ᠠᠯᠲᠠᠨ ᠨᠠᠮᠤᠷ ᠤ᠋ᠨ ᠤᠯᠠᠷᠢᠯ ᠶ᠋ᠢᠡᠷ ᠲᠦᠩᠯᠢᠶᠣᠣ ᠬᠤᠳᠠ ᠶ᠋ᠢᠨ ᠬᠦᠷᠢᠶᠡ ᠬᠣᠰᠢᠭᠤᠨ ᠤ᠋ ᠡᠯᠡ ᠭᠠᠵᠠᠷ ᠤ᠋ᠨ ᠮᠠᠯᠴᠢᠨ ᠲᠠᠷᠢᠶᠠᠴᠢᠳ ᠴᠠᠭ ᠢ᠋ ᠠᠮᠵᠢᠨ ᠬᠥᠭᠡ ᠳᠠᠷᠤᠰᠢ ᠶ᠋ᠢᠨ ᠡᠷᠳᠡᠨᠢ ᠰᠢᠰᠢ ᠪᠡᠨ ᠬᠠᠳᠤᠵᠤ ᠬᠤᠷᠢᠶᠠᠬᠤ ᠪᠠ ᠬᠠᠳᠠᠭᠠᠯᠠᠵᠤ ᠲᠠᠷᠤᠰᠢᠭᠤᠯᠬᠤ ᠠᠵᠢᠯ ᠳ᠋ᠤ ᠶᠠᠭᠠᠷᠠᠯᠳᠤᠵᠤ᠂ ᠮᠠᠯ ᠤᠨᠤᠭᠠ ᠪᠡᠨ ᠮᠡᠨᠳᠦ ᠤᠨᠳᠤᠷᠤᠭᠤᠯᠬᠤ ᠲᠡᠵᠢᠭᠡᠯ ᠪᠣᠷᠳᠣᠭᠠ ᠶ᠋ᠢ ᠱᠠᠯᠠᠪᠳᠠᠨ ᠨᠦᠭᠡᠴᠡᠯᠡᠨᠠ᠃ ᠡᠨᠡ ᠵᠢᠯ ᠲᠤᠰ ᠬᠤᠰᠢᠭᠤ 45 ᠲᠦᠮᠡᠨ ᠮᠤ᠌ ᠶ᠋ᠢᠨ ᠬᠥᠭᠡ ᠳᠠᠷᠤᠰᠢ ᠶ᠋ᠢᠨ ᠡᠷᠳᠡᠨᠢ ᠰᠢᠰᠢ ᠲᠠᠷᠢᠵᠤ᠂ 135 ᠲᠦᠮᠡᠨ ᠲᠣᠨ ᠬᠥᠭᠡ ᠳᠠᠷᠤᠰᠢ ᠲᠠᠷᠤᠰᠢᠭᠤᠯᠬᠤ ᠪᠡᠷ ᠵᠢᠱ᠌ᠢᠵᠦ ᠪᠠᠢᠨᠠ᠃
ᠬᠦᠷᠢᠶᠠ ᠬᠤᠰᠢᠭᠤ ᠮᠢᠬᠠᠨ ᠤ᠋ ᠦᠭᠡᠷ ᠤ᠋ᠨ ᠠᠵᠤ ᠦᠢᠯᠡᠰ ᠢ᠋ ᠬᠦᠳᠡᠭᠡ ᠲᠤᠰᠬᠤᠨ ᠢ᠋ ᠬᠦᠭᠵᠢᠭᠦᠯᠦᠨ ᠮᠠᠨᠳᠤᠭᠤᠯᠬᠤ ᠵᠠᠩᠬᠢᠯᠠᠭᠠ ᠶ᠋ᠢᠨ ᠠᠷᠭᠠ ᠬᠡᠮᠵᠢᠶᠠ ᠶ᠋ᠢᠨ ᠨᠢᠭᠡ ᠪᠤᠯᠭᠠᠵᠤ᠂ ᠬᠡᠪᠴᠢᠶᠡᠵᠢᠭᠰᠡᠨ ᠪᠦᠭᠡᠳ ᠤᠯᠠᠨ ᠡᠰᠢᠴᠢᠯᠡᠭᠰᠡᠨ ᠤᠳᠤ ᠦᠶᠠ ᠶ᠋ᠢᠨ ᠲᠡᠵᠢᠭᠡᠨ ᠦᠷᠡᠵᠢᠭᠦᠯᠬᠦ ᠪᠠᠢᠷᠢᠰᠢᠯ ᠢ᠋ ᠨᠢᠭᠡᠨᠳᠡ ᠪᠦᠷᠢᠯᠳᠦᠭᠦᠯᠪᠡ᠃ ᠬᠥᠭᠡ ᠳᠠᠷᠤᠰᠢ ᠶ᠋ᠢᠨ ᠡᠷᠳᠡᠨᠢ ᠰᠢᠰᠢ ᠶ᠋ᠢᠨ ᠤᠷᠭᠤᠯᠳᠠ ᠶ᠋ᠢᠨ ᠬᠤᠭᠤᠴᠠᠭᠠ ᠨᠢ ᠣᠬᠣᠷ᠂ ᠨᠢᠭ᠍ᠲᠠ ᠲᠠᠷᠢᠵᠤ ᠪᠤᠯᠬᠤ᠂ ᠤᠨᠠᠯᠲᠠ ᠨᠢ ᠥᠨᠳᠥᠷ᠂ ᠰᠢᠮᠡ ᠲᠡᠵᠢᠭᠡᠯ ᠡᠯᠪᠡᠭ ᠵᠡᠷᠭᠡ ᠳᠠᠪᠠᠭᠤᠯᠢᠭ᠋ ᠲᠤ᠌ ᠰᠠᠭᠤᠷᠢᠯᠠᠨ᠂ ᠣᠢᠷᠠᠶᠢᠨ ᠵᠢᠯ ᠳ᠋ᠤ ᠲᠤᠰ ᠬᠣᠰᠢᠭᠤ ᠮᠢᠬᠠᠨ ᠤ᠋ ᠦᠬᠡᠷ ᠦ᠋ᠨ ᠬᠡᠷᠡᠭᠴᠡᠭᠡ ᠳ᠋ᠤ ᠵᠣᠬᠢᠴᠠᠭᠰᠠᠨ ᠬᠥᠭᠡ ᠳᠠᠷᠤᠰᠢ ᠶ᠋ᠢᠨ ᠡᠷᠳᠡᠨᠢ ᠰᠢᠰᠢ ᠳᠠᠷᠢᠬᠤ ᠵᠢ ᠶᠡᠬᠡ ᠪᠡᠷ ᠬᠥᠭᠵᠢᠭᠦᠯᠵᠦ᠂ ᠳᠠᠷᠢᠵᠤ ᠲᠡᠵᠢᠭᠡᠬᠦ ᠶ᠋ᠢ ᠤᠶᠠᠯᠳᠤᠭᠤᠯᠬᠤ ᠠᠷᠭᠠ ᠬᠡᠯᠪᠡᠷᠢ ᠪᠡᠷ ᠲᠡᠵᠢᠭᠡᠨ ᠦᠷᠡᠵᠢᠭᠦᠯᠬᠦ ᠦᠢᠯᠡᠰ ᠤ᠋ᠨ ᠥᠪᠡᠷ ᠦ᠋ᠨ ᠥᠷᠲᠡᠭ ᠢ᠋ ᠤᠯᠠᠮ ᠨᠢᠭᠡ ᠠᠯᠬᠤᠮ ᠪᠠᠭᠤᠷᠠᠭᠤᠯᠤᠨ᠂ ᠮᠠᠯᠴᠢᠨ ᠲᠠᠷᠢᠶᠠᠴᠢᠤᠨ ᠤ᠋ᠨ ᠣᠷᠣᠯᠭᠠ ᠶ᠋ᠢᠨ ᠨᠡᠮᠡᠭᠳᠡᠯ ᠳ᠋ᠤ ᠬᠦᠴᠦᠨ ᠨᠡᠮᠡᠷᠢᠯᠡᠵᠤ ᠪᠤᠢ᠃
ᠰᠤᠷᠪᠤᠯᠵᠢᠯᠠᠭᠴᠢ ᠬᠦᠷᠢᠶᠠ ᠬᠣᠰᠢᠭᠤᠨ ᠤ᠋ ᠬᠦᠷᠢᠶᠡ ᠪᠠᠯᠭᠠᠰᠤ ᠶ᠋ᠢᠨ ᠳᠤᠤᠷᠠ ᠶᠠᠩᠰᠢᠪ ᠵᠡᠭᠥᠨ ᠭᠠᠴᠠᠭᠠᠨ ᠤ᠋ ᠬᠥᠭᠡ ᠳᠠᠷᠤᠰᠢ ᠶ᠋ᠢᠨ ᠡᠷᠳᠡᠨᠢ ᠰᠢᠰᠢ ᠶ᠋ᠢᠨ ᠲᠠᠷᠢᠶᠠᠨ ᠳ᠋ᠤ ᠬᠦᠷᠪᠡᠯ᠂ ᠡᠷᠳᠡᠨᠢ ᠰᠢᠰᠢ ᠨᠢ ᠭᠦᠢᠴᠡᠳ ᠢᠳᠡᠭᠡᠰᠢᠭᠡᠳ᠂ ᠨᠠᠪᠴᠢ ᠨᠠᠮᠠᠭᠠ ᠨᠢ ᠰᠠᠬᠤᠯᠢᠭ᠋ ᠤᠷᠭᠤᠵᠤ᠂ ᠬᠠᠳᠤᠵᠤ ᠬᠤᠷᠢᠶᠠᠵᠤ ᠪᠤᠯᠬᠤ ᠴᠠᠭ ᠲᠠᠭᠠᠨ ᠣᠷᠣᠭᠰᠠᠨ ᠪᠠᠢᠪᠠ᠃ ᠬᠥᠬᠡ ᠳᠠᠷᠤᠰᠢᠶᠢᠨ ᠡᠷᠳᠡᠨᠢ ᠰᠢᠰᠢ ᠪᠠᠨ ᠬᠠᠳᠤᠵᠤ ᠬᠤᠷᠢᠶᠠᠬᠤ ᠪᠡᠷ ᠶᠠᠭᠠᠷᠠᠵᠤ ᠪᠠᠢᠭᠰᠠᠨ ᠲᠤᠰ ᠭᠠᠴᠠᠭᠠᠨ ᠤ᠋ ᠲᠠᠷᠢᠶᠠᠴᠢᠨ ᠬᠤᠩ ᠱᠠᠨ᠄ 《ᠡᠨᠡ ᠵᠢᠯ ᠮᠠᠨ ᠤ᠋ ᠬᠢ 150 ᠮᠦ᠍ ᠶ᠋ᠢᠨ ᠬᠥᠭᠡ ᠳᠠᠷᠤᠰᠢ ᠶ᠋ᠢᠨ ᠡᠷᠳᠡᠨᠢ ᠰᠢᠰᠢ ᠲᠠᠷᠢᠵᠠᠢ᠃ ᠮᠠᠨ ᠤ᠋ ᠲᠡᠵᠢᠭᠡᠨ ᠦᠷᠡᠵᠢᠭᠦᠯᠬᠦ ᠲᠤᠰᠬᠠᠢ ᠬᠤᠷᠰᠢᠶᠠ 150 ᠭᠠᠷᠤᠢ ᠦᠨᠢᠶᠡ ᠲᠡᠵᠢᠭᠡᠵᠦ ᠪᠠᠢᠭᠠ ᠪᠤᠯᠬᠤᠷ ᠨᠢᠭᠡ ᠦᠬᠡᠷ ᠲᠤ᠌ ᠪᠠᠷᠤᠭ ᠨᠢᠭᠡ ᠮᠦ᠍ ᠬᠦᠬᠡ ᠲᠠᠷᠤᠰᠢ ᠶ᠋ᠢᠨ ᠲᠠᠷᠢᠶᠠ ᠨᠤᠬᠳᠠᠭᠤᠯᠬᠤ ᠪᠠᠷᠢᠮᠵᠢᠶᠠ ᠪᠡᠷ ᠲᠠᠷᠢᠭᠰᠠᠨ ᠶᠤᠮ᠃ ᠡᠨᠡ ᠵᠢᠯ ᠦ᠋ᠨ ᠤᠨᠠᠯᠲᠠ ᠰᠠᠢᠨ᠂ ᠮᠦ᠍ ᠪᠦᠷᠢ ᠶ᠋ᠢᠨ ᠤᠨᠠᠯᠲᠠ 8000 ᠵᠢᠩ ᠤᠷᠴᠢᠮ ᠳ᠋ᠤ ᠬᠥᠷᠥᠨᠡ᠃ ᠬᠥᠭᠡ ᠳᠠᠷᠤᠰᠢ ᠶ᠋ᠢᠨ ᠰᠢᠮᠡ ᠲᠡᠵᠢᠭᠡᠯ ᠦ᠋ᠨ ᠥᠷᠲᠡᠭ ᠥᠨᠳᠥᠷ᠂ ᠳᠠᠷᠤᠰᠢᠭᠤᠯᠤᠭᠰᠠᠨ ᠪᠤᠷᠳᠤᠭᠠ ᠪᠠᠷ ᠨᠢᠭᠡ ᠪᠦᠯᠦᠭ ᠨᠠᠷᠢᠯᠢᠭ᠋ ᠪᠣᠷᠳᠣᠭᠠ ᠶ᠋ᠢ ᠣᠷᠣᠯᠠᠭᠤᠯᠪᠠᠯ ᠮᠠᠯ ᠤ᠋ᠨ ᠤᠯᠠᠨ ᠲᠠᠯᠠ ᠶ᠋ᠢᠨ ᠰᠢᠮᠡ ᠲᠡᠵᠢᠭᠡᠯ ᠦ᠋ᠨ ᠬᠡᠷᠡᠭᠴᠡᠭᠡ ᠶ᠋ᠢ ᠬᠠᠩᠭᠠᠵᠤ ᠳᠡᠶ᠋ᠢᠯᠬᠦ ᠪᠦᠭᠡᠳ ᠮᠠᠯ ᠲᠡᠵᠢᠭᠡᠬᠦ ᠥᠪᠡᠷ ᠦ᠋ᠨ ᠥᠷᠲᠡᠭ ᠢ᠋ ᠴᠤ᠌ ᠪᠠᠭᠠᠰᠠᠬᠵᠤ᠂ ᠦᠬᠡᠷ ᠪᠦᠷᠢ ᠳ᠋ᠤ ᠵᠢᠯ ᠤ᠋ᠨ 500 ᠲᠥᠭᠥᠷᠢᠭ ᠣᠷᠴᠢᠮ ᠦᠪᠡᠷ ᠤ᠋ᠨ ᠦᠷᠳᠡᠭ ᠢ᠋ ᠠᠷᠪᠢᠯᠠᠵᠤ ᠲᠠᠶ᠋ᠢᠯᠤᠨᠠ》 ᠭᠡᠵᠥ ᠶᠠᠷᠢᠵᠤ ᠪᠠᠢᠯᠠ᠃
ᠬᠥᠭᠡ ᠳᠠᠷᠤᠰᠢ ᠵᠢᠨ ᠡᠷᠳᠡᠨᠢ ᠰᠢᠰᠢ ᠲᠠᠷᠤᠰᠢᠭᠤᠯᠬᠤ ᠨᠢ ᠮᠦᠨ ᠴᠤ᠌ ᠵᠠᠩᠭᠢᠯᠠᠭᠠ ᠶ᠋ᠢᠨ ᠠᠵᠢᠯ ᠪᠤᠯᠤᠨᠠ᠃ ᠰᠤᠷᠪᠤᠯᠵᠢᠯᠠᠭᠴᠢ ᠡᠯᠡᠰᠥᠨ ᠪᠠᠯᠭᠠᠰᠤ ᠵᠢᠨ ᠪᠧᠪᠧ ᠭᠠᠴᠠᠭᠠᠨ ᠤ᠋ ᠮᠠᠯᠴᠢᠨ ᠢᠩᠭᠡᠷ ᠤ᠋ᠨ ᠳ᠋ᠤ ᠬᠦᠷᠪᠡᠯ᠂ ᠲᠤᠯᠤᠭᠠ ᠨᠠᠢ᠍ᠮᠠᠨ ᠲᠣᠰᠬᠣᠨ ᠤ᠋ ᠠᠷᠠᠳ ᠰᠠᠶᠢᠬᠠᠨ ᠬᠤᠷᠢᠶᠠᠭᠰᠠᠨ ᠬᠥᠭᠡ ᠳᠠᠷᠤᠰᠢ ᠶ᠋ᠢᠨ ᠡᠷᠳᠡᠨᠢ ᠰᠢᠰᠢ ᠶ᠋ᠢ ᠨᠢ ᠵᠣᠭᠣᠷᠢᠯᠠᠬᠤ ᠳ᠋ᠤ ᠬᠠᠪᠰᠤᠷᠴᠤ ᠪᠠᠢᠪᠠ᠃ ᠳᠡᠳᠡ ᠬᠡᠷᠴᠢᠭᠰᠡᠨ ᠬᠥᠭᠡ ᠳᠠᠷᠤᠰᠢ ᠶ᠋ᠢᠨ ᠡᠷᠳᠡᠨᠢ ᠰᠢᠰᠢ ᠶ᠋ᠢ ᠵᠤᠭᠤᠷᠢ ᠳ᠋ᠤ ᠨᠡᠮᠡᠬᠥ ᠵᠢᠨ ᠳᠠᠭᠠᠤ ᠬᠡᠪᠰᠢᠭᠥᠯᠵᠤ ᠳᠠᠷᠤᠰᠢᠭᠤᠯᠤᠨ᠂ ᠵᠣᠭᠣᠷᠢ ᠳᠦᠭᠦᠷᠦᠭᠰᠡᠨ ᠤ᠋ ᠳᠠᠷᠠᠭᠠ ᠰᠦᠯᠢᠶᠥᠦ ᠪᠦᠷᠬᠦᠪᠴᠢ ᠪᠡᠷ ᠨᠢᠭ᠍ᠲᠠ ᠪᠢᠲᠡᠭᠦᠮᠵᠢᠯᠡᠵᠦ᠂ ᠲᠠᠬᠢᠨ ᠨᠠᠷᠢᠨ ᠰᠢᠷᠣᠢ ᠪᠡᠷ ᠳᠠᠷᠤᠵᠤ ᠳᠠᠯᠪᠢᠵᠤ ᠪᠠᠢᠯᠠ᠃ ᠡᠨᠡ ᠪᠤᠯ ᠬᠦᠴᠢᠯᠲᠥ᠋ᠷᠥᠭᠴᠢ ᠥᠭᠡᠢᠳᠡᠭᠥᠯᠥᠨ ᠢᠰᠬᠡᠬᠦ ᠪᠡᠷ ᠳᠠᠮᠵᠢᠨ ᠰᠦᠯ ᠰᠠᠢᠲᠠᠢ ᠪᠣᠷᠳᠣᠭᠠ ᠪᠣᠯᠭᠠᠬᠤ ᠶᠠᠪᠤᠴᠠ ᠪᠣᠯᠣᠨᠠ᠃ ᠡᠢᠨ ᠬᠦ᠌ ᠢᠰᠬᠡᠭᠰᠡᠨ ᠬᠥᠭᠡ ᠳᠠᠷᠤᠰᠢ ᠨᠢ ᠢᠷᠡᠬᠦ ᠵᠢᠯ ᠦ᠋ᠨ ᠬᠠᠪᠤᠷ ᠪᠣᠯᠬᠤ ᠳ᠋ᠤ ᠮᠦᠨ ᠴᠤ᠌ ᠵᠥᠭᠡᠯᠡᠨ ᠰᠢᠭᠦᠰᠦᠯᠢᠭ ᠮᠥᠷᠳᠡᠭᠡᠨ ᠰᠢᠮᠡ ᠲᠡᠵᠢᠭᠡᠯ ᠰᠠᠢᠳᠠᠢ ᠪᠠᠢᠳᠠᠭ᠃ 《ᠮᠠᠨ ᠤ᠋ ᠬᠢ ᠡᠨᠡ ᠵᠢᠯ 30 ᠮᠦ᠍ ᠬᠥᠭᠡ ᠳᠠᠷᠤᠰᠢ ᠵᠢᠨ ᠡᠷᠳᠡᠨᠢ ᠰᠢᠰᠢ ᠲᠠᠷᠢᠵᠠᠢ᠃ ᠮᠦ᠍ ᠪᠦᠷᠢ ᠶ᠋ᠢᠨ ᠤᠨᠠᠯᠲᠠ ᠪᠠᠷᠤᠭ 5000 ᠵᠢᠩ ᠳ᠋ᠤ ᠬᠥᠷᠴᠥ᠂ ᠢᠷᠡᠬᠦ ᠬᠠᠪᠤᠷ ᠡᠭᠥᠨ ᠢ᠋ ᠪᠡᠨ ᠬᠠᠭᠤᠷᠠᠢ ᠡᠪᠡᠰᠦ ᠲᠠᠢ ᠬᠤᠯᠢᠵᠤ ᠲᠡᠵᠢᠭᠡᠪᠡᠯ ᠦᠬᠡᠷ ᠲᠠᠷᠭᠤ ᠠᠪᠬᠤ ᠨᠢ ᠲᠦᠷᠭᠡᠨ ᠪᠤᠯᠤᠨᠠ ᠳ᠋ᠸ！》 ᠭᠡᠵᠥ ᠢᠩᠭᠡᠷ ᠤᠷᠮᠠᠳᠠᠢ ᠶᠠᠷᠢᠨᠠ᠃