠴᠠᠭᠠᠨ ᠡᠷᠪᠡᠬᠡᠢ

ᠡᠭᠦᠯᠡᠨ ᠳᠡᠭᠡᠷ᠎ᠡ᠎ᠠᠴᠠ ᠪᠠᠭᠤᠨ᠎ᠠ

ᠮᠥᠰᠥᠨ ᠴᠠᠭᠠᠨ ᠤᠩᠭᠠᠷᠢᠯ

ᠡᠭᠦᠳᠡᠨ ᠳᠡᠭᠡᠷ᠎ᠡ ᠮᠢᠨᠢ ᠰᠠᠭᠤᠨ᠎ᠠ