ᠡᠵᠡᠨ᠎ᠠ ᠬᠤᠰᠢᠭᠤᠨ᠎ᠤ  ᠪᠠᠶᠠᠨᠲᠤᠤᠷᠠᠢ ᠰᠤᠮᠤᠨ᠎ᠤ ᠵᠢᠷᠭᠠᠯᠠᠩᠲᠤ ᠭᠠᠴᠠᠭᠠᠨ᠎ᠤ ᠮᠠᠯᠴᠢᠨ ᠪᠠᠲᠤᠮᠦ᠋ᠩᠬᠡ᠎ᠶᠢᠨ ᠬᠢᠨ ᠰᠠᠷ᠎ᠠ ᠰᠢᠨ᠎ᠠ ᠪᠡᠷ ᠤᠨᠴᠠᠭᠠᠢ ᠶᠠᠭᠠᠷᠠᠤ ᠪᠠᠢᠯ᠎ᠠ᠃ ᠲᠡᠳᠡᠨ᠎ᠤ ᠬᠢ ᠰᠢᠨ᠎ᠠ᠎ᠶᠢᠨ ᠭᠡᠢᠴᠢᠨ ᠎ᠢᠶᠡᠨ ᠳᠠᠢᠯᠠᠬᠤ᠎ᠶᠢᠨ ᠵᠡᠷᠭᠡᠴᠡᠭᠡ ᠪᠠᠷ ᠲᠦᠯ᠎ᠢᠶᠡᠨ ᠲᠤᠰᠤᠭᠠᠳ ᠶᠠᠭᠠᠷᠠᠨ᠎ᠠ᠃ ᠡᠨᠡ ᠵᠢᠯ ᠡᠳᠡᠨ᠎ᠤ ᠬᠢ ᠤᠨᠴᠠᠭᠠᠢ ᠨᠢᠭᠡ ᠲᠦᠯ ᠲᠤᠰᠴᠤ ᠪᠠᠢᠭ᠎ᠠ ᠰᠠᠨ᠃

— ᠮᠠᠨ᠎ᠤ ᠬᠢ ᠡᠨᠡ ᠵᠢᠯ ᠳᠦᠷᠪᠡᠨ ᠡᠪᠡᠷ ᠲᠠᠢ ᠬᠤᠨᠢᠨ᠎ᠤ ᠬᠤᠷᠠᠭ᠎ᠠ ᠪᠠᠨ ᠲᠤᠰᠴᠤ ᠪᠤᠢ᠃ ᠤᠯᠠᠭᠠᠨ ᠬᠦᠷᠡᠩ ᠦᠩᠭᠡ ᠲᠠᠢ ᠬᠤᠷᠠᠭ᠎ᠠ ᠪᠤᠯ ᠳᠦᠷᠪᠡᠨ ᠡᠪᠡᠷ ᠲᠠᠢ ᠬᠤᠨᠢᠨ᠎ᠤ ᠬᠤᠷᠠᠭ᠎ᠠ ᠪᠤᠯᠤᠨ᠎ᠠ ᠭᠡᠵᠦ ᠪᠠᠲᠤᠮᠦ᠋ᠩᠬᠡ ᠰᠠᠶᠢᠬᠠᠨ ᠭᠠᠷᠤᠭᠰᠠᠨ ᠬᠤᠷᠠᠭ᠎ᠠ ᠪᠠᠨ ᠦᠬᠦᠭᠡᠷᠳᠦᠨ᠎ᠠ᠃

ᠪᠠᠲᠤᠮᠦ᠋ᠩᠬᠡ᠎ᠶᠢᠨ ᠬᠢᠨ ᠨᠢᠳᠦᠨᠤᠨ ᠵᠢᠯ ᠡᠴᠡ ᠡᠬᠢᠯᠡᠨ ᠳᠦᠷᠪᠡᠨ ᠡᠪᠡᠷ ᠲᠠᠢ ᠬᠤᠨᠢ ᠮᠠᠯᠵᠢᠵᠡᠢ᠃ ᠳᠦᠷᠪᠡᠨ ᠡᠪᠡᠷ ᠲᠠᠢ ᠬᠤᠨᠢ ᠵᠢ ᠤᠯᠠᠭᠠᠨ ᠬᠤᠨᠢ ᠭᠡᠳᠡᠭ᠃ ᠤᠭᠠᠯᠵᠠ ᠪᠠ ᠳᠦᠪᠡᠳ ᠬᠤᠨᠢ ᠡᠴᠡ ᠡᠷᠯᠢᠰᠡᠵᠢᠭᠦᠯᠦᠭᠰᠡᠨ ᠬᠤᠨᠢᠨ᠎ᠤ ᠡᠭᠦᠯᠳᠡᠷ ᠪᠤᠯᠤᠨ᠎ᠠ᠃ ᠤᠯᠠᠭᠠᠨ ᠬᠤᠨᠢᠨ᠎ᠤ  ᠪᠡᠶ᠎ᠠ ᠨᠢ ᠦᠨᠳᠦᠷ ᠲᠤᠮᠤ ᠪᠦᠭᠡᠳ ᠲᠠᠷᠭᠤ ᠰᠠᠢᠳᠠᠢ᠂ ᠦᠬᠡᠬᠦ ᠲᠤᠰᠤᠨ᠎ᠤ ᠴᠢᠨᠠᠷ ᠨᠢ ᠰᠠᠢᠨ᠂ ᠬᠦᠢᠲᠡᠨ᠎ᠳ᠋ᠤ ᠲᠡᠰᠪᠦᠷᠢᠳᠡᠢ ᠬᠤᠨᠢ ᠪᠤᠯᠤᠨ᠎ᠠ᠃

— ᠮᠠᠨ᠎ᠤ ᠬᠢ ᠡᠨᠡ ᠵᠢᠯ ᠳᠠᠯᠠ ᠭᠠᠷᠤᠢ ᠲᠦᠯ ᠲᠤᠰᠤᠨ᠎ᠠ᠃ ᠬᠤᠷᠢᠭᠠᠳ ᠨᠢ ᠳᠦᠷᠪᠡᠨ ᠡᠪᠡᠷ ᠲᠠᠢ ᠬᠤᠨᠢᠨ᠎ᠤ ᠬᠤᠷᠠᠭ᠎ᠠ ᠪᠤᠯᠤᠨ᠎ᠠ᠃ ᠤᠯᠠᠭᠠᠨ ᠬᠤᠨᠢ ᠪᠦᠷ ᠢᠬᠡᠷᠡᠯᠡᠳᠡᠭ ᠪᠦᠭᠡᠳ ᠬᠤᠷᠠᠭᠠᠨ᠎ᠤ  ᠪᠤᠢᠵᠢᠯᠳᠠ ᠲᠦᠷᠭᠡᠨ᠂ ᠲᠠᠷᠭᠤ ᠰᠠᠢᠳᠠᠢ᠂ ᠰᠡᠬᠦᠯ ᠨᠢ ᠵᠢᠵᠢᠭ᠂ ᠶᠠᠭ ᠤᠭᠠᠯᠵᠠ᠎ᠶᠢᠨ ᠤᠳᠤᠮ᠎ᠢᠶᠡᠨ ᠳᠠᠭᠤᠷᠢᠶᠠᠭᠰᠠᠨ᠃ ᠡᠷ᠎ᠠ ᠬᠤᠷᠠᠭ᠎ᠠ ᠨᠢ ᠳᠦᠷᠪᠡᠨ ᠡᠪᠡᠷ ᠲᠠᠢ ᠪᠠᠢᠳᠠᠭ᠃ ᠮᠠᠨ᠎ᠤ ᠨᠤᠲᠤᠭ᠎ᠤᠨ ᠬᠤᠨᠢ ᠵᠢ ᠪᠤᠳᠤᠪᠠᠯ ᠢᠯᠡᠬᠦᠦ 500 ᠲᠦᠭᠦᠷᠢᠭ᠎ᠤᠨ ᠠᠰᠢᠭ ᠤᠯᠳᠠᠭ᠃ ᠮᠠᠨ᠎ᠤ ᠬᠢ ᠠᠯᠲᠠᠨ ᠨᠠᠮᠤᠷ᠎ᠤᠨ ᠲᠤᠤᠷᠠᠢ᠎ᠶᠢᠨ ᠨᠠᠢᠷ᠎ᠢᠶᠡᠷ  ᠵᠢᠭᠤᠯᠴᠢᠯᠠᠭᠴᠢ ᠲᠤᠰᠳᠠᠭ᠃ ᠵᠢᠭᠤᠯᠴᠢᠯᠠᠭᠰᠠᠳ ᠳᠦᠷᠪᠡᠨ ᠡᠪᠡᠷ ᠲᠠᠢ ᠬᠤᠨᠢ ᠵᠢ ᠶᠡᠬᠡ ᠱᠤᠬᠤᠭᠠᠷᠬᠠᠵᠦ ᠰᠡᠭᠦᠳᠡᠷ ᠲᠠᠳᠠᠭᠠᠳ ᠶᠠᠪᠤᠳᠠᠭ ᠭᠡᠵᠦ ᠪᠠᠲᠤᠮᠦ᠋ᠩᠬᠡ ᠶᠠᠷᠢᠨ᠎ᠠ᠃

《ᠤᠷᠤᠯᠳᠤᠯᠭ᠎ᠠ ᠰᠠᠢᠲᠤ ᠤᠷᠤᠢ᠎ᠳᠤ ᠭᠠᠷᠤᠨ᠎ᠠ》ᠭᠡᠳᠡᠭ᠃ ᠪᠠᠲᠤᠮᠦ᠋ᠩᠬᠡ ᠴᠸ᠋ ᠮᠠᠯ ᠰᠦᠷᠦᠭ᠎ᠤᠨ ᠲᠤᠭ᠎ᠠ ᠵᠢ ᠪᠢᠰᠢ᠂ ᠡᠭᠦᠯᠳᠡᠷ᠎ᠢ ᠡᠷᠢᠯᠬᠢᠯᠡᠵᠦ ᠤᠷᠤᠯᠭ᠎ᠠ ᠪᠠᠨ ᠨᠡᠮᠡᠭᠳᠡᠬᠦᠯᠬᠦ ᠵᠢ ᠵᠤᠷᠢᠳᠠᠭ ᠬᠠᠰᠢᠷ ᠮᠠᠯᠴᠢᠨ ᠰᠠᠨ᠃ ᠲᠡᠳᠡᠨ᠎ᠤ ᠰᠦᠷᠦᠭ ᠲᠸ᠋ ᠰᠢᠨᠵᠢᠶᠠᠩ᠎ᠤᠨ ᠨᠠᠷᠢᠨ ᠨᠤᠤᠰᠤᠲᠤ ᠬᠤᠨᠢ᠂ ᠤᠯᠠᠭᠠᠨ ᠬᠤᠨᠢ᠂ ᠦᠵᠦᠮᠦᠴᠢᠨ ᠬᠤᠨᠢ ᠲᠠᠢ ᠪᠦᠭᠡᠳ ᠤᠷᠲᠤ ᠴᠢᠬᠢᠲᠤ ᠢᠮᠠᠭ᠎ᠠ ᠪᠤᠢ᠃

— ᠮᠠᠨ᠎ᠤ ᠬᠢ ᠳᠡᠭᠡᠷ᠎ᠠ ᠵᠠᠭᠤᠨ᠎ᠤ ᠶᠡᠷᠡᠭᠡᠳ ᠤᠨ ᠡᠴᠡ ᠦᠵᠦᠮᠦᠴᠢᠨ ᠬᠤᠨᠢ ᠮᠠᠯᠵᠢᠵᠦ ᠡᠬᠢᠯᠡᠭᠰᠡᠨ᠂ ᠳᠠᠷᠠᠭ᠎ᠠ ᠨᠢ ᠰᠢᠨᠵᠢᠶᠠᠩ ᠎ᠤᠨ ᠨᠠᠷᠢᠨ ᠨᠤᠤᠰᠤᠲᠤ ᠬᠤᠨᠢ ᠮᠠᠯᠵᠢᠭᠰᠠᠨ᠂ ᠤᠳᠤᠬᠠᠨ᠎ᠳᠤ ᠪᠠᠨ ᠭᠤᠤᠯᠳᠠᠭᠤ ᠤᠯᠠᠭᠠᠨ ᠬᠤᠨᠢ ᠮᠠᠯᠵᠢᠵᠦ ᠪᠤᠢ᠃ ᠤᠷᠲᠤ ᠴᠢᠬᠢᠲᠤ ᠢᠮᠠᠭ᠎ᠠ ᠵᠢ ᠪᠠᠰᠠ ᠨᠢᠳᠦᠨᠤᠨ ᠡᠴᠡ ᠬᠠᠷᠢᠭᠤᠯᠤᠭᠰᠠᠨ᠃ ᠤᠷᠲᠤ ᠴᠢᠬᠢᠲᠤ ᠢᠮᠠᠭ᠎ᠠ  ᠰᠦ ᠰᠠᠢᠲᠠᠢ᠂ ᠲᠠᠷᠭᠤ ᠰᠠᠢᠳᠠᠢ᠂ ᠢᠬᠡᠷ᠎ᠠ ᠲᠦᠯᠯᠡᠳᠡᠭ ᠪᠤᠯᠬᠤᠷ ᠦᠰᠬᠦ ᠨᠢ ᠬᠤᠷᠳᠤᠨ᠃ ᠨᠤᠲᠤᠭ᠎ᠤᠨ ᠢᠮᠠᠭ᠎ᠠ ᠵᠢ ᠪᠤᠳᠤᠪᠠᠯ ᠮᠢᠬᠠᠨ᠎ᠤ  ᠭᠠᠷᠤᠯᠳᠠ 30 ᠵᠢᠩ ᠢᠯᠡᠬᠦᠦ  ᠪᠤᠯᠬᠤᠷ ᠤᠷᠤᠯᠭ᠎ᠠ  ᠴᠸ᠋ ᠰᠠᠢᠨ ᠪᠠᠢᠳᠠᠭ᠂ ᠡᠨᠡ ᠵᠢᠯ ᠡᠴᠡ ᠪᠠᠰᠠ ᠬᠤᠨᠢᠨ ᠲᠡᠮᠡᠭᠡ ᠮᠠᠯᠵᠢᠬᠤ ᠰᠠᠨᠠᠭ᠎ᠠ ᠲᠠᠢ ᠭᠡᠵᠦ ᠪᠠᠲᠤᠮᠦ᠋ᠩᠬᠡ ᠮᠠᠯ᠎ᠢᠶᠡᠨ ᠡᠪᠡᠰᠦᠯᠡᠨ᠎ᠠ᠃

ᠳᠦᠷᠪᠡᠨ ᠡᠪᠡᠷ ᠲᠠᠢ ᠬᠤᠨᠢ᠂ ᠳᠦᠷᠪᠡᠨ ᠡᠭᠦᠯᠳᠡᠷ᠎ᠤᠨ ᠰᠦᠷᠦᠭ ᠲᠠᠢ ᠪᠠᠲᠤᠮᠦ᠋ᠩᠬᠡ᠎ᠶᠢᠨ ᠬᠤᠳᠠᠨ ᠡᠴᠡ ᠬᠠᠪᠤᠷ ᠴᠠᠭ᠎ᠤᠨ ᠠᠮᠢᠵᠢᠷᠠᠯ ᠤᠶᠠᠩᠭᠠᠷᠠᠨ᠎ᠠ᠃